The Phnom Penh Post Search

Search form




Logo of Phnom Penh Post newspaper Phnom Penh Post - សកម្មជន​ថា មាន​ការឈូស​ដីព្រៃ​នៅ​ដែនជម្រក​សត្វព្រៃ​ភ្នំ​ណាមលៀរ




សកម្មជន​ថា មាន​ការឈូស​ដីព្រៃ​នៅ​ដែនជម្រក​សត្វព្រៃ​ភ្នំ​ណាមលៀរ

Content image - Phnom Penh Post
ការឈូសឆាយ​ទន្ទ្រាន​ដីព្រៃ​នៅ​តំបន់​ស្នូល​នៃ​ដែនជម្រក​សត្វព្រៃ​ភ្នំណាមលៀរ​។ រូបថត សហគមន៍

សកម្មជន​ថា មាន​ការឈូស​ដីព្រៃ​នៅ​ដែនជម្រក​សត្វព្រៃ​ភ្នំ​ណាមលៀរ

មណ្ឌលគីរីៈ សកម្មជន​ការពារ​ព្រៃឈើ​នៅ​ខេត្ត​មណ្ឌលគិរី​បាន​អះអាងថា ខាង​សហគមន៍​បាន​ប្រទះឃើញ​សកម្មភាព​ឈូសឆាយ​ទន្ទ្រាន​ដីព្រៃ​ស្ថិត​ក្នុង​តំបន់​ស្នូល​នៃ​ដែនជម្រក​សត្វព្រៃ​ភ្នំ​ណាមលៀរ​ហើយ​មន្ត្រី​បរិស្ថាន​និយាយថា ពួកគេ​នឹង​ចុះទៅ​ពិនិត្យ​ទីតាំង​នោះ​។

លោក គ្រើង តុលា សកម្មជន​ការពារ​ព្រៃឈើ និង​ជា​ជនជាតិ​ដើម​ភាគតិច​ព្នង​បាន​ប្រាប់​ភ្នំពេញប៉ុស្ដិ៍​នៅ​ថ្ងៃទី​ ១០ ​ឧសភា ​ថា កាលពី​ថ្ងៃ​ទី​ ៩ ខែ​ឧសភា ក្រុម​សហគមន៍​ប្រហែល​ ២០ ​នាក់​ បាន​ប្រទះឃើញ​សកម្មភាព​ឈូសឆាយ​ដី​ព្រៃ​អស់​ជាង​ ១០០ ​ហិកតា​ ស្ថិត​ក្នុង​ចំណុច​ទួលស្វាយ ភូមិ​ពូរលេះ ឃុំ​ដាក់ដាំ ស្រុក​អូររាំង​ដែល​គេ​ដឹងថា ជា​តំបន់​ស្នូល​នៃ​ដែនជម្រក​សត្វព្រៃ​ភ្នំ​ណាមលៀរ ដែល​សម្បូរ​ទៅ​ដោយ​ឈើ​ធំៗ និង​សត្វព្រៃ​រស់នៅ​។

លោក​ថា​៖ «​កន្លែង​ដែល​មាន​ការឈូសឆាយ​ហ្នឹង​គឺមាន​ដើមឈើ​ច្រើន​មែនទែន​ហើយ​ធំៗ​ទៀត​ដែល​ខ្លះ​អាច​ចាប់​ឱប​ពី​ ៣ ​នាក់​ ទៅដល់ ៤ ​នាក់ និង​ជា​តំបន់​មាន​ដុះ​រុក្ខជាតិ​ដ៏កម្រ​បំផុត​ក្នុង​ពិភពលោក​គឺ​សន្លឹក​ព្យាប់​។ គេ​ឈូសឆាយ​រហូត​មក​ដល់​ថ្ងៃ​ហ្នឹង គឺ​អស់​រយៈពេល​ប្រហែល​ ១ ​សប្ដាហ៍​មកហើយ​។ ដោយសារ​ពលរដ្ឋ​មិនមាន​ជំនាញ​ក្នុងការ​ចុច GPS​។ អ៊ីចឹង​យើង​អត់ដឹង​ថា តើ​ដី​ហ្នឹង​ស្ថិត​ក្នុង​ប្លង់​របស់​ឯកជន ឬ​ក្រៅ​ប្លង់​ឯកជន​ទេ​ប៉ុន្តែ​គ្រាន់តែ​ដឹងថា ជា​តំបន់​សម្បូរ​សត្វព្រៃ និង​ព្រៃឈើ យើង​ដឹង​តែ​ប៉ុណ្ណឹង​ទេ​»​។

សកម្មជន​រូបនេះ​បន្តថា តាម​ការសាកសួរ​មេ​ការមើល​ការខុសត្រូវ​នៅ​កន្លែង​ឈូសឆាយ​បាន​ប្រាប់​ក្រុម​ពលរដ្ឋ​ថា ពួកគេ​បាន​ឈូសឆាយ​ដីព្រៃ​ទាំងនោះ​ដើម្បីឱ្យ​ក្រុមហ៊ុន​មេកាហ្វើស​។ លោក​បន្តថា ក្រុមហ៊ុន​នេះ​ទទួល​បាន​ដី​សម្បទាន​សេដ្ឋកិច្ច​ចំនួន​ ៩ ០០០ ​ហិកតា​ កាលពី​ឆ្នាំ​ ២០១៤ ប៉ុន្តែ​ចុងក្រោយ​បាន​អះអាង​ថា នៅសល់​តែ​ចំនួន​ ៦ ០០០ ​ហិកតា​ប៉ុណ្ណោះ​។

លោក តុលា បញ្ជាក់​ថា ការផ្ដល់​ដីសម្បទាន​ដល់​ក្រុមហ៊ុន​នេះ​គឺ​ផ្ទុយ​ទៅ​នឹង​ប្រសាសន៍​របស់លោក​នាយក​រដ្ឋមន្ត្រី​ ហ៊ុន សែន កាលពី​ឆ្នាំ​ ២០១២ ដែល​បាន​បញ្ជា​ឱ្យ​ឈប់​ផ្ដល់​ដីសម្បទាន​សេដ្ឋកិច្ច​តទៅទៀត​។

លោក​ តុលា បាន​បន្ថែមថា ករណី​ឈូសឆាយ​ដីព្រៃ​នេះ​គឺ​លោក​មិន​ហ៊ាន​រាយការណ៍​ទៅ​លោក វុធ សារុំ ប្រធាន​ដែនជម្រក​សត្វព្រៃ​ភ្នំ​ណាមលៀរ​នោះទេ ដោយសារ​ការរាយការណ៍​កន្លងទៅ លោក​ទទួល​បាន​ការព្រមាន​ប្ដឹង​ទៅ​តុលាការ​ត្រឡប់មកវិញ​។

ប៉ុន្តែ​យ៉ាងណា​លោក តុលា បញ្ជាក់​ថា​លោក​បាន​រាយការណ៍​អំពី​ករណីនេះ​តាម​ហ្វេសប៊ុក​ទៅ Messager លោក ហ៊ុន សែន និង​លោក​ សាយ សំអាល់ រដ្ឋមន្ត្រី​ក្រសួង​បរិស្ថាន​រួចហើយ ដើម្បី​ស្នើសុំ​ឱ្យមាន​កិច្ច​អន្តរាគមន៍​បញ្ឈប់​សកម្មភាព​បំផ្លាញ​ដីព្រៃ​នេះ​។

លោក​ថា​៖ «​ម្សិលមិញ​បណ្ដាញ​របស់ខ្ញុំ គាត់​ទៅ​សួរ​ខាង​មេការ​ឈូសឆាយ​ហ្នឹង ថា​តើ​អ្នកឯង​ឈូសឆាយ​បាន​លិខិត​ស្នាម​អត់ ហើយ​មាន​ការអនុញ្ញាត​ពី​ខាង​ណា​អត់ ហើយ​គាត់​បាន​ប្រាប់​ទាំងអស់​។ អ្វីដែល​ប្រជាពលរដ្ឋ​បានឃើញ​ការឈូសឆាយ​ហ្នឹង​គឺ​មាន​គ្រឿងចក្រ​ចំនួន​ ៣ ​គ្រឿង ហើយ​មាន​ប៉ូលិស ប៉េអឹម និង​ទាហាន​ជា​អ្នក​យាមផ្លូវ​»​។

កាលពី​ថ្ងៃ​ម្សិលមិញ ភ្នំពេញប៉ុស្ដិ៍​មិនអាច​សុំ​ការអត្ថាធិប្បាយ​ពី​តំណាង​ក្រុមហ៊ុន​មេហ្កាហ្វើស​ឈ្មោះ​ថែប​បាន​ទេ ដោយសារ​លេខ​ទូរស័ព្ទ​មិនអាច​ទាក់ទង​បាន​។ ប៉ុន្តែ​លោក ចាស់ ណា មេឃុំ​ដាក់​ដាំ​បាន​បញ្ជាក់ថា លោក​មិន​បានដឹង​អំពី​ការឈូសឆាយ​ដីព្រៃ​នេះ​ទេ​។ យ៉ាងណាក្តី​លោក​ថា អាច​ជា​ការឈូសឆាយ​ដើម្បី​ធ្វើ​ផ្លូវ​ប៉ុណ្ណោះ និង​ថា​ដែនជម្រក​សត្វព្រៃ​ភ្នំ​ណាមលៀរ​មិន​ស្ថិត​ក្នុង​ឃុំ​ដាក់​ដាំ​ឡើយ​។

ចំណែក​លោក សៀក មុន្នី អភិបាលស្រុក​អូររាំង​បញ្ជាក់​ថា ខេត្ត​មិនមាន​គម្រោង​ធ្វើ​ផ្លូវ​នៅក្នុង​ដែនជម្រក​សត្វព្រៃ​ភ្នំ​ណាមលៀរ​ឡើយ ប៉ុន្តែ​ការឈូសឆាយ​ធ្វើ​ផ្លូវ​នោះ​អាច​ស្ថិត​ក្នុង​ទីតាំង​របស់​ក្រុមហ៊ុន​ប៉ុណ្ណោះ​។

ជាមួយ​គ្នា​នេះ​លោក សៀក មុន្នី បញ្ជាក់​ទៀត​ថា ក្រុមហ៊ុន​មេហ្កាហ្វើស គឺ​ទទួល​បាន​ដី​សម្បទាន​សេដ្ឋកិច្ច​ពី​រដ្ឋាភិបាល គឺ​មុនពេល​មាន​ការប្រកាស​របស់​លោក ហ៊ុន សែន នៅក្នុង​ឆ្នាំ ២០១២ ​ទៅ​ទៀត ប៉ុន្តែ​ក្រុមហ៊ុន​នេះ​ទើប​ចូលទៅ​ធ្វើ​សកម្មភាព​រួមទាំង​សិក្សា​ពី​ផលប៉ះពាល់​ចាប់ពី​ឆ្នាំ​ ២០១៤ ​ប៉ុណ្ណោះ​។

លោក​ថា​៖ «​គេ​ (​រដ្ឋាភិបាល​) ​គេ​ឱ្យ​យូរហើយ​ប៉ុន្តែ​គាត់​ (​ក្រុមហ៊ុន​) ​ទើប​ចុះ​សិក្សា​ក្រោយនេះ​។ កន្លែង​ខ្លះ​គាត់​ (​លោក តុលា​) ​មិន​ច្បាស់ និង​ចេះតែ​ថា គេ​មិន​ធ្វើ​អី​ឱ្យ​ល្មើសច្បាប់ ព្រោះ​មិនមែន​មាន​តែ​លោក​ តុលា ​មួយ​ទេ គឺ​មាន​អង្គការ​ផ្សេងៗ​ជាច្រើន​ណាស់​តាម​ចាំ​ឃ្លាំមើល​»​។

លោក កែវ សុភ័ក្រ ប្រធាន​មន្ទីរ​បរិស្ថាន​ខេត្តមណ្ឌលគិរី​ថ្លែងថា លោក​នឹង​ចាត់​មន្ត្រី​បរិស្ថាន​ឱ្យ​ចុះ​ស្រាវជ្រាវ​អំពី​ការលើកឡើង​ដែល​ថា មាន​ការឈូសឆាយ​នៅក្នុង​ដែនជម្រក​សត្វព្រៃ​ភ្នំ​ណាមលៀរ​នេះ​។

លោក​ថា​៖ «​ដោយសារ​នៅ​ថ្ងៃ​ចន្ទ​នេះ ទើប​ខ្ញុំ​មាន​ប្រជុំ​ផ្ទៃក្នុង​។ អ៊ីចឹង​!​ប្រហែល​នៅ​ថ្ងៃ​អង្គារ​បាន​ខ្ញុំ​បញ្ជូន​ក្រុមការងារ​មន្ទីរ​ឱ្យ​ចុះទៅ​ត្រួតពិនិត្យ​ព័ត៌មាន ដោយ​មាន​អនុប្រធាន​មន្ទីរ​ខ្ញុំ​ម្នាក់​ចូលរួម​ដឹកនាំ​ក្រុមការងារ​ហ្នឹង ដើម្បី​ផ្ទៀងផ្ទាត់​មើល ថា​តើ​ការ​ឈូសឆាយ និង​កាប់រាន​នោះ​ស្ថិត​នៅក្នុង​ដែនជម្រក​សត្វព្រៃ​ភ្នំ​ណាមលៀរ​ ឬ​មួយ​នៅក្នុង​ក្រុមហ៊ុន​»៕

អត្ថបទគួរចាប់អារម្មណ៍