.jpg)
ដើមច្បោះជ័រទឹករបស់សហគមន៍ព្រៃឈើក្នុងខេត្តព្រះវិហាររងការកាប់បំផ្លាញ។ រូបថត សហគមន៍
កំពង់ធំ/ព្រះវិហារៈ សកម្មជនការពារព្រៃឈើ និងបរិស្ថានកាលពីម្សិលមិញសម្ដែងក្ដីបារម្ភជុំវិញការកើនឡើងនៃការកាប់បំផ្លាញព្រៃឈើនៅតែបន្តកើតមានឡើងជារៀងរាល់ថ្ងៃ ព្រោះតែមិនមានការទប់ស្កាត់ និងការបង្ក្រាបឲ្យបានទាន់ពេលវេលាក្នុងខេត្តទាំង ២។
ខណៈនៅក្នុងខែកក្កដានេះដើមច្បោះជ័រទឹកចំនួន ៦៦ ដើមរបស់សហគមន៍នៅភូមិស្រទ្បៅទោង ឃុំពោធិ៍ ស្រុកត្បែងមានជ័យ ខេត្តព្រះវិហារត្រូវបានកាប់បំផ្លាញយ៉ាងអនាធិបតេយ្យ។
លោក ពេជ្រ ពាន់ ប្រធានបណ្តាញសហគមន៍ព្រៃព្រះរកា ខេត្តព្រះវិហារ (PFCN) កាលពីម្សិលមិញបានអះអាងថាជនល្មើសបានកាប់ដើមច្បោះជ័រទឹកចំនួន ៦៦ ដើមរបស់សហគមន៍ស្ថិតនៅក្នុងតំបន់អូរដាច់កន្ទបព្រៃព្រះរកា។ លើសពីនេះប្រភេទដើមឈើធំផ្សេងៗទៀតក៏កំពុងរងការកាប់បំផ្លាញជាហូរហែក្នុងអំឡុងពេលដំណើរការបោះឆ្នោតនេះ។
លោក ពាន់ ថ្លែងថាមួយរយៈចុងក្រោយនេះក្រុមហ៊ុនដែលទទួលបានដីសម្បទានសេដ្ឋកិច្ចមិនសូវមានសកម្មភាពកាប់បំផ្លាញព្រៃឈើដូចកាលពីមុនទេ ប៉ុន្ដែមានការកើនឡើងចំពោះពលរដ្ឋចំណាកស្រុកពីខេត្តផ្សេង បាននាំគ្នាកាប់ព្រៃឈើនៅក្នុងតំបន់នេះជាបន្តបន្ទាប់ ដោយគ្មានការទប់ស្កាត់ និងបង្ក្រាបឡើយ។
លោក ពាន់ បានថ្លែងថា៖ «ឥឡូវនេះក្រុមហ៊ុនមិនសូវមានសកម្មភាពកាប់ព្រៃឈើទេ ប៉ុន្ដែសហគមន៍យើងព្រួយបារម្ភខ្លាំង ចំពោះជនល្មើសដែលចំណាកស្រុកពីខេត្តផ្សេងៗ ហើយមកកាប់ព្រៃឈើយកទៅលក់ឲ្យក្រុមហ៊ុនវិញ។ ជាក់ស្ដែងដូចជាដើមច្បោះជ័រទឹកចំនួន ៦៦ ដើមរបស់សហគមន៍ត្រូវគេកាប់នេះគឺធ្វើឲ្យពលរដ្ឋក្នុងភូមិបាត់បង់ចំណូលជាច្រើនពីដើមច្បោះជ័រទឹកទាំងនេះ»។
លោក ហឿង សុភាព អ្នកសម្របសម្រួលបណ្ដាញសហគមន៍ព្រៃឡង់ខេត្តកំពង់ធំបានឲ្យដឹងកាលពីម្សិលមិញដែរថា ក្រុមបណ្ដាញសហគមន៍ព្រៃឡង់មកពីឃុំដងកាំបិត ឃុំសណ្ដាន់ ស្រុកសណ្ដាន់ ខេត្តកំពង់ធំ បានធ្វើការចុះល្បាតព្រៃដោយមានការសហការ និងចូលរួមពីមន្រី្តឧទ្យានុរក្សនៃក្រសួងបរិស្ថានសរុបចំនួន ១៥ នាក់ និងម៉ូតូចំនួន ១៥ គ្រឿងចាប់ពីថ្ងៃទី ១៥ ដល់ថ្ងៃទី ១៧ កក្កដា នេះសកម្មភាពនៃការចុះល្បាតបានជួបឧបសគ្គជាច្រើន ប៉ុន្តែបានរកឃើញម៉ាស៊ីនរណារយន្តចំនួន ៤ គ្រឿង និងផ្លែរណារចំនួន ២ និងឈើដែលអាររួចប្រហែល ១ ម៉ែត្រគុប តែមិនអាចចេញបាននៅចំណុចច្រកតោល និងអូរឆ្នូរបានយកវត្ថុតាងទាំងនោះប្រគល់ឲ្យទៅមន្ត្រីឧទ្យានុរក្សក្រុមចល័តដើម្បីរក្សាទុក និងចាត់ចែងតាមនីតិវិធីច្បាប់។
លោកថ្លែងថា៖ «មន្ត្រីយាមតាមច្រកចេញមួយចំនួនហាក់មិនសូវយកចិត្តទុកដាក់ការពារព្រៃឈើទេ ហើយមួយចំនួនទៀតបានឃុបឃិតគ្នាបើកដៃឲ្យឈ្មួញចូលកាប់ព្រៃដោយរលូន។ ខ្ញុំសូមសំណូមពរមន្ត្រីពាក់ព័ន្ធជួយពង្រឹងការការពារព្រៃឈើទាំងនេះ ព្រោះមើលទៅព្រៃឈើយើងនៅសេសសល់ប្រហែលជាង ៣០ ភាគរយប៉ុណ្ណោះ»។
លោក ឡោ ច័ន្ធ មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកខេត្តព្រះវិហារ (ADHOC) បានឲ្យដឹងថា ករណីនៃការកាប់បំផ្លាញព្រៃឈើនាបច្ចុប្បន្ននេះមិនមានការថមថយទេ គឺនៅបន្តកាប់បំផ្លាញជាហូរហែរៀងរាល់ថ្ងៃដោយមិនមានការរំខានពីសមត្ថកិច្ចទេ។
លោក សៅ សុភាព អ្នកនាំពាក្យក្រសួងបរិស្ថាន និងលោក សុង ច័ន្ធសុជាតិ ប្រធានមន្ទីរបរិស្ថានខេត្តព្រះវិហារកាលពីម្សិលមិញមិនអាចទាក់ទងសុំអត្ថាធិប្បាយបានទេ។
លោក ជិន មនោរិទ្ធ នាយករងដែនជម្រកសត្វព្រៃប្រចាំនៅតំបន់ព្រៃឡង់បានអះអាងថាបច្ចុប្បន្ននេះសកម្មភាពការបំផ្លាញព្រៃឈើមានសភាពស្ងប់ស្ងាត់ ហើយប្រជាពលរដ្ឋនាំគ្នាត្រៀមលក្ខណៈ ដើម្បីទៅបោះឆ្នោតជ្រើសតាំងតំណាងរាស្ត្រក្នុងខែនេះ៕
