មណ្ឌលគិរី: សកម្មជនការពារបរិស្ថាន និងព្រៃឈើ លោក គ្រើង តុលា គ្រោងដាក់ពាក្យបណ្ដឹងទៅសាលាឧទ្ធរណ៍ បន្ទាប់ពីសាលាដំបូងខេត្តមណ្ឌលគិរីបានសម្រេចកាលថ្ងៃទី ១៩ ខែមករាឆ្នាំនេះឱ្យលោកផ្ដល់សំណង ៤០ លានរៀលទៅលោក សៀក មុន្នី អភិបាលស្រុកអូររាំងពាក់ព័ន្ធនឹងបទបរិហារកេរ្តិ៍ជាសាធារណៈ។
ការសម្រេចរបស់សាលាដំបូងខេត្តនេះ បន្ទាប់ពីលោក សៀក មុន្នី បានប្ដឹងលោក គ្រើង តុលា ករណីសរសេរសារលើហ្វេសប៊ុកកាលពីចុងខែមករា ឆ្នាំ ២០២០ ថា លោក សៀក មុន្នី មានពាក់ព័ន្ធនឹងការរំលោភយកដីព្រៃអភិរក្ស ៣០០ ហិកតា នៅសង្កាត់សុខដុម ក្រុងសែនមនោរម្យ ខេត្តមណ្ឌលគិរី។
លោក គ្រើង តុលា បានថ្លែងពីម្សិលមិញថា លោកមិនពេញចិត្តនឹងសាលក្រមដែលបង្គាប់ឱ្យលោកផ្ដល់សំណងទៅលោក សៀក មុន្នី ចំនួន ៤០ លានរៀល និងបង់ប្រាក់ចូលរដ្ឋចំនួន ៤ លានរៀលទេ។ សំណុំរឿងនេះលោកកំពុងរៀបចំប្ដឹងទៅសាលាឧទ្ធរណ៍។
លោកបន្តថា លោកបានទទួលដំណឹងពីពលរដ្ឋក្នុងតំបន់ខាងលើនេះថា លោក សៀក មុន្នី ពិតជាបានជាប់ពាក់ព័ន្ធការឈូសឆាយដីព្រៃចំនួន ៣០០ ហិកតា និងបានឃុបឃិត ជាមួយមន្ត្រីមួយចំនួនទៀតរំលោភយកដីព្រៃរបស់រដ្ឋធ្វើជាកម្មសិទ្ធិខុសច្បាប់។
លោក គ្រើង តុលា បញ្ជាក់ថា៖ «ខ្ញុំគិតថា ចៅក្រម និងព្រះរាជអាជ្ញាតុលាការខេត្តមណ្ឌលគិរីកាត់ក្ដី ដោយមិនបានស្រាវជ្រាវ ឬស៊ើបអង្កេតរឿងក្ដីឱ្យបានស៊ីជម្រៅទេ...ខ្ញុំជាអ្នកការពារដីរដ្ឋ ទ្រព្យសម្បត្តិរបស់រដ្ឋ បែរជាខ្ញុំជាអ្នកមានទោសទៅវិញ ខ្ញុំកំពុងរៀបចំដាក់ពាក្យប្ដឹងជំទាស់ទៅសាលាឧទ្ធរណ៍ ប៉ុន្ដែខ្ញុំមិនទាន់អាចបញ្ជាក់ពីពេលវេលាទេ»។
លោក សៀក មុន្នី អភិបាលស្រុកអូររាំងកាលពីម្សិលមិញ មិនអាចសុំការបញ្ជាក់ពីករណីនេះបានទេ ដោយសារទូរស័ព្ទលោកមិនអាចទាក់ទងបាន។
ប៉ុន្តែនៅក្នុងសម្រង់សាលក្រមនោះ លោក សាន សុផា មេធាវី តំណាងឱ្យលោក សៀក មុន្នី បានសន្និដ្ឋានថាជនជាប់ចោទពិតជាបានប្រព្រឹត្តអំពើបរិហារកេរ្តិ៍ជាសាធារណៈមែន ដោយសារមិនបានបង្ហាញភ័ស្តុតាងច្បាស់លាស់ពីចំនួនទឹកប្រាក់ ដែលថាមានប្រព្រឹត្តអំពើពុករលួយ ឬគ្មានលិខិតណាដែលបញ្ជាក់ថា លោក សៀក មុន្នី មានដី ៣០០ ហិកតា។
លោកបន្តថា ជនជាប់ចោទបានអានសេចក្ដីបំភ្លឺរបស់រដ្ឋបាលស្រុកអូររាំងរួចហើយ ប៉ុន្ដែនៅតែមិនទទួលស្គាល់ និងនៅតែថា ការប្រព្រឹត្តរបស់ខ្លួនត្រឹមត្រូវ។ លោកស្នើសុំឱ្យតុលាការផ្តន្ទាទោសជនជាប់ចោទតាមច្បាប់ និងសុំទាមទារសំណងជំងឺចិត្តចំនួន ២០ ម៉ឺនដុល្លារអាមេរិក។
តាមសាលក្រមរបស់លោក លី លីបម៉េង ចៅក្រមជំនុំជម្រះនៃសាលាដំបូងខេត្តមណ្ឌលគិរីចុះថ្ងៃទី ១៩ ខែមករា ដែលភ្នំពេញប៉ុស្ដិ៍ទទួលបានពីម្សិលមិញ បានផ្តន្ទាទោស ឈ្មោះ គ្រើង តុលា ភេទប្រុស អាយុ ៣០ ឆ្នាំ ជនជាតិព្នង ពិន័យជាប្រាក់ចំនួន ៤ លានរៀលចូលថវិការដ្ឋ ក្រោមបទចោទ «បរិហារកេរ្តិ៍ជាសាធារណៈ» ប្រព្រឹត្តនៅខេត្តមណ្ឌលគិរីពីថ្ងៃទី ៣១ ខែមករា ឆ្នាំ ២០២០ តាមបញ្ញត្តិមាត្រា ៣០៤ នៃក្រមព្រហ្មទណ្ឌ។
ជាមួយគ្នានេះ សាលក្រមបានបង្គាប់ឱ្យលោក គ្រើង តុលា សងសំណងជំងឺចិត្តទៅដើមបណ្ដឹងឈ្មោះ សៀក មុន្នី ចំនួន ៤០ លានរៀល រីឯការទាមទារលើសពីនេះត្រូវបដិសេធចោល តែបើកសិទ្ធិប្ដឹងជំទាស់ និងប្ដឹងឧទ្ធរណ៍តាមកំណត់ច្បាប់។ សំណុំរឿងនេះ ជំនុំជម្រះជាសាធារណៈនៅថ្ងៃទី ១៧ ខែធ្នូ ឆ្នាំ ២០២០ នៅចំពោះមុខជនជាប់ចោទឈ្មោះ គ្រើង តុលា និងកំបាំងមុខដើមបណ្ដឹង ឈ្មោះ សៀក មុន្នី។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានថ្លែងពីម្សិលមិញថា ខេត្តមណ្ឌលគិរីត្រូវបានគេមើលឃើញមានទំនាស់ដីធ្លី និងការរំលោភយកដីរដ្ឋច្រើនករណី។ ថ្មីៗកន្លងទៅនេះ ក្រសួងមហាផ្ទៃ ក្រសួងបរិស្ថាន និងក្រសួងពាក់ព័ន្ធផ្សេងទៀត បានស្រាវជ្រាវរកឃើញអ្នកពាក់ព័ន្ធជាបន្តបន្ទាប់ក្នុងនោះក៏មានមន្ត្រីជាន់ខ្ពស់ផងដែរ។
លោកបន្តថា ករណីនេះត្រូវតែស៊ើបអង្កេតឱ្យបានស៊ីជម្រៅ ព្រោះសេចក្ដីរាយការណ៍ពីពលរដ្ឋភាគច្រើនគឺជារឿងពិត ដោយសារពួកគាត់រស់នៅក្នុងមូលដ្ឋានផ្ទាល់។
លោក ប៊ុណ្ណារ៍ បានបញ្ជាក់ថា៖ «លោកព្រះរាជអាជ្ញា និងចៅក្រមតុលាការ ត្រូវតែស៊ើបអង្កេតឱ្យបានច្បាស់លាស់ មុននឹងធ្វើការសម្រេចណាមួយ បើមិនអ៊ីចឹងទេ គឺប៉ះពាល់ដល់សិទ្ធិ និងយុត្តិធម៌ជនដែលស្មោះត្រង់ការពារប្រយោជន៍ជាតិ។ ខ្ញុំគិតថា លោក តុលា គួរស្វែងរកភ័ស្តុតាងបន្ថែមដើម្បីដោះបន្ទុក និងប្ដឹងទៅសាលាឧទ្ធរណ៍បន្តទៀត»៕