.jpg)
លោក ជា ហ៊ាន (ស្តាំរូបទី ២) ពេលបង្ក្រាបបទល្មើសព្រៃឈើជាមួយសមត្ថកិច្ចថ្ងៃទី ១៨ កុម្ភៈនៅជួរភ្នំក្រវាញ។ រូប ហ្វេសប៊ុក
កំពង់ស្ពឺៈ មន្ត្រីសង្គមស៊ីវិលដែលធ្វើការផ្នែកប្រយុទ្ធប្រឆាំងការបំផ្លាញធនធានធម្មជាតិគ្រោងស្នើសុំកម្លាំងប្រដាប់អាវុធចម្រុះរួមគ្នាចុះបង្ក្រាបមិនឲ្យដឹងមុនលើទីតាំងកាប់ព្រៃឈើ និងរោងសិប្បកម្មអារឈើខុសច្បាប់នៅតំបន់ជួរភ្នំរមាំងស និងជួរភ្នំក្រវាញកណ្តាលនៅឃុំតាសាល ស្រុកឱរ៉ាល់ ខេត្តកំពង់ស្ពឺ ដោយអះអាងថាមន្ត្រីមូលដ្ឋានមិនអើពើចុះបង្ក្រាប ខណៈមន្ត្រីបដិសេធមានបទល្មើសព្រៃឈើ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋ (ACNCIPO) បានថ្លែងថា បទល្មើសព្រៃឈើនៅតំបន់ជួរភ្នំក្រវាញកណ្ដាល និងជួរភ្នំក្រវាញខាងត្បូងនៅតែបន្តមានការកាប់ឈើជាហូរហែដោយគ្មានខ្លាចញញើតច្បាប់ ហើយក៏គ្មានអាជ្ញាធរមូលដ្ឋានចុះបង្ក្រាបដែរ។ ជនល្មើសបានប្រើប្រាស់ម៉ាស៊ីន អារឈើប្រភេទរ៉ៃសម្រាប់អារនៅក្នុងព្រៃនោះតែម្ដង។ ក្រោយពីអារច្រៀកជាបន្ទះក្ដាររួចហើយ ពួកគេបានដឹកជញ្ជូនចេញពីព្រៃទៅតាមស្រុកស្រែអំបិល ខេត្តកោះកុងយ៉ាងរលូនដោយគ្មានរំខានសមត្ថកិច្ចនៅតំបន់នោះទេ។
លោក ជា ហ៊ាន បានឲ្យដឹងថាកាលពីសប្ដាហ៍មុនលោកបានចុះទៅដល់ទីតាំងនោះផ្ទាល់ ដោយពិនិត្យឃើញថា ដើមឈើដែលត្រូវបានកាប់សម្រាប់ត្រៀមអារច្រៀកជាបន្ទះក្ដារនោះប្រហែលជិត ៤០ ម៉ែត្រគុបដាក់គរជាគំនរនៅក្បែររោងម៉ាស៊ីនអារ ១ កន្លែងក្នុងតំបន់ ជួរភ្នំក្រវាញខាងត្បូង។ កន្លងមករោងម៉ាស៊ីនអារឈើនេះធ្លាប់ត្រូវបានបង្ក្រាបម្ដងរួចមកហើយ ប៉ុន្ដែពេលនេះជនល្មើសនៅតែបន្តធ្វើអាជីវកម្មកាប់អារឈើដដែល។
លោកបញ្ជាក់ថា៖ «ខ្ញុំគ្រោងចុះទៅទីតាំងនោះម្ដងទៀត ហើយនឹងស្នើសុំកម្លាំងប្រដាប់អាវុធទៅជាមួយគឺទៅចាប់ខ្លួនម្ចាស់ទីតាំង និងអ្នកពាក់ព័ន្ធទាំងអស់ហ្នឹងតែម្ដង។ យកទាំងសម្ភារ ចាប់ទាំងម្ចាស់ ដើម្បីកសាងសំណុំរឿងទៅតុលាការ។ លើកនេះគឺមិនលើកលែងដាច់ខាត។ ចំណែកមន្ត្រីឧទ្យានុរក្សបរិស្ថានមិនអើពើបង្ក្រាបទេ គឺដេកចាំតែប្រមូលលុយពីបទល្មើសព្រៃឈើហ្នឹង»។
ទោះបីយ៉ាងណាលោក ជា ហ៊ាន មិនកំណត់ពេលវេលាជាក់លាក់ដែលនឹងត្រូវចុះទៅបង្ក្រាបបទល្មើសព្រៃឈើជាមួយកងកម្លាំងប្រដាប់អាវុធនៅតំបន់នោះទេ ដោយលោកថាមិនចង់ឲ្យជនល្មើសដឹងមុន ដើម្បីកុំឲ្យពួកគេរត់គេចខ្លួន។ តំបន់ឧទ្យានជាតិជួរភ្នំក្រវាញជាទីកន្លែងដែលមានអនុក្រឹត្យដាក់ជាកន្លែងសម្រាប់អភិរក្ស រួមទាំងព្រៃឈើ និងសត្វព្រៃ។
ប៉ុន្តែលោក នៅ ណាក់ អនុប្រធានមន្ទីរបរិស្ថានខេត្តកំពង់ស្ពឺអះអាងថា៖ «យើងបង្ក្រាប និងទប់ស្កាត់រួចរាល់ហើយ គឺគ្មានបទល្មើសអ្វីទេ យើងបានប្រមូលឈើទាំងអស់មកទុកនៅទីស្នាក់ការឧទ្យានុរក្សជួរភ្នំក្រវាញហើយ ប៉ុន្ដែខ្ញុំអត់ទាន់បានទទួលដំណឹងអ្វីថ្មីបន្ថែមទៀតពីមន្ត្រីដែលប្រចាំការនៅទីនោះទេ»។
លោក ឡុង ស៊ី នាយកឧទ្យានជាតិជួរភ្នំក្រវាញខាងត្បូងដែលជាមន្ត្រីប្រចាំការនៅតំបន់នោះបានថ្លែងពីម្សិលមិញថា នៅតំបន់ជួរភ្នំក្រវាញនេះមិនមានសកម្មភាពកាប់បំផ្លាញព្រៃឈើដូចការលើកឡើងរបស់សង្គមស៊ីវិលនោះទេ។ ប៉ុន្ដែលោកថាអាចមានករណីលួចបាញ់សត្វព្រៃពីសំណាក់ពលរដ្ឋក្នុងមូលដ្ឋានមួយចំនួនដែរ។ ចំណែកករណីដឹកជញ្ជូនឈើ ឬកាប់ឈើជាលក្ខណៈទ្រង់ទ្រាយធំនាបច្ចុប្បន្ននេះហាក់មានសភាពស្ងប់ស្ងាត់ហើយ។
លោកបន្តថា មន្ត្រីជំនាញតែងតែចុះល្បាតជាប្រចាំដោយកន្លងមកសមត្ថកិច្ចធ្លាប់បានឃាត់ខ្លួនជនល្មើសជាច្រើនករណី ហើយបានរឹបអូសសម្ភារមួយចំនួនផងដែរ។
លោកជំរុញឲ្យប្រជាពលរដ្ឋមូលដ្ឋានសហការជាមួយមន្ត្រីជំនាញជួយការពារព្រៃឈើ និងសត្វព្រៃ។ ព្រោះមន្ត្រីដែលគ្រប់គ្រងប្រចាំការនៅតំបន់នោះមិនគ្រប់គ្រាន់ឆ្លើយតបតាមទំហំការងារនៅទីនោះទេ។
លោក ឡុង ស៊ី បញ្ជាក់ថា៖ «ខ្ញុំអត់ដឹងខាងសង្គមស៊ីវិលគាត់ដើរតាមណា ដែលបានរកឃើញបទល្មើសព្រៃឈើនេះទេ។ ព្រោះយើងបានបង្ក្រាបជាហូរហែរួចមកហើយ ដោយសព្វថ្ងៃនេះមិនមានករណីបទល្មើសព្រៃឈើជាលក្ខណៈទ្រង់ទ្រាយធំទេ។ សព្វថ្ងៃនេះមានតែករណីគេលួចបាញ់សត្វព្រៃនៅពេលយប់ គាត់លួចដាក់អន្ទាក់ តែរឿងកាប់ព្រៃឈើ គឺអត់មានទេ»។
លោក វ៉ី សំណាង អភិបាលខេត្តកំពង់ស្ពឺពីម្សិលមិញ មិនទាន់អាចទាក់ទងសុំការបញ្ជាក់ជុំវិញករណីនេះបានទេ៕
