កំពង់ស្ពឺៈ ប្រធានអង្គការប្រឆាំងអំពើពុករលួយទប់ស្កាត់ការបំផ្លាញ ធនធានធម្មជាតិ និងការពារសិទ្ធិពលរដ្ឋ (ACNCIPO) លោក ជា ហ៊ាន ប្ដឹងអ្នករំលោភដីធ្លី ៥ នាក់ [មេភូមិម្នាក់] ទៅតុលាការខេត្តកំពង់ស្ពឺពាក់ព័ន្ធការឈូសឆាយដីដែនជម្រកសត្វព្រៃភ្នំឱរ៉ាល់ចំនួន ១១២ ហិកតា នៅភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ ប៉ុន្តែមេភូមិអះអាងថា គាត់សុខចិត្តទទួលទោសបើគាត់ជាប់ពាក់ព័ន្ធនឹងដីធ្លីនោះ។
តាមពាក្យបណ្ដឹងរបស់លោក ជា ហ៊ាន ចុះថ្ងៃទី ១៥ មិថុនា និងដាក់ទៅសាលាដំបូងខេត្តកំពង់ស្ពឺនាថ្ងៃនោះដែរគឺលោកប្តឹងឈ្មោះ សឿន ណាក់ ភេទប្រុស អាយុ ៣៧ ឆ្នាំឈ្មោះ មក ម៉ាន ឈ្មោះ មក ម៉េត ឈ្មោះ ខៀវ សារឿន និងឈ្មោះ អ៊ឹម សន មេភូមិស្រែកិន។ ពួកគេរស់នៅភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ ពួកគេរងការប្តឹងពីបទប៉ុនប៉ងនៃបទឧក្រិដ្ឋ [ឈូសឆាយដីព្រៃដោយខុសច្បាប់ និងរារាំងមន្ត្រីជំនាញក្នុងការអនុវត្តច្បាប់]។
ពាក្យបណ្ដឹងបន្តថា មន្ត្រីអង្គការ ACNCIPO កាលពីថ្ងៃទី ៥ មីនា ឆ្នាំ ២០២០ បានចុះអង្កេតនៅតំបន់ អូរពង្រ ក្នុងភូមិស្រែកិន ដោយបានឃើញឈ្មោះ មក ម៉ាន ឈ្មោះ មក ម៉េត និងឈ្មោះ ខៀវ សារឿន កំពុងរុករានទន្ទ្រានដីព្រៃខុសច្បាប់ចំនួន ១១២ ហិកតានៅឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ [ដែនជម្រកសត្វព្រៃភ្នំឱរ៉ាល់]។ ក្រោយមកនៅថ្ងៃទី ៨ មិថុនា ឆ្នាំ ២០២០ អង្គការបានស្នើទៅមន្ទីរបរិស្ថានខេត្ត ដើម្បីចុះកំណត់លេខយាមការក្នុងការដកហូតទីតាំងដីព្រៃដែលគេកាប់រានទន្ទ្រានមកទុកជាសម្បត្តិរដ្ឋវិញ។
ពាក្យបណ្ដឹងបន្ថែមថា បន្ទាប់មកនៅថ្ងៃទី ១១ មិថុនា ឆ្នាំ ២០២០ មន្ទីរបរិស្ថានចេញបញ្ជាបេសកកម្មឲ្យមន្ត្រីជំនាញបរិស្ថានខេត្តកំពង់ស្ពឺចុះកំណត់យាមការ។ ប៉ុន្ដែឈ្មោះ សឿន ណាក់ និងបក្ខពួកជាង ១០ នាក់ផ្សេងទៀតបានធ្វើសកម្មភាពយកទូរស័ព្ទដៃថតរថយន្តមន្ត្រីដែលកំពុងចតក្បែរដីដែលត្រូវកំណត់លេខយាមការព្រមទាំងគំរាមកំហែងមន្ត្រី និងមន្ត្រីអង្គការ ACNCIPO ថែមទៀត។
លោក ជា ហ៊ាន ប្រាប់ភ្នំពេញប៉ុស្ដិ៍ ថាក្រោយពី សឿន ណាក់ បានថតលោក និងមន្ត្រីបរិស្ថានបុគ្គលរូបនេះបានគំរាមឲ្យប្រគល់ត្រាក់ទ័រ ២ គ្រឿងឲ្យទៅគាត់វិញជាបន្ទាន់។ បើមិនឲ្យទេ គាត់នឹងប្តឹងទៅតុលាការ។ បុគ្គលរូបនេះនៅតែថត ទើបលោកចាប់ទូរស័ព្ទមិនឲ្យថត និងមិនឲ្យទៅរារាំងមន្ត្រីជំនាញបរិស្ថានក្នុងការចុះបំពេញបេសកកម្ម។
លោកថា ភ្លាមៗនោះឈ្មោះ សឿន ណាក់ បាននាំបក្ខពួកជាង ១០ នាក់ ដោយដៃកាន់ដំបង និងអ្នកខ្លះមានកាំបិតមកគំរាមលោក និងមន្ត្រីបរិស្ថានឲ្យប្រគល់ត្រាក់ទ័រ ២ គ្រឿងដែលលោក និងមន្ត្រីឧទ្យានុរក្សភ្នំឱរ៉ាល់ចាប់ប្រគល់ឲ្យមន្ត្រីឧទ្យានុរក្សបរិស្ថានស្នាក់ការរង ស្រែកិនកាលពីពេលថ្មីៗនេះ។
លោក ជា ហ៊ាន បញ្ជាក់ថា៖ «ខ្ញុំដាក់ប្ដឹងពួកគាត់ទាំង ៥ នាក់ហ្នឹង ហើយគឺចោទពីបទប៉ុនប៉ងនៃបទឧក្រិដ្ឋរារាំងមន្ត្រីជំនាញក្នុងពេលបំពេញបេសកកម្ម និងឈូសឆាយទន្ទ្រានដីព្រៃដោយខុសច្បាប់ និងទាមទារសំណងនៃជំងឺចិត្ត ១០០ លានរៀល និងផ្តន្ទាទោសតាមច្បាប់ទៅលើបុគ្គលទាំង ៥ នាក់នេះ»។
លោក ខៃ សម្ភស្ស ព្រះរាជអាជ្ញារងសាលាដំបូងខេត្តកំពង់ស្ពឺប្រាប់ថា លោកមិនទាន់បានឃើញសំណុំរឿងនេះទេ។
លោក ទេព ណែម មេឃុំត្រពាំងជោប្រាប់ពីម្សិលមិញថា ដីដែនជម្រកសត្វព្រៃភ្នំឱរ៉ាល់ពិតជាមានការរំលោភពីសំណាក់ពលរដ្ឋមួយក្រុមតូចដែលមានមូលដ្ឋាននៅភូមិស្រែកិនមែន។
លោកថា៖ «ខ្ញុំបានទទួលដំណឹងពីពលរដ្ឋមកថា មេភូមិ អ៊ឹម សន អ្នកជំរុញឲ្យពលរដ្ឋទៅរំលោភយកដីហ្នឹង ហើយខ្ញុំបានប្រាប់គាត់ច្រើន លើកហើយកុំទៅប៉ះពាល់ដីហ្នឹង ដីរបស់រដ្ឋទេ។ បើគាត់នៅតែមិនស្ដាប់តាមខ្ញុំ ខ្ញុំក៏អត់មានយោបល់អ្វីដែរ។ ខ្ញុំទុកឲ្យមន្ត្រីជំនាញខាងបរិស្ថាន គាត់ចាត់ចែងតាមនីតិវិធីរបស់គាត់ទៅ។ គាត់ចង់ប្ដឹង ក៏ប្ដឹងទៅ ខ្ញុំអត់ដឹងទេ ព្រោះខ្ញុំបានជួយសម្របសម្រួល និងប្រាប់មេភូមិហ្នឹងច្រើនលើកហើយ»។
លោក អ៊ឹម សន មេភូមិស្រែកិន អះអាងពីម្សិលមិញថា ការចោទរូបលោកមិនមានមូលដ្ឋានច្បាស់លាស់ និងគ្មានភ័ស្តុតាងត្រឹមត្រូវ។ លោកថានឹងចូលបំភ្លឺនៅតុលាការ បើមានការកោះហៅតាមពាក្យបណ្ដឹងរបស់លោក ជា ហ៊ាន។
លោកថា៖ «ខ្ញុំមិនបានទៅពាក់ព័ន្ធអ្វីនឹងដីនៅតំបន់ហ្នឹងទេ ហើយការចោទប្រកាន់ខ្ញុំនេះគឺមិនមែនជាការពិតទេ។ ខ្ញុំសុខចិត្តទទួលទោសតាមច្បាប់ បើខ្ញុំពាក់ព័ន្ធនឹងដីហ្នឹងមែន ហើយឲ្យ ជា ហ៊ាន ប្ដឹងខ្ញុំទៅ ខ្ញុំមិនខ្លាចនឹងចូលបំភ្លឺនៅតុលាការទេ ព្រោះខ្ញុំមិនដឹងរឿងហ្នឹង។ ពលរដ្ឋទាំងអស់ហ្នឹង មិនដឹងគាត់មកពីណា ពីណីផង ហើយមកចោទខ្ញុំអ្នកដឹកនាំទៅទន្ទ្រានដីរដ្ឋទៅវិញ»។
លោក ជូ ច័ន្ទដារ៉ារិទ្ធិ មន្ត្រីបរិស្ថាន ខេត្តកំពង់ស្ពឺដែលបានចុះកំណត់យាមការដីនៅដែនជម្រកសត្វព្រៃភ្នំឱរ៉ាល់ថ្លែងពីថ្ងៃទី ១៥ មិថុនា ថាដីដែនជម្រកសត្វព្រៃភ្នំឱរ៉ាល់ប្រមាណជាង ១០០ ហិកតា ត្រូវបានជនខិលខូចរំលោភយកដោយខុសច្បាប់តាមរយៈការឈូសឆាយដីព្រៃ និងព័ទ្ធរបង ព្រមទាំងបានសាងសង់តង់ជាច្រើនកន្លែង។
លោកបញ្ជាក់ថា៖ «យើងនឹងចុះទៅវាស់វែងដីទីតាំងនោះម្ដងទៀត ព្រោះយើងវាស់បានតែពាក់កណ្ដាលនៃទំហំដីដែលគេរំលោភបំពានហ្នឹងទេ»៕