The Phnom Penh Post Search

Search form

Logo of Phnom Penh Post newspaper Phnom Penh Post - សកម្មជន​ម្នាក់​ត្រូវ​មន្ត្រី​​​​អាវុធហត្ថ​ប្រើ​ហិង្សា​លើ ក្រោយ​រាយការណ៍​ពី​បទ​ល្មើស​ព្រៃឈើ

សកម្មជន​ម្នាក់​ត្រូវ​មន្ត្រី​​​​អាវុធហត្ថ​ប្រើ​ហិង្សា​លើ ក្រោយ​រាយការណ៍​ពី​បទ​ល្មើស​ព្រៃឈើ

Content image - Phnom Penh Post
សកម្មជនព្រៃឈើ សាំ ចក់ ដេក​រុំ​របួស ក្រោយ​ត្រូវមន្ត្រី​កង​រាជ​អាវុធហត្ថ​ម្នាក់ និងបក្ខពួកប្រើហិង្សា។ រូបថត អាដហុក

សកម្មជន​ម្នាក់​ត្រូវ​មន្ត្រី​​​​អាវុធហត្ថ​ប្រើ​ហិង្សា​លើ ក្រោយ​រាយការណ៍​ពី​បទ​ល្មើស​ព្រៃឈើ

ឧត្តរមានជ័យៈ មន្ត្រី​អង្គការ​ទប់​ស្កាត់​បទ​ល្មើស​ព្រៃឈើ​នៅ​កម្ពុជា​ប្រចាំ​ខេត្ត​ឧត្តរមាន​ជ័យ​បាន​ស្វែង​រក​ការ​អន្តរាគមន៍​ពី​សមាគមន៍​អាដហុក​ បន្ទាប់​ពី​បាន​ដាក់​ពាក្យ​បណ្តឹង​ទៅ​តុលាការ​ ពាក់​ព័ន្ធ​និង​មន្ត្រី​កង​រាជ​អាវុធហត្ថ​ម្នាក់​និង​បក្ស​ពួក​ ៦ ​នាក់​ផ្សេង​ទៀត​បាន​ប្រើ​ហិង្សា​មក​លើ​រូប​ បន្ទាប់​ពី​បាន​​រាយការណ៍​បទល្មើស​ព្រៃ​ឈើ​ទៅ​សមត្ថកិច្ច។

លោក សាំ ចក់ នាយក​សាខា​នៃ​អង្គការ​ទប់ស្កាត់​បទ​ល្មើស​នៅ​កម្ពុជា​ប្រចាំ​ខេត្ត​ឧត្តរមានជ័យ​បាន​ថ្លែង​ឲ្យ​ដឹង​ថា លោក​បាន​ដាក់​ពាក្យ​បណ្តឹង​ទៅ​តុលាការ​ខេត្ត​កាល​ពី​ថ្ងៃ​ទី​​ ១៧ ខែ​កញ្ញា ពី​បទ​មនុស្ស​ឃាតដោយ​ចេតនា​ ដោយ​សារ​តែ​មន្ត្រី​កង​រាជ​អាវុធហត្ថ​ប្រចាំ​ការ​នៅ​ស្រុក​អន្លង់​វែងនិង​បក្ខពួក​រកស៊ី​ឈើ​ ៦ ​នាក់​ផ្សេង​ទៀត​បាន​មក​វាយ​រូបលោក​ដល់​ផ្ទះ។

លោក​បាន​ថ្លែង​ថា៖ «​គេ​ខឹង​ខ្ញុំ​រាយ​ការណ៍​ទៅ​សមត្ថកិច្ច​ពួកគេ​រកស៊ី​ឈើ គេ​ក៏​មក​វាយ​ខ្ញុំ​ដល់​ផ្ទះ​កាល​ពី​ថ្ងៃ​ទី​១៥។ បើ​ខ្ញុំ​មិន​រត់​ឲ្យ​គេ​ជួយ​ទាន់​ទេ​គេ​សម្លាប់​ខ្ញុំ​ចោល​បាត់​ទៅ​ហើយ​»។​

លោក​បាន​ឲ្យ​ដឹង​ថា កាល​ពី​ថ្ងៃ​ទី​១៥ ខែ​កញ្ញា លោក​បាន​ទៅ​ពិនិត្យ​សកម្មភាព​រក​ស៊ី​ឈើ​ខុស​ច្បាប់​នៅ​តំបន់​អូរស្វាយនៃ​ឃុំ​​អូរស្វាយ ស្រុក​ត្រពាំងប្រាសាទ ហើយ​នៅ​យប់​នោះ លោក​បាន​ប្រទះ​ឃើញ​បុរស​ឈ្មោះ ណាក់ ដែល​ជា​ឈ្មួញ​បាន​ដឹក​​ជញ្ជូន​ឈើ​តាម​រថយន្ត​កាម៉ារី ហើយ​លោក​ក៏​បាន​ទូរស័ព្ទ​ហៅ​កម្លាំង​ចម្រុះ​ដើម្បី​ស្ទាក់​ត្រួត​ពិនិត្យ។ លុះនៅ​ថ្ងៃ​ទី​បន្ទាប់​ ឈ្មោះ ណាក់ ដែល​ជា​ឈ្មួញ​ដឹក​ឈើ​នោះ បាន​ទូរស័ព្ទ​ហៅ​ចង់​ជួប​រូប​លោក ស្រាប់​តែ​គេ​នាំ​ទាំង​មន្ត្រី​កង​រាជ​អាវុធហត្ថ​ម្នាក់​នៃ​ស្រុក​អន្លង់វែង ឈ្មោះ ប៉ក់ កា និង​បក្ខពួក ៥ ​នាក់​ទៀត ទៅ​វាយ​តប់​រូប​លោក​តែ​ម្ដង។

លោក​បាន​ឲ្យ​ដឹង​ថា៖ «គេ​ប្រាប់​ខ្ញុំ​ថា ​គេ​មក​វាយ​សម្លាប់​ខ្ញុំ​តែ​ម្តង។ ដូច្នេះ ​ខ្ញុំ​ស្នើ​អង្គការ​អាដហុក​ជួយ​អតន្តរាគមន៍​ទៅ​តុលាការ​ឲ្យ​តុលាការ​កោះ​ហៅ ​វែក​ញែក​រក​យុត្តិធម៌​សម្រាប់​ខ្ញុំ​​ស្រប​តាម​ច្បាប់»។

លោក ប៉ក់ កា មន្ត្រី​កង​រាជ​អាវុធហត្ថ​នៃ​ស្រុក​ អន្លង់វែង ពុំ​អាច​ទាក់​ទង​ដើម្បី​សុំ​ការ​អធិប្បាយ​ជុំវិញ​ការ​ចោទ​ប្រកាន់​នោះ​បាន​ទេ​ ដោយ​ទូរស័ព្ទ​របស់​លោក​គ្មាន​អ្នក​ទទួល​។

លោក ស្រី ណារ៉េន មន្ត្រី​​សម្រប​សម្រួល​នៃ​សមាគម​ការពារ​សិទ្ធិ​មនុស្ស​អាដហុក ខេត្ត​ឧត្តរមានជ័យ ឲ្យ​ដឹង​ថា លោក​បាន​ទទួល​បណ្ដឹង​ពី​នាយក​សាខា​អង្គការ​ទប់ស្កាត់​បទល្មើស​នៅ​កម្ពុជា​ហើយ​ទាក់​ទិន​​នឹងរឿង​មន្ត្រី​កង​រាជ​អាវុធហត្ថ​និង​បក្ខពួក ព្រួត​​គ្នា​វាយ​ ហើយ​​បាន​ពិនិត្យ​ឃើញ​មាន​ស្លាក​ស្នាម​របួស​នៅ​លើ​ផ្ទៃ​មុខ​របស់គាត់​ផងដែរ។ លោក​នឹង​ដាក់​ពាក្យ​ស្នើសុំ​អន្តរាគមន៍​ទៅ​តុលាការ ហើយ​លោក​​នឹង​រក​មេធាវីដើម្បី​ការពារ​បុគ្គលិក​អង្គការ​ក្រៅ​រដ្ឋាភិបាល​ម្នាក់​នោះ។

លោកថា៖«​នេះ​ជា​ការ​រំលោភសិទ្ធិ​មនុស្ស​ធ្ងន់ធ្ងរទៅ​លើ​អ្នក​ការពារ​ធនធាន​ធម្មជាតិ។ ម្យ៉ាង​ទៀត​ខ្លួន​ជា​អ្នក​អនុវត្តច្បាប់​បែរ​ជា​មិន​គោរព​ច្បាប់​ទៅ​វិញ​»។

ទាក់​ទិន​ទៅ​នឹង​ករណី​នេះ​ដែរ​ កាល​ពី​​ថ្ងៃ​ទី ​២៦ ខែ​មេសា សកម្មជន​ការពារ​បរិស្ថាន​ដ៏​ល្បី​ លោក ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិត្រូវ​បាន​គេ​បាញ់​សម្លាប់​នៅនៅ​ត្រង់​ចំណុច​វាល​បី ឃុំបាក់ខ្លង ស្រុក​មណ្ឌល​សីមា ខេត្ត​កោះ​កុង ​នៅ​ខណៈពេល​ដែល​រូប​លោក​បាន​នាំ​អ្នក​សារព័ត៌​មាន​ក្នុង​​ស្រុក​​ពីរ​រូប​ចុះ​​ទៅ​យក​ព័ត៌មាន​ស៊ើបអង្កេត​និង​ថតរូប​សកម្មភាព​បទល្មើស​ព្រៃ​ឈើ​ខុសច្បាប់​នៅ​​តំបន់​ជួរ​ភ្នំ​ក្រ​វាញ​​ភាគ​កណ្ដាល ​ខេត្ត​​​​​កោះ​កុង៕

អត្ថបទគួរចាប់អារម្មណ៍