មណ្ឌលគិរីៈ សកម្មជនព្រៃឈើបានស្នើឱ្យគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ស៊ើបអង្កេតឡើងវិញលើការសង្ស័យបទល្មើសបំផ្លាញព្រៃឈើរបស់ក្រុមហ៊ុន លឹម រ៉ូយ៉ាល់ ជ័ញ ស្ដុក ខណៈសកម្មជនអះអាងថា ក្រុមហ៊ុននេះតែងលួចកាប់ឈើខុសច្បាប់ក្នុងដែនជម្រកសត្វព្រៃដឹកចូលក្រុមហ៊ុនរបស់ខ្លួន ដោយបំភាន់ភ្នែកមន្ត្រីធ្វើជាឈើស្របច្បាប់ ប៉ុន្តែមន្ត្រីជំរុញឲ្យដាក់ពាក្យបណ្តឹង។
លោក ហេង ស្រស់ សកម្មជនការពារព្រៃឈើប្រាប់ភ្នំពេញប៉ុស្ដិ៍ម្សិលមិញថា ខាងគណៈកម្មាធិការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិមិនអាចគ្រាន់តែចុះទៅពិនិត្យកន្លែងស្ដុកឈើរបស់ក្រុមហ៊ុន លឹម រ៉ូយ៉ាល់ រួចហើយបកស្រាយថា ក្រុមហ៊ុននេះ មិនជាប់ពាក់ព័ន្ធនឹងបទល្មើសព្រៃឈើឡើយ។
លោកបញ្ជាក់ថា៖ «គាត់ត្រូវតែស៊ើបអង្កេត និងស្វែងរកព័ត៌មានមួយចំនួន ដែលនៅក្រឡឹងជុំវិញបរិវេណដីសម្បទានសេដ្ឋកិច្ចហ្នឹង ថាតើមតិសាធារណជនទាំងអស់ហ្នឹង គាត់បាន ឃើញអ្វីដែលជាស្នាដៃរបស់ក្រុមហ៊ុនមួយហ្នឹង។ មិនមែនចុះទៅឆែកឆេរហើយថាឈើហ្នឹងជាឈើចាស់ទេ ហើយក្រុមហ៊ុនថា ខ្លួនទទួលបានសិទ្ធិស្របច្បាប់វិនិយោគទេ។ ប៉ុន្តែត្រូវតែប្រមូលភ័ស្ដុតាង និងព័ត៌មានឱ្យបានគ្រប់ជ្រុងជ្រោយថាតើក្រុមហ៊ុនហ្នឹងប្រព្រឹត្តបទល្មើសតាំងពីឆ្នាំណាដល់ឆ្នាំណាខ្លះ?»។
លោក ហេង ស្រស់ អះអាថា ប្រជាពលរដ្ឋរស់នៅក្បែរក្រុមហ៊ុន លឹម រ៉ូយ៉ាល់ ដែលជាក្រុមហ៊ុនរបស់លោកឧកញ៉ា លឹម ប៊ុណ្ណា ហៅខ្នាដែលលក់ផ្ទេរសិទ្ធិកាន់កាប់ទៅឱ្យជនជាតិចិន គឺសឹងតែ ១០០ ភាគរយ បានដឹងថាក្រុមហ៊ុនមួយនេះ តែងលួចកាប់បំផ្លាញព្រៃឈើខុសច្បាប់ក្រោមលេសដីសម្បទានរបស់ខ្លួន ជាពិសេសគឺស្ថិតក្នុងដែនជម្រកសត្វព្រៃភ្នំព្រេចក្នុងខេត្តមណ្ឌលគិរី។
លោកថាក្រុមហ៊ុន លឹម រ៉ូយ៉ាល់ ជាក្រុមហ៊ុនមានឈ្មោះបោះសំឡេងស្ថិតក្នុងខេត្តមណ្ឌលគិរី ក្នុងការកាប់បំផ្លាញព្រៃឈើខុសច្បាប់ដើម្បីលក់ចែកចាយក្នុងប្រទេសផងនិងលក់ទៅកាន់ប្រទេស វៀតណាម ផង។
លោកបន្តថា៖ «លេសមួយទៀត នៅពេលមន្ត្រីជំនាញឬមន្ត្រីប៉េអឹមមិនបានចុះអនុវត្តច្បាប់ គឺគាត់ (ក្រុមហ៊ុន) តែងកាប់ឈើពីខាងក្រៅ នាំចូលទៅខាងក្នុងក្រុមហ៊ុន ហើយនៅពេលមន្ត្រីចុះទៅឆែកឆេរទៅ គាត់តែងយកឈើក្នុងដីសម្បទានសេដ្ឋកិច្ចហ្នឹង មកបង្ហាញមន្ត្រីជំនាញថា ក្រុមហ៊ុនរបស់ខ្លួន មិនបានល្មើសច្បាប់ទេ។ គឺគេរៀបប្រព័ន្ធរបស់គេថា មិនរកស៊ីខុសច្បាប់ទេ»។
ក្រុមហ៊ុន លឹម រ៉ូយ៉ាល់ ជ័ញ ស្ដុក ទទួលបានអាជ្ញាប័ណ្ណពីក្រសួងបរិស្ថានរយៈពេល ៥០ ឆ្នាំ កាលពីឆ្នាំ ២០១២ ដើម្បីវិនិយោគផ្នែកកសិឧស្សាហកម្មលើផ្ទៃដីចំនួន ៩ ០៦៨ ហិកតា ក្នុងស្រុកកោះញែក និងស្រុកពេជ្រាដា។
បើតាមលោក ហេង ស្រស់ ក្នុងស្រុកកោះញែកមានក្រុមហ៊ុនចំនួន ៦ ដែលមានឈ្មោះបោះសំឡេងខាងកាប់បំផ្លាញព្រៃឈើ ក្រោមលេសទទួលដីសម្បទានសេដ្ឋកិច្ចពីរដ្ឋាភិបាល ហើយក្រុមហ៊ុនទាំងនេះមិនបានអភិវឌ្ឍផ្ដល់ផលប្រយោជន៍សម្រាប់ពលរដ្ឋឡើយ។
ប៉ុន្តែលោក អេង ហ៊ី មន្ត្រីនាំពាក្យគណៈកម្មាធិការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិបានបញ្ជាក់ក្នុងសន្និសីទកាសែតកាលពីថ្ងៃទី ១៨ កក្កដា ថា តាមការស៊ើបអង្កេតបឋម គឺក្នុងចំណោមក្រុមហ៊ុនទាំង ៦ នោះ មានក្រុមហ៊ុនចំនួន ៥ កំពុងប្រឈមនឹងការដកហូតអាជ្ញាបណ្ណ រួមមានក្រុមហ៊ុន ម៉ាស្ទ័រខេសិន ក្រុមហ៊ុន យ៉ាន់ចាវ ក្រុមហ៊ុន ថាច់វូដ ក្រុមហ៊ុន វិជ្ជរី និងក្រុមហ៊ុន ណេងណា ខណៈក្រុមហ៊ុនមួយទៀតឈ្មោះ លឹម រ៉ូយ៉ាល់ ត្រូវសមត្ថកិច្ចរកឃើញថា មិនមានពាក់ព័ន្ធនឹងករណីបទល្មើសព្រៃឈើនោះទេ។
លោក អេង ហ៊ី ប្រាប់ភ្នំពេញប៉ុស្ដិ៍ម្សិលមិញថា អ្នកអះអាងថាក្រុមហ៊ុន លឹម រ៉ូយ៉ាល់ មានជាប់ពាក់ព័ន្ធនឹងបទល្មើសព្រៃឈើ គួរតែដាក់បណ្ដឹងបរិហារក្រុមហ៊ុននេះទៅតុលាការខេត្តមណ្ឌលគិរី ដើម្បីធ្វើជាសាក្សីក្នុងការស៊ើបអង្កេត។ លោកថា នៅពេលមានបណ្ដឹងបរិហារ គឺតុលាការនិងអាជ្ញាធរប្រាកដជាបើកការស៊ើបអង្កេតជាថ្មី។
លោកថា៖ «ទៅប្ដឹងហ្នឹង គឺគេចាប់ផ្ដើមធ្វើ (ស៊ើបអង្កេត) ហើយ ព្រោះអាជ្ញាធរដែនដីគឺគណៈកម្មការហើយ»។
លោក អេង ហ៊ី បន្ថែមថា ចំពោះក្រុមហ៊ុនចំនួន ៥ មិនទាន់ដកហូតអាជ្ញាប័ណ្ណនៅឡើយទេ ដោយសារការស៊ើបអង្កេតមិនទាន់បញ្ចប់។
ទោះយ៉ាងណាប្រភពស្និទ្ធនឹងក្រុមហ៊ុន លឹម រ៉ូយ៉ាល់ សុំមិនបញ្ចេញឈ្មោះម្នាក់ប្រាប់ភ្នំពេញប៉ុស្ដិ៍ថា ដោយសារទទួលបានភាពស្របច្បាប់ក្នុងការឈូសឆាយ និងការដឹកជញ្ជូនឈើក្រោមលេសដីសម្បទានសេដ្ឋកិច្ច ក្រុមហ៊ុននេះបានបង្កើតឱ្យមានក្រុមចូលទៅកាប់បំផ្លាញព្រៃឈើជាច្រើនក្រុមក្នុងដែនជម្រកសត្វព្រៃភ្នំព្រេចនិងដែនជម្រកសត្វព្រៃកែវសីមា ដោយសារមានការធានាបើកផ្លូវពីអាជ្ញាធរពាក់ព័ន្ធ ដើម្បីយកឈើទាំងនោះ មកលក់ឱ្យក្រុមហ៊ុនវិញ។
ប្រភពដដែលបន្ថែមថា ឈើដែលយកទៅទុកក្នុងក្រុមហ៊ុន លឹម រ៉ូយ៉ាល់ មួយចំនួនដឹកទៅលក់នៅប្រទេសវៀតណាម។ ឈើក្នុងមួយឡានយីឌុប ត្រូវបង់ប្រហែល ១ ម៉ឺន ៨ ពាន់ដុល្លារ ទៅឱ្យមន្ត្រីសម្រាប់ថ្លៃសេវាបើកផ្លូវ ដឹកចេញពីខេត្តមណ្ឌលគិរីរហូតទៅដល់ប្រទេស វៀតណាម។ សល់មួយចំនួនទៀតត្រូវបានដឹកចេញទៅកែច្នៃក្នុងឃ្លាំងកែច្នៃឈើដ៏ធំមួយ ដែលអាចផ្ទុកឈើបានរាប់ពាន់ម៉ែត្រគុបស្ថិតក្នុងតំបន់សេដ្ឋកិច្ចពិសេសនៅភូមិត្រពាំងស្រែ ឃុំ ២ ធ្នូ ស្រុកស្នួល ខេត្តក្រចេះ ដើម្បីចែកចាយឈើទាំងនោះទៅឱ្យក្រុមហ៊ុនចិនដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន លឹម រ៉ូយ៉ាល់។
ប្រភពនេះបន្តថា៖ «ខ្ញុំដឹងរហូតយកចេញទៅវៀតណាមតាមច្រកណា ហើយថៅកែវៀតណាមគេស្ដុកនៅកន្លែងណា ហើយឯកឧត្តមហ្នឹងឈ្មោះអី ព្រោះខ្ញុំមានបងធម៌វៀតណាមជាអ្នករកស៊ីឈើដែរ ប្រាប់ខ្ញុំទាំងអស់។ ខ្លះទៀតអ្នករកស៊ីឈើសុទ្ធតែជាមិត្តភក្ដិ។ អ៊ីចឹង គេអត់លាក់លៀមយើងទេដូចគ្រាន់តែនៅ (ក្រុមហ៊ុន) យ៉ាន់ចាវ ហ្នឹងគ្រាន់តែថៅកែវៀតណាម ៣ នាក់ដែលឈររង់ចាំទិញឈើ ហើយចាប់បានតែមួយហ្នឹង ហើយកម្មករវៀតណាមមានមិនចេះតិចនាក់ទេ»។
លោក កែវ សុភក្ត្រ ប្រធានមន្ទីរបរិស្ថានខេត្តមណ្ឌលគិរីថ្លែងថា៖ «ខ្ញុំអត់សូវច្បាស់ដែរ ប៉ុន្តែការចោទប្រកាន់នេះដោយសារប្រជាជនចេះតែនិយាយទៅប៉ុន្តែសកម្មភាពវាខុសពីការនិយាយ»៕