.jpg)
លោក ធឿន ប៊ុនធន សកម្មជនអតីតគណបក្សសង្គ្រោះជាតិ ដែលរងបទចោទពីតុលាការ។ រូបថត ហ្វេសប៊ុក
រតនគិរីៈ សកម្មជនអតីតគណបក្សសង្គ្រោះជាតិចំនួន ២ នាក់ផ្សេងទៀត ត្រូវបានសាលាដំបូងខេត្តរតនគិរីចោទប្រកាន់កាលពីម្សិលមិញពីបទ «រួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ»។ នេះបើតាមអ្នកនាំពាក្យសាលាដំបូងខេត្តរតនគិរី ។
ការចោទប្រកាន់នេះកើតមានឡើង ៩ ថ្ងៃបន្ទាប់ពីសកម្មជនអតីតគណបក្សសង្គ្រោះជាតិចំនួន ៦ នាក់ ត្រូវបានសាលាដំបូងរាជធានីភ្នំពេញ ចោទប្រកាន់ និងបញ្ជូនទៅឃុំខ្លួនបណ្តោះអាសន្ននៅពន្ធនាគារពីបទ «រួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ» ដូចគ្នានេះ។
លោក កែវ ពិសុទ្ធ អ្នកនាំពាក្យសាលាដំបូងខេត្តរតនគិរីបានថ្លែងថា៖ «ឃើញសមត្ថិកិច្ចបញ្ជូនមកព្រឹកមិញ (ថ្ងៃចន្ទ) បន្ទាប់ពីឃាត់ខ្លួនបាននៅស្រុកអូរយ៉ាដាវ។ អយ្យការបានចោទប្រកាន់លោក ងិន សុផាត់ អាយុ ៥៦ ឆ្នាំ និងធឿន ប៊ុនធន អាយុ ៥០ ឆ្នាំ ពីបទរួមគំនិតក្បត់ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គមជាតិ»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានថ្លែងកាលពីម្សិលមិញថា៖ «យើងចោទពួកគាត់ថា ដើរបំផុស និងចូលរួមចលនាក្បត់។ គាត់បានដើរផ្សព្វផ្សាយផែនការប្រឆាំងរាជរដ្ឋាភិបាល និងផ្តួលរំលំរដ្ឋាភិបាល»។ ប៉ុន្តែលោក គឹមខឿន បានបដិសេធផ្តល់ព័ត៌មានលម្អិតអំពីថាតើអ្នកទាំង ២ នេះបានធ្វើសកម្មភាពខុសច្បាប់អ្វីខ្លះនោះទេ ដោយគ្រាន់តែថ្លែងថា៖ «យើងមានភ័ស្តុតាង ហើយយើងមិនចាប់គេដោយគ្មានភ័ស្តុតាងបានទេ ដោយសារតែពួកគេបានធ្វើសកម្មភាព យើងមានវីដេអូពីសកម្មភាព»។
លោកឧត្ដមសេនីយ៍ទោ យិន ចំណាន ស្នងការខេត្តរតនគិរីបានបដិសេធធ្វើអធិប្បាយពាក់ព័ន្ធនឹងករណីនេះ។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា ការចាប់ខ្លួនបន្តបន្ទាប់ទៅលើសកម្មជនអតីតគណបក្សសង្គ្រោះជាតិនេះ នឹងធ្វើឲ្យស្ថានការណ៍នយោបាយកាន់តែតានតឹងឡើងថែមទៀតដែលធ្វើឲ្យប៉ះពាល់ដល់មុខមាត់របស់ប្រទេសកម្ពុជា ហើយសហគមន៍អន្តរជាតិអាចនឹងដាក់សម្ពាធបន្ថែមទៀតមកលើរដ្ឋាភិបាលកម្ពុជា។
លោកបញ្ជាក់ដូច្នេះថា៖ «សហគមន៍អន្តរជាតិកំពុងតែសម្លឹងមើលប្រទេសកម្ពុជាយើងក្នុងការអនុវត្ត និងគោរពលទ្ធិប្រជាធិបតេយ្យ និងសិទ្ធិមនុស្ស។ បើយើងនៅតែបន្តចាប់ខ្លួនទៀត គេនឹងបន្តគាបសង្កត់យើងថែមទៀតហើយ។ ស្ថានការណ៍កាន់តែអាក្រក់ទៅៗ»។
មន្ត្រីជាន់ខ្ពស់សមាគមការពារសិទ្ធិមនុស្ស អាដហុក លោក យី សុខសាន បានចាត់ទុកការចាប់ខ្លួនសកម្មជនអតីតគណបក្សសង្គ្រោះជាតិនេះថា ជាការបំភិតបំភ័យ និងរឹតត្បិតសិទ្ធិសេរីភាពរបស់ប្រជាពលរដ្ឋ។
លោកបញ្ជាក់ថា៖ «ប្រសិនបើការចាប់ខ្លួននេះគ្រាន់តែផ្អែកទៅលើគាត់បញ្ចេញមតិនៅតាមបណ្តាញសង្គម ឬតាមមធ្យោបាយផ្សេងៗគឺវារំលោភទៅលើគោលការច្បាប់ជាតិ និងអន្តរជាតិដែលធានានូវសិទ្ធិសេរីភាពក្នុងការបញ្ចេញមតិរបស់ប្រជាពលរដ្ឋ។ កាលណាចាប់ខ្លួនជាបន្តបន្ទាប់ដោយសារការបញ្ចេញមតិវានឹងធ្វើឲ្យប្រជាពលរដ្ឋដទៃទៀតគាត់ចាប់ផ្តើមមានការព្រួយបារម្ភ និងភ័យខ្លាចអំពីការបញ្ចេញមតិ»។
ក៏ប៉ុន្តែលោក ឆាយ គឹមខឿន បានថ្លែងថាអ្នកដែលភ័យ និងព្រួយបារម្ភគឺជាអ្នកដែលពាក់ព័ន្ធនឹងផែនការរបស់លោក សម រង្ស៊ី ក្នុងការប៉ុនប៉ងរៀបចំផែនការផ្តួលរំលំរដ្ឋាភិបាលដែលតម្រូវឲ្យសមត្ថកិច្ចត្រូវតែចាត់វិធានការតាមផ្លូវច្បាប់យ៉ាងតឹងរ៉ឹងចំពោះពួកគេ៕
