.jpg)
សកម្មជនគាំទ្រអតីតបក្សប្រឆាំង ២ នាក់ ប្ដីប្រពន្ធកាលពីថ្ងៃទី ២៥ វិច្ឆិកា បានចូលសារភាព ដើម្បីទទួលបានការអធ្យាស្រ័យពីរដ្ឋាភិបាល។ រូបថត សហការី
ភ្នំពេញៈ សកម្មជនគាំទ្រអតីតបក្សប្រឆាំង ២ នាក់ ប្ដីប្រពន្ធកាលពីថ្ងៃទី ២៥ វិច្ឆិកា បានចូលសារភាព ដើម្បីទទួលបានការអធ្យាស្រ័យពីរដ្ឋាភិបាល ហើយអះអាងថា ជីវិតនយោបាយរបស់លោក សម រង្ស៊ី កំពុងដើរទៅរកភាពទាល់ច្រក។
លោក តោ និមល និងភរិយាដែលធ្លាប់បានបង្ហោះសារនៅលើហ្វេសប៊ុកវាយប្រហាររដ្ឋាភិបាល និងគាំទ្រដំណើរវិលត្រឡប់មកកម្ពុជារបស់ប្រធានស្ដីទីអតីតគណបក្សសង្គ្រោះជាតិ លោក សម រង្ស៊ី បានត្រឡប់ពីប្រទេស ថៃចូលមកសារភាពដើម្បីទទួលបានការអធ្យាស្រ័យកាលពីថ្ងៃអាទិត្យ ដោយចូលមកវិញតាមច្រកទ្វារព្រំដែនបឹងត្រកួន ស្រុកថ្មពួក ខេត្តបន្ទាយមានជ័យ។
កាលពីថ្ងៃសៅរ៍លោកបានសរសេរនៅលើហ្វេសប៊ុកថា៖ «ហ៊ុន សែន បរាជ័យហើយ។ ដើម្បីអំណាចរបស់ខ្លួន និងបក្ខពួក គ្រួសារ ទោះបីសហគមន៍អឺរ៉ុបផ្តាច់ EBA ក៏ ហ៊ុន សែន មិនខ្វល់ដែរ ព្រោះអ្នករងគ្រោះមិនមែនជាគ្រួសាររបស់ ហ៊ុន សែន។ តែខ្មែរជាងកន្លះនគរត្រូវការ EBA ហើយគាត់មិនត្រូវការក្រុម ហ៊ុន សែន ដឹកនាំតទៀតដែរ»។
ក៏ប៉ុន្តែរំលងបាន ១ ថ្ងៃនៅថ្ងៃអាទិត្យបែរជាលោកសរសេរថា៖ «មានមិត្តតែមិនអាចទុកចិត្តបាន ខ្ញុំចង់នៅម្នាក់ឯងជាមួយប្រពន្ធជាទីស្រឡាញ់របស់ខ្ញុំ»។
តាមរយៈបទសម្ភាសជាមួយសារព័ត៌មាន ហ្វ្រេសញូវ លោក និមល បានរៀបរាប់ថា លោកបានទទួលការណែនាំពីលោក អេង ឆៃអ៊ាង អនុប្រធានបក្សសង្គ្រោះជាតិឱ្យកៀរគរប្រមូលពលករតាមរោងចក្រនៅប្រទេសថៃមកអមដំណើរលោក សម រង្ស៊ី នៅថ្ងៃទី ៩ វិច្ឆិកា។ ប៉ុន្តែដោយសារការវិលត្រឡប់ថ្ងៃនោះបានបរាជ័យ ពលរដ្ឋដែលគ្រោងអមដំណើរបានបែកខ្ញែកគ្នាទៅវិញ។
ក្នុងអំឡុងពេលរស់នៅប្រទេសថៃលោកថា លោកទទួលបានប្រាក់ឧបត្ថម្ភក្នុងមួយខែ ១០០ ដុល្លារ សម្រាប់ការរស់នៅ។ នៅទីនោះលោកតែងប្រជុំគ្នាពេលទំនេរ ដូចជា ការញ៉ាំកាហ្វេ ហូបនំបញ្ចុក កៀរគរមនុស្សឲ្យមកចូលរួមហែហមលោក សម រង្ស៊ី ចូលស្រុកខ្មែរ។ ទោះយ៉ាងណាលោកថា មិនមានមនុស្សរាប់លាននាក់គ្រោងអមដំណើរលោក សម រង្ស៊ី ដូចអ្វីដែលលោក សម រង្ស៊ី បានអះអាងនោះទេ។
លោកថ្លែងថា៖ «កត្តាដែលគាត់មិនអាចចូលមកច្រើនដោយសារម្នាក់ៗគាត់ខំប្រឹងធ្វើការ បើគាត់មកចូលរួមគាត់ខាតធ្វើការ។ តើអ្នកណាទៅចិញ្ចឹមគ្រួសារគាត់ អ៊ីចឹងការដែលថាមករាប់សែនរាប់លាននោះជាការបំប៉ោងតួលេខទេ ការឃោសនាអកុសល និងជាការបោកប្រាស់ទេ»។
លោកបញ្ជាក់ថា ការដែលលោកសម្រេចចិត្តចូលមកសារភាពនេះ ដោយសារតែលោកនាយករដ្ឋមន្ត្រី ហ៊ុន សែន បើកចិត្តទូលាយមិនប្រកាន់ទោសពៃរ៍ ហើយដោយសារតែលោកនាយករដ្ឋមន្ត្រីយល់ឃើញថា អ្នកដែលប្រកាសគាំទ្រដំណើរវិលត្រឡប់របស់លោក សម រង្ស៊ី គឺត្រូវបានលោក រង្ស៊ី លោក អេង ឆៃអ៊ាង និងលោកស្រី មូរ សុខហួរ បោកប្រាស់។ លោកបន្តថា អ្នកដែលរត់ភៀសខ្លួនទៅថៃភាគច្រើនបានត្រឡប់មកវិញហើយនៅសល់តែតិចតួចប៉ុណ្ណោះ។
លោកថ្លែងថា៖ «ខ្ញុំសូមអំពាវនាវដល់សកម្មជនដែលគាំទ្រគណបក្សសង្គ្រោះជាតិទាំងអស់ដែលធ្លាប់ចាញ់បោកគណបក្សសង្គ្រោះជាតិសូមឱ្យវិលមកជួបជុំគ្រួសារវិញមក ហើយសម្ដេចអគ្គមហាសេនាបតីតេជោ ហ៊ុន សែន គាត់មិនប្រកាន់ទោសពៃរ៍ទេ មករស់នៅដោយសុខសប្បាយទៅ»។
លោកថា លោកមានការស្ដាយក្រោយដែលបានធ្វើនូវទង្វើខុសឆ្គងកន្លងមក ដូចជា ការបង្ហោះសារមានខ្លឹមសារប៉ះពាល់ការដឹកនាំរបស់លោក ហ៊ុន សែន។
លោក តោ និមល យល់ថាជីវិតនយោបាយរបស់លោក សម រង្ស៊ី កំពុងដើរដល់ទីទាល់ច្រកហើយ។ លោក សម រង្ស៊ី នឹងបាត់បង់ប្រជាប្រិយភាព បើសិនជាលោកបន្តញុះញង់ និងបោកប្រាស់បន្តទៀត។
ជាមួយគ្នានេះមនុស្សជំនិតរបស់លោក កឹម សុខា ប្រធានគណបក្សសង្គ្រោះជាតិដែលត្រូវបានរំលាយបានសរសេរនៅលើទំព័រហ្វេសប៊ុករបស់ខ្លួន ដោយមានសារដែលលោកថា ជាសាររបស់លោក កឹម សុខា។
លោក មុត ចន្ថា សរសេរថា៖ «ខ្ញុំនឹងមិនធ្វើអ្វីបង្កឱ្យមានចលាចល និងភាពវឹកវរដល់ជាតិរបស់ខ្ញុំដែលខ្លួនខ្ញុំរស់នៅក្រោមដំបូលដែរនោះទេ។ ខ្ញុំមិនដែលនឹកចង់ ឬពុំដែលមានបំណងចាកចេញពីប្រទេសកំណើតរបស់ខ្ញុំម្តងណាឡើយ ព្រោះខ្ញុំបានជ្រើសរើសយកប្រទេសរបស់ខ្ញុំជាដំបូលតែមួយដែលខ្ញុំត្រូវរស់នៅ និងជាមូលដ្ឋាននៃជីវភាពនយោបាយរបស់ខ្ញុំ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិយល់ថាការចេញសារភាពរបស់លោកនិមល និងភរិយាគឺហាក់ដូចជារឿងសាមញ្ញមួយនៅក្នុងនយោបាយកម្ពុជាតាំងពីឆ្នាំ ១៩៩៣ មកម្ល៉េះ។
លោកថ្លែងថា៖ «យើងចាត់ទុកជារឿងធម្មតាមួយ ជាដំណើរការប្រក្រតីនៃរបៀបនយោបាយខ្មែរយើង។ ចំណុចទី ២ ក៏អាចបង្ហាញពីចំណុចខ្លាំងនៃគណបក្សប្រជាជនដែរ ដែលចេះប្រមូលកម្លាំងទាំងអស់ ទោះបីជាពួកគេធ្លាប់ប្រឆាំងក្ដី។ ចំណុចពិសេសរបស់គណបក្សប្រជាជនគឺពូកែប្រមូលមនុស្សនោះឯង ឱ្យមកនៅក្រោមឆត្ររបស់គណបក្សប្រជាជនកម្ពុជា»។
លោកបន្ថែមថា លោក តោ និមល មិនប្រាកដថាជាអ្នកប្រឆាំងទេ ប៉ុន្តែអាចជាធនធានគណបក្សប្រជាជនដែលជាយុទ្ធសាស្ត្រមួយដែលធ្វើឱ្យគណបក្សប្រជាជនរឹងមាំ។
លោកថ្លែងថា៖ «យើងមើលលើអន្តរជាតិមិនសូវចាប់អារម្មណ៍លោក សម រង្ស៊ី ទេ គេកំពុងចាប់អារម្មណ៍លើលោក កឹម សុខា ថាតើដំណើរទៅមុខទៀតយ៉ាងណាដែរ សម្រាប់លោក កឹម សុខា ហើយទី ២ អ្នកគាំទ្រមិនផ្កាប់មុខគាត់ពិចារណាឡើងវិញ»។
លោកថា អ្នកគាំទ្រលោក សម រង្ស៊ី និងអតីតបក្សប្រឆាំង មិនមែនដោយសារលោក សម រង្ស៊ី ឬបក្សប្រឆាំងមានគោលនយោបាយល្អទេ ប៉ុន្តែដោយសារពួកគេ ជួបរឿងរ៉ាវអយុត្តិធម៌ក្នុងសង្គម។ ដើម្បីទាក់ទាញការគាំទ្រលោកថា គណបក្សកាន់អំណាចគួរតែដោះស្រាយបញ្ហាសង្គមដែលលោកចាត់ទុកថាជា «ជំងឺរ៉ាំរ៉ៃ»។
លោកថា៖ «អ៊ីចឹងរដ្ឋាភិបាលភារកិច្ចសំខាន់របស់គាត់គឺត្រូវធ្វើម៉េចដោះស្រាយបញ្ហាអយុត្តិធម៌សង្គមដែលគេមើលឃើញច្បាស់នឹងភ្នែក ដែលទាំងអស់គ្នាទទួលស្គាល់ថាជាបញ្ហា នោះគឺត្រូវនាំគ្នាដោះស្រាយឱ្យអស់»។
ប៉ុន្តែលោកស្រី មូរ សុខហួរ អតីតអនុប្រធានអតីត CNRP បញ្ជាក់ថា៖ «ជាការសារភាពដោយបង្ខំដែលមិនឆ្លុះបញ្ចាំងពីការពិត»៕
