The Phnom Penh Post Search

Search form




Logo of Phnom Penh Post newspaper Phnom Penh Post - សកម្មជន​អតីត​បក្សប្រឆាំង​ម្នាក់ ​សុំ​តុលាការ​បន្ថយទោស​រឿង​រិះគន់​អគារ​បាក់​ធ្វើឲ្យ​ស្លាប់​មនុស្ស

សកម្មជន​អតីត​បក្សប្រឆាំង​ម្នាក់ ​សុំ​តុលាការ​បន្ថយទោស​រឿង​រិះគន់​អគារ​បាក់​ធ្វើឲ្យ​ស្លាប់​មនុស្ស

Content image - Phnom Penh Post
នគរបាល​នាំខ្លួន​ជនជាប់ចោទ​ ម៉ៃ ហុងស្រៀង មកកាន់​សាលាឧទ្ធរណ៍​កន្លងមក​។ រូបថត ហ្វេសប៊ុក

សកម្មជន​អតីត​បក្សប្រឆាំង​ម្នាក់ ​សុំ​តុលាការ​បន្ថយទោស​រឿង​រិះគន់​អគារ​បាក់​ធ្វើឲ្យ​ស្លាប់​មនុស្ស

ភ្នំពេញៈ អតីត​សកម្មជន​នៃ​អតីត​បក្ស​សង្គ្រោះ​ជាតិ​ម្នាក់​នៅ​ខេត្ត​ព្រះសីហនុ​បាន​សុំ​ចៅក្រម​សាលាឧទ្ធរណ៍​ឲ្យ​បន្ថយទោស​ដល់​រូបគេ​កាលពី​ម្សិលមិញ​ពាក់ព័ន្ធ​ការបង្ហោះ​សារ​ប្រើពាក្យ​រិះគន់​រាជរដ្ឋាភិបាល​ក្នុងអំឡុង​ខែ​ឧសភា ឆ្នាំ​ ២០១៩ ដែល​បាន​ប្រព្រឹត្ត​នៅ​រាជធានី​ភ្នំពេញ ហើយ​ត្រូវ​បាន​សាលាដំបូង​រាជធានី​ភ្នំពេញ​ផ្តន្ទាទោស​ ១៨ ​ខែ​។

ជនជាប់ចោទ​ឈ្មោះ ម៉ៃ ហុងស្រៀង បាន​ឆ្លើយ​ក្នុង​សវនាការ​ពី​ម្សិលមិញ​ថា ពាក្យពេចន៍​ដែល​គាត់​បាន​ប្រើ​នៅក្នុង​ហ្វេសបុក​របស់គាត់​គឺ​គាត់​កូពី​មកពី​គេ​ទេ​ហើយ​គាត់​បាន​ចែករំលែក​បន្តទៀត​។ ទោះយ៉ាងណា គាត់​ធ្វើ​នេះ​គ្មាន​ចេតនា​ក្នុង​ន័យ​រិះគន់​ណាមួយ​ដល់​រដ្ឋាភិបាល​ទេ​។

ជនជាប់ចោទ​ថ្លែងថា​៖ «​បទចោទ​នេះ ខ្ញុំ​ព្រម​ទទួល​យក​តែ​ខ្ញុំ​សុំ​តុលាការ​បន្ថយទោស​ដល់​ខ្ញុំ​ដើម្បី​ឆាប់​បាន​ចេញ​ទៅ​ព្យាបាល ពីព្រោះ​ខ្ញុំ​កំពុង​មាន​ជំងឺ​កៀបសរសៃ​ជើង​»​។

នៅក្នុង​បន្ទប់​សវនាការ​កាលពី​ម្សិលមិញ​លោកស្រី​ចៅក្រម ចាន់ ម៉ាឌីណា ប្រធាន​ក្រុមប្រឹក្សា​ជំនុំជម្រះ​បាន​អាន​អង្គហេតុ​នៅ​ចំពោះមុខ​ជន​ជាប់ចោទ​ថា ការផ្តើម​ឲ្យ​មាន​ការចោទប្រកាន់ និងផ្តន្ទាទោស​នេះ ដោយសា​កាលពី​អំឡុង​ខែ​កក្កដា ឆ្នាំ​ ២០១៩ ជន​ជាប់ចោទ​ឈ្មោះ ម៉ៃ ហុងស្រៀង អាយុ ៣៨ ​ឆ្នាំ​ បាន​ធ្វើ​សកម្មភាព​យ៉ាងសកម្ម​ដោយ​បាន​បង្ហោះ​សារ​ក្នុងន័យ​ប្រមាថ និង​ប្រើ​ពាក្យពេចន៍​រិះគន់​ដល់​ថ្នាក់ដឹកនាំ និង​តាមរយៈ​បណ្តាញ​ទំនាក់ទំនង​សង្គម​ហ្វេសប៊ុក​។

លោកស្រី​ចៅក្រម​បាន​ថ្លែង​ឲ្យ​ដឹង​តាម​អង្គហេតុ​ថា ក្រោយពី​មាន​ការស្រាវជ្រាវ​របស់​នាយកដ្ឋាន​ប្រឆាំង​បទល្មើស​បច្ចេកវិទ្យា​នៃ​ក្រសួងមហាផ្ទៃ​មក សមត្ថកិច្ច​បាន​ចាប់ខ្លួន​ជនជាប់ចោទ​នៅតាម​បណ្ដោយ​ផ្លូវ​លេខ ២០០៤ ខណ្ឌ​ពោធិ៍សែនជ័យ រាជធានី​ភ្នំពេញ ក្រោយ​ពេលដែល​ជនជាប់ចោទ​រត់គេចខ្លួន​ពី​ការឡោមព័ទ្ធ​របស់​សមត្ថកិច្ច​នៅ​ខេត្ត​ព្រះសីហនុ​។

យោងតាម​អង្គ​ហេតុនេះ​បាន​បញ្ជាក់​ថា​លោក ម៉ៃ ហុងស្រៀង បាន​ប្រើពាក្យ​នៅក្នុង​សារ​ដែល​មានន័យថា​៖ «​អ្នក​ដែល​ធ្វើ​ឲ្យ​អគារ​នៅ​ខេត្ត​ព្រះសីហនុ​បាក់​សង្កត់​មនុស្ស​ស្លាប់​បែរជា​ឡើងបុណ្យ ឡើង​ស័ក្តិ​ទៅវិញ​»​។ រួមទាំង​មាន​បង្ហោះ​សារ​រិះគន់​ដែល​ប្រើពាក្យ​ធ្ងន់ៗ​មួយ​ចំនួន​ទៀត​ទៅលើ​ស្ថាប័ន​ក្រសួង​ក្នុង​ជួរ​រាជរដ្ឋាភិបាល​​កម្ពុជា​ផង​។

លោកស្រី​ចៅក្រម ចាន់ ម៉ាឌីណា បាន​ឲ្យ​ដឹង​ដោយ​យោងតាម​អង្គ​ហេតុថា សំណុំ​រឿងនេះ​ត្រូវបាន​សាលាដំបូង​រាជធានី​ភ្នំពេញ​បើកសវនាការ​នៅ​ថ្ងៃទី​ ២៩ កញ្ញា ឆ្នាំ ២០១៩ និង ប្រកាស​សាលក្រម​នៅ​ថ្ងៃទី ១០ ខែ តុលា ឆ្នាំ​ ២០១៩ ​ដោយ​ចោទ​បទ​ញុះញង់​ឲ្យ​មាន​អំពើ​ឧក្រិដ្ឋ​ជាអាទិ៍​ឲ្យ​ជាប់​ពន្ធនាគារ ១ ​ឆ្នាំកន្លះ​តាម​មាត្រា​ ៤៩៤ ​និង​ ៤៩៦ ​នៃ​ក្រមព្រហ្មទណ្ឌ ហើយ​បទចោទ ១ ​បទល្មើស​ទៀត​គឺ​ញុះញង់​ធ្វើឲ្យ​មានការ​រើសអើង​ត្រូវ​បាន​ទម្លាក់ចោល​។

លោក អ៊ឹម សុផាន តំណាង​មហាអយ្យការ​សន្និដ្ឋាន​ថា តាមរយៈ​ពេល​សួរដេញដោល​គឺ​ជនជាប់ចោទ​បាន​ឆ្លើយ​ដោយ​ទទួល​ដឹង​កំហុស តែ​រូបគេ​បាន​សុំ​ដល់​ក្រុមប្រឹក្សា​ជំនុំជម្រះ​ឲ្យ​បន្ថយទោស​ដល់​គាត់ ។

លោក​ សុផាត ថ្លែងថា​៖ «​ដូច្នេះ​ខ្ញុំ​ទុក​ជូន​ក្រុមប្រឹក្សា​ជំនុំជម្រះ​ពិចារណា តាមច្បាប់​»​។

លោក កែត ឃី មេធាវី ការពារ​សិទ្ធិ​ឲ្យ​ជនជាប់ចោទ​បាន​សន្និដ្ឋាន​ថា ក្រោយពី​កូនក្តី​លោក​ជាប់​ក្នុង​ពន្ធនាគារ​អស់​រយៈពេល​ជាង​ ៥ ​ខែ​មក គឺ​រូបគេ​បានដឹង​កំហុស​ហើយ ហើយ​គេ​ប្តឹង​ទាស់​មក​សាលាឧទ្ធរណ៍​នេះ​គឺ​បំណង​សុំ​តុលាការ​បន្ថយទោស​ដល់​គាត់​។

លោក​ថ្លែងថា​៖ «​តាម​មាត្រា ៤៩៥, ៤៩៦​ នៃ​ក្រមព្រហ្មទណ្ឌ​គឺកំណត់​ទោស​ពី​ ៦ ​ខែ​ទៅ ២ ​ឆ្នាំ ។​ដូច្នេះ​ខ្ញុំ​សុំ​តុលាការ​បន្ថយទោស​តាម​ការស្នើសុំ​របស់គាត់​ផង​»​។ លោក​មេធាវី​បាន​ឲ្យ​ដឹងថា ករណី​កូនក្តី​របស់លោក​នេះ លោក​សង្ឃឹម​ថា​តុលាការ​នឹង​បន្ថយទោស​ដល់​កូនក្តី​របស់លោក​។ ប៉ុន្តែ​ការសម្រេច​បន្ថយទោស​ ឬ​មិន​បន្ថយទោស​គឺជា​ឆន្ទានុសិទ្ធិ​របស់​ចៅក្រម​។ ក្រោយ​ជំនុំជម្រះ​លោកស្រី​ចៅក្រម​ ចាន់ ម៉ាឌីណា ថ្លែងថា​សាលដីកា​នេះ​នឹង​ប្រកាស​នៅ​ថ្ងៃទី​ ២៨ មករា​៕

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។