The Phnom Penh Post Search

Search form




Logo of Phnom Penh Post newspaper Phnom Penh Post - សកម្មជន​តវ៉ា​ប្រឆាំង​ការ​ចាប់​ផ្សឹក​ និង​ឃុំ​សង្ឃ​ខ្មែរ​ក្រោម​ពីរ​អង្គ

សកម្មជន​តវ៉ា​ប្រឆាំង​ការ​ចាប់​ផ្សឹក​ និង​ឃុំ​សង្ឃ​ខ្មែរ​ក្រោម​ពីរ​អង្គ

អតីត​សកម្មជន​ព្រះសង្ឃ​ខ្មែរ​កម្ពុជា​ក្រោម​ពីរ​អង្គ​ត្រូវ​បាន​សមត្ថកិច្ច​​ចាប់​ផ្សឹក និង​នាំ​ខ្លួន​កាលពី​ថ្ងៃ​សៅរ៍។
អតីត​សកម្មជន​ព្រះសង្ឃ​ខ្មែរ​កម្ពុជា​ក្រោម​ពីរ​អង្គ​ត្រូវ​បាន​សមត្ថកិច្ច​​ចាប់​ផ្សឹក និង​នាំ​ខ្លួន​កាលពី​ថ្ងៃ​សៅរ៍។ រូបថត អង្គការ​អាដហុក

សកម្មជន​តវ៉ា​ប្រឆាំង​ការ​ចាប់​ផ្សឹក​ និង​ឃុំ​សង្ឃ​ខ្មែរ​ក្រោម​ពីរ​អង្គ

ភ្នំពេញៈ បណ្តាញ​ព្រះសង្ឃ​ខ្មែរ​កម្ពុជា​ក្រោម និស្សិត និង​ប្រជាសហគមន៍​ប្រមាណ ៨០ នាក់ កាលពី​ម្សិលមិញ​បាន​ប្រមូល​ផ្តុំ​គ្នា​នៅ​មុខ​សាលា​សង្កាត់​កាកាប ខណ្ឌ​ពោធិ៍សែនជ័យ​ដើម្បី​ទាមទារ​ឲ្យ​ដោះលែង​អតីត​សកម្មជន​ព្រះសង្ឃ​ខ្មែរ​ក្រោម​ពីរ​រូប​ដែល​ត្រូវ​បាន​អនុគណ​ចាប់​ផ្សឹក​បន្ទាប់ពី​ឆែកឆេរ​ក្នុង​កុដិ​រកឃើញ​នូវ​វត្ថុតាង​ខុស​ធម៌​វិន័យ​ហើយ​ត្រូវ​បាន​អាជ្ញាធរ​ឃាត់​ខ្លួន​ដើម្បី​បញ្ជូន​ទៅ​តុលាការ។

អតីត​ព្រះសង្ឃ​ខ្មែរ​កម្ពុជា​ក្រោម​ទាំង​ពីរ​រូប​​នោះ​មាន​ឈ្មោះ ដាវ ទេព អាយុ ២៨ ឆ្នាំ និង​ ជា វណ្ណដា អាយុ ៣០ ឆ្នាំ​គង់​នៅ​កុដិ​លេខ ៤ ក្នុង​វត្ត​អង្គតាមិញ​ហៅ​វត្ត​គោក​ចំបក់​ស្ថិត​ក្នុង​ភូមិ​គោក​ចំបក់​សង្កាត់​ចោមចៅ ខណ្ឌ​ពោធិ៍សែនជ័យ និង​ត្រូវ​បាន​ចាប់​ផ្សឹក​ដោយ​អនុគណ ខណ្ឌ​ពោធិ៍សែនជ័យ​នៅ​វត្ត​ជម្ពូវ័ន​កាលពី​ល្ងាច​ថ្ងៃ​សៅរ៍​ហើយ​ត្រូវ​បាន​ឃុំ​ខ្លួន​សួរ​នាំ​នៅ​សាលា​សង្កាត់​កាកាប។

ព្រះតេជគុណ ថាច់ ហាសំអាង ព្រះចៅអធិការ​វត្ត​សាមគ្គីរង្ស៊ី​ដែល​ចូលរួម​តវ៉ា​នោះ​មាន​សង្ឃដីកា​ថា​ការ​ឆែកឆេរ​រក​ភ័ស្តុតាង​រហូត​ឈាន​ដល់​ការ​ចោទប្រកាន់​លើ​អតីត​សង្ឃ​ខ្មែរ​ក្រោម​នេះ​គឺជា​ផែនការ​រៀបចំ​ និង​គ្រោង​ទុក​ជា​មុន​របស់​សមត្ថកិច្ច​ដែល​មាន​ចេតនា​ក្នុង​ការ​គាបសង្កត់​លើ​ព្រះសង្ឃ​ទាំង​ពីរ​អង្គ​នោះ​ព្រោះ​តែ​កន្លង​មក​សង្ឃ​ទាំង​ពីរ​អង្គ​មាន​ភាព​សកម្ម​ក្នុង​ការ​ចូលរួម​សកម្មភាព​សង្គម​ប្រឆាំង​នឹង​ការ​អះអាង​ដែល​ថា​ទឹកដី​កម្ពុជា​ក្រោម​ជា​របស់​វៀតណាម​រួម​នឹង​ការ​ចុះពិនិត្យ​បង្គោល​ព្រំដែន​ដែល​ត្រូវ​វៀតណាម​បោះ​ចូល​មក​ក្នុង​ទឹកដី​ខ្មែរ​។

ព្រះអង្គ​មាន​សង្ឃដីកា​​បន្ត​ថា​៖ «សុទ្ធតែ​ជា​គម្រោង​ការ​ចុះ​ត្រួតពិនិត្យ​មិន​មាន​ដីកា​ច្បាស់​លាស់​ទេ និង​មិន​មាន​វត្តមាន​របស់​ព្រះសង្ឃ​ទាំង​ពីរ​អង្គ​នៅ​ទី​នោះ​ទេ​គឺ​ធ្វើ​ឡើង​ស្ងាត់ៗ​តែ​ម្តង​ហើយ​ចំពោះ​បណ្តឹង​ចោទ​ពី​បទ​ហិង្សា​វិញ​នោះ​ក្មេង​វត្ត​ម្នាក់​មិន​មាន​បំណង​ប្តឹង​ទេ​ហើយ​បាន​សុំ​ដក​ពាក្យ​ប្តឹង​វិញ​តែ​សមត្ថកិច្ច​នៅ​តែ​មិន​ព្រម​ដោះលែង​នោះ​ទេ»។

អភិបាល​ខណ្ឌ​ពោធិ៍សែនជ័យ​លោក ហែម ដារិទ្ធ ដែល​បាន​ដឹកនាំ​គណៈ​បញ្ជាការ​ខណ្ឌ​ចុះ​ត្រួតពិនិត្យ​រដ្ឋបាល​ក្នុង​កុដិ​របស់​អតីត​ព្រះសង្ឃ​ខ្មែរ​កម្ពុជា​ក្រោម​ទាំង​ពីរ​រូប​នោះ​បាន​ឲ្យ​ដឹង​ថា​ប្រតិបត្តិការ​ចុះ​ឆែកឆេរ​នេះ​ធ្វើ​ឡើង​តាម​បណ្តឹង​របស់​ប្រជាពលរដ្ឋ និង​ក្មេង​វត្ត​ដែល​រស់នៅ​តំបន់​នោះ។

លោក​ថា៖ «តាម​សេចក្តី​រាយការណ៍​របស់​ប្រជាពលរដ្ឋ​ដែល​យើង​ចុះ​ទៅ​តែ​ទៅ​ដល់​ក្មេង​វត្ត​នៅ​ទី​នោះ​ក៏​ប្រាប់​ថា​លោក​ទាំង​នោះ​ធ្លាប់​គំរាម​សម្លាប់​ដោយ​ប្រើ​ដាវ​ កាំបិត​ អ៊ីចឹង​ដល់​ពេល​យើង​ឆែកឆេរ​ទៅ​ឃើញ​វត្ថុតាង​ខុស​ធម៌​វិន័យ​ច្រើន​ទៀត»។

ដើម​បណ្តឹង​ដែល​ជា​ក្មេងវត្ត​ម្នាក់​ដែល​បាន​ស្នាក់​នៅ​វត្ត​អង្គតាមិញ​ប្រមាណ ៥ ខែ បាន​រៀបរាប់​ដោយ​សុំ​មិន​បញ្ចេញ​ឈ្មោះ​ព្រោះ​ខ្លាច​បង្ក​ជា​បញ្ហា​ធំ​ថា​ខ្លួន​ពិតជា​ធ្លាប់​មាន​ប៉ះពារ​សម្តី​ជាមួយ​ព្រះសង្ឃ​មួយ​អង្គ​ក្នុង​ចំណោម​សង្ឃ​ទាំង​ពីរ​នោះ​កាលពី​ថ្ងៃ​ទី ២៥ ខែ​កក្កដា​ប៉ុន្តែ​មិន​ខ្លាំងក្លា​នោះ​ទេ​ហើយ​ក្រោយ​មក​នៅ​ថ្ងៃ​ទី ១ ខែ​សីហា ស្រាប់តែ​មាន​មន្ត្រី​ប៉ូលិស​មិន​ស្គាល់​អត្តសញ្ញាណ​មួយ​រូប​មក​បង្ខំ​​ខ្លួន​ឲ្យ​រៀបរាប់​ពី​ទំនាស់​នោះ និង​ជំរុញ​ឲ្យ​ដាក់​ពាក្យ​ប្តឹង​។

អតីត​ព្រះសង្ឃ​ខ្មែរ​ក្រោម​ត្រូវ​សមត្ថកិច្ច​រុញ​បញ្ចូល​ឡាន​ពី​ថ្ងៃ​សៅរ៍។
អតីត​ព្រះសង្ឃ​ខ្មែរ​ក្រោម​ត្រូវ​សមត្ថកិច្ច​រុញ​បញ្ចូល​ឡាន​ពី​ថ្ងៃ​សៅរ៍។ រូបថត អាដហុក

យុវជន​ដដែល​អះអាង​ថា៖ «ខ្ញុំ​មិន​ចង់​ប្តឹង​ទេ​តែ​ត្រូវ​ប៉ូលិស​បង្ខំ​​រហូត​ឈាន​ដល់​ការ​ចុះ​ហត្ថលេខា​ប្តឹង​ពី​ការ​គំរាម​កំហែង។ ខ្ញុំ​គិត​ថា​រឿង​នោះ​តិចតួច​ទេ​តែ​ក្រោយ​ដឹង​ថា​ព្រះសង្ឃ​ទាំង​ពីរ​ត្រូវ​បាន​ចាប់​ផ្សឹក និង​ឃុំ​ខ្លួន​ខ្ញុំ​ក៏​មក​សុំ​ដកពាក្យ​ប្តឹង​វិញ​តែ​សមត្ថកិច្ច​ថា​រឿង​នោះ​បញ្ជូន​ទៅ​តុលាការ​ហើយ»។

តាម​របាយការណ៍​ប៉ូលិស​ភ័ស្តុតាង​ដែល​ត្រូវ​បាន​ដកហូត​រួមមាន​ម្សៅស​មួយ​កញ្ចប់​ដែល​សមត្ថកិច្ច​សង្ស័យ​ថា​ជា​ថ្នាំញៀន កាំបិត ដាវ ដំបង ខោ​ក្នុង​ប្រុស និង​ស្រី បៀ ស្រោម​អនាម័យ​ ក្រដាស​កន្ទុយ​លេខ​ឆ្នោត ស៊ីឌី និង​ទូរស័ព្ទ​ចំនួន​បី​គ្រឿង។

អធិការ​ខណ្ឌ​ពោធិ៍សែនជ័យ លោក យឹម សារ៉ាន់ កាលពី​ម្សិលមិញ​បាន​បដិសេធ​ឆ្លើយតប​ជុំវិញ​ចំណាត់ការ​លើ​អតីត​ព្រះសង្ឃ​ទាំង​ពីរ​អង្គ​នោះ​ដោយ​អះអាង​ថា​កំពុង​ធ្វើ​ការងារ​នោះ។ ចំណែក​នាយ​ប៉ុស្តិ៍​សង្កាត់​កាកាប លោក សាន ប៉ែត មិន​អាច​ទាក់ទង​បាន​ទេ​។

មន្ត្រី​ស៊ើប​អង្កេត​នៃ​សមាគម​ខ្មែរ​កម្ពុជា​ក្រោម​ដើម្បី​សិទ្ធិ​មនុស្ស និង​អភិវឌ្ឍន៍ លោក សឺន ជុំសុធន បាន​ឲ្យ​ដឹង​នៅ​ក្រោយ​ពេល​ចូល​ជួប​ជាមួយ​មន្ត្រី​នគរបាល​នៅ​សង្កាត់​កាកាប​រួច​ថា​សមត្ថកិច្ច​បាន​សម្រេច​បញ្ជូន​សំណុំ​រឿង​ទៅ​តុលាការ​ហើយ​គ្រោង​ចោទ​អតីត​ព្រះសង្ឃ​ទាំង​ពីរ​នាក់​ពាក់ព័ន្ធ​នឹង​ការ​ប្រើប្រាស់ និង​ជួញដូរ​គ្រឿងញៀន​។

អនុប្រធាន​អង្កេត​សិទ្ធិ​មនុស្ស និង​ជំនួយ​ផ្នែក​ច្បាប់​នៃ​អង្គការ​អាដហុក លោក ណៃ វ៉ង់ដា ដែល​បាន​តាមដាន​ហេតុការណ៍​នេះ​បាន​ឲ្យ​ដឹង​ថា​បើ​ទោះបី​សមត្ថកិច្ច​ធ្វើការ​ឆែកឆេរ​តាម​បណ្តឹង​ក្មេងវត្ត​ក្តី​តែ​គប្បី​មាន​វត្តមាន​របស់​សាមីខ្លួន​នៅ​ទី​នោះ​ដើម្បី​បង្ហាញ​ពី​តម្លាភាព​ហើយ​ជាក់ស្តែង​ក្រោយ​ពេល​កើត​ហេតុ​ដើម​បណ្តឹង​អះអាង​ថា​ខ្លួន​មិន​មាន​បំណង​ប្តឹង​នោះ​ទេ​ព្រោះ​ជា​ជម្លោះ​ពាក្យ​សម្តី​តូចតាច​តែ​ប៉ុណ្ណោះ​។

លោក វ៉ង់ ​ដា មាន​ប្រសាសន៍​ថា​ក្នុង​រឿង​នេះ​សមត្ថកិច្ច​ហាក់​ដូចជា​បាន​បំពាន​លើ​ដែន​សមត្ថកិច្ច​របស់​ខ្លួន។

លោក​​បាន​បញ្ជាក់​ថា៖ «​ជាក់ស្តែង​នៅពេល​ឆែកឆេរ​ព្រះសង្ឃ​ទាំង​ពីរ​អង្គ​នោះ​កំពុង​និមន្ត​បិណ្ឌបាត​នៅ​ខាង​ក្រៅ​មិន​មាន​វត្តមាន​នៅ​ក្នុង​កុដិ​នោះ​ទេ។​ អ៊ីចឹង​វា​ពិបាក​ក្នុង​ការ​បង្ហាញ​ពី​ភាព​ស្អាតស្អំ​របស់​ខ្លួន​ប្រសិន​បើ​មាន​គេ​ថា​ខ្លួន​ដាក់​របស់របរ​ខុស​វិន័យ​ទាំងនោះ​»៕

អត្ថបទគួរចាប់អារម្មណ៍