The Phnom Penh Post Search

Search form

Logo of Phnom Penh Post newspaper Phnom Penh Post - សកម្មជន​បន្ត​ទាមទារ​ឲ្យ​ដោះលែង​អ្នក​ជាប់​ឃុំ




សកម្មជន​បន្ត​ទាមទារ​ឲ្យ​ដោះលែង​អ្នក​ជាប់​ឃុំ

សកម្មជន​បន្ត​ទាមទារ​ឲ្យ​ដោះលែង​អ្នក​ជាប់​ឃុំ

140211_01
សកម្មជន ដើរក្បួនតវ៉ាទាមទារឲ្យមានការដោះលែងអ្នកជាប់ឃុំ២១នាក់ថែមទៀត កាលពីថ្ងៃម្សិលមិញ ហេង ជីវ័ន

ភ្នំពេញៈ បាតុកម្ម​នៅ​ថ្ងៃ​ម្សិលមិញ​គាំទ្រ​ឲ្យ​ដោះលែង​អ្នក​ជាប់​ឃុំ​ដែល​ត្រូវ​បាន​ចាប់​ខ្លួន​ក្នុង​អំឡុង​បាតុកម្ម​កាល​ពី​ខែ​មុន​នោះ មាន​លក្ខណៈ​សន្តិវិធី​ជាង​បាតុកម្ម​ដែល​មនុស្ស ២១នាក់ ត្រូវ​បាន​ចាប់​ខ្លួន។

ការ​ដើរ​ដង្ហែ​ទៅ​ទីសក្ការៈ នៅ​មាត់​ទន្លេ ក្នុង​រាជធានី​ភ្នំពេញ ក្រសួង យុតិ្តធម៌ និង​សាលា​ឧទ្ធរណ៍ ពុំ​មាន​ការ​ធ្វើ​អន្តរាគមន៍​ពី​នគរបាល​ទេ ខណៈ​ដែល​បាតុករ​បាន​ប្រគល់​ញត្តិ និង​បង្ហោះ​ប៉េងប៉ោង និង​លែង​សត្វ​ចាប ដើម្បី​អំពាវនាវ​ឲ្យ​ដោះលែង​មនុស្ស​ទាំង ២១ នាក់ ដែល​នៅ​ជាប់​ឃុំ​នៅ​ឡើយ បន្ទាប់​ពី​មាន​ការ​ប៉ះទង្គិច​ជាមួយ​នឹង​អាជ្ញាធរ​នៅ​ក្នុង​បាតុកម្ម​ដែល​គាំទ្រ​កូដកម្ម​របស់​កម្មករ​កាល​ពី​ដើម​ខែ មករា។ ខណៈ​ដែល​អ្នក​គាំទ្រ​ប្រហែល ១២០ នាក់​ឈប់​នៅ​មុខ​សាលា​ឧទ្ធរណ៍ លោក អាត់ ធន ប្រធាន​សហជីព ស៊ីខៅឌូ បាន​ស្រែក​ថា៖ «ដោះលែង ដោះលែង ដោះលែង ដោយ​គ្មាន​លក្ខខណ្ឌ យើង​ត្រូវ​ការ​សេរីភាព! ថ្ងៃ​ស្អែក ជា​ថ្ងៃ​សវនាការ លើ​ពាក្យ​សុំ​ធានា​ឲ្យ​នៅ​ក្រៅ​ឃុំ​សម្រាប់​មនុស្ស​ទាំង ២១នាក់ ដែល​ជាប់​ឃុំ​នៅ​ឡើយ យើង​ជឿ​ជាក់​ថា សាលា​ឧទ្ធរណ៍​នឹង​ដោះលែង​ពួក​គេ​ឲ្យ​មាន​សេរីភាព»។

លោក ធន និង​សមាជិក​សហជីព ៩ នាក់ និង​អង្គការ​មិន​មែន​រដ្ឋាភិបាល​ជាច្រើន​បាន​ច្រៀង​ក្នុង​អំឡុង​ដើរ​ដង្ហែ​ដ៏​ខ្លី​ទៅ​កាន់​ទី​បូជា​នៃ​ព្រះពុទ្ធ​សាសនា ដែល​ព្រះសង្ឃ បាន​សូត្រ​ធម៌ មុន​ពេល​ក្រុម​នោះ​បាន​បង្ហោះ​ប៉េងប៉ោង និង​ដោះលែង​ចាប​ចំនួន ២៣ក្បាល តំណាង​ឲ្យ​មនុស្ស​ម្នាក់ៗ​ដែល​ត្រូវ​បាន​ចាប់​ខ្លួន​ក្នុង​អំឡុង​បាតុកម្ម​កាល ពី​ថ្ងៃ ទី២ និង ៣ ខែ មករា។ ក្នុង​នោះ​ពីរ​នាក់​ត្រូវ​បាន​អនុញ្ញាត​ឲ្យ​នៅ​ក្រៅ​ឃុំ កាល​ពី​ថ្ងៃ​សៅរ៍។

លោក​ស្រី Naly Pilorge ប្រធាន​អង្គការ លីកាដូ បាន​ថ្លែង​ថា បាតុកម្ម​ស្រដៀង​គ្នា​បាន​ធ្វើ​ឡើង​នៅ​ទីតាំង​យ៉ាង​តិច​ចំនួន ៤៥កន្លែង នៅ​កម្ពុជា​និង​នៅ​តាម​ទីក្រុង​ក្នុង​បណ្តា​ប្រទេស​ចំនួន ១៣។

Content image - Phnom Penh Post

នៅ​ក្នុង​សន្និសីទ​សារព័ត៌មាន​មុន​ពេល​ដើរ​ដង្ហែ លោក រ៉ុង ឈុន ប្រធាន​សហភាព​សហជីព​កម្ពុជា​បាន​ថ្លែង​ថា ប្រសិន​បើ​ចៅក្រម​បដិសេធ​ពាក្យ​សុំ​ធានា​នៅ​ក្រៅ​ឃុំ ហើយ​រដ្ឋាភិបាល​មិន​យល់​ព្រម​ដំឡើង​ប្រាក់​ឈ្នួល​អប្បបរមា​ទេ​នោះ សហជីព​នឹង​ធ្វើ​បាតុកម្ម​នៅ​តាម​ដង​ផ្លូវ។

លោក រ៉ុង ឈុន ប្រធាន​សហភាព​សហជីព​កម្ពុជា​បាន​ថ្លែង​ថា៖ «ប្រសិន​បើ​មិន​ដោះលែង​មនុស្ស ហើយ​រដ្ឋាភិបាល​មិន​ដំឡើង​ប្រាក់​ឈ្នួល​អប្បបរមា​ដល់ ១៦០ ដុល្លារ​ក្នុង​មួយ​ខែ​ទេ​នោះ ខ្ញុំ​នឹង​ដឹក​នាំ​មហា​បាតុកម្ម​ទូទាំង​ប្រទេស។ សកម្មជន​នៅ​រោងចក្រ​ត្រៀម​ដើរ​តាម​ថ្នាក់​ដឹក​នាំ​សហជីព​ក្នុង​មហា​បាតុកម្ម នៅ​ថ្ងៃ​បន្ទាប់»។

ក្នុង​ការ​ដើរ​ដង្ហែ​ដោយ​ឡែក​មួយ​កាល​ពី​ព្រឹក​ម្សិលមិញ ព្រះសង្ឃ សមាជិក​សហជីព និង​សកម្មជន​ដីធ្លី ១០០ រូប បាន​នាំ​ញត្តិ​ទាមទារ​ឲ្យ​ដោះលែង​បុរស​ទាំង ២១ នាក់ ដែល​នៅ​ជាប់​ឃុំ ហើយ​ឲ្យ​តុលាការ​លើក​ចោល​ការ​ចោទ​ប្រកាន់​ពី​បទ​បង្ក​ការ​ខូច​ខាត​ដោយ​មាន​ស្ថាន​ទម្ងន់​ទោស និង​អំពើ​ហិង្សា​ដោយ​មាន​ស្ថាន​ទម្ងន់​ទោស​ប្រឆាំង​នឹង​អ្នក​ទាំង ២៣។

អ្នក​ស្រី ប្រាក់ សុវណ្ណារី ប្រពន្ធ​លោក វន់ ពៅ ប្រធាន​សមាគម​ប្រជាធិបតេយ្យ​សេដ្ឋកិច្ច​ក្រៅ​ប្រព័ន្ធ​ដែល​ត្រូវ​បាន​ចាប់​ខ្លួន​ក្នុង​បាតុកម្ម​នៅ​មុខ​រោងចក្រ យ៉ាក ជីន បាន​ចូល​រួម​ជាមួយ​នឹង​ក្រុម​នេះ​ដែរ ដោយ​អះអាង​ថា ប្តី​របស់​អ្នក​ស្រី គ្មាន​កំហុស​ទេ។

អ្នក​ស្រី​បាន​បន្ត​ថា៖ «ខ្ញុំ​ចូល​រួម​ដើម្បី​ស្វែង​រក​យុតិ្តធម៌​ពី​ក្រសួង យុតិ្តធម៌ និង​សាលា​ឧទ្ធរណ៍។ គេ​ត្រូវ​តែ​ដោះលែង និង​លុប​ចោល ការ​ចោទ​ប្រកាន់​ប្រឆាំង​ប្តី​ខ្ញុំ និង​ជន​រងគ្រោះ ២០ នាក់​ផ្សេង​ទៀត ព្រោះ​គេ​គ្មាន​កំហុស​ទេ»។

លោក ស៊ុន លីហយ បុគ្គលិក ស៊ីខៅឌូ បាន​ថ្លែង​ថា ថ្នាក់​ដឹក​នាំ ស៊ីខៅឌូ និង​សហជីព​ដទៃ​ទៀត នឹង​ចូល​រួម​សវនាការ​លើ​ពាក្យ​សុំ​ធានា​ឲ្យ​នៅ​ក្រៅ​ឃុំ ដែល​នឹង​ធ្វើ​នៅ​ព្រឹក​នេះ៕ TK

អត្ថបទគួរចាប់អារម្មណ៍