The Phnom Penh Post Search

Search form

Logo of Phnom Penh Post newspaper Phnom Penh Post - សកម្មជន​បឹងកក់​ទៅ​ផ្តល់​បទ​ពិសោធ​នៅ​ថៃ

សកម្មជន​បឹងកក់​ទៅ​ផ្តល់​បទ​ពិសោធ​នៅ​ថៃ

សកម្មជន​បឹងកក់​ទៅ​ផ្តល់​បទ​ពិសោធ​នៅ​ថៃ

130611_06a
សកម្មជនស្ត្រីនៅបឹងកក់ ទៅដាក់ញត្តិនៅសាលាឧទ្ធរណ៍សុំដោះលែង យ៉ោម បុប្ផា ហុង មិនា

ភ្នំពេញៈ ម្ចាស់​ពាន​រង្វាន់​សិទ្ធិ​មនុស្ស និង​ភាព​ជា​អ្នក​ដឹក​នាំ​របស់​សហគមន៍​បឹងកក់ អ្នក​ស្រី ទេព វន្នី បាន​ចេញ​ដំណើរ​ទៅ​ប្រទេស​ថៃ​កាល​ពី​យប់​ម្សិលមិញ បន្ទាប់​ពី​បាន​នាំ​យក​ញតិ្ត​គាំទ្រ​ពី​បណ្ដា​អង្គការ​ក្រៅ​រដ្ឋាភិបាល ជាតិ​និង​អន្តរជាតិ​ចំនួន​៤២​ដែល​ស្នើ​សុំ​ឲ្យ​ដោះលែង​អ្នក​ស្រី យ៉ោម បុប្ផា ទៅ​ដាក់​សុំ​កិច្ច​អន្តរាគមន៍​ជា​ថ្មី ពី​ស្ថាប័ន​ជាតិ​កំពូលៗ។

អ្នក​ស្រី ប្រាប់​ថា អ្នក​ស្រី​ត្រូវ​អញ្ជើញ​ឲ្យ​ទៅ​ចូល​រួម​កម្មវិធី​សិក្ខា​សាលា​រយៈ​ពេល​៥​ថ្ងៃ​ស្តី​ពី«​ការ​ចែក​រំលែក​បទ​ពិសោធ​នៃ​ការ​តស៊ូ​មតិ​ដើម្បី​ការពារ​សិទ្ធិ​និង​ដីធ្លី» នៅ​ក្នុង​ទី​ក្រុង​បាងកក​ប្រទេស​ថៃ ចាប់​ពី​ថ្ងៃ​ទី១១ ដល់​ថ្ងៃ​ទី១៥ ខែ​មិថុនា ប៉ុន្តែ​អ្នក​ស្រី​អះអាង​ថា គាត់​នឹង​សុំ​អ្នក​រៀប​ចំ​អង្គ​សិក្ខា​សាលា​វិល​ត្រឡប់​មក​វិញ​ឲ្យ​បាន​មុន​ការ​ប្រកាស​សាល​ដីកា​របស់​សាលា​ឧទ្ធរណ៍ លើ​ករណី អ្នក​ស្រី យ៉ោម បុប្ផា។

អ្នក​ស្រី​ថ្លែង​ថា៖​«​ខ្ញុំ​បា​នត្រៀម​យក​បញ្ហា​ការ​រំលោភ​សិទ្ធិ​ដីធ្លី និង​ការ​តស៊ូ​មតិ​តាម​ផ្លូវ​ច្បាប់​ដោយ​អហិង្សា​ទៅ​ចែក​រំលែក​ក្នុង​សិក្ខាសាលា​នោះ និង​អំពាវនាវ​ឲ្យ​ជួយ​គាំទ្រ​ការ​ដោះលែង​អ្នក​ស្រី យ៉ោម បុប្ផា ផង​ដែរ»។

មុន​ចេញ​ទៅ​ប្រទេស​ថៃ អ្នក​ស្រី​និង​សមាជិក​ជាង​២០​នាក់ បាន​នាំ​គ្នា​ទៅ​សុំ​កិច្ច​អន្តរាគមន៍​ដោះ​លែង​អ្នក​ស្រី យ៉ោម បុប្ផា ជា​ថ្មី​ទៀត ពី​ស្ថាប័ន​រដ្ឋសភា ទី​ស្ដី​ការ​គណៈ​រដ្ឋ​មន្ត្រី និង​នៅ​សាលា​ឧទ្ធរណ៍ ដោយ​ភ្ជាប់​ជាមួយ​នូវ​សំណើ​គាំទ្រ​ពី​អង្គការ​ក្រៅ​រដ្ឋាភិបាល​ជាតិ​និង​អន្តរជាតិ​ចំនួន​៤២ ដែល​បាន​ឃ្លាំ​មើល​យ៉ាង​ដិត​ដល់​ក្នុង​ករណី​នេះ។

អ្នក​ស្រី ថ្លែង​ថា៖«បើ​សិន​ជា​អ្នក​ស្រី យ៉ោម បុប្ផា ពិត​ជា​បាន​ប្រព្រឹត្ត​ដូច​ការ​ចោទ​ប្រកាន់ ម៉្លេះ មិន​មាន​អង្គការ​ក្រៅ​រដ្ឋាភិបាល​ចេញ​មុខ​គាំទ្រ​ទេ ហើយ​គាត់​ក៏​មិន​ត្រូវ​គេ​ចាត់​ទុក​ជា​អ្នក​ទោស​មនសិការ​នោះ​ដែរ»។

ពាក់​ព័ន្ធ​នឹង​ករណី​នេះ ក្រុម​គាំទ្រ​អ្នក​រត់​ម៉ូតូ​ឌុប លោក ឯ សុភាស់ ប្រធាន​សមាគម​រួម​គ្នា​ដើម្បី​អភិវឌ្ឍន៍​កម្ពុជា ចាត់​ទុក​ការ​ដាក់​ញត្តិ​នេះ​ថា ជា​ការ​ដាក់​សម្ពាធ​ទៅ​លើ​រដ្ឋាភិបាល ពិសេស​តុលាការ​ដែល​ជា​ស្ថាប័ន​ឯករាជ្យ។

លោក នាង ហៃ មេធាវី​ការពារ​ជន​រងគ្រោះ វ៉ាត ថៃ​សេង និង ង៉ែត ចិត្រ ក៏​សម្ដែង​ក្ដី​បារម្ភ​ទៅ​លើ​ការ​ដើរ​ដាក់​ញត្តិ​សុំ​ឲ្យ​មាន​ការ​ដោះ​លែង [យ៉ោម បុប្ផា]​របស់​ក្រុម​ស្ត្រី​នៃ​សហគមន៍​បឹងកក់ ដោយ​បាន​ថ្លែង​ថា៖ «វា​អាច​ប៉ះ​ពាល់​ដល់​ផល​ប្រយោជន៍​កូន​ក្ដី​របស់​ខ្ញុំ​ខ្លះៗ​ដែរ»។

ទោះ​ជា​យ៉ាង​ណា​លោក​បញ្ជាក់​ថា៖«ខ្ញុំ​មាន​ជំនឿ​លើ​តុលាការ​ព្រោះ​តុលាការ​ជា​ស្ថាប័ន​ឯករាជ្យ​រាល់​ការ​សម្រេច​សេចក្ដី​គឺ​យោង​ទៅ​លើ​អង្គ​ច្បាប់ និង​ធាតុ​ផ្សំ​នៃ​បទ​ល្មើស ដែល​រួម​បញ្ចូល​អង្គហេតុ​និង​ភ័ស្តុតាង​មក​បញ្ជាក់ ហើយ​យើង​មាន​អំណះ​អំណាង​គ្រប់​គ្រាន់​សម្រាប់​ដាក់​បន្ទុក​លើ​ជន​ជាប់​ចោទ»។

អ្នក​ស្រី យ៉ោម បុប្ផា ត្រូវ​ចាប់​ខ្លួន​កាល​ពី​ខែ​កញ្ញា​ឆ្នាំ​មុន ពី​បទ​ប្រើ​ហិង្សា​ដោយ​ចេតនា​និង​មាន​ស្ថាន​ទម្ងន់​ទោស​ប្រព្រឹត្ត​លើ​បុរស​អ្នក​រត់​ម៉ូតូ​ឌុប​ពីរ​នាក់​កាល​ពី​ខែ​សីហា ហើយ​ត្រូវ​តុលាការ​រាជធានី​ភ្នំពេញ​ផ្តន្ទាទោស​ឲ្យ​ជាប់​ពន្ធនាគារ​ចំនួន​បី​ឆ្នាំ។ កាល​ពី​សប្តាហ៍​មុន សាលា​ឧទ្ធរណ៍​បាន​ដំណើរការ​សាក​សួរ​ដេញ​ដោល​រយៈ​ពេល​ជាង​បី​ម៉ោង​លើ​អង្គ​សេចក្ដី​នៃ​ករណី យ៉ោម បុប្ផា ហើយ​គ្រោង​នឹង​បន្ត​នីតិវិធី​ជំនុំ​ជម្រះ​លើ​ករណី​នេះ​ជា​បន្ត​ទៀត នៅ​ថ្ងៃ​សុក្រ​សប្ដាហ៍​នេះ៕

អត្ថបទគួរចាប់អារម្មណ៍