The Phnom Penh Post Search

Search form

Logo of Phnom Penh Post newspaper Phnom Penh Post - សកម្មជន​ប៉ង​ដើរ​តវ៉ា​ឲ្យ​ដោះលែង​អ្នក​ជាប់​ឃុំ​អាច​ប្រឈម​នឹង​ប៉ូលិស




សកម្មជន​ប៉ង​ដើរ​តវ៉ា​ឲ្យ​ដោះលែង​អ្នក​ជាប់​ឃុំ​អាច​ប្រឈម​នឹង​ប៉ូលិស

សកម្មជន​ប៉ង​ដើរ​តវ៉ា​ឲ្យ​ដោះលែង​អ្នក​ជាប់​ឃុំ​អាច​ប្រឈម​នឹង​ប៉ូលិស

ភ្នំពេញៈ សកម្មជន​អាច​នឹង​ជួប​បញ្ហា​ជាមួយ​នឹង​សមត្ថកិច្ច​នគរបាល​នៅ​ព្រឹក​នេះ ក្នុង​ការ​ព្យាយាម​ធ្វើ​ការ​តវ៉ា​ដែល​គ្រោង​ធ្វើ​នៅ​មាត់​ទន្លេ​និង ការ​ហែ​ក្បួន​ទៅ​ស្ថានទូត​មួយ​ចំនួន​នៅ​ថ្ងៃ​សាមគ្គី​អន្តរជាតិ​ជាមួយ កម្ពុជា។

ជា​ការ​ឆ្លើយ​តប​តាម​ទូរស័ព្ទ​ជាមួយ ភ្នំពេញ ប៉ុស្តិ៍ ពី​ម្សិលមិញ អ្នក​នាំ​ពាក្យ​កង​រាជ​អាវុធហត្ថ​លើ​ផ្ទៃ​ប្រទេស​លោក ខេង ទីតូ បាន​ថ្លែង​ថា អ្នក​គាំទ្រ​មនុស្ស​ដែល​ត្រូវ​ឃុំ​ខ្លួន ២១នាក់ ក្នុង​អំឡុង​កូដកម្ម​បាតុកម្ម​របស់​កម្មករ​កាត់ដេរ កាល​ពី​ដើម​ខែ មករា ពុំ​មាន​សិទ្ធិ​ហែ​ក្បួន​ទៅ​ដាក់​ញត្តិ​នៅ​ស្ថានទូត​នានា​ទេ។ លោក​ថ្លែង​ថា៖ «កង​នគរបាល​អាច​នឹង​បញ្ឈប់​ពួក​គេ»។

លោក​បន្ត​ថា តំណាង​អង្គការ​ក្រៅ​រដ្ឋាភិបាល និង​អង្គការ​ដទៃ​ទៀត​មាន​សេរីភាព​ដាក់​ញត្តិ ប៉ុន្តែ ពួក​គេ​មិន​អាច​ហែ​ក្បួន​បាន​ទេ។

បន្ទាប់​ពី​សន្និសីទ​កាសែត​នៅ​ម៉ោង ៩ ព្រឹក​ម្សិលមិញ នៅ​សណ្ឋាគារ អឹមភើរៀ សកម្មជន​សហជីព ក្រុម​គ្រួសារ​នៃ​អ្នក​ជាប់​ឃុំ​និង​សកម្មជន​ដទៃ​ទៀត​ជាង ៣៥០ នាក់ គ្រោង​នឹង​ដើរ​ក្បួន​ទៅ​ព្រះអង្គ ដងកើ មុខ​បរម​រាជវាំង ដើម្បី​បន់ស្រន់​និង​បង្ហោះ​ប៉េងប៉ោង សុំ​ឲ្យ​ពួក​គេ​ទាំង ២១ នាក់​នៅ​ក្រៅ​ឃុំ​គឺ​មួយ​ថ្ងៃ​មុន​សវនាការ។ នេះ​បើ​តាម​លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​បាន​ថ្លែង​កាល​ពី​ម្សិលមិញ។

លោក ស៊ីណា ថ្លែង​បន្ត​ថា អ្នក​ចូល​រួម​នឹង​ដើរ​ក្បួន​ទៅ​ស្ថានទូត​មួយ​ចំនួន​ដូចជា​ស្ថានទូត អាមេរិក បារាំង និង ចិន ដើម្បី​ដាក់​ញត្តិ​អំពាវនាវ​ឲ្យ​មាន​ការ​ដោះលែង​អ្នក ២១នាក់ ដែល​ត្រូវ​ចាប់​ឃុំ​ខ្លួន​ក្នុង​អំឡុង​បាតុកម្ម​ថ្ងៃ ទី២ និង ៣ មករា។ មនុស្ស ២ នាក់ ក្នុង​ចំណោម​មនុស្ស ២៣ នាក់​ដែល​ត្រូវ​ចាប់​ខ្លួន បាន​ដោះលែង​កាល​ពី​ថ្ងៃ​សៅរ៍។

អ្នក​នាំ​ពាក្យ​សាលា​រាជធានី​លោក ឡុង ឌីម៉ង់ បាន​ថ្លែង​ថា សាលា​រាជធានី​មិន​បាន​ទទួល​សំណើ​សុំ​ធ្វើ​បាតុកម្ម​ពី​ក្រុម​នេះ​ទេ។ លោក​បន្ត​ថា លោក​មិន​ប្រាកដ​ថា តើ​នគរបាល​នឹង​បង្ក្រាប​ការ​តវ៉ា ឬ​ហែ​ក្បួន​ពួក​គេ​ទេ។

លោក Dave Welsh នាយក​ប្រចាំ​ប្រទេស​នៃ​មជ្ឈមណ្ឌល​អាមេរិក​ដើម្បី​សាមគ្គីភាព​ការងារ (ACILS) បាន​ថ្លែង​កាល​ពី​ម្សិលមិញ​ថា ការ​បង្ក្រាប​អាច​ធ្វើ​ឲ្យ​ប៉ះពាល់​ដល់​មុខ​មាត់​របស់​រដ្ឋាភិបាល​កម្ពុជា​នៅ​សហគមន៍​អន្តរជាតិ។ ការ​បន់​ស្រន់​និង​ការ​ហែ​ក្បួន​ទៅ​ដាក់​ញត្តិ​ស្រប​ជាមួយ​បាតុកម្ម​សន្តិវិធី​ដែល​គ្រោង​ធ្វើ​ឡើង​គាំទ្រ​បុព្វហេតុ​ដូច​គ្នា​នៅ ប្រទេស​ផ្សេង​គ្នា​យ៉ាង​ហោច​ណាស់ ១៣ រួម​មាន​ទាំង​កូរ៉េ​ខាង​ត្បូង បែលហ្ស៊ិក និង​សហរដ្ឋ​អាមេរិក។

លោក Welsh បន្ត​ថា៖ «ជាមួយ​កិច្ច​ប្រឹង​ប្រែង​សាមគ្គី​អន្តរជាតិ​នៅ​ថ្ងៃ​ស្អែក ប្រសិន​មាន​ពាក្យ​ថា ការ​បង្ក្រាប​ហិង្សា​នៅ​ក្នុង​ព្រឹត្តិការណ៍​នេះ នោះ​វា​នឹង​ក្លាយ​ជា​បញ្ហា​អន្តរជាតិ»៕ PS

អត្ថបទគួរចាប់អារម្មណ៍