The Phnom Penh Post Search

Search form




Logo of Phnom Penh Post newspaper Phnom Penh Post - សកម្មជន​ព្រៃ​ឡង់ ៩ នាក់​ត្រូវ​បាន​កោះ​ឲ្យ​ចូល​បំភ្លឺ​តុលាការ

សកម្មជន​ព្រៃ​ឡង់ ៩ នាក់​ត្រូវ​បាន​កោះ​ឲ្យ​ចូល​បំភ្លឺ​តុលាការ

សកម្មជន​ព្រៃ​ឡង់ ៩ នាក់​ត្រូវ​បាន​កោះ​ឲ្យ​ចូល​បំភ្លឺ​តុលាការ

កំពង់ធំៈ ក្រុម​សកម្មជន ព្រៃ​ឡង់ ចំនួន ៩​នាក់ នៅ​ក្នុង ស្រុក​សណ្តាន់ ខេត្ត​កំពង់ធំ នឹង​ត្រូវ​កោះ​ហៅ​ចូល​តុលាការ​នៅ​ថ្ងៃ​ចន្ទ ដើម្បី​ការពារ​ខ្លួន​ប្រឆាំង​នឹង​បណ្តឹង​បទ​ចោទ​ប្រកាន់​ពី​បទ​បំផ្លាញ​ទ្រព្យ​សម្បត្តិ​ឯកជន​បន្ទាប់​ពី​ត្រូវ​បាន​ចោទ​ប្រកាន់​ដោយ​ស្រ្តី​អ្នក​មាន​ទ្រព្យ​សម្បត្តិ​ម្នាក់​ដែល​ពួក​គាត់​អះអាង​ថា បាន​ព្យាយាម​ឈូស​ឆាយ​តំបន់​ព្រៃ​ការពារ​ក្នុង ឆ្នាំ​២០១១។

លោក ព្រំ ស៊ុយ អាយុ ៦៨​ឆ្នាំ បាន​ប្រាប់​ឲ្យ​ដឹង​ថា គាត់​បាន​ទទួល​ដីកា​កោះ​នេះ​កាល​ខែ​មុន​ឲ្យ​ចូល​ទៅ​បំភ្លឺ​នៅ​តុលាការ​នៅ​ថ្ងៃ​ចន្ទ អាទិត្យ​ក្រោយ​នេះ។

លោក ព្រំ ស៊ុយ និយាយ​ថា៖ «ខ្ញុំ​មិន​បាន​ធ្វើ​អ្វី​ដូច​ដែល​ពួក​គេ​ប្តឹង​ចោទ​ប្រកាន់​ខ្ញុំ​នោះ​ទេ។ ហើយ​ខ្ញុំ​គ្រាន់​តែ​ការពារ​សហគមន៍​ព្រៃ​ឈើ​នេះ»។

លោក​បាន​បញ្ជាក់​ទៀត​ថា៖ «តុលាការ​បាន​សាក​សួរ​យើង ពីរ​ដង​រួច​មក​ហើយ​តាំង​ពី ឆ្នាំ​២០១១ ហើយ​ខ្ញុំ​គិត​ថា តុលាការ​នឹង​មិន​កោះ​ហៅ​ពួក​យើង​ឲ្យ​ចូល​សវនាការ​ពាក់​ព័ន្ធ​នឹង​ករណី​នេះ​ទេ ... ខ្ញុំ​នឹង​មក​កាន់​តុលាការ​តាម​ការ​កោះ​ឲ្យ​ទាន់​ពេល​វេលា។ ខ្ញុំ​មិន​ខ្លាច​ទេ ពីព្រោះ​ខ្ញុំ​មិន​បាន​ធ្វើ​អ្វី​ខុស»។

បើ​តាម​សកម្មជន​ទាំង​នេះ​បាន​ឲ្យ​ដឹង​ថា កាល ឆ្នាំ​២០១១ អ្នក​ស្រី អុល រដ្ឋា ដែល​ជា​ស្រ្តី​មាន​ទ្រព្យ​សម្បត្តិ​ស្តុក​ស្តម្ភ​ម្នាក់​បាន​នាំ​មនុស្ស​មួយ​ក្រុម​ទៅ​កាន់​តំបន់​នេះ​ដើម្បី​ឈូស​ឆាយ​រាន​យក​ដី​ដើម្បី​ដាំ​ដំឡូង​មី។ ក្នុង​ពេល​នោះ សកម្មជន​ទាំង​នេះ​បាន​ព្យាយាម​បញ្ឈប់​សកម្មភាព​ពួក​គេ ប៉ុន្តែ​ក្រោយ​មក​ត្រូវ​បាន​ចោទ​ប្រកាន់​ពី​បទ​បំផ្លាញ​ទ្រព្យ​សម្បត្តិ​ឯកជន​ទៅ​វិញ។

អ្នក​ស្រី អុល រដ្ឋា ជា​ដើម​បណ្តឹង​មិន​អាច​ទាក់​ទង​សុំ​ការ អត្ថាធិប្បាយ​ជុំវិញ​រឿង​ក្តី​ក្តាំ​នេះ​បាន​ទេ កាល​ពី​ម្សិល​មិញ។

អ្នក​ដែល​ត្រូវ​បាន​ចោទ​ប្រកាន់​ម្នាក់​ទៀត​និង​ជា​មេភូមិ ជាំស្វាយ លោក ម៉ៅ ធា បាន​ថ្លែង​ប្រាប់ កាល​ម្សិល​មិញ​ថា អ្នក​ភូមិ​មិន​បាន​ធ្វើ​ឲ្យ​ខូច​ខាត​ឬ​បំផ្លាញ​ទ្រព្យ​សម្បត្តិ​នរណា​ម្នាក់​ទេ។ លោក​ថា៖ «យើង​គ្រាន់​តែ​ដើរ​កាត់​ចម្ការ​ដែល​ពួក​គេ​ឈូស​ឆាយ​ព្រៃ​សហគមន៍​ប្រហែល ២ ហិកតា​ដើម្បី​យក​ធ្វើ​ជា​កម្មសិទ្ធិ​របស់​ខ្លួន ប៉ុន្តែ​ពួក​គេ​បាន​ប្តឹង​យើង​ទៅ​កាន់​តុលាការ​ចោទ​ថា យើង​បាន​បំផ្លាញ​ទ្រព្យ​សម្បត្តិ​របស់​ពួក​គាត់​ទាំង​អយុត្តិធម៌»។

លោក ម៉ៅ ធា បន្ត​ឲ្យ​ដឹង​ថា វា​អយុត្តិធម៌​ណាស់​ដែល​អ្នក​ការពារ​ព្រៃ​ឈើ​ត្រូវ​គេ​ប្តឹង​និង​ចោទ​ប្រកាន់​ពី​បទ​បំផ្លាញ​ទ្រព្យ​សម្បត្តិ​ឯកជន ប៉ុន្តែ គាត់​រំពឹង​ថា តុលាការ​នឹង​ស្វែង​រក​យុត្តិធម៌​ឲ្យ​អ្នក​ភូមិ​គាត់។

លោក សាយ ណូរ៉ា ព្រះ​រាជអាជ្ញា​រង ខេត្ត​កំពង់ធំ មិន​អាច​ទាក់​ទង​សុំ​អត្ថាធិប្បាយ​បាន​ទេ កាល​ម្សិល​មិញ៕

អត្ថបទគួរចាប់អារម្មណ៍