សៀមរាបៈ សកម្មជនសិទិ្ធស្រ្តី និងអង្គការសង្គមស៊ីវិល កាលពីម្សិលមិញ បានមានប្រតិកម្មខ្លាំងចំពោះសុន្ទរកថា របស់លោក សម រង្ស៊ី មេដឹកនាំគណបក្សប្រឆាំងនៅទីក្រុង សៀមរាប កាលពី ថ្ងៃអង្គារ ដែលលោកបានចោទសួរថា តើហេតុអ្វី លោកនាយករដ្ឋមន្រ្តី ហ៊ុន សែន «ទន់ខ្សោយជាងស្ត្រី» ដោយមិនហ៊ានប្រកាសឲ្យធ្វើការបោះឆ្នោតឡើងវិញដូចលោកស្រី យ៉ីងឡាក់ ស៊ីណាវ៉ាត្រា ឆ្លើយតបនឹងបាតុកម្មនៅក្នុងប្រទេស ថៃ។
លោកស្រី រស់ សុភាព នាយកប្រតិបតិ្តនៃអង្គការអភិវឌ្ឍនិងយ៉េនឌ័រ កម្ពុជា និងជាអនុប្រធានគណៈកម្មាធិការលើកកម្ពស់ស្រ្តីក្នុងនយោបាយ បានថ្លែងថា លោកស្រី «ខកចិត្ត» ចំពោះសម្តីរបស់លោក សម រង្ស៊ី។
លោកស្រីបានថ្លែងថា៖ «គាត់ជាមេដឹកនាំ [ប្រឆាំង] គាត់មិនគួរនិយាយបែបនេះទេ ព្រោះមានបុរស មានស្រ្តីក្នុងសង្គមនេះ [អ្វីដែលអ្នកធ្វើ] មិនមានន័យថា អ្នកទន់ខ្សោយជាងស្រ្តីទេ ព្រោះ [នោះមានន័យថា] ស្រ្តីក៏ទន់ខ្សោយដែរ»។
លោកស្រីបានបន្តថា៖ «វាមិនសំខាន់ទេ បើអ្នកជាប្រុស ឬបើអ្នកជាស្រ្តី។ ប្រសិនបើអ្នកណាម្នាក់មានសមត្ថភាពគេជាអ្នកធ្វើការឲ្យសង្គមនិងប្រទេស ជាអ្នកដែលយើងគាំទ្រ»។
លោកស្រី ពក ណាន់ដា នាយកប្រតិបតិ្តនៃអង្គការស្រ្តីដើម្បីភាពថ្កុំថ្កើន ដែលបណ្តុះបណ្តាលស្រ្តីឲ្យឈរឈ្មោះសម្រាប់តំណែងនយោបាយបានថ្លែងថា ការអត្ថាធិប្បាយរបស់លោក សម រង្ស៊ី គឺជាសារនយោបាយដើម្បីទាក់ទាញដល់ក្រុមបាតុករ។ លោកស្រីបញ្ជាក់ថា៖ «យើងមានស្រ្តី រឹងមាំ និងស្រ្តីទន់ខ្សោយ។ គាត់មិនគួរប្រៀបធៀបបែបនោះទេ។ ប្រហែលវាជាគ្រាន់តែជាការថ្លែងប៉ុណ្ណោះ»។
លោកស្រីបានបន្ថែមថា ដោយសារក្រុមបាតុករបានសាទរសម្តីរបស់គាត់ និងច្រៀងដូចគ្នា វាមិនមានន័យថា គេយល់ស្របនោះទេ។
លោកស្រីបន្តថា៖ «ក្នុងបរិបទកម្ពុជា មនុស្ស ទោះគេយល់ស្រប ឬមិនយល់ស្របក៏ដោយវាពិបាកនឹងកំណត់។ ពេលមេដឹកនាំនិយាយអ្វី គេគ្រាន់តែញញឹម។ ការប្រៀបធៀបភេទនេះមិនគួរធ្វើឡើងដោយជនណាម្នាក់ឡើយពេលអ្នកប្រៀបធៀបបុរសនិងស្រ្តីវាឆ្លុះបញ្ចាំងអំពីអ្នក» ថ្លែងទៅកាន់អ្នកគាំទ្រគណបក្សសង្គ្រោះជាតិជាង ១៥០០០ នាក់ នៅខេត្ត សៀមរាប កាលពីថ្ងៃអង្គារ លោក សម រង្ស៊ី បានស្នើឲ្យក្រុមបាតុករមានមោទនភាពចំពោះលោកស្រី យ៉ីងឡាក់ ដែលបានយល់ព្រមប្រកាសឲ្យបោះឆ្នោតឡើងវិញ ដោយធ្វើការប្រៀបធៀបជាមួយនឹងលោក ហ៊ុន សែន។
លោក សម រង្ស៊ី ថ្លែងថា៖ «ខ្ញុំសូមអំពាវនាវ ដល់លោក ហ៊ុន សែន ហើយខ្ញុំសុំមួយ គឺសុំលោក ហ៊ុន សែន កុំទន់ខ្សោយជាងស្រ្តី»។ លោកបានបន្ថែមថា៖ «លោក គួរមើលប្រទេសជិតខាង មាននាយក រដ្ឋមន្រ្តីស្រ្តីនៅថៃឈ្មោះ យ៉ីងឡាក់ ស៊ីណាវ៉ាត្រា។ សូមមានមោទនភាព [ចំពោះគាត់] ។ ប្រជាជនធ្វើបាតុកម្មឲ្យលោកស្រីលាលែងពីអំណាច ហើយលោកស្រីយល់ព្រមឲ្យបោះឆ្នោតឡើងវិញ»។
បន្ទាប់មក លោក សម រង្ស៊ី បាន សួរក្រុមបាតុករម្តងទៀតថា៖ «ហេតុអ្វីលោក ហ៊ុន សែន ទន់ខ្សោយជាងស្រ្តី?»។ ក្រុមបាតុករក៏បានចាប់ផ្តើមស្រែក «ហ៊ុន សែន ចុះចេញ ហ៊ុន សែន ចុះចេញ កុំខ្សោយជាងស្រ្តី»។
លោក សម រង្ស៊ី បានថ្លែងប្រាប់ ភ្នំពេញ ប៉ុស្តិ៍ កាលពីម្សិលមិញ ថា ការអត្ថាធិប្បាយរបស់លោកគឺចង់ប្រាប់ក្រុមបាតុករថា តើលោកគោរពលោកស្រី យ៉ីងឡាក់ ប៉ុនណា ដែលបានកោះឲ្យបោះឆ្នោតឡើងវិញ បើទោះបីជាគាត់មិនត្រូវធ្វើបែបនោះក៏ដោយបើផ្អែកតាមផ្លូវច្បាប់។ លោកបានបន្ថែមថា៖ «លោក ហ៊ុន សែន មានមូលហេតុខ្លាំងជាងត្រូវចុះចេញ ប៉ុន្តែគាត់មិនព្រមចុះចេញ។ ដូច្នេះ លោកមិនសូវក្លាហានជាងស្រ្តីទេ»។
លោកបញ្ជាក់ថា៖ «នេះជាការប្រៀបធៀប។ មិនមែនជាការប្រៀបធៀបផ្ទាល់រវាងបុរស និងស្រ្តីទូទៅទេ។ វាចៃដន្យដែលនាយករដ្ឋមន្រ្តីថៃគឺជាស្រ្តី»។
លោក សម រង្ស៊ី បានបន្តថា បើទោះបីជាការអត្ថាធិប្បាយរបស់លោកមិនមានគោលបំណងលើកឡើងថា បុរសមានឧត្តមភាពជាងស្រ្តីក៏ដោយ ក៏លោក សម រង្ស៊ី «សុំអភ័យទោស ចំពោះការយល់ខុសនេះ»៕ TK
