The Phnom Penh Post Search

Search form

Logo of Phnom Penh Post newspaper Phnom Penh Post - សកម្មជន​ស្ត្រី​នៃ​សហគមន៍​បឹងកក់​ធ្វើ​កូដកម្ម​បង្អត់​អាហារ

សកម្មជន​ស្ត្រី​នៃ​សហគមន៍​បឹងកក់​ធ្វើ​កូដកម្ម​បង្អត់​អាហារ

សកម្មជន​ស្ត្រី​នៃ​សហគមន៍​បឹងកក់​ធ្វើ​កូដកម្ម​បង្អត់​អាហារ

130604_08
សកម្មជនស្ត្រីនៅបឹងកក់បួននាក់ ធ្វើកូដកម្មបង្អត់អាហារទាមទារឲ្យដោះលែង យ៉ោម បុប្ផា ហេង ជីវ័ន

ភ្នំពេញៈ តំណាង​សកម្មជន​ដី​ធ្លី​នៃ​សហគមន៍​បឹង​កក់​នៅ​ពី​ព្រឹក​ថ្ងៃ​ចន្ទ បាន​នាំ​គ្នា​ធ្វើ​កូដកម្ម​បង្អត់​អាហារ​នៅ​មុខ​សាលា​ឧទ្ធរណ៍​ដើម្បី​ទាមទារ​យុត្តិធម៌ និង​សេរីភាព​ជូន​អ្នក​ស្រី យ៉ោម បុប្ផា។

អ្នក​ស្រី បូ ឆវី តំណាង​ម្នាក់​ក្នុង​ចំណោម​បួន​នាក់ ដែល​អង្គុយ​តវ៉ា​នៅ​មុខ​សាលា​ឧទ្ធរណ៍​រួម​មាន​អ្នក​ស្រី ទេព វន្នី អ្នក​ស្រី ប៊ូវ សោភា និង​អ្នក​ស្រី គង់ ចាន់ថា បាន​ប្រាប់​ភ្នំពេញ ប៉ុស្តិ៍​ថា ការ​ធ្វើ​កូដកម្ម​បង្អត់​អាហារ​នេះ ក្នុង​បំណង​ទាម​ទារ​ឲ្យ​តុលាការ​នេះ​ផ្ដល់​ភាព​យុត្តិធម៌ និង​សេរីភាព​ជូន អ្នក​ស្រី យ៉ោម បុប្ផា វិញ​។ អ្នក​ស្រី​និយាយ​ថា៖ «ពួក​យើង​នឹង​បន្ត​ធ្វើ​កូដកម្ម​បង្អត់​អាហារ​នៅ​ទី​នេះ រហូត​ដល់​ព្រឹក​ថ្ងៃ​អង្គារ​នេះ ហើយ​យើង​នឹង​ត្រឡប់​មក​នៅ​ថ្ងៃ​ពុធ ដើម្បី​គាំទ្រ​នឹង​លើក​ទឹក​ចិត្ត​ដល់​អ្នក​ស្រី យ៉ោម បុប្ផា ដែល​ត្រូវ​សាលា​ឧទ្ធរណ៍​បើក​ជំនុំ​ជម្រះ​អង្គ​សេចក្ដី​នៅ​ព្រឹក​ថ្ងៃ​ពុធ​»។

អ្នក​ចូល​រួម​កូដកម្ម​បង្អត់​អាហារ​នេះ​ដែរ អ្នក​ស្រី ទេព វន្នី និយាយ​ថា អ្វី​ដែល​ពួក​គាត់​ធ្វើ​នៅ​ពេល​នេះ គឺ​ចង់​បង្ហាញ​ឲ្យ​តុលាការ​និង​មន្ត្រី​នៃ​ស្ថាប័ន​ពាក់​ព័ន្ធ​ឯ​ទៀត​ដឹង​ថា ពួក​គាត់​ជា​អ្នក​រងគ្រោះ​ក្នុង​ជម្លោះ​ដី​ធ្លី​នៅ​បឹង​កក់ ជា​ពិសេស អ្នក​ស្រី យ៉ោម បុប្ផា ពេល​នេះ​មាន​ការ​ស្រេក​ឃ្លាន​«យុត្តិធម៌​និង​សេរីភាព»ខ្លាំង​ណាស់។

អ្នក​ស្រី យ៉ោម បុប្ផា ត្រូវ​ឃុំ​ខ្លួន​នៅ​ពន្ធនាគារ​ព្រៃ​ស ក្នុង​ខែ​សីហា ហើយ​នៅ​ខែ​កញ្ញា គាត់​ត្រូវ​បាន​សាលា​ដំបូង​រាជធានី​ភ្នំពេញ​ផ្តន្ទាទោស​ឲ្យ​ជាប់​ពន្ធនាគារ​បី​ឆ្នាំ ពី​បទ​ពាក់​ព័ន្ធ​នឹង​ករណី​បង្ក​ហិង្សា​ដោយ​ចេតនា ទៅ​លើ​អ្នក​រត់​ម៉ូតូ​ឌុប​ពីរ​នាក់ ឲ្យ​រង​របួស​ធ្ងន់។

ប្ដី​របស់​អ្នក​ស្រី​យ៉ោម បុប្ផា លោក លួស សាខន បាន​និយាយ​ថា​គាត់​បាន​ទៅ​សួរ​សុខ​ទុក្ខ​ប្រពន្ធ​នៅ​ពន្ធនាគារ PJ ហើយ​ប្រាប់​ពី​គម្រោង​ការ​តវ៉ា​បង្អត់​អាហារ​របស់​អ្នក​ភូមិ​បឹងកក់។ លោក​បន្ត​ថា៖ «ប្រពន្ធ​ខ្ញុំ​បាន​ប្រាប់​ខ្ញុំ​វិញ​ថា គាត់​ក៏​នឹង​មិន​ញ៉ាំ​អ្វី​ដែរ បើ​សិន​អ្នក​ភូមិ​ធ្វើ​កូដកម្ម​បង្អត់​អាហារ​ទាមទារ​យុត្តិធម៌​និង សេរីភាព»។

ខណៈ​ពេល​ធ្វើ​កូដកម្ម​នោះ​អ្នក​ស្រី បូ ឆវី បាន​ដួល​សន្លប់​នៅ​ម៉ោង ៨​កន្លះ​យប់​ហើយ​អ្នក​ស្រី ប៊ូវ សោភា ក៏​បាន​ដួល​សន្លប់​ដែរ​នៅ​ម៉ោង ៨​:៤០​នាទី យប់​ដោយ​ការ​ហេវ​ហត់​អស់​កម្លាំង៕

អត្ថបទគួរចាប់អារម្មណ៍