ភ្នំពេញៈ សង្គមស៊ីវិលជាតិ និងអន្តរជាតិជំរុញឱ្យមានការផ្សព្វផ្សាយ អប់រំអំពីបញ្ហាសុខភាពឱ្យបានទូលំទូលាយ ដើម្បីបង្ហាញសាធារណជនពីបញ្ហាដែលត្រូវប្រុងប្រយ័ត្ន និងវិធានការ ទប់ស្កាត់ ជាពិសេសផ្សព្វផ្សាយអប់រំពីជំងឺអេដស៍ របេង គ្រុនចាញ់ និងជំងឺឆ្លងដទៃទៀតដោយពួកគេអះអាងថា ការផ្សាយនៅមានកម្រិតទាបនៅឡើយ។
ការជំរុញនេះធ្វើឡើងក្នុងពិធីប្រកាសដាក់ឱ្យប្រើប្រាស់គោលការណ៍ណែនាំ សម្រាប់អ្នកសារព័ត៌មានក្នុងការរាយការណ៍អំពីការគ្របដណ្ដប់សេវាសុខាភិបាល សកលកាលពីថ្ងៃទី ១៤ ខែតុលា ដើម្បីលើកកម្ពស់ការយល់ដឹងដល់អ្នកសារព័ត៌មាន និងអ្នកបម្រើការក្នុងវិស័យប្រព័ន្ធផ្សព្វផ្សាយអំពីរបៀបរាយការណ៍ទាក់ទងសុខភាពប្រកបដោយវិជ្ជាជីវៈ និងស្របតាមគោលការណ៍ណែនាំដោយមានភាគីពាក់ព័ន្ធចូលរួមប្រមាណ ៣០ នាក់។
លោក ជួប សុខចំរើន នាយកប្រតិបត្តិអង្គការ (KHANA) ថ្លែងថា កន្លងមកលោកធ្លាប់បានកត់សម្គាល់ឃើញថា ការផ្សព្វផ្សាយ និងការចូលរួមរបស់អ្នកសារព័ត៌មានជុំវិញការផលិតអត្ថបទស្ដីពីការអប់រំសុខភាព ក៏ដូចជាការសរសេរអត្ថបទអប់រំអំពីជំងឺឆ្លងដូចជាជំងឺអេដស៍ របេង គ្រុនចាញ់ និងជំងឺឆ្លងដទៃទៀតនៅមានកម្រិតនៅឡើយ។
លោកជំរុញឱ្យស្ថាប័នព័ត៌មានជួយផលិតអត្ថបទវីដេអូ និងសរសេរព័ត៌មានបែបស៊ីជម្រៅក្នុងន័យអប់រំពន្យល់ពីផលប៉ះពាល់នៃជំងឺទាំងឡាយណាដែលងាយចម្លងពីមនុស្សម្នាក់ទៅមនុស្សម្នាក់។ ដោយសារពលរដ្ឋកម្ពុជាភាគច្រើន មិនសូវបានទទួលព័ត៌មានអំពីការថែទាំសុខភាពឱ្យបានល្អប្រសើរដែលអាចចៀសផុតពីជំងឺ។
លោក សុខចំរើន បញ្ជាក់ថា៖ «ខ្ញុំគិតថា បញ្ហានេះមិនមែនពួកខ្ញុំជាសង្គមស៊ីវិល ឬរដ្ឋាភិបាលធ្វើម្នាក់ឯងទេ គឺសារព័ត៌មានក៏ជាផ្នែកមួយសំខាន់ដែរ។ អ្នកសារព័ត៌មានគឺនាំសារសំខាន់ៗណែនាំឱ្យស្គាល់ពីគោលការណ៍ណែនាំអំពីសុខភាពដែលទទួលបានការបង្ហាញពីអ្នកជំនាញ ឬអ្នកពាក់ព័ន្ធក្នុងវិស័យសុខភាពហ្នឹង។ អ៊ីចឹងយើងអំពាវនាវឱ្យពួកគាត់ជួយបំពេញបន្ថែមពីបញ្ហានេះ»។
លោកស្រី Rachel Ong អ្នកសម្របសម្រួលប្រចាំតំបន់នៃបណ្ដាញអ្នកតស៊ូមតិ សម្រាប់មូលនិធិសកលប្រយុទ្ធនឹងជំងឺអេដស៍ របេង និងគ្រុនចាញ់ប្រចាំតំបន់អាស៊ី និងប៉ាស៊ីហ្វិកថ្លែងថា សារព័ត៌មានពិតជាមានសារៈសំខាន់ខ្លាំងណាស់។ នៅពេលអ្នកសារព័ត៌មានបានសរសេរ ឬចងក្រងសំណុំឯកសារផ្សេងៗពិតជាមានឥទ្ធិពលខ្លាំង ដើម្បីផ្ដល់ដំណឹងអវិជ្ជមានទៅថ្នាក់ដឹកនាំ ឬភាគីពាក់ព័ន្ធក្នុងការដោះស្រាយបញ្ហាដែលកើតមានឡើង។
បើតាមមន្ត្រីសង្គមស៊ីវិលរូបនេះគឺលោកស្រីចង់ឱ្យអ្នកសារព័ត៌មានស្រាវជ្រាវ និងដកស្រង់សម្ដីអ្នកជំនាញបង្ហាញសាធារណជនឱ្យបានទូលំទូលាយដើម្បីបង្ហាញទៅសហគមន៍ងាយរងគ្រោះឱ្យមានការប្រុងប្រយ័ត្នខ្ពស់ចំពោះបញ្ហាសុខភាព។ ជាក់ស្ដែងអំឡុងជំងឺកូវីដ១៩នេះអ្នកសារព័ត៌មានវិជ្ជាជីវៈដើរតួសំខាន់ក្នុងការអប់រំ ផ្សព្វផ្សាយពីវិធានការទប់ស្កាត់ការចម្លង និងវិធានការការពារខ្លួនផងដែរ។
លោកស្រីបញ្ជាក់ថា៖ «ខ្ញុំកំពុងធ្វើការជាមួយមូលនិធិសកលដើម្បីចូលរួមប្រយុទ្ធប្រឆាំងនឹងជំងឺអេដស៍ របេង និងគ្រុនចាញ់។ ខ្ញុំចាប់អារម្មណ៍ច្រើនចំពោះកម្ពុជាគឺរដ្ឋាភិបាលបានយកចិត្តទុកដាក់ច្រើន ហើយខ្ញុំក៏ចង់ឃើញកម្ពុជាប្រឹងប្រែងបន្តទៀតចំពោះការប្រយុទ្ធប្រឆាំងជំងឺឆ្លងទាំងអស់»។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជាថ្លែងថា ការផ្សព្វផ្សាយបញ្ហាសុខភាពនាពេលបច្ចុប្បន្ននេះមានភាពល្អប្រសើរ។ ប៉ុន្ដែការសរសេរព័ត៌មានទាក់ទងការជំរុញឱ្យមានការកែប្រែឱ្យមានភាពប្រសើរឡើងនូវគោលនយោបាយសុខភាព និងហិរញ្ញវត្ថុសុខភាពគឺនៅមានកម្រិតទាបនៅឡើយ។
បើតាមលោក ណុប វី កង្វះខាតរបស់អ្នកសារព័ត៌មានមួយចំនួនគឺសមត្ថភាពក្នុងការសរសេរព័ត៌មានដែលមានលក្ខណៈគ្រប់ជ្រុងជ្រោយនៅមានកម្រិត។ ម្យ៉ាងទៀតប្រព័ន្ធផ្សព្វផ្សាយនៅកម្ពុជាមានចំនួនតិចតួចណាស់ដែលហ៊ានសរសេរព័ត៌មានបែបបង្ហាញពីបញ្ហារបស់សង្គមជាតិ ឬព័ត៌មានដែលជំរុញទៅរដ្ឋាភិបាលឱ្យយកចិត្តទុកដាក់កាន់តែខ្លាំង។
លោកថា៖ «ទាក់ទងសមត្ថភាព ឬវិជ្ជាជីវៈគឺខ្ញុំគិតថា មិនមែនពួកគាត់ ទាំងអស់គ្មានសមត្ថភាពទេ ប៉ុន្ដែអ្នកសារព័ត៌មានជំនាន់ក្រោយមិនទាន់មានការពិសោធការងារច្រើន ដូច្នេះនៅមានភាពខ្វះចន្លោះ។ អ៊ីចឹងយើងត្រូវតែធ្វើការគាំទ្រពួកគាត់តាមរយៈការបណ្ដុះបណ្ដាលបន្ថែម ហើយអង្គភាពមួយចំនួនគាត់យកចិត្តទុកដាក់បង្រៀនបុគ្គលិកគាត់។ ប៉ុន្ដែស្ថាប័នខ្លះទៀត គាត់មិនសូវយកចិត្តទុកដាក់ទេ»។
អ្នកនាំពាក្យក្រសួងសុខាភិបាលលោកស្រី ឱ វណ្ណឌីន ថ្លែងនៅថ្ងៃទី ១៤ តុលា ថា មុនពេលជំងឺ កូវីដ១៩មកដល់ការផ្សព្វផ្សាយ និងការនាំសារអប់រំអំពីបញ្ហាសុខភាពនៅមានកម្រិត។ ក្រសួងសុខាភិបាលបានប្រឹងប្រែង ផលិតសារអប់រំទាក់ទងសុខភាព ជាពិសេសសារអប់រំពាក់ព័ន្ធជំងឺឆ្លង ដូចជា ជំងឺអេដស៍ របេង គ្រុនចាញ់ និងជំងឺសំខាន់ៗមួយចំនួនទៀត ដើម្បី បញ្ជ្រាបចំណេះដឹង ពញ្ញាក់ស្មារតីពលរដ្ឋឱ្យប្រុងប្រយ័ត្នខ្ពស់។
លោកស្រីថ្លែងថា៖ «ក្នុងបរិបទប្រយុទ្ធប្រឆាំងជំងឺកូវីដ១៩នេះគឺខ្ញុំសង្កេតឃើញអ្នកសារព័ត៌មានយើងក៏គាត់ខិតខំជួយផ្សព្វផ្សាយច្រើនហើយយើងនៅតែអំពាវនាវឱ្យមានការផ្សព្វផ្សាយបន្ថែមទៀត។ ជាពិសេសនៅក្នុងអំឡុងពេលទឹកជំនន់នេះ បញ្ហាសុខុមាលភាពសាធារណៈប្រឈមដែរ។ អ៊ីចឹងយើងរួមគ្នាផ្សព្វផ្សាយព័ត៌មានសំខាន់ៗទាំងអស់ឱ្យដល់សហគមន៍ងាយរងគ្រោះដើម្បីឱ្យគាត់ប្រុងប្រយ័ត្ន»៕