The Phnom Penh Post Search

Search form

Logo of Phnom Penh Post newspaper Phnom Penh Post - សង្គម​ស៊ីវិល​ជំរុញ​ឲ្យ​គោរព​សិទ្ធិ​ជា​មូលដ្ឋាន​ ក្នុង​ការ​ចូលរួម​បោះឆ្នោត

សង្គម​ស៊ីវិល​ជំរុញ​ឲ្យ​គោរព​សិទ្ធិ​ជា​មូលដ្ឋាន​ ក្នុង​ការ​ចូលរួម​បោះឆ្នោត

Content image - Phnom Penh Post
លោក គល់ បញ្ញា (កណ្ដាល) នៅ​ក្នុង​សន្និសីទ​សារព័ត៌មាន​កន្លង​មក។ ផា លីណា

សង្គម​ស៊ីវិល​ជំរុញ​ឲ្យ​គោរព​សិទ្ធិ​ជា​មូលដ្ឋាន​ ក្នុង​ការ​ចូលរួម​បោះឆ្នោត

ភ្នំពេញៈ សង្គម​ស៊ីវិល​ដែល​ធ្វើការ​ផ្នែក​បោះឆ្នោត​បាន​ជំរុញ​ដល់​រដ្ឋាភិបាល​ឱ្យ​មាន​ការ​គោរព​សិទ្ធិ​មនុស្ស​ដើម្បី​ធានា​សិទ្ធិ​សេរីភាព​ជា​មូលដ្ឋាន​របស់​ពលរដ្ឋ​ក្នុង​ការ​ចូលរួម ​និង​ឃោសនា​បោះឆ្នោត​ឃុំ​សង្កាត់​ដែល​នឹង​ប្រព្រឹត្ត​ទៅ​​នៅ​ឆ្នាំ ២០១៧ ដើម្បី​កសាង​សន្តិភាព​នៅ​កម្ពុជា​ខណៈ​សង្គម​ស៊ីវិល​​បារម្ភ​រឿង​មន្ត្រី​សិទ្ធិ​មនុស្ស​​ត្រូវ​បាន​ជាប់​ឃុំ​។

ការ​ជំរុញ​នេះ​ធ្វើ​ឡើង​នៅក្នុង​សិក្ខា​សាលា​ថ្នាក់​ជាតិ​ស្តីពី​សមាហរណកម្ម​ការ​កសាង​សន្តិភាព​ក្នុង​ការងារ​សិទ្ធិ​មនុស្ស​​នៅ​កម្ពុជា​កាលពី​ម្សិលមិញ​នៅ​ភ្នំពេញ​ដែល​មាន​ការ​ចូលរួម​ពី​តំណាង​អង្គការ​សង្គម​ស៊ីវិល និង​មន្ត្រី​រដ្ឋាភិបាល​មួយ​ចំនួន។

នាយក​ប្រតិបត្តិ​ឃ្លាំ​មើល​ការ​បោះឆ្នោត​ហៅ​កាត់​ថា​ខុមហ្វ្រែល​លោក គល់ បញ្ញា បាន​ថ្លែង​ថា​ដើម្បី​ឱ្យ​ការ​បោះឆ្នោត​ប្រព្រឹត្ត​ទៅ​ដោយ​រលូន សេរី និង​យុត្តិធម៌​លុះ​ណា​តែ​រដ្ឋាភិបាល​គោរព​សិទ្ធិ​មនុស្ស និង​បង្ក​បរិយាកាស​ល្អ។

លោក​ថា «រឿង​មួយ​ដែល​យើង​ជួប​បញ្ហា​គឺ​បរិយាកាស​ដើម្បី​ត្រៀម​ការ​បោះឆ្នោត​ក្រុម​ប្រឹក្សា​ឃុំ​ សង្កាត់ បរិយាកាស​​​​មើល​ទៅ​អាច​ប៉ះពាល់​ទៅ​នឹង​ការ​ចូលរួម​ពី​ពលរដ្ឋ​ជាពិសេស​អ្នក​គាំទ្រ​គណបក្ស​ប្រឆាំង​មាន​ការ​ភ័យ​ខ្លាច​ស្ថិត​នៅ​ក្រោម​ការ​ភិតភ័យ...ច្រើន​ហើយ​ការ​ចូលរួម​របស់​អង្គការ​សិទ្ធិ​មនុស្ស​នានា​មាន​ការ​ភ័យ​ខ្លាច»។

លោក​ចង់​ឃើញ​ពលរដ្ឋ​ប្រើ​សិទ្ធិ​ពេញលេញ​ក្នុង​ការ​ចូលរួម និង​ឃោសនា​បោះឆ្នោត​ដោយ​សន្តិភាព​ដែល​មិន​​ក្លាយ​ទៅ​ជា​ហិង្សា។

លោក​ថា៖ «អ្នក​ធ្វើ​ការងារ​តស៊ូ​មតិ​កំពុង​ប្រឈម​មាន​ការ​ដាក់​សម្ពាធ​គាបសង្កត់​ហើយ​ថ្មីៗ​នេះ​រហូត​ដល់​មាន​ការ​ចាប់​អ្នក​ការពារ​សិទ្ធិ​មនុស្ស​ដាក់​ពន្ធនាគារ​ទៀត​ផង»។

លោក​ក៏​បាន​​បារម្ភ​ផង​ដែរ​ខណៈ​អ្នក​ចុះ​ឈ្មោះឆ្នោត​នៅ​មាន​ចំនួន​តិច​ដោយ​លោក​ថា​កង្វះ​ព័ត៌មាន និង គជប មិន​អាច​សម្រួល​ដល់​អ្នក​ធ្វើ​ចំណាក​ស្រុក​បាន​។

លោក​ថា​៖ «ការងារ​ចុះ​ឈ្មោះ​បោះឆ្នោត​ដែល​ទើប​បាន​បញ្ចប់​យើង​មាន​ការ​ព្រួយបារម្ភ​ព្រោះ​អ្នក​មាន​សិទ្ធិ​ចុះ​ឈ្មោះ​បោះឆ្នោត​មាន​ជាង​ ៩ ​លាន​នាក់​តែ​ចុះ​ឈ្មោះ​បាន​ជាង​ជិត ៨ ​លាន​នាក់​អ៊ីចឹង​ពួក​គាត់​បាត់បង់​សិទ្ធិ​បោះឆ្នោត​ហើយ​ភាគច្រើន​អ្នក​ធ្វើ​ចំណាក​ស្រុក​ និង​ពលរដ្ឋ​ក្រីក្រ»។

បើ​តាម​មន្ត្រី​គណៈកម្មាធិការ​ជាតិ​រៀបចំ​ការ​បោះឆ្នោត​បាន​ថ្លែង​ក្រោយ​បញ្ចប់​ការ​ចុះ​ឈ្មោះ​បោះឆ្នោត​កាលពី​ថ្ងៃ​ពុធ​ថា​ពលរដ្ឋ​ដែល​បាន​ទៅ​ចុះ​ឈ្មោះ​បោះឆ្នោត​មាន​ជាង ៨០ ភាគរយ​ស្មើ​នឹង ៧,៩ លាន​នាក់​ក្នុង​ចំណោម​អ្នក​មាន​សិទិ្ធ​បោះឆ្នោត​ប្រមាណ​ ៩,៦ លាន​​នាក់។ ​ក្នុង​នោះ​មន្ត្រី​អះអាង​ថា​ពលរដ្ឋ​ប្រមាណ​ ១,៧ លាន​នាក់​ដែល​មិន​បាន​ចុះ​ឈ្មោះ​អាច​ដោយសារ​ធ្វើ​ចំណាកស្រុក​ទៅ​ថៃ (ដែល​មាន​ប្រមាណ​ ១,១ លាន​នាក់) ព្រម​ទាំង​កំហុស​នៃ​ចំនួន​ប៉ាន់​ប្រមាណ​របស់ គ.ជ.ប។

ប្រធាន​គ្រប់គ្រង​ផ្នែក​អង្កេត​នៃ​អង្គការ​លីកាដូ​លោក អំ សំអាត ថ្លែង​ថា​ការ​គោរព​​សិទ្ធិ​មនុស្ស​នឹង​ជួយ​ដល់​ការ​បោះឆ្នោត​មួយ​​ត្រឹមត្រូវ​ សេរី និង​យុត្តិធម៌​។

លោក​ថា៖ «ប្រសិន​បើ​គ្មាន​គោលការណ៍​គោរព​សិទ្ធិ​មនុស្ស​ពិតប្រាកដ​ទេ​ការ​បោះឆ្នោត​នោះ​ត្រូវ​បាត់បង់​នូវ​ចំណែក​ណា​មួយ​ឧទាហរណ៍​សិទ្ធិ​ពលរដ្ឋ​ក្នុង​ការ​ចុះ​ឈ្មោះ​បោះឆ្នោត​ដាច់​ខាត​ត្រូវ​ធានា​ឱ្យ​គាត់​មាន​សិទ្ធិ​ចុះ​ឈ្មោះ​បោះឆ្នោត​ទោះបី​ជា​គាត់​នៅ​ទីណា​ក៏ដោយ...»។

​ន្ទឹម​នឹង​នោះ​លោក​ក៏​ជំរុញ​ឱ្យ​ប្រព័ន្ធ​តុលាការ​ឯករាជ្យ​​ផង​ដែរ​ដើម្បី​ធានា​ដល់​សិទ្ធិ​ពលរដ្ឋ​ក្នុង​ការ​បញ្ចេញ​មតិ។

លោក​ថា​​៖ «ប្រសិន​បើ​តុលាការ​ឯករាជ្យ​នោះ​នឹង​ធានា​បាន​នូវ​ការ​គោរព​សិទ្ធិ​មនុស្ស និង​ភាព​ស្មើ​គ្នា​ចំពោះ​មុខ​ច្បាប់​ប៉ុន្តែ​បើ​មិន​ឯករាជ្យ​គឺ​គ្រោះថ្នាក់​បំផុត​សម្រាប់​សង្គម​ស៊ីវិល និង​ក្រុម​ដែល​ធ្វើ​ឱ្យ​ប៉ះពាល់​ប្រយោជន៍​គណបក្ស​នយោបាយ​ដែល​មាន​ឥទ្ធិពល»។

ទាក់ទង​នឹង​សិទ្ធិ​មនុស្ស​នេះ​ដែរ​មន្ត្រី​ការពារ​សិទ្ធិ​មនុស្ស​នៃ​អង្គការ​អាដហុក​ ៤ រូប និង​មន្ត្រី​ គជប ១ រូប​ត្រូវ​បាន​តុលាការ​ចាប់​ដាក់​ពន្ធនាគារ​ដោយ​ចោទ​ពី​បទ​សូកប៉ាន់​សាក្សី​ខណៈ​​មាន​ការ​រិះគន់​ពី​មតិ​ជាតិ និង​អន្តរជាតិ។ បន្ថែម​ពី​នេះ​តុលាការ​ជាន់​ទាប​រហូត​ដល់​ជាន់​ខ្ពស់​បាន​បដិសេធ​បណ្តឹង​សុំ​នៅ​ក្រៅ​ឃុំ​របស់​មន្ត្រី​សិទ្ធិ​មនុស្ស​ដោយ​ថា​អ្នក​ទាំង​ ៥ នឹង​ធ្វើ​ឱ្យ​វឹកវរ​ក្នុង​សង្គម។

របាយការណ៍​សង្ខេប​ស្តីពី​សិទ្ធិ​មនុស្ស​ និង​បញ្ហា​ប្រឈម​ចេញ​ផ្សាយ​កាលពី​ម្សិលមិញ​រកឃើញ​ថា​ស្ថានភាព​សិទ្ធិ​មនុស្ស​នៅ​កម្ពុជា​រង​ការ​គំរាម​កំហែង​ទៅ​លើ​សកម្មជន​សិទ្ធិ​មនុស្ស​សកម្មជន​ដីធ្លី និង​បរិស្ថាន​ជាដើម។ ក្នុង​នោះ​សង្គម​ស៊ីវិល​ស្នើ​ឱ្យ​បញ្ឈប់​ការ​រើសអើង​ប្រឆាំង​សកម្មជន​អភិវឌ្ឍន៍​នៅ​នឹង​កន្លែង ឬ​ផ្តល់​សំណង​សមរម្យ​មុន​នឹង​បណ្តេញ​ចេញ៕

អត្ថបទគួរចាប់អារម្មណ៍