The Phnom Penh Post Search

Search form




Logo of Phnom Penh Post newspaper Phnom Penh Post - សង្គម​ស៊ីវិល​រក​អន្តរាគមន៍​ឲ្យ​បញ្ឈប់​ការ​សង់​ទំនប់​នៅ​ឡាវ

សង្គម​ស៊ីវិល​រក​អន្តរាគមន៍​ឲ្យ​បញ្ឈប់​ការ​សង់​ទំនប់​នៅ​ឡាវ

Content image - Phnom Penh Post
គ្រឿង​ចក្រ​កំពុង​ដំណើរ​ការ​សាង​សង់​ទំនប់​​វារី​អគ្គិសនី​ដន​សាហុង​នៅ​ឡាវ​កន្លង​មក​​។ រូបថត សហ​ការី

សង្គម​ស៊ីវិល​រក​អន្តរាគមន៍​ឲ្យ​បញ្ឈប់​ការ​សង់​ទំនប់​នៅ​ឡាវ

ភ្នំពេញៈ សង្គម​ស៊ីវិល ​ដែល​ធ្វើការ​ទៅលើ​កិច្ចការ​ពារ​បរិស្ថា​ន​ បាន​ផ្ញើលិខិត​ទៅ​លោក​នាយក​រដ្ឋ​មន្ត្រី​ ហ៊ុន សែន​រួម​ទាំង​ប្រធានា​ធិបតី​អាមេរិក និង​អគ្គលេខាធិការ​អាស៊ាន ឲ្យ​លើក​ពី​បញ្ហា​ព្រួយ​បារម្ភ​របស់​ប្រជា​ជន​រស់នៅ​តាម​ដង​ទន្លេ​មេគង្គ នៅ​ក្នុង​កិច្ចប្រជុំ​កំពូល​ពិសេស​អាស៊ាន-អាមេរិក ខណៈ​ប្រទេស​ឡាវ​រឹង​រូស​បន្ត​សាង​សង់​ទំនប់​វារី​អគ្គិសនី​ដន​សាហុង។

នៅ​ក្នុង​សន្និសីទ​សារព័ត៌​មាន ស្តីពី​សំណើ​សុំ​អន្តរាគមន៍ ​ពី​ថ្នាក់​ដឹក​នាំ​ទាំង​បី កាលពី​ម្សិល​មិញ​ នាយក​ប្រតិបត្តិ​វេទិកា​នៃ​អង្គការ​មិនមែន​រដ្ឋាភិបាល​ ស្តីពី​កម្ពុជា​ លោក តឹក វណ្ណារ៉ា បាន​ថ្លែង​ថា មូលហេតុ​ដែល​សង្គម​ស៊ីវិល​បាន​ស្នើ​ទៅ​ថ្នាក់​ដឹក​នាំ​កំពូលៗ​នេះ ​ដោយ​សារ​ការ​ដោះស្រាយ​ក្នុង​តំបន់​នា​ពេល​កន្លង​មក ពុំ​មាន​លទ្ធផល​ជា​វិជ្ជមាន​ណា​មួយ​ឡើយ​ ចំណែក​ភាគី​ប្រទេស​ឡាវ មិន​បាន​យក​អនុសាសន៍​ ពី​ប្រទេស​ដែល​រង​ផល​ប៉ះពាល់​ទៅ​ពិចារណា​ឡើយ​។

លោក​បន្ត​ថា​ ប្រមុខ​រដ្ឋាភិបាល​កម្ពុជា អគ្គលេខាធិការ​អាស៊ាន និង​សហរដ្ឋ​អាមេរិក ពិត​ជា​មាន​តួនាទី​សំខាន់ ក្នុង​ការ​អន្តរាគមន៍​លើ​បញ្ហា​នេះ ព្រោះ​ការ​សាងសង់​ទំនប់​ដន​សាហុង អាច​នាំ​ឱ្យ​មាន​ការ​ប្រែប្រួល​អាកាស​ធាតុ និង​ជា​ការ​រំលោភ​សិទ្ធិ​មនុស្ស។

លោក​បន្ត​ថា៖«​ព្រោះ​អាមេរិក​ មាន​តួនាទី​សំខាន់​ក្នុង​ការ​ធានា​ឱ្យ​មាន​តុល្យភាព​ទាំង​ផ្នែក​អភិវឌ្ឃ​សេដ្ឋកិច្ច និង​និរន្តរភាព ក្នុង​អនុ​តំបន់​ទន្លេ​មេគង្គ ក្នុង​ការ​ប្រើ​ប្រាស់​ទន្លេ​មេគង្គ និង​បរិស្ថាន ព្រោះ​អាមេរិក​ ជា​ផ្នែក​មួយ​រួម​ចំណែក​ការពារ​បរិស្ថាន និង​ប្រព័ន្ធ​អេកូឡូស៊ី»​។

លោក វណ្ណារ៉ា សង្ឃឹម​ថា យ៉ាង​ហោច​ណាស់​ ក្នុង​ចំណោម​អ្នក​ទាំងបី​នោះ អាច​មាន​ម្នាក់​នឹង​លើក​ឡើង​ពី​បញ្ហា​នេះ ​នៅ​ក្នុង​កិច្ច​ប្រជុំ​ដ៏​ពិសេស​មួយ​នេះ​។

នាយក​ប្រតិបត្តិ​រង​នៃ​សម្ព័ន្ធ​ភាព ដើម្បី​អភិរក្ស​ធនធាន​ជល​ផល​ លោក ​យុក សេង​ឡុង ​ថ្លែង​ថា អ្វី​ដែល​សង្គម​ស៊ីវិល​មើល​ឃើញ​បច្ចុប្បន្ន ការ​ដោះ​ស្រាយ​នៅ​ក្នុង​ថ្នាក់​តំបន់​ ហាក់​បី​ដូច​ជា​បរាជ័យ​ច្រើន ក្នុង​ការ​ដោះ​ស្រាយ ពោល​រាល់​តម្រូវ​ការ ការ​ស្នើ​សុំ មតិ​យោបល់ និង​ក្តី​ព្រួយ​បារម្ភ​ផ្សេង​ៗ​ដែល​បាន​លើក​ឡើង​នា​ពេល​កន្លង​មក ពុំ​ត្រូវ​បាន​រដ្ឋាភិបាល​​ឡាវ​ យក​មក​​ពិចារណា​​ទេ។

លោក​ថា​៖«រាល់​កង្វល់​ផ្សេងៗ​ដែល​យើង​បាន​ដាក់​ទៅ​នេះ រដ្ឋាភិបាល​ឡាវ​ ហាក់​បី​ដូច​ជា​ព្រងើយ​កន្តើយ​ហើយ​ថ្មីៗ​នេះ​ ឡាវ​បាន​ប្រកាស​ក្តែងៗ​ថា គម្រោង​ទំនប់​វារី​អគ្គិសនី​មាន​ការ​ពិគ្រោះ​យោបល់​ពេញ​លេញ​ជាមួយ​ប្រទេស​ជា​សមាជិក តែ​ជាក់​ស្តែង​មិន​ដូច្នេះ​ទេ»។

ប្រធាន​សម្ព័ន្ធ​ប្រជា​នេសាទ​កម្ពុជា និង​ជា​តំណាង​សហគមន៍​នេសាទ​មក​ពី​តំបន់​ទន្លេសាប លោក ឡុង សូ​ចែត ថ្លែង​ថា ប្រសិនបើ​គម្រោង​ទំនប់​វារី​អគ្គិសនី​ដន​សាហុង​ពិតជា​កើត​ឡើង​មែន មិន​ត្រឹមតែ​ប៉ះពាល់​ដល់​អ្នក​រស់​នៅ​តាម​ដង​ទន្លេ​មេគង្គ​ទេ អ្នក​រស់​នៅ​តាម​ដង​ទន្លេ​សាប​ក៏​រង​ផល​ប៉ះពាល់​ដូច​គ្នា​ដែរ​ ព្រោះ​ទន្ល​ទាំង​ពីរ​មាន​ទំនាក់​ទំនង​​គ្នា។ «អនាគត​ទៅ​បឹង​ទន្លេ​សាប​នឹង​ជួប​បញ្ហា​ធ្ងន់ធ្ងរ​ទាក់ទង​នឹង​បញ្ហា​ជលផល បើ​សិន​ជា​ទន្លេ​មេគង្គ​ ត្រូវ​បាន​កាត់​ផ្តាច់​ជា​កង់ៗ ហើយ​ធន​ធាន​ជលផល​ក្នុង​បឹង​ទន្លេសាប​នឹង​ធ្លាក់​ចុះ​»។

មន្ត្រី​ខុទ្ទកាល័យ​នាយក​រដ្ឋ​មន្រ្តី​លោក គង់ ចំរើន បាន​បដិសេធ​ធ្វើ​អត្ថា​ធិប្បាយ​លើ​បញ្ហា​នេះ​ ដោយ​ថ្លែង​ថា លោក​មិន​ទាន់​ទទួល​បាន​លិខិត​សុំ​អន្តរាគមន៍​នៅ​ឡើយ។

ក្នុង​លិខិត​សុំ​អន្តរាគមន៍​ដែល​បាន​ស្នើ​ទៅ​ថ្នាក់​ដឹក​នាំ​ទាំង​៣​លើក​ឡើង​ថា៖«សូម​ឯក​ឧត្តម មេត្តា​ពិចារណា លើក​ឡើង​អំពី​សេចក្តី​ព្រួយ​បារម្ភ​ របស់​ប្រជាជន​ ក្នុង​តំបន់​ទន្លេ​មេគង្គ ចំពោះ​ការ​អភិវឌ្ឍ​ទំនប់​វារីអគ្គិសនី ដន​សាហុង នៅ​ក្នុង​កិច្ច​ប្រជុំ​កំពូល​ពិសេស​ អាស៊ាន-សហរដ្ឋ​អាមេរិក​ដែល​នឹង​ប្រព្រឹត្ត​ទៅ​នៅ​ថ្ងៃទី ១៥ ដល់ ថ្ងៃ​ទី​១៦ កុម្ភៈ»។

យោង​តាម​ការ​សិក្សា​របស់​សម្ព័ន្ធ​ទន្លេ​មេគង្គ រក​ឃើញ​ថា​ គម្រោង​ទំនប់​វារី​អគ្គិសនី​នេះ នឹង​គំរាម​កំហែង​ការ​ប្រកប​របរ​ចិញ្ចឹម​ជីវិត​ដល់​ប្រជាជន​ប្រមាណ ​៦០ លាន​នាក់​ដែល​ពឹង​អាស្រ័យ​លើ​ធនធាន​ទន្លេ​មេគង្គ៕

អត្ថបទគួរចាប់អារម្មណ៍