ភ្នំពេញៈ សង្គមស៊ីវិលបានសាទរ ចំពោះវិធានការរបស់ក្រសួងអប់រំដែលបានហាមឃាត់មិនឱ្យមានកិច្ចសហការរវាងអង្គភាពចំណុះរបស់ក្រសួងអប់រំជាមួយនឹងក្រុមហ៊ុនថ្នាំជក់ដោយលើកឡើងថា នេះជាវិធានការមួយដែលត្រឹមត្រូវក្នុងការទប់ស្កាត់ការផ្សព្វផ្សាយផលិតផលថ្នាំជក់នៅក្នុងប្រទេស។
កាលពីថ្ងៃទី ១៧ កុម្ភៈ ឆ្នាំ ២០២១ ក្រសួងអប់រំ យុវជន និងកីឡាចេញសេចក្តីណែនាំដោយហាមឃាត់មិនឱ្យអង្គភាពចំណុះក្រសួងមានមន្ទីរអប់រំ រាជធានី-ខេត្តការិយាល័យអប់រំ ក្រុង ស្រុក ខណ្ឌ គ្រឹះស្ថានសិក្សាគ្រប់កម្រិតទាំងសាធារណៈ និងឯកជនមិនឱ្យមានកិច្ចសហការជាមួយក្រុមហ៊ុនថ្នាំជក់ឡើយ។
អង្គការចលនាដើម្បីសុខភាពកម្ពុជាបានលើកឡើងក្នុងសេចក្តីប្រកាសព័ត៌មានរបស់ខ្លួនចេញផ្សាយកាលពីម្សិលមិញថា ខ្លឹមសារគោលនៃសេចក្តីណែនាំនេះគឺហាមមិនអោយគ្រឹះស្ថានសិក្សាសាធារណៈ និងឯកជនចាប់ដៃគូសហការជាមួយ ឬទទួលការឧបត្ថម្ភពីឧស្សាហករថ្នាំជក់ ទោះក្នុងគោលបំណងណាមួយក៏ដោយជាអាទិ៍សកម្មភាពសប្បុរសធម៌ ទស្សនកិច្ចសិក្សា ហាត់ការងារ ផ្លាស់ប្តូរបទពិសោធ ឬសិក្សាស្រាវជ្រាវ។
អង្គការនេះយល់ថា កម្មវិធីទំនួលខុសត្រូវសង្គម (CSR) របស់ឧស្សាហករថ្នាំជក់ត្រូវបានផ្ដួចផ្ដើមឡើងក្នុងគោលបំណងដើម្បីផ្សព្វផ្សាយផលិតផលថ្នាំជក់របស់ខ្លួន និងជាទម្រង់មួយនៃការស្វែងរកទីផ្សារ ហើយសេចក្តីណែនាំនេះគឺជាការចូលរួមរបស់ក្រសួងអប់រំក្នុងការអនុវត្តវិធានការហាមឃាត់ការផ្សព្វផ្សាយលក់ ការស្វែងរកទីផ្សារលក់ផលិតផលថ្នាំជក់ដែលត្រូវបានហាមឃាត់ទាំងស្រុងដោយច្បាប់ស្តីពីការត្រួតពិនិត្យផលិតផលថ្នាំជក់។
សេចក្តីប្រកាសដដែលបញ្ជាក់ថា៖ «ការផ្តល់ទីកន្លែង ឬទីធ្លាគ្រឹះស្ថានសិក្សាសាធារណៈ និងឯកជនសម្រាប់រៀបចំកម្មវិធីផ្សព្វផ្សាយ ឬពិព័រណ៍ដែលជាកម្មវិធីរបស់ឧស្សហករណ៍ថ្នាំជក់ ក៏ត្រូវបានហាមឃាត់។ សេចក្តីណែនាំនេះគឺជាផ្នែកមួយនៃការចូលរួមអនុវត្តអនុសញ្ញាស្តីពីការត្រួតពិនិត្យផលិតផលថ្នាំជក់ផងដែរ»។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាបានប្រាប់ភ្នំពេញប៉ុស្តិ៍ពីម្សិលមិញថា តាមរយៈការសិក្សាពីឯកសារផ្ទៃក្នុងរបស់ក្រុមហ៊ុនថ្នាំជក់អន្តរជាតិ ឧស្សាហកម្មថ្នាំជក់បានប្រើប្រាស់យុទ្ធសាស្ត្រ ទំនួលខុសត្រូវសង្គមដើម្បីបង្កើតទំនាក់ទំនងជាមួយបុគ្គលដែលមានសិទ្ធិសម្រេចបង្កើតឥទ្ធិពលក្នុងការរៀបចំគោលនយោបាយ និងសាងកេរ្តិ៍ឈ្មោះរបស់ក្រុមហ៊ុន។
លោកបន្តថា ក្រុមហ៊ុនថ្នាំជក់ក៏បានប្រើប្រាស់កម្មវិធីជួយសង្គម ដើម្បីបង្កើនទំនុកចិត្តបង្កើនប្រាក់ចំណេញ និងរារាំងការអនុវត្តគោលនយោបាយការពារសុខភាពប្រកបដោយប្រសិទ្ធភាព តាមរយៈការសហការជាមួយស្ថាប័នអប់រំទូទាំងប្រទេសផងដែរ។
លោកបញ្ជាក់ថា៖ «តាមពិតយើងមានឯកសារសិក្សានានាបានបញ្ជាក់ថា ទោះបីសកម្មភាពព្រឹត្តិការណ៍រៀបចំដោយអាជីវកម្មថ្នាំជក់ជាសកម្មភាពសប្បុរសក្តី គឺសុទ្ធតែមានគោលបំណងផ្សាយផលិតផលរបស់គេមុន។ ការធ្វើដូច្នេះគឺអាជីវកម្មទាំងនោះ មានគោលដៅក្នុងការងាយស្រួលលក់ផលិតរបស់ពួកគេប៉ុណ្ណោះ ព្រោះពួកគេចង់ឱ្យកុមារ និងយុវជន ស្គាល់ផលិតផលរបស់គេ»។
មាត្រា ៥.៣ នៃអនុសញ្ញាស្តីពីការត្រួតពិនិត្យផលិតផលថ្នាំជក់ចែងថា សុខភាពសាធារណៈ និងឧស្សាហកម្មថ្នាំជក់មានទំនាស់ផលប្រយោជន៍នឹងគ្នាមិនអាចផ្សះផ្សាបានដោយសារក្រុមហ៊ុនថ្នាំជក់ផលិត និងផ្សព្វផ្សាយលក់ផលិតផលថ្នាំជក់ដែលតាមរយៈលក្ខណៈវិទ្យាសាស្ត្របានរកឃើញថា បង្កឱ្យអ្នកជក់ញៀន ឈឺ ពិការ ស្លាប់ និងធ្វើឱ្យកើតមានបញ្ហាសង្គមផ្សេងៗរួមទាំងភាពក្រីក្រផងដែរ៕
វីដេអូ៖