.jpg)
សកម្មភាពរបស់មន្ត្រីពេលចុះជួយជនរងគ្រោះដោយការបាក់រលំអគារនៅខេត្តកែបកាលពីថ្ងៃ ៣ មករា ថ្មីៗនេះ។ ហេង ជីវ័ន
ភ្នំពេញៈ ក្រុមសង្គមស៊ីវិលបានទាមទារឲ្យរដ្ឋាភិបាលមានវិធានការម៉ឺងម៉ាត់ ដើម្បីធានាគុណភាព និងសុវត្ថិភាពនៅកន្លែងធ្វើការងារ សម្រាប់កម្មករសំណង់ ក្រោយពីហេតុការណ៍បាក់រលំអគារចំនួន ៣ ដងកាលពីឆ្នាំមុន និងដើមឆ្នាំនេះដែលបណ្តាលឲ្យមានមនុស្សស្លាប់ជិត ៧០ នាក់ ដោយពួកគេគ្រោងរួមគ្នាជាង ១០០ ស្ថាប័ន នៃសង្គមស៊ីវិលនឹងដាក់ញត្តិទៅរដ្ឋាភិបាលសប្តាហ៍ក្រោយសុំឲ្យគិតអំពីរឿងនេះ។
សហព័ន្ធសហជីពកម្មករសំណង់ និងព្រៃឈើកម្ពុជា (BWTUC) និងមជ្ឈមណ្ឌលសម្ព័ន្ធភាព ការងារ និងសិទ្ធិមនុស្ស (CENTRAL) ក្នុងសន្និសីទសារព័ត៌មានពីម្សិលមិញបានលើកយកញត្តិដែលគ្រោងដាក់ទៅរដ្ឋាភិបាលមកបញ្ជាក់ថា ការអនុវត្ដបទដ្ឋានសុវត្ថិភាពនៅតាមការដ្ឋានសំណង់នីមួយៗគឺជារឿងចាំបាច់បំផុត សម្រាប់ធានាដល់អាយុជីវិតមនុស្ស ធានាឱ្យមានប្រសិទ្ធភាពចំពោះការទប់ស្កាត់ហានិភ័យដែលអាចកើតមានឡើងជាយថាហេតុ។
ញត្តិនេះបន្តថា៖ «ការយកទីតាំងការដ្ឋានសំណង់ដែលកំពុងសាងសង់ធ្វើជាកន្លែងស្នាក់នៅផង និងសាងសង់ផងគឺជាហានិភ័យខ្ពស់បំផុតដល់អាយុជីវិតកម្មករទាំងនោះ។ អ្នកទទួលខុសត្រូវ សាងសង់ និងម្ចាស់សំណង់មិនត្រូវឱ្យរួចផុតពីបទព្រហ្មទណ្ឌដោយគ្រាន់តែចេញសំណងដល់ជនរងគ្រោះនោះឡើយ។ ការអនុវត្ដច្បាប់គឺជាកត្ដាចម្បងដែលតម្រូវឱ្យមានវិធានការតឹងរ៉ឹង និងប្រសិទ្ធភាព»។
ក្រុមសង្គមស៊ីវិលខាងលើបញ្ជាក់ថាករណីបាក់រលំអគារនៅខេត្ដកែប មន្ដ្រីអនុវត្ដច្បាប់ និងអាជ្ញាធរមានសមត្ថកិច្ចត្រូវទទួលខុសត្រូវចំពោះមុខច្បាប់តាមរយៈការអនុវត្ដច្បាប់ដោយមិនមានការអត់ឱនចំពោះបុគ្គលណាមួយរួមទាំងអ្នកសមគំនិតផងដែរ។
សង្គមស៊ីវិលទាំងនេះបញ្ជាក់ថា៖ «បើករណីនេះត្រូវបានអត់ឱននោះ បង្ហាញថាការអនុវត្ដច្បាប់មិនមានប្រសិទ្ធភាពទៅថ្ងៃអនាគត។ ត្រូវស្រាវជ្រាវរកជនល្មើសមកផ្ដន្ទាទោសទៅតាមច្បាប់នៃព្រះរាជាណាចក្រកម្ពុជា។ អ្នកសមគំនិត អ្នកផ្តើមគំនិត ត្រូវទទួលទោសដូចអ្នកប្រព្រឹត្ដផ្ទាល់ដែរ។ អាជ្ញាធរមានសមត្ថកិច្ចត្រូវតែទទួលខុសត្រូវលើគ្រោះថ្នាក់នេះ និងត្រូវទទួលទោសដូចអ្នកប្រព្រឹត្ដផ្ទាល់ដែរដើម្បីធានាឱ្យជនរងគ្រោះទទួលបានភាពយុត្ដិធម៌»។
តាមរយៈការសិក្សាស្រាវជ្រាវរបស់សង្គមស៊ីវិលខាងលើបានបង្ហាញថា កម្មករដែលបម្រើការងារនៅក្នុងវិស័យសំណង់មានចំនួនតិចតួចណាស់ដែលមានការធានារ៉ាប់រងនៅពេលដែលករណីគ្រោះថ្នាក់ការងារកើតឡើង។ មានកម្មករប្រមាណតែ ៩ ភាគរយប៉ុណ្ណោះ ដែលទទួលបានការធានារ៉ាប់រង ផ្ដល់ឱ្យដោយនិយោជក និងប្រមាណ ៥ ភាគរយត្រូវបានចុះបញ្ជីជាមួយបេឡាជាតិសន្តិសុខសង្គម។
លោក សុខ គីន ប្រធានសហព័ន្ធសហជីពសំណង់ និងព្រៃឈើកម្ពុជានៅក្នុងធ្វើសន្និសីទពីម្សិលមិញ ទាមទារឱ្យរដ្ឋាភិបាលត្រូវធានាឱ្យបាននូវគុណភាព និងសុខសុវត្ថិភាពក្នុងវិស័យសំណង់នៅប្រទេសកម្ពុជា។
លោកថ្លែងថា៖ «បើរដ្ឋាភិបាលនៅតែបន្តប្រើយន្តការដូចពេលបច្ចុប្បន្ន នោះបញ្ហានៅតែបន្តកើតមានឡើងទៅលើកម្មករក្នុងវិស័យសំណង់។ ការជំរុញឱ្យភាគីពាក់ព័ន្ធយកចិត្ដទុកដាក់ក្នុងការអនុវត្ដច្បាប់ក្នុងវិស័យសំណង់នេះនៅតែមានបញ្ហាដដែល។ ហេតុដូច្នេះសន្និសីទនេះធ្វើយ៉ាងណាដើម្បីឱ្យភាគីពាក់ព័ន្ធរដ្ឋាភិបាលពង្រឹងក្នុងការអនុវត្ដច្បាប់ និងត្រូវស្វែងរកភាគីពាក់ព័ន្ធមកទទួលខុសត្រូវក្នុងឧប្បទ្ទវហេតុនៅខេត្ដកែបនេះ»។
លោក សុខ គីន បញ្ជាក់ថា ក្រុមសង្គមស៊ីវិលមានអង្គការសង្គមស៊ីវិលជាតិ និងអន្តរជាតិដែលធ្វើការលើវិស័យសិទ្ធិការងារ សិទ្ធិមនុស្សប្រមាណជាង ១០០ ស្ថាប័នទៀតនៅសប្ដាហ៍ក្រោយនឹងដាក់ញត្ដិទាមទារឱ្យរដ្ឋាភិបាលពង្រឹងការអនុវត្ដច្បាប់លើវិស័យសំណង់ស្រាវជ្រាវរកអ្នកទទួលខុសត្រូវចំពោះមុខច្បាប់។ ពួកគេក៏ស្នើផ្ដល់ទីតាំងសាធារណៈនៅទីរួមខេត្ដព្រះសីហនុ និងកែបដើម្បីធ្វើស្ដូបរំឭកការចងចាំដល់ព្រឹត្តិការណ៍នៃការបាក់រលំអគារកន្លងមកនេះ។
លោក ឃុន ថារ៉ូ អ្នកគ្រប់គ្រងកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលើកឡើងថា កន្លងមកអង្គការសង្គមស៊ីវិល និងសហជីពជាង ១០០ ក៏ធ្លាប់បានដាក់ញត្ដិម្ដងរួចហើយក្នុងការស្នើឱ្យរដ្ឋាភិបាលមានវិធានការចាំបាច់ដើម្បីទប់ស្កាត់បង្ការនូវគ្រោះមហន្តរាយនៃការបាក់រលំអគារនេះទៀត។ ប៉ុន្ដែជាអកុសលហេតុការណ៍នេះនៅតែកើតមានឡើងនៅខេត្ដកែបបណ្ដាលឱ្យមានកម្មកររងគ្រោះ ៥៩ នាក់ និងរងគ្រោះថ្នាក់បាត់បង់ជីវិត ៣៦ នាក់។
លោកបន្ដថា ក្រោយពីមានហេតុការណ៍បាក់រលំអគារនៅខេត្ដកែបលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានទទួលស្គាល់ថាមានការដ្ឋានសំណង់ខុសច្បាប់ជាច្រើននៅខេត្ដព្រះសីហនុ ភ្នំពេញ និងខេត្ដបន្ទាយមានជ័យ។ នេះបង្ហាញពីភាពកម្សោយនូវការអនុវត្ដច្បាប់របស់ក្រសួងមានសមត្ថកិច្ច អាជ្ញាធរពាក់ព័ន្ធទាំងថ្នាក់ជាតិ និងថ្នាក់ក្រោមជាតិ។
លោកបញ្ជាក់ថា៖ «បញ្ហាដែលមើលឃើញក្នុងវិស័យសំណង់តាមបណ្ដាខេត្ដខាងលើយើងបានស្នើសុំដល់រាជរដ្ឋាភិបាលឱ្យមានវិធានការក្នុងការទប់ស្កាត់នូវករណីនេះកុំឱ្យមានការកើតឡើង។ ព្រោះបញ្ហាក្នុងវិស័យសំណង់នេះជាបញ្ហាធំធេងណាស់ដែលយើងត្រូវទប់ស្កាត់។ យើងឃើញថា ព្រឹត្ដិការណ៍នៅខេត្ដព្រះសីហនុ និងកែប ទោះបីរដ្ឋាភិបាលមានវិធានការមួយចំនួនក៏ដោយ ប៉ុន្ដែការអនុវត្ដច្បាប់ឱ្យមានប្រសិទ្ធភាពនៅតែជាបញ្ហាប្រឈមរបស់មន្ដ្រីតាំងពីថ្នាក់ជាតិទៅដល់ថ្នាក់ក្រោមជាតិ»។
លោក ថារ៉ូ ស្នើដល់រដ្ឋាភិបាលជំរុញឱ្យមានការចុះធ្វើអធិការកិច្ចការងារជាប្រចាំឱ្យមានប្រសិទ្ធភាព និងតម្លាភាព ដើម្បីពិនិត្យមើលអំពីលក្ខខណ្ឌសុវត្ថិភាព និងបទដ្ឋានការងាររបស់កម្មករសំណង់ និងធ្វើការចុះបញ្ជីក្រុមហ៊ុនសាងសង់ទាំងនោះជាមួយបេឡាជាតិរបបសន្ដិសុខសង្គមនៅទូទាំងប្រទេស។
កាលពីខែមិថុនា ឆ្នាំ ២០១៩ មានហេតុការណ៍បាក់រលំអគារកម្ពស់ ៧ ជាន់ នៅខេត្តព្រះសីហនុដែលបណ្តាលឲ្យមនុស្សស្លាប់ ២៨ នាក់ និងរបួស ២៦ នាក់។ មកដល់ខែធ្នូ ក៏មានហេតុការណ៍បាក់រលំអគារ ១ ផងដែរនៅវត្តប្រាសាទគោកចក ខេត្តសៀមរាប បណ្តាលឲ្យមនុស្សស្លាប់ ៣ នាក់ និងរបួសជាង ១០ នាក់ និងចូលដល់ខែមករាឆ្នាំនេះ ក៏ស្រាប់តែមានហេតុការណ៍បាក់រលំសំណង់អគារកម្ពស់ ៦ ជាន់ នៅខេត្តកែប បណ្តាលឲ្យមនុស្សស្លាប់ ៣៦ នាក់ និងរបួស ២៣ នាក់។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់មិនអាចសុំការបកស្រាយបានទេពីម្សិលមិញដោយទូរស័ព្ទគ្មានអ្នកទទួល។ ប៉ុន្ដែលោក ផៃ ស៊ីផាន អ្នកនាំពាក្យរាជរដ្ឋាភិបាលចាត់ទុកការស្នើសុំ និងការបញ្ចេញមតិរបស់ក្រុមសហជីព និងសង្គមស៊ីវិលនេះគឺជាភាពវិជ្ជមានដែលនេះគឺជាសិទ្ធិរបស់ពលរដ្ឋ។
លោកថ្លែងថា៖ «អ្វីដែលជាសកម្មភាពរបស់អង្គការមិនមែនរដ្ឋាភិបាលកំពុងតែសម្ដែងមតិនេះ គឺជាការចូលរួមមួយដ៏ល្អជាការយកចិត្ដទុកដាក់មួយល្អ ក្នុងការប្រឹងប្រែងការពារសុវត្ថិភាពកម្មកររបស់ពួកយើង។ រដ្ឋាភិបាលដែលដឹកនាំដោយសម្ដេចអគ្គមហាសេនាបតីតេជោ ហ៊ុន សែន ជារាជរដ្ឋាភិបាលស្ដាប់នូវការផ្ដល់យោបល់គ្រប់បែបយ៉ាងគ្រប់ស្ថានភាពក្នុងកិច្ចអនុវត្ដន៍ឆ្លើយតបចំពោះប្រជាពលរដ្ឋរបស់ពួកយើង»៕
វីដេអូ៖
