ភ្នំពេញៈ មេដឹកនាំសង្គមស៊ីវិល បានស្នើឲ្យគណបក្សប្រឆាំង លុបចោលនូវបញ្ញតិ្តដែលគេរាយការណ៍ថា កំពុងត្រូវបានចរចាក្នុងកំណែទម្រង់ការបោះឆ្នោតជាមួយនឹងគណបក្សប្រជាជនដែលនឹងព្យាយាមរឹតត្បិតសេរីភាពរបស់អង្គការមិនមែនរដ្ឋាភិបាលក្នុងអំឡុងយុទ្ធនាការបោះឆ្នោត។
លោក គល់ បញ្ញា នាយកប្រតិបតិ្តនៃអង្គការ ខុម ហ្វ្រែល បានឲ្យដឹងថា កាលពីថ្ងៃពុធ តំណាងពីសម្ព័ន្ធអង្គការមួយហៅថា សម្ព័ន្ធកំណែទម្រង់ការបោះឆ្នោត បានជួបជាមួយនឹងលោក កឹម សុខា អនុប្រធានគណបក្សសង្គ្រោះជាតិ និងមន្រ្តីគណបក្សជាច្រើនរូប ដែលកំពុងចូលរួមចរចាជាមួយនឹងគណបក្សប្រជាជនលើការផ្លាស់ប្តូរច្បាប់បោះឆ្នោត។
លោកបញ្ជាក់ថា សម្ព័ន្ធកំណែទម្រង់ការបោះឆ្នោត បានបង្ហាញពីអនុសាសន៍សំខាន់ៗចំនួន ៧ សម្រាប់ច្បាប់បោះឆ្នោត ដែលនឹងធ្វើវិសោធនកម្ម រាប់ទាំងការលុបចោលនូវបញ្ញតិ្ត ដែលនឹងហាមឃាត់អង្គការមិនមែនរដ្ឋាភិបាល កុំឲ្យធ្វើសេចក្តីថ្លែង ដែលចាត់ទុកថា «ជាការប្រមាថមកលើអ្នកនយោបាយ ឬគណបក្សនយោបាយរហូតដល់ការបោះឆ្នោត»។
លោកបញ្ញាបានលើកឡើងកាលពីម្សិលមិញថា៖ «យើងបានព្យាយាមបញ្ចុះបញ្ចូលគាត់ថា នេះគឺជារឿងខុសប្រសិនបើគាត់ដាក់ក្នុងច្បាប់បោះឆ្នោត ហើយថា យើងព្រួយបារម្ភណាស់ថា នេះគឺជាអ្វីដែលរំលោភលើសិទិ្ធនយោបាយរបស់អង្គការមិនមែនរដ្ឋាភិបាល»។ «ហេតុអ្វីរើសអើង?ហេតុអ្វីតម្រង់គោលដៅលើអង្គការមិនមែនរដ្ឋាភិបាល? ឯករាជភាពនិងការមិនប្រកាន់បក្សគឺជាក្រមប្រតិបតិ្តរបស់យើង»។
ក្រុមការងារគណបក្សជាប់ឆ្នោតទាំងពីរ នៅមានចំណុចខ្វែងគំនិតគ្នាជាច្រើន ចំពោះកំណែទម្រង់ប្រព័ន្ធរៀបចំការបោះឆ្នោតថ្មី៕ TK
