.jpg)
លោក អ៊ុក វណ្ណារ៉ា នាយកប្រតិបត្តិរងវេទិកានៃអង្គការមិនមែនរដ្ឋាភិបាលស្តីពីកម្ពុជា។ ហេង ជីវ័ន
ភ្នំពេញៈ អង្គការសង្គមស៊ីវិល និងពលរដ្ឋស្នើឲ្យរដ្ឋាភិបាលដាក់សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ ផ្សព្វផ្សាយជាសាធារណៈ និងឲ្យពិគ្រោះយោបល់ជាមួយសាធារណជន អង្គការសង្គមស៊ីវិល និងភាគីពាក់ព័ន្ធ ខណៈដែលមន្ត្រីជាន់ខ្ពស់រដ្ឋាភិបាលអះអាងថា ជាការជ្រៀតជ្រែកចូលកិច្ចការផ្ទៃក្នុងរបស់រដ្ឋាភិបាល។
ការស្នើនេះធ្វើឡើងនៅក្នុងវេទិកាស្តីពី «ការចូលរួមរបស់សាធារណជននៅក្នុងដំណើរការរៀបចំថវិកានៅថ្នាក់ជាតិ និងថ្នាក់ក្រោមជាតិ» នៅសណ្ឋាគារសាន់វ៉េរាជធានីភ្នំពេញពីម្សិលមិញដែលមានអ្នកចូលរួមប្រមាណជិត ៣០០ នាក់ក្នុងនោះមានមន្ត្រីក្រសួងមហាផ្ទៃ អង្គការសង្គមស៊ីវិលជាង ១០ មាននិស្សិត ព្រះសង្ឃ និងប្រជាពលរដ្ឋមកពីបណ្តាខេត្តនានា។
ការស្នើនេះធ្វើឡើងមួយថ្ងៃបន្ទាប់គណៈរដ្ឋមន្ត្រីបានប្រកាសបើកកិច្ចប្រជុំពេញអង្គពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ នៅថ្ងៃសុក្រនេះ។
លោក អ៊ុក វណ្ណារ៉ា នាយកប្រតិបត្តិរងវេទិកានៃអង្គការមិនមែនរដ្ឋាភិបាលស្តីពីកម្ពុជាប្រាប់អ្នកសារព័ត៌មានក្នុងវេទិកានោះថាដើម្បីឲ្យសាធារណជនចូលរួមបានទាល់តែក្រសួង ឬស្ថាប័នពាក់ព័ន្ធត្រូវរៀបចំជាវេទិកា ជាសាធារណៈ ឬសិក្ខាសាលា ដើម្បីឲ្យពលរដ្ឋ និងអង្គការសង្គមស៊ីវិលមានឱកាសចូលរួមចំណែកប្រាប់ពីតម្រូវការអាទិភាពជាក់លាក់របស់ប្រជាពលរដ្ឋមុនពេលដែលសេចក្តីព្រាងច្បាប់នេះស្នើទៅក្រសួងសេដ្ឋកិច្ច និងហិរញ្ញវត្ថុ។
លោកថា៖ «គ្មានការចូលរួមពីពួកគាត់ទេ (សាធារណជន) ពួកគាត់អត់បានលើកពីតម្រូវការរបស់ពួកគាត់ពិតប្រាកដដូច្នេះអាចនឹងធ្វើឲ្យមានការប៉ាន់ប្រមាណពីតម្រូវការជាក់ស្តែងរបស់ប្រជាពលរដ្ឋខុស ជាពិសេសពលរដ្ឋដែលងាយរងគ្រោះនៅក្នុងសង្គម ដូច្នេះការចូលរួមនេះមានសារៈសំខាន់ណាស់ ពីព្រោះគាត់ដឹងពីកន្លែងណាដែលរមាស់ដូច្នេះយើងអេះឲ្យចំកន្លែងរមាស់។ បើយើងអេះមិនចំកន្លែងរមាស់ គាត់នៅតែបន្តអេះដដែល អ៊ីចឹងនៅតែមានបញ្ហាដដែល»។
លោក ប៉ិច ពិសី នាយកកម្មវិធីជាន់ខ្ពស់នៃអង្គការតម្លាភាពកម្ពុជាថ្លែងថា ប្រជាពលរដ្ឋទាំងអស់មានតួនាទីក្នុងការចូលរួមផ្តល់យោបល់ និងពិនិត្យរាល់ការចំណាយរបស់រដ្ឋាភិបាលថាតើសមស្របតាមតម្រូវការរបស់ប្រជាពលរដ្ឋដែរឬទេ ហើយបានអះអាងថាការចូលរួមក្នុងដំណើរការថវិកាគឺមានសារៈសំខាន់ណាស់ដើម្បីធ្វើឲ្យរដ្ឋាភិបាលកាន់តែមានការទទួលខុសត្រូវ និងបង្កើនកិច្ចប្រឹងប្រែងលើកកម្ពស់អភិបាលកិច្ចក្នុងការប្រើប្រាស់ថវិកា។
លោកបញ្ជាក់ថា៖ «ដើម្បីបន្តនូវកំណើនសេដ្ឋកិច្ច និងនិរន្តរភាពនៃការអភិវឌ្ឍនាពេលខាងមុខទាមទារនូវការពង្រឹងការចូលរួមពីសាធារណជន ជាពិសេសគឺយុវជនក្នុងដំណើរការរៀបចំ និងតាមដានការប្រើប្រាស់ថវិកាព្រមទាំងការបើកទូលាយនូវព័ត៌មានអំពីថវិកាដល់សាធារណជនឲ្យកាន់តែប្រសើរឡើងថែមទៀត»។
លោក ឡុង សូយ គ្រូបង្រៀនមកពីខេត្តស្វាយរៀងអះអាងថា៖ «យើងចង់ឲ្យរដ្ឋាភិបាល និងមន្ត្រីថ្នាក់ក្រោមជាតិបង្ហាញថវិកាជាតិ និងការចំណាយឲ្យបានច្បាស់ជូនដល់ប្រជាពលរដ្ឋទាំងការអភិវឌ្ឍផ្លូវថ្នល់ ហើយថាការចាយវាយនោះមានប៉ុន្មានដំណាក់កាល។ យើងឃើញថាមានការលាក់លៀមថវិកាជាតិ»។
សុផានណា និស្សិតស្រីមកពីសាកលវិទ្យាល័យភូមិន្ទភ្នំពេញនិយាយថា ប្រជាពលរដ្ឋមានសិទ្ធិទទួលបានព័ត៌មាន និងផ្តល់យោបល់ទាក់ទងនឹងថវិកាជាតិដោយសារតែប្រជាពលរដ្ឋបានបង់ពន្ធជូនរដ្ឋាភិបាល។
នាងបន្ថែមថា៖ «ថវិកាទាំងអស់ហ្នឹងគឺកើតចេញពីការប្រមូលពន្ធពីប្រជាពលរដ្ឋ។ ដូច្នេះប្រជាពលរដ្ឋមានសិទ្ធិដឹង និងឮទាក់ទងរឿងថវិកាជាតិ។ ថវិកាជាតិគួរបង្ហាញជាសាធារណៈមុនពេលដែលសភាធ្វើការអនុម័ត»។
ប៉ុន្តែលោក ផៃ ស៊ីផាន អ្នកនាំពាក្យរដ្ឋាភិបាលថ្លែងថា៖ «នេះគឺជាការសម្រេចទទួលខុសត្រូវរបស់រដ្ឋាភិបាល ហើយគ្មានអង្គការណាមកលូកលាន់ និងជ្រៀតជ្រែកបានទេ។ អង្គការសង្គមស៊ីវិលគួរតែយកចិត្តទុកដាក់ និងតាមដានសកម្មភាពនៅរដ្ឋសភា។ ប្រជាពលរដ្ឋអត់មានសិទ្ធិនៅក្នុងរដ្ឋាភិបាលក្នុងការលើកឡើងពីថវិកាជាតិ ប៉ុន្តែប្រជាពលរដ្ឋមានសិទ្ធិសេរីភាពរាយការណ៍ និងតតាំងនៅរដ្ឋសភានេះគឺជានីតិវិធី»៕
