The Phnom Penh Post Search

Search form




Logo of Phnom Penh Post newspaper Phnom Penh Post - សង្គ្រាម​ពាក្យ​ស្លោក CPP និង CNRP កំពុង​បន្ដ




សង្គ្រាម​ពាក្យ​ស្លោក CPP និង CNRP កំពុង​បន្ដ

Content image - Phnom Penh Post
អតីត​ប្រធាន​គណបក្ស​សង្គ្រោះជាតិ​លោក សម រង្ស៊ី នា​ពេល​កន្លង​មក។ ហុង មិនា

សង្គ្រាម​ពាក្យ​ស្លោក CPP និង CNRP កំពុង​បន្ដ

ភ្នំពេញៈ បើ​ទោះបី​ជា​គណបក្ស​កាន់​អំណាច​​បាន​គំរាម​​ចាត់​វិធានការ​ផ្លូវ​​ច្បាប់​​ទៅ​លើ​គណបក្ស​ប្រឆាំង​​​ដែល​ប្រើ​ពាក្យ​ស្លោក​នយោបាយ​ «​ដូរ​​មេឃុំ​បម្រើ​បក្ស​ ដាក់​មេឃុំ​បម្រើ​រាស្រ្ត​»ក្ដី ប៉ុន្តែ​សង្គ្រាម​ពាក្យ​សម្តី​រវាង​គណបក្ស​នយោបាយ​​​កំពុង​មាន​កម្តៅ​ខ្លាំង​ឡើង ខណៈ​ពាក្យ​ស្លោក​ថ្មីៗ​ក៏​កំពុង​ត្រូវ​បាន​បង្កើត​ឡើង​ដែរ​នោះ​។

អតីត​ប្រធាន​គណបក្ស​សង្គ្រោះជាតិ លោក សម រង្ស៊ី ​កាលពី​ថ្ងៃ​សៅរ៍​បាន​​ឆ្លៀត​សៀតស៊ក​ពាក្យ​សម្តី​ទៅ​គណបក្ស​ប្រជាជន​ដែល​កំពុង​កាន់​អំណាច​​ដោយ​បង្កើត​​ជា​ពាក្យ​ស្លោក​នយោបាយ​​ថ្មី​ចំនួន​ពីរ​បី​​បន្ថែម​ទៀត​​សម្រាប់​វេទិកា​នយោបាយ​​របស់​គណបក្ស​សង្គ្រោះ​ជាតិ​ដោយ​បាន​លើក​ឡើង​​ថា​ «​ដូរ​ភាព​ខ្មៅ​ងងឹត​ឧបទ្រព​ដាក់​ពន្លឺ​ព្រះអាទិត្យ​» «ដូរ​គ្រួសារ​និយម បក្ខ​ពួកនិយម​ និង​ពុករលួយ​និយម​ដាក់​សមត្ថ​ភាព​និយម» «ដូរ​ចោរាធិបតេយ្យ ដាក់​ប្រជាធិបតេយ្យ»។ ​

សារ​នយោបាយ​ទាំងអស់​នេះ​​ត្រូវ​បាន​សរសេរ​ និង​បង្ហោះ​ដោយ​លោក សម រង្ស៊ី ​នៅ​លើ​ហ្វេសប៊ុក​របស់​លោក។

តាមរយៈ​ការ​បង្កើត​ពាក្យ​ស្លោក​នយោបាយ​ថ្មីៗ​នេះ​លោក សម រង្ស៊ី ​បាន​លើក​ឡើង​នូវ​សំណួរ​​ថា​ «បើ​យើង​ប្រើ​ពាក្យ​ស្លោក​ណា​មួយ​ដូច​ខាង​ក្រោម​នេះ តើ​គេ​នឹង​រក​រឿង​យើង និង​ប្តឹង​យើង​ទៀត​ទេ​?»។

ប៉ុន្តែ​អ្នក​នាំពាក្យ​របស់​គណបក្ស​ប្រជាជន​កម្ពុជា​លោក សុខ ឥសាន កាលពី​ម្សិលមិញ​បាន​ចាត់​ទុក​​ពាក្យ​ស្លោក​​របស់​លោក សម រង្ស៊ី ថា​ជា​ការ​បង្ក​រឿង​ដោយ​លោក​ថ្លែង​ថា​ករណី​មួយ​មិន​ទាន់​បាន​បញ្ចប់​ផង​ ករណី​មួយ​ទៀត​​ក៏​កើត​មាន​បន្ត​ ​ប៉ុន្តែ​​លោក​បាន​បន្ថែម​ថា​គណបក្ស​ប្រជាជន​កម្ពុជា​មិន​ចាប់​អារម្មណ៍​នឹង​ពាក្យ​ស្លោក​នយោបាយ​​​របស់​លោក សម រង្ស៊ី នោះ​ទេ ពីព្រោះ​ជីវិត​នយោបាយ​របស់​លោក សម រង្ស៊ី ​បាន​បញ្ចប់​ហើយ​​​ ដូច្នេះ​វា​មិន​មាន​ឥទ្ធិពល​អ្វី​ទៅ​លើ​រដ្ឋាភិបាល​ឡើយ។

លោក សុខ ឥសាន បាន​បន្ត​ថា​៖ «​​ចំណុច​ណា​ក៏ដោយ​​​គឺ​​យោង​ទៅ​តាម​​ក្របខ័ណ្ឌ​​កម្មវិធី​នយោបាយ​​ និង​នៅ​ក្នុង​ក្របខ័ណ្ឌ​​សីលធម៌​ដែល​កំណត់​ដោយ​ គ.ជ.ប.​ ប៉ុន្តែ​ចំណុច​ណា​ដែល​ប៉ះពាល់​​សេចក្តី​ថ្លៃថ្នូរ​​របស់​គណបក្ស​ប្រជាជន​ និង​រាជរដ្ឋាភិបាល​យើង​នឹង​​ពិចារណា​ [ចាត់​វិធានការ​ផ្លូវ​ច្បាប់​]»។

ពាក់ព័ន្ធ​នឹង​វិធានការ​ទៅ​ផ្លូវ​ច្បាប់​ប្រឆាំង​នឹង​ពាក្យ​ស្លោក​​នយោបាយ​របស់​គណបក្ស​សង្គ្រោះជាតិ​ដែល​បាន​ប្រើ «​ដូរ​​មេឃុំ​បម្រើ​បក្ស​ដាក់​មេឃុំ​បម្រើ​រាស្រ្ត​» នោះ​លោក សុខ ឥសាន ក៏​បាន​បញ្ជាក់​ផង​ដែរ​ថា​ករណី​នេះ​​គណបក្ស​ប្រជាជន​កម្ពុជា​ទុក​ឲ្យ​ក្រសួង​មហាផ្ទៃ​ជា​អ្នក​ចាត់​វិធានការ​​មុន​ដោយសា ​រដ្ឋមន្រ្តី​ក្រសួង​មហាផ្ទៃ​ជា​អ្នក​ទទួល​ និង​ជា​អ្នក​ចុះ​ឈ្មោះ​​គណបក្ស​នយោបាយ​ហើយ​​​បន្ទាប់​មក​គណបក្ស​ប្រជាជន​នឹង​ដាក់​ពាក្យ​បណ្តឹង​ពេល​ក្រោយ។

អ្នក​នាំ​ពាក្យ​ក្រសួង​មហាផ្ទៃ​លោក ខៀវ សុភ័គ មិន​អាច​ទាក់ទង​សុំ​អត្ថាធិប្បាយ​បាន​​ទេ​កាលពី​ថ្ងៃ​ម្សិលមិញ។

ទន្ទឹម​នេះ​អនុប្រធាន​គណបក្ស​សង្គ្រោះ​ជាតិ​លោក អេង ឆៃអ៊ាង បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​​ពាក្យ​ស្លោក​​នយោបាយ​ទាំងអស់​របស់​លោក សម រង្ស៊ី ដែល​បាន​លើក​ឡើង​នោះ​គណបក្ស​សង្គ្រោះជាតិ​នឹង​ពិចារណា​​​យក​ទៅ​ប្រើប្រាស់​​​សម្រាប់​​កម្មវិធី​នយោបាយ​​ និង​ថា​គណបក្ស​នីមួយៗ​មាន​សិទ្ធិ​ក្នុង​ការ​ប្រើប្រាស់​ពាក្យ​ស្លោក​នយោបាយ​របស់​ខ្លួន​ដើម្បី​បម្រើ​អត្ថប្រយោជន៍​ដល់​ប្រជាពលរដ្ឋ។

លោក អេង ឆៃអ៊ាង បាន​បន្ត​ថា​៖ «​​គ្មាន​បញ្ហា​ទេ​ពាក្យ​ស្លោក​ទាំង​នោះ​យើង​អាច​ជ្រើសរើស​ពាក្យ​ស្លោក​ណា​មួយ​​​ដែល​មាន​ន័យ​​ [យើង​] អាច​យក​ប្រើ​»។

នៅពេល​សួរ​​​ថា​ តើ​គណបក្ស​សង្គ្រោះ​ជាតិ​គិត​ដូច​ម្តេច​ដែរ​​នៅ​ពេល​គណបក្ស​ប្រើ​ពាក្យ​ស្លោក​​ទាំង​នេះ​ហើយ​ប្រសិន​បើ​​គណបក្ស​ប្រជាជន​ដាក់​ពាក្យ​បណ្តឹង​​នោះ​លោក អេង ឆៃអ៊ាង បាន​លើក​ឡើង​ថា​លោក​កំពុង​តែ​​ងឿង​ឆ្ងល់​អំពី​វិធានការ​ផ្លូវ​ច្បាប់​​របស់​គណបក្ស​ប្រជាជន​ទៅ​លើ​ពាក្យ​ស្លោក​របស់​គណបក្ស​សង្គ្រោះ​ជាតិ​។

លោក អេង ឆៃអ៊ាង បាន​ថ្លែង​បន្ត​ថា​៖ «​​គេ​ប្តឹង​អី​បន្ត​ចុះ​។ ​យើង​​ចង់​ឃើញ​ចៅក្រម​ថា​ តើ​ពួកគេ​​​វិនិច្ឆ័យ​​ទៅ​លើ​ករណី​នេះ​យ៉ាង​ដូចម្តេច​?» ។

លោក ឆៃអ៊ាង បាន​បន្ត​ទៀត​ថា​មាន​តែ​ប្រជាពលរដ្ឋ​​ទេ​ដែល​ជា​អ្នក​វិនិច្ឆ័យ​ពាក្យ​ស្លោក​ទាំង​នេះ​ហើយ​ប្រសិន​បើ​​ពាក្យ​ស្លោក​ទាំង​នេះ​​មិន​ចាប់​អារម្មណ៍​ដល់​ប្រជាពលរដ្ឋ ពួកគេ​នឹង​មិន​បោះឆ្នោត​ឲ្យ​គណបក្ស​សង្គ្រោះជាតិ​ទេ​៕ PS

អត្ថបទគួរចាប់អារម្មណ៍