The Phnom Penh Post Search

Search form




Logo of Phnom Penh Post newspaper Phnom Penh Post - សង្គ្រោះជាតិ​មិន​ចូលរួម​អនុម័ត​ច្បាប់ ​ស្ដីពី​គណបក្ស​នយោបាយ​នៅ​ថ្ងៃ​នេះ​ទេ




សង្គ្រោះជាតិ​មិន​ចូលរួម​អនុម័ត​ច្បាប់ ​ស្ដីពី​គណបក្ស​នយោបាយ​នៅ​ថ្ងៃ​នេះ​ទេ

Content image - Phnom Penh Post
លោក កឹម សុខា ប្រធាន​ស្តីទី​គណបក្ស​សង្គ្រោះ​ជាតិ​ពេល​ដើរ​ចេញ​ពី​កិច្ចប្រជុំ​គណបក្ស​កាលពី​ម្សិលមិញ។ ផា លីណា

សង្គ្រោះជាតិ​មិន​ចូលរួម​អនុម័ត​ច្បាប់ ​ស្ដីពី​គណបក្ស​នយោបាយ​នៅ​ថ្ងៃ​នេះ​ទេ

ភ្នំពេញៈ តំណាងរាស្រ្ត​គណបក្ស​ប្រឆាំង​បាន​សម្រេច​ធ្វើ​ពហិការ​សម័យ​ប្រជុំ​រដ្ឋសភា​នៅ​ថ្ងៃ​នេះ ខណៈ​តំណាងរាស្រ្ត​គណបក្ស​កាន់​អំណាច​នឹង​បោះឆ្នោត​អនុម័ត​ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដែល​មាន​លក្ខណៈ​ចម្រូងចម្រាស បើ​ទោះបី​ជា​ច្បាប់​នេះ​ត្រូវ​បាន​មជ្ឈដ្ឋាន​មួយ​ចំនួន​យល់​ថា​បង្កើត​ឡើង​ដើម្បី​រំលាយ​គណបក្ស​សង្គ្រោះ​ជាតិ​ដែល​ជា​គូប្រជែង​ដ៏​ស្រួចស្រាល់​ជាមួយ​គណបក្ស​ប្រជាជន​ក៏ដោយ។

លោក សុន ឆ័យ ប្រធាន​ក្រុម​តំណាងរាស្រ្ត​គណបក្ស​សង្គ្រោះជាតិ​ដែល​ជា​គណបក្ស​ប្រឆាំង​បាន​បញ្ជាក់​កាលពី​ម្សិលមិញ​ថា បន្ទាប់ពី​កិច្ចប្រជុំ​ផ្ទៃក្នុង​តំណាងរាស្រ្ត​គណបក្ស​សង្គ្រោះជាតិ​បាន​សម្រេច​មិន​ចូលរួម​សម័យ​ប្រជុំ​ពេញ​អង្គ​របស់​រដ្ឋសភា​នៅ​ថ្ងៃ​នេះ​ដែល​នឹង​អនុម័ត​សំណើ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​ដោយ​ថ្លែង​ថា​ច្បាប់​នេះ​មិនមែន​ជា​បំណង​ប្រាថ្នា​របស់​ប្រជាពលរដ្ឋ​ដែល​ជំរុញ​ឲ្យ​រដ្ឋសភា​អនុម័ត​ទេ​ព្រោះ​ច្បាប់​នេះ​ធ្វើ​ឡើង​ដើម្បី​ដាក់​សម្ពាធ​ទៅ​លើ​គណបក្ស​នយោបាយ​ ជាពិសេស​គណបក្ស​កាន់​អំណាច​ចង់​ដាក់​សម្ពាធ​មក​លើ​គណបក្ស​សង្គ្រោះ​ជាតិ​ដែល​ជា​គូ​ប្រកួត​ប្រជែង​នយោបាយ​របស់​ខ្លួន​ហើយ​ជាង​នេះ​ទៀត​ បន្ទាប់ពី​ច្បាប់​នេះ​ត្រូវ​បាន​បង្កើត​រួច​វា​នឹង​ធ្វើ​ឲ្យ​បែកបាក់​ជាតិ។

លោក សុន ឆ័យ បាន​ថ្លែង​ថា៖ «ច្បាប់​នេះ​ប្រសិន​បើ​វា​ត្រូវ​បាន​យក​ទៅ​អនុវត្ត យើង​ឃើញ​ថា​វា​ផ្ទុយ​នឹង​គោលការណ៍​ប្រជាធិបតេយ្យ​សេរី​ពហុបក្ស។ គេ​មិន​ដែល​ធ្វើ​ច្បាប់​ដើម្បី​រំខាន​គណបក្ស​មួយ​ទៀត ឬ​បង្ក​ការ​លំបាក ឬ​គំរាម​កំហែង​គណបក្ស​ផ្សេងៗ​ទៀត​នោះ​ទេ​ហើយ​ការ​ធ្វើ​វិសោធនកម្ម​ច្បាប់​នេះ​គឺ​ផ្ទុយ​នឹង​ឆន្ទៈ​របស់​ពលរដ្ឋ​ខ្មែរ»។

លោក ឆ័យ បាន​ជំរុញ​ឲ្យ​ធ្វើការ​ស្ទង់​មតិ​ប្រជាពលរដ្ឋ​ខ្មែរ​ថា​តើ​ពលរដ្ឋ​ខ្មែរ​ចង់​ឲ្យ​មាន​ច្បាប់​នេះ​ឬ​អត់។ លោក​បន្ថែម​ថា​សេចក្តី​ព្រាង​ច្បាប់​នេះ​ត្រូវ​បាន​ធ្វើ​ឡើង​ក្នុង​ភាព​បន្ទាន់​ដោយ​គ្មាន​ការ​ផ្តល់​មតិយោបល់​ពី​គណបក្ស​ពាក់ព័ន្ធ​ណា​មួយ។

លោក សុន ឆ័យ បន្ត​ថា៖ «យើង​មិន​អាច​ចូលរួម​ចំណែក​ទៅ​លើ​ច្បាប់​ដែល​អាក្រក់ និង​ប៉ះពាល់​អត្ថប្រយោជន៍​សង្គម​ជាតិ​បែប​នេះ​បាន​ទេ​ហើយ​គណបក្ស​ណា​ដែល​មាន​អំណាច​អាច​សម្រេច [ធ្វើ​ច្បាប់​នេះ] តែ​ម្នាក់​ឯង​ទុក​ឲ្យ [គណបក្ស​នោះ] ទទួល​ខុស​ត្រូវ»។

លោក សុន ឆ័យ បន្ថែម​ថា​តំណាងរាស្រ្ត​គណបក្ស​សង្គ្រោះជាតិ​នៅ​តែ​បន្ត​ការងារ​របស់​ខ្លួន​ក្នុង​តួនាទី​ជា​សមាជិក​រដ្ឋសភា​ធម្មតា​ហើយ​នឹង​សម្រេច​ចូលរួម​សម័យ​ប្រជុំ​ពេញ​អង្គ​រដ្ឋសភា​នៅ​រាល់​ករណី​ដែល​សម្រេច​មិន​ប៉ះពាល់​អត្ថប្រយោជន៍​ជាតិ និង​ប្រជាធិបតេយ្យ​សេរី​ពហុបក្ស។

ទោះ​យ៉ាង​ណា​ក្តី​អ្នក​នាំពាក្យ​របស់​គណបក្ស​កាន់​អំណាច​លោក សុខ ឥសាន បាន​ទម្លាក់​កំហុស​ទៅ​លើ​គណបក្ស​សង្គ្រោះជាតិ​ឲ្យ​ទទួល​ខុស​ត្រូវ​ចំពោះ​ការ​មិន​ចូលរួម​ប្រជុំ​រដ្ឋសភា​អនុម័ត​សំណើ​ច្បាប់​ស្តីពី​គណបក្ស​នយោបាយ​ហើយ​ថា​បើ​ទោះបី​ជា​គណបក្ស​សង្គ្រោះជាតិ​មិន​ចូលរួម​ប្រជុំ​សភា​ក៏​មិន​មាន​ឧបសគ្គ​ណា​មួយ​ចំពោះ​គណបក្ស​ប្រជាជន​កម្ពុជា​ក្នុង​ការ​អនុម័ត​ធ្វើ​វិសោធនកម្ម​ច្បាប់ស្តី​ពី​គណបក្ស​នយោបាយ​នេះ​ដែរ​ព្រោះ​គណបក្ស​ប្រជាជន​កម្ពុជា​មាន​សំឡេង​អនុម័ត​សំណើ​ច្បាប់​នេះ​ដោយ​ការ​បោះឆ្នោត​ ៥០ បូក ១។

លោក សុខ ឥសាន ថ្លែង​ថា៖ «ដូច្នេះ​ដំណើរការ​ទៅ​រលូន​ហើយ​ជា​ការ​សម្រេច​របស់​រដ្ឋសភា​ទាំង​មូល​មិនមែន​ជា​ការ​សម្រេច​របស់​គណបក្ស​ប្រជាជន​កម្ពុជា​តែ​មួយ​នោះ​ទេ។ [គណបក្ស​សង្គ្រោះ​ជាតិ] មិន​ចូលរួម​ប្រជុំ [សភា] គឺ​ដូចជា​សិស្ស​មិន​ទៅ​រៀន មិន​ចូល​រៀន»។ លោក​បញ្ជាក់​ថា៖ «[យើង] ធ្វើ​ត្រឹមត្រូវ​ទៅ​តាម​នីតិវិធី»។

លោក ឥសាន បាន​ព្រមាន​ថា​គណបក្ស​សង្គ្រោះ​ជាតិ​ដែល​មិន​ចូលរួម​ប្រជុំ​សភា​ត្រូវ​ទទួល​ខុស​ត្រូវ​ចំពោះ​រដ្ឋធម្មនុញ្ញ និង​បទបញ្ជា​ផ្ទៃក្នុង​នៃ​រដ្ឋសភា​ហើយ​ច្បាប់​នេះ​នឹង​ត្រូវ​អនុម័ត​សម្រាប់​គណបក្ស​ទូទៅ មិនមែន​សំដៅ​តែ​គណបក្ស​សង្គ្រោះជាតិ​តែ​មួយ​ទេ។

ប៉ុន្តែ​ទោះ​ជា​យ៉ាង​ណា​លោក គល់ បញ្ញា នាយក​ប្រតិបត្តិ​នៃ​គណៈកម្មាធិការ​សម្រាប់​ការ​បោះឆ្នោត​ដោយ​សេរី និង​យុត្តិធម៌​នៅ​កម្ពុជា​ហៅ​ខុមហ្វ្រែល បាន​ចាត់​ទុក​ច្បាប់​ស្តីពី​គណបក្ស​នយោបាយ​ដែល​ធ្វើ​ដោយ​តំណាងរាស្រ្ត​គណបក្ស​ប្រជាជន​កម្ពុជា​តែ​មួយ​ថា​ជា​ច្បាប់​មិន​ពេញលេញ​ទៅ​តាម​ផ្លូវ​ច្បាប់​ទេ។

លោក បញ្ញា បាន​ថ្លែង​បន្ត​ថា៖ «វា​ជា​ច្បាប់​ដែល​ប៉ះពាល់​គណបក្ស​ប្រកួត​ប្រជែង​ដទៃៗ។ ជា​គោលការណ៍ [យើង] ត្រូវ​តែ​ឲ្យ​មាន​យ៉ាង​ហោច​ណាស់​ពីរ​គណបក្ស​ចូល [អនុម័ត] ដែល​មាន​ន័យ​ថា​ទាំង​គណបក្ស​កាន់​អំណាច និង​គណបក្ស​ប្រឆាំង​ដែល​មាន​អាសនៈ​នៅ​ក្នុង​រដ្ឋសភា​ដើម្បី​ឲ្យ​ច្បាប់​នេះ​មាន​លក្ខណៈ​ពេញលេញ»៕ PS

អត្ថបទគួរចាប់អារម្មណ៍