The Phnom Penh Post Search

Search form




Logo of Phnom Penh Post newspaper Phnom Penh Post - សង្គ្រោះជាតិ​​សុំ​សង់​រូប​សំណាក​ កែម ​ឡី នៅ​ទីលាន​ប្រជាធិបតេយ្យ

សង្គ្រោះជាតិ​​សុំ​សង់​រូប​សំណាក​ កែម ​ឡី នៅ​ទីលាន​ប្រជាធិបតេយ្យ

រូប​សំណាក​លោក កែម ឡី ដែល​ត្រូវ​គេ​បង្ហោះ​តាម​ហ្វេសប៊ុក​។
រូប​សំណាក​លោក កែម ឡី ដែល​ត្រូវ​គេ​បង្ហោះ​តាម​ហ្វេសប៊ុក​។

សង្គ្រោះជាតិ​​សុំ​សង់​រូប​សំណាក​ កែម ​ឡី នៅ​ទីលាន​ប្រជាធិបតេយ្យ

ភ្នំពេញៈ តំណាងរាស្ត្រ​គណបក្ស​សង្គ្រោះ​ជាតិ​នៅ​មណ្ឌល​ខេត្ត​តាកែវ​ដែល​ត្រូវ​ជា​ស្រុក​កំណើត​លោក​បណ្ឌិត​ កែម ឡី បាន​ស្នើ​អភិបាល​រាជធានី​ភ្នំពេញ​តម្កល់​រូបសំណាក​អ្នក​វិភាគ​ល្បី​ឈ្មោះ​ដែល​ត្រូវ​បាន​គេ​បាញ់​សម្លាប់​​រូប​នេះ​នៅក្នុង​បរិវេណ​ទីលាន​ប្រជាធិបតេយ្យ​ដោយ​អះអាង​ថា​ដើម្បី​រំឭក​វីរភាព​រូប​គាត់។

ក្នុង​លិខិត​ស្នើសុំ​របស់​តំណាងរាស្ត្រ​គណបក្ស​សង្គ្រោះ​ជាតិ​លោក អ៊ូ ច័ន្ទរ័ត្ន ផ្ញើ​ជូន​អភិបាល​រាជធានី​ភ្នំពេញ​លោក ប៉ា សុជាតិវង្ស​ចុះ​ថ្ងៃ ១៧ ខែ​សីហា​បាន​លើក​ឡើង​ថា​ប្រជាពលរដ្ឋ​ខ្មែរ​រាប់លាន​នាក់​គ្រប់​មជ្ឈដ្ឋាន​ទាំង​ក្នុង​ និង​ក្រៅ​ប្រទេស​មាន​ការ​​សោកស្តាយ​យ៉ាង​ខ្លាំង​ចំពោះ​ការ​បាញ់​សម្លាប់​លោក​បណ្ឌិត កែម ឡី ដោយ​ចាត់​ទុក​គាត់​ជា​វីរបុរស​របស់​ពួក​គាត់។

ក្នុង​លិខិត​បញ្ជាក់​ថា៖ «ជាមួយ​គ្នា​នេះ​ពួកគាត់​ព្រម​ទាំង​រូបខ្ញុំ​ផ្ទាល់​​មាន​បំណង​សាងសង់ និង​តម្កល់​រូបសំណាក​លោក​បណ្ឌិត កែម ឡី នៅ​បរិវេណ​ទីលាន​ប្រជាធិបតេយ្យ​ដើម្បី​រំឭក​ដល់​វីរភាព​របស់​លោក​បណ្ឌិត​ដែល​លោក​​ជា​និមិត្តរូប​នៃ​សេរីភាព​បញ្ចេញ​មតិ»។

អ្នក​នាំ​ពាក្យ​សាលា​រាជធានី​លោក មាន ចាន់យ៉ាដា បាន​ថ្លែង​ថា​លោក​មិន​ទាន់​ទទួល​លិខិត​ស្នើសុំ​នោះ​ទេ​ហើយ​​លោក​ថា៖ «ខ្ញុំ​ឆ្លើយ​មិន​ទាន់​បាន​ទេ​ទាល់​តែ​សុំ​យោបល់​ថ្នាក់ដឹកនាំ​ព្រោះ​នេះ​លើស​កម្រិត​ដែល​ខ្ញុំ​ឆ្លើយ​មុន​បាន​ទាល់​តែ​សុំ​ថ្នាក់​ដឹកនាំ​ដើម្បី​សម្រេច​ព្រោះ​ត្រូវ​ជជែក​គ្នា​ថា​ហេតុផល​អី​ដែល​ត្រូវដាក់​អ៊ីចឹង​ចាំ​ជជែក​គ្នា​ពេល​ក្រោយ»។

កន្លង​ទៅ​គណបក្ស​ប្រជាធិបតេយ្យ​មូលដ្ឋាន​ធ្លាប់​បាន​ស្នើ​ទៅ​រដ្ឋាភិបាល​ឱ្យ​ដាក់​បញ្ចូល​ថ្ងៃ​ទី ១០ កក្កដា​ដែល​ជា​ថ្ងៃ​លោក​បណ្ឌិត​ កែម ឡី ត្រូវ​ឃាតករ​បាញ់​សម្លាប់​ទៅ​ជា​ថ្ងៃ​ឈប់​សម្រាក​ទូទាំង​ប្រទេស និង​ដាក់​ឈ្មោះ​ថា​ទិវា​ជាតិ​នៃ​សេរីភាព​បញ្ចេញមតិ។

តែ​អ្នក​នាំ​ពាក្យ​ទីស្ដីការ​គណៈរដ្ឋមន្ត្រី​លោក ផៃ ស៊ីផាន ថ្លែង​ថា​ទោះបី​ជា​លោក កែម ឡី មាន​មនុស្ស​ជាច្រើន​ចូលចិត្ត​គាត់​ក៏ដោយ​តែ​មិន​ទាន់​ដល់​ថ្នាក់​ចាត់​ទុក​គាត់​ជា​វីរបុរស​នោះ​ទេ​ហើយ​លោក​ជឿ​ថា​ «​រឿង កែម ឡី ជា​រឿង​ឯកជន​សុទ្ធសាធ​»​។

លោក កែម ឡី ត្រូវ​បាន​ខ្មាន់​កាំភ្លើង​បាញ់​សម្លាប់​ទាំង​កណ្តាល​ថ្ងៃ​នៅ​ក្នុង​ផ្សារ​ទំនើប​ស្តាម៉ាត​ ការ៉ាស់សាំង​កាល់តិច​បូកគោ​ក្នុង​រាជធានី​ភ្នំពេញ​ដែល​មាន​មនុស្ស​ច្រើន​អ៊ូអរ​កាលពី​ព្រឹក​ថ្ងៃ​ទី ១០ ខែ​កក្កដា​ហើយ​សព​របស់​លោក​ត្រូវ​បាន​ដង្ហែ​យក​ទៅ​បញ្ជុះ​នៅ​ស្រុក​កំណើត​ក្នុង​ខេត្ត​តាកែវ​កាលពី​ថ្ងៃ​ទី ២៤ ខែ​កក្កដា​ដែល​គេ​ប៉ាន់​ប្រមាណ​ថា​មាន​មនុស្ស​ចូលរួម​ដង្ហែ​ប្រមាណ​​ ២ លាន​នាក់​។ រហូត​មក​ដល់​ពេល​នេះ​មាន​រយៈពេល​ ១ ​ខែ ៨ ថ្ងៃ​ហើយ​សមត្ថកិច្ច​នៅ​មិន​ទាន់​ចាប់​ខ្លួន​អ្នក​នៅ​ពី​ក្រោយ​ណា​ម្នាក់​​ផ្សេង​ទៀត​នៅ​ឡើយ​ទេ​ក្រៅពី​ឈ្មោះ​ ជួប សម្លាប់​ ដែល​សមត្ថកិច្ច​អះអាង​ថា​ជា​ជន​ដៃដល់​ហើយ​ត្រូវ​បាន​ចាប់​ខ្លួន​ភ្លាមៗ​បន្ទាប់ពី​បាន​ធ្វើការ​បាញ់​សម្លាប់​លោក កែម ឡី។

ចំណែក​នៅ​កន្លែង​បញ្ចុះ​សព​លោក កែម ឡី គិត​មក​ដល់​ត្រឹម​ថ្ងៃ​ម្សិលមិញ​នៅ​តែ​មាន​ប្រជាពលរដ្ឋ​ជា​ហូរហែ​មកពី​តាម​បណ្តា​ខេត្ត​នានា​នៅ​តែ​បន្ត​ទៅ​អុជ​ធូប​គោរព​វិញ្ញាណក្ខន្ធ​របស់​លោក​នៅ​ឡើយ​៕

អត្ថបទគួរចាប់អារម្មណ៍