The Phnom Penh Post Search

Search form




Logo of Phnom Penh Post newspaper Phnom Penh Post - សង្គ្រោះជាតិ​ នឹង​បង្កើត​រដ្ឋាភិបាល​ស្រប​ច្បាប់​ បើ​សិន​ឈ្នះ​ឆ្នោត​ ២០១៨




សង្គ្រោះជាតិ​ នឹង​បង្កើត​រដ្ឋាភិបាល​ស្រប​ច្បាប់​ បើ​សិន​ឈ្នះ​ឆ្នោត​ ២០១៨

Content image - Phnom Penh Post
លោក​ សម រង្ស៊ី ជួប​សំណេះ​សំណាល​ជាមួយ​ខ្មែរ​នៅ​សហរដ្ឋ​អាមេរិក​កាលពី​សប្តាហ៍​មុន។ រូបថត ហ្វេសប៊ុក

សង្គ្រោះជាតិ​ នឹង​បង្កើត​រដ្ឋាភិបាល​ស្រប​ច្បាប់​ បើ​សិន​ឈ្នះ​ឆ្នោត​ ២០១៨

ភ្នំពេញៈ មេដឹកនាំ​គណបក្ស​ប្រឆាំង​លោក​ សម រង្ស៊ី​ បាន​ថ្លែង​កាលពី​ថ្ងៃ​សៅរ៍​​ថា​គណបក្ស​របស់​លោក​នឹង​រៀបចំ​រដ្ឋាភិបាល​ស្រប​ច្បាប់​មួយ ប្រសិន​បើ​ខ្លួន​ឈ្នះ​ឆ្នោត​នៅក្នុង​​ការ​បោះឆ្នោត​ឆ្នាំ ២០១៨ ហើយ​លោក​ថ្លែង​ថា​គណបក្ស​កាន់​អំណាច​សព្វ​ថ្ងៃ​ដែល​ដឹកនាំ​ដោយ​លោក ​ហ៊ុន ​សែន​ នឹង​ក្លាយ​ទៅ​ជា​ក្រុម​ឧទ្ទាម​ប្រសិន​បើ​គណបក្ស​កាន់​អំណាច​យូរ​អង្វែង​មួយ​នេះ​ប្រឆាំង​នឹង​រដ្ឋាភិបាល​ថ្មី​ដែល​ដឹកនាំ​ដោយ​គណបក្ស​របស់​លោក។

ការ​អត្ថាធិប្បាយ​នេះ​ត្រូវ​បាន​បង្ហោះ​ជា​ភាសា​អង់គ្លេស​នៅ​លើ​ទំព័រ​ហ្វេសប៊ុក​ផ្ទាល់​របស់​លោក​ សម រង្ស៊ី​ អម​ជាមួយ​នឹង​ការ​ថ្លែង​​របស់​លោក​​នៅក្នុង​សហរដ្ឋអាមេរិក​ដែល​លោក​បាន​ទៅ​ដល់​កាលពី​សប្តាហ៍​មុន​​ដោយ​គ្រោង​ជួប​ប្រជុំ​ជាមួយ​មន្ត្រី​រដ្ឋាភិបាល​អាមេរិក​ និង​​សហគមន៍​ខ្មែរ​នៅ​ទី​នោះ​ផង​ដែរ។

លោក​ សម រង្ស៊ី បាន​សរសេរ​នៅក្នុង​ទំព័រ​ហ្វេសប៊ុក​ថា៖ «នៅ​ក្នុង​ឆ្នាំ ២០១៨ គណបក្ស​សង្គ្រោះ​ជាតិ​នឹង​រៀបចំ​រដ្ឋាភិបាល​ថ្មី​ស្របច្បាប់​នៅ​ពេល​គណបក្ស​ខ្លួន​ដឹកនាំ​រដ្ឋាភិបាល​ហើយ​មាន​ក្រុម​ឧទ្ទាម​ប្រឆាំង​នោះ​នឹង​គ្មាន​កម្លាំង​ណា ឬ​កងកម្លាំង​ប្រដាប់​អាវុធ​ចូលរួម​មក​ប្រឆាំង​រដ្ឋាភិបាល​ស្រប​ច្បាប់​នោះ​ទេ។ នៅ​ពេល​ណា​ដែល​ក្រុម​ឧទ្ទាម​ងើប​​ឡើង​ប្រឆាំង​រដ្ឋាភិបាល​ថ្មី​ដែល​ដឹកនាំ​ដោយ​គណបក្ស​ប្រឆាំង​ត្រូវ​តែ​កម្ចាត់​ពួក​ឧទ្ទាម​»​​។

មេបក្ស​ប្រឆាំង​ ដែល​កំពុង​រស់នៅ​និរទេស​ខ្លួន​ដោយ​ខ្លួនឯង​រូប​នេះ​បាន​ថ្លែង​ទៀត​ថា​លោក​ជឿ​ថា​វៀតណាម​ដែល​ជា​ប្រវត្តិសាស្ត្រ​តែងតែ​ជួយ​ដល់​គណបក្ស​ប្រជាជន​ដែល​ជួយ​ឲ្យ​លោក​ ហ៊ុន សែន​ ឡើង​កាន់​អំណាច​នៅ​ក្នុង​ឆ្នាំ​ ១៩៨៥ នឹង​ឈប់​ជួយ​គណបក្ស​នេះ​ទៀត​​ហើយ​ប្រសិន​បើ​ការ​បោះឆ្នោត​ឆ្នាំ​ ២០១៨ បាន​បង្ហាញ​ថា​គណបក្ស​ប្រជាជន​បាត់បង់​ការ​គាំទ្រ​នោះ។

លោក​ថ្លែង​ថា​៖ «ដូច​ចិន​ក៏​អ៊ីចឹង​ដែរ​ពី​ដើម​ចិន​ជួយ​ខ្មែរ​ក្រហម​ប៉ុន្តែ​ចិន​សម័យ​នេះ​ និង​ចិន ៤០ ​ឆ្នាំ​មុន​ខុស​គ្នា​ឆ្ងាយ​ណាស់​គ្មាន​ចិន​ណា​មក​ជួយ​ខ្មែរ​ក្រហម​ទៀត​ទេ​ហើយ​គ្មាន​ប្រទេស​វៀតណាម​ទៅ​ជួយ​ ហ៊ុន សែន​ ទៀត​ទេ​ព្រោះ​កាលៈទេសៈ​វា​ប្រែប្រួល​ឥឡូវ​នេះ​ប្រទេស​វៀតណាម​កំពុង​មាន​បញ្ហា​នៅ​សមុទ្រ​ចិន​ខាង​ត្បូង​ហើយ​ប្រទេស​វៀតណាម​ត្រូវការ​ការ​គាំទ្រ​ពី​សហរដ្ឋ​អាមេរិក...»។

នៅ​ក្នុង​សុន្ទរកថា​ដែល​​ថ្លែង​នៅក្នុង​វីដេអូ​ដែល​ត្រូវ​បាន​បង្ហោះ​លោក​ សម រង្ស៊ី​ បាន​ពិភាក្សា​អំពី​ការ​រំពឹង​ថា​បើ​គណបក្ស​ប្រជាជន​បដិសេធ​លទ្ធផល​នៃ​ការ​បោះឆ្នោត​ និង​មិន​ព្រម​ផ្ទេរ​អំណាច​មក​ឲ្យ​គណបក្ស​សង្គ្រោះ​ជាតិ​ថា​តើ​ស្ថានការណ៍​វា​ទៅ​ជា​យ៉ាង​ម៉េច​? លោក សម រង្ស៊ី​ មិន​បាន​ឆ្លើយតប​ទៅ​នឹង​សំណើ​តាមរយៈ​អ៊ីមែល​ដើម្បី​សុំ​ការ​អត្ថាធិប្បាយ​​បន្ថែម​ទៀត​ទេ​កាលពី​ម្សិលមិញ។

ទោះ​ជា​យ៉ាង​ណា​នៅក្នុង​ការ​បង្ហោះ​សារ​របស់​លោក​ លោក​បាន​មាន​ប្រសាសន៍​ពី​ការ​ផ្ទេរ​អំណាច​ដែល​ការ​បោះឆ្នោត​នឹង​ប្រព្រឹត្ត​ទៅ​នៅ​ក្នុង​រយៈពេល​ ១៨​ខែ​ទៀត​ដែល​វា «គ្រាន់តែ​ជា​ផ្នែក​មួយ​នៃ​សង្គ្រាម​ និង​ចិត្តសាស្ត្រ​ផ្នែក​នយោបាយ​ប៉ុណ្ណោះ​» រវាង​គណបក្ស​ទាំង​ពីរ​។

អ្នក​នាំពាក្យ​គណបក្ស​ប្រជាជន​លោក​ សុខ ឥសាន បាន​ថ្លែង​ថា​លោក​មិន​ចាប់​អារម្មណ៍​ទៅ​នឹង​សេចក្តី​អធិប្បាយ​របស់​លោក​ សម រង្ស៊ី​នៅ​លើ​ទំព័រ​ហ្វេសប៊ុក​នោះ​ទេ​ហើយ​លោក​បាន​បដិសេធ​ផ្តល់​អត្ថាធិប្បាយ​ចំពោះ​សំណួរ​ថា​តើ​គណបក្ស​កាន់​អំណាច​នឹង​បះបោរ​ប្រឆាំង​​​​រដ្ឋាភិបាល​របស់​គណបក្ស​សង្គ្រោះ​ជាតិ​ដែរ​ឬ​អត់ ​បើ​សិន​គណបក្ស​ប្រឆាំង​មួយ​នេះ​ឈ្នះឆ្នោត​នៅ​ក្នុង​ឆ្នាំ ២០១៨។

លោក​ ឥសាន ​ថ្លែង​ថា៖ «ការ​ឈ្នះឆ្នោត​គឺ​គាត់​បាន​និយាយ​អំពី​វា​អស់​រយៈពេល​ជាង​ ២០ ​ឆ្នាំ​មក​ហើយ។ តើ​វា​ពិត​ដែរ​ឬ​ទេ? គណបក្ស​កាន់​អំណាច​មិន​មាន​ជំនឿ​ថា​គាត់​នឹង​ឈ្នះ​ឆ្នោត​នោះ​ទេ»។

លោក​ សម រង្ស៊ី​ គឺជា​បុគ្គល​ម្នាក់​ដែល​តែងតែ​រិះគន់​ខ្លាំង​បំផុត​ទៅ​ដល់​អ្នក​ដែល​គាំទ្រ​គណបក្ស​ប្រជាជន​ដែល​ប្រកាន់​បក្ខពួក​នៅ​ក្នុង​កងយោធា។

មេដឹកនាំ​យោធា​កំពូលៗ​ភាគច្រើន​គឺជា​សម្ព័ន្ធ​មិត្ត​ជិតស្និទ្ធ​ជាមួយ​លោក ហ៊ុន​ សែន ​ដែល​មួយ​ចំនួន​កំពុង​កាន់កាប់​មុខ​តំណែង​ជា​ឥស្សរជន​នៅក្នុង​គណបក្ស​កាន់​អំណាច​នឹង​មួយ​ចំនួន​មាន​មុខ​តំណែង​នៅ​ក្នុង​គណៈកម្មាធិការ​កណ្តាល​គណបក្ស​ផង​ដែរ​ខណៈ​ដែល​​គណបក្ស​សង្គ្រោះ​ជាតិ​ក៏​ដូចជា​អ្នក​សង្កេត​ការណ៍​មួយ​ចំនួន​បាន​សម្តែង​ការ​ព្រួយបារម្ភ​អំពី​ការ​អន្តរាគមន៍​របស់​កងយោធា​ចូល​ទៅ​ក្នុង​រឿង​នយោបាយ​ក្នុង​នាម​ជា​គណបក្ស​ប្រជាជន​កម្ពុជា​ពី​មុន។

លោក​ គល់ បញ្ញា នាយក​អង្គការ​ឃ្លាំ​មើល​ការ​បោះឆ្នោត​ខុមហ្វ្រែល​បាន​ថ្លែង​ថា​លោក​នៅ​តែ​ជឿជាក់​ថា​ការ​បោះឆ្នោត​ឆ្នាំ ២០១៨ ​ខាង​មុខ​នឹង​ប្រព្រឹត្ត​ទៅ​ដោយ​សន្តិវិធី​ប៉ុន្តែ​លោក​បាន​បន្ថែម​ថា​ការ​គំរាម​កំហែង​ណា​មួយ​ពី​មនុស្ស​មួយ​ចំនួន​ដូចជា​លោក​ សម រង្ស៊ី​ ដែល​ថា​គណបក្ស​ប្រជាជន​ដែល​ប្រឆាំង​រដ្ឋាភិបាល​ថ្មី​ជា​ក្រុម​ឧទ្ទាម​ត្រូវ​តែ «កម្ចាត់» ​ដោយ​រដ្ឋាភិបាល​គណបក្ស​សង្គ្រោះ​ជាតិ​នាពេល​អនាគត​នោះ​វា​នឹង​មិន​ជួយ​ដល់​ស្ថានការណ៍​អ្វី​​នោះ​ទេ។

លោក​ថ្លែង​ថា៖ «វា​ជា​សេចក្តី​ថ្លែងការណ៍​ផ្នែក​អារម្មណ៍​។ វា​មិនមែន​ជា​ដំណោះស្រាយ​ជាក់ស្តែង​ទេ។ ខ្ញុំ​សង្ឃឹម​ថា​នឹង​មិន​មាន​សេចក្តី​ថ្លែងការណ៍​ផ្លូវ​អារម្មណ៍​ដូចនេះ​កើត​មាន​ច្រើន​តទៅ​ទៀត​ទេ។ យើង​ត្រូវ​ការ​ចក្ខុវិស័យ​វែង​ឆ្ងាយ​សម្រាប់​លទ្ធិប្រជាធិបតេយ្យ​នៅ​ក្នុង​ប្រទេស​កម្ពុជា»។

លោក​បាន​បន្ថែម​ទៀត​ថា៖ «ខ្ញុំ​គិត​ថា​គាត់​ប្រហែល​ជា​បារម្ភ​អំពី​សេចក្តី​ថ្លែងការណ៍​នាពេល​ថ្មីៗ​នេះ​របស់​លោក​ ហ៊ុន សែន អំពី​លទ្ធភាព​អាច​កើត​មាន​សង្គ្រាម​​ស៊ីវិល​ [​ប្រសិន​​បើ​គណបក្ស​សង្គ្រោះ​ជាតិ​ឈ្នះ​ឆ្នោត] ប៉ុន្តែ​ខ្ញុំ​នៅ​តែ​មាន​ទំនុក​ចិត្ត​ថា​វា​នឹង​ប្រព្រឹត្ត​ទៅ​ដោយ​សន្តិវិធី​ប្រសិន​​បើ​មាន​ការ​ផ្លាស់ប្តូរ​ណា​មួយ​នោះ​។ ខ្ញុំ​ពិតជា​សង្ឃឹម​ថា​លទ្ធផល​នៃ​ការ​បោះឆ្នោត​នឹង​ត្រូវ​បាន​គេ​គោរព​ទាំងអស់​គ្នា​ហើយ​នឹង​មាន​សន្តិភាព»៕ NS

អត្ថបទគួរចាប់អារម្មណ៍