ភ្នំពេញៈ គណបក្សសង្គ្រោះជាតិ បានអំពាវនាវឲ្យគ្រឹះស្ថានមីក្រូហិរញ្ញវត្ថុ ធ្វើការចរចាឡើងវិញ ចំពោះលក្ខខណ្ឌកម្ចីជាមួយអ្នកខ្ចីដែលទទួលរងគ្រោះដោយទឹកជំនន់។
ទឹកទំនន់ឆ្នាំនេះ បានប៉ះពាល់ខេត្តចំនួន ២០ និងប្រជាជនចំនួនជាង ១,៧ លាននាក់ ហើយពលរដ្ឋចំនួន ៣១ ៣១៤ គ្រួសារត្រូវបានជម្លៀស។ នេះបើតាមវេទិកាឆ្លើយតបមនុស្សធម៌។
គណបក្សសង្គ្រោះជាតិបានសូមឲ្យគ្រឹះស្ថានមីក្រូហិរញ្ញវត្ថុ លើកលែងការសងប្រាក់វិញ រយៈពេល ៦ខែ ហើយបញ្ចុះអត្រាការប្រាក់ទៅ ១ ភាគរយ សម្រាប់រយៈពេលមួយឆ្នាំ និងលើកលែងការរឹបអូសយកដីឬទ្រព្យសម្បត្តិរយៈពេល ៦ ខែ។
នៅក្នុងរបាយការណ៍មួយរបស់គណបក្សសង្គ្រោះជាតិ ស្តីពីការជំពាក់បំណុលបន្ទាប់ពីទឹកជំនន់ដែលចេញកាលពីម្សិលមិញ បានថ្លែងថា ប្រជាជនដែលបានទទួលរងគ្រោះធ្ងន់ធ្ងរដោយទឹកជំនន់គួរត្រូវបានអនុញ្ញាតឲ្យកសាងជីវភាពរបស់ខ្លួនវិញ ដោយមិនមានបន្ទុកនៃការសងបំណុល។ របាយការណ៍បានបន្តថា៖ «ផលប៉ះពាល់នៃការជំពាក់បំណុលលើគ្រួសារប្រជាជន គឺធ្ងន់ធ្ងរ និងផ្តល់នូវនិន្នាការខ្ចីបំណុលមិនមែនត្រឹមតែសម្រាប់ធ្វើស្រែចម្ការទេ ប៉ុន្តែថែមទាំងសម្រាប់គាំពារសុខភាពផងដែរ។ វាមានតម្រូវការចាត់វិធានការជាបន្ទាន់ដើម្បីជួយសម្រាល សម្ពាធលើប្រជាជនរងគ្រោះដោយទឹកជំនន់ និងធ្វើការចរចាលក្ខខណ្ឌសងបំណុលឡើងវិញ»។
លោកស្រី មូរ សុខហួរ ប្រធានផ្នែកកិច្ចការសាធារណៈគណបក្ស សង្គ្រោះជាតិបានថ្លែងថា គណបក្សសង្គ្រោះជាតិ មិនមែនស្នើសុំសម្រាប់គ្រួសារទាំងអស់ទេ ប៉ុន្តែគ្រាន់តែសម្រាប់គ្រួសារដែលមានហានិភ័យបំផុតដូចជាគ្រួសារប្រមាណ ២០ ភាគរយ ដែលរស់នៅក្រោមបន្ទាត់នៃភាពក្រីក្រ។
ទិន្នន័យថ្មីបំផុត ពីសមាគមមីក្រូហិរញ្ញវត្ថុកម្ពុជា បង្ហាញថា ប្រជាជនកម្ពុជាជាង ១,៣ លាននាក់គឺជាអតិថិជនបច្ចុប្បន្នរបស់គ្រឹះស្ថានមីក្រូ ហិរញ្ញវត្ថុ។
លោកស្រី មូរ សុខហួរ បានថ្លែងថា គ្រឹះស្ថានមីក្រូហិរញ្ញវត្ថុ នៅកំពុងផ្តល់កម្ចីទៅគ្រួសារដែលរងគ្រោះដោយទឹកជំនន់ ដែលពួកគេគ្មានជម្រើសផ្សេងក្រៅពីខ្ចីប្រាក់ ដើម្បីចំណាយតាមតម្រូវការមូលដ្ឋានរួមទាំងសម្រាប់ការព្យាបាលជំងឺ។ «តើអាចមិនឈឺយ៉ាងម៉េចទៅ បើពួកគាត់រស់នៅ ដោយផឹកទឹកជំនន់កខ្វក់» ប៉ុន្តែលោក ប៊ុន មុនី ប្រធានសមាគមមីក្រូហិរញ្ញវត្ថុកម្ពុជា បានថ្លែងថា អ្នកនយោបាយ « ពិតជាមិនយល់» អំពីឧស្សាហកម្មនេះទេ។ លោកបន្តថា៖ «មីក្រូហិរញ្ញវត្ថុគឺសំខាន់ណាស់ នៅក្នុងការអភិវឌ្ឍសេដ្ឋកិច្ច ហើយប្រសិនបើអ្នករាល់គ្នាយល់យើងអាចបន្តទៀត។ ប្រសិនបើមិនមានមីក្រូហិរញ្ញវត្ថុ អ្នកក្រនឹងរងការឈឺចាប់ជាងនេះ»។ លោកបានបន្តថា៖ «វិធីដែលគណបក្សសង្គ្រោះជាតិចង់ពន្យារពេល ការប្រមូលការប្រាក់នេះ គឺមិនសមស្របទេ យើងដឹងជាងអ្នកនយោបាយអំពីអ្វីដែលកើតឡើងនៅមូលដ្ឋាន និងដឹងអំពីបញ្ហានៃការឈឺចាប់របស់អតិថិជនរបស់យើង»។ លោក មុនី បានថ្លែងទៀតថា ក្រុមហ៊ុនរបស់លោកឈ្មោះ Sathapana Limited បានកំណត់អត្តសញ្ញាថា មានតែ ៤៥ ក្នុងចំណោមអតិថិជនចំនួន ៧៦ ០០០ នាក់ បានទទួលរងផលប៉ះពាល់ដោយទឹក ជំនន់ ហើយអាចតម្រូវឲ្យមានការចរចាលក្ខខណ្ឌសងកម្ចីឡើងវិញ។ លោកបានបន្ថែមថា ស្ថានភាពគឺ «មិនធ្ងន់ធ្ងរ» ទេ ដោយសារមានតែ ៣០ ភាគរយប៉ុណ្ណោះ នៃកម្ចីទាំងអស់ដែលខ្ចីសម្រាប់ផលិតកម្មកសិកម្ម។
បើតាមទិន្នន័យថ្មីៗ ពីក្រសួង កសិកម្ម ទឹកជំនន់ឆ្នាំនេះ បានប៉ះពាល់ដីស្រែចំនួន ២៨៧ ០០០ ហិកតា និងប្រមាណមួយភាគរយនៃដីសរុបចំនួន ២,៥ ហិកតា ត្រូវបានបំផ្លាញ។
លោក ជាម យៀប ប្រធានគណៈកម្មការធនាគារ និងហិរញ្ញវត្ថុនៃរដ្ឋសភា បានថ្លែងថា មានផែនការធ្វើឲ្យប្រាកដថា គ្រឹះស្ថានមីក្រូហិរញ្ញវត្ថុ «ធ្វើអ្វីដែលពួកគេអាចដើម្បីជួយជនរងគ្រោះទឹកជំនន់ និងមិនធ្វើឲ្យប្រជាជនមានការលំបាកទេ»។ លោកបានថ្លែងបន្តថា នេះអាចរួមបញ្ចូលការផ្លាស់ប្តូរពេលវេលានៃការសងកម្ចី ដូចដែលរដ្ឋាភិបាលបានស្នើសុំក្នុងអំឡុងទឹកជំនន់ឆ្នាំ ២០១១ ដែលបានបំផ្លាញ ១០ ភាគរយនៃដីស្រែនៅទូទាំងប្រទេស។
ប្រធាន សមាគមសេដ្ឋកិច្ចកម្ពុជា លោក ស្រី ចាន់ធី បានថ្លែងថា វាទំនងជាមានអ្នកជំពាក់បំណុលជាច្រើនរងគ្រោះដោយទឹកជំនន់នៅឆ្នាំនេះ។ លោកស្រីបន្ថែមថា ប្រជាជនអាចនឹងខ្ចីកម្ចីពីអ្នកចងការប្រាក់ដែលអាចនឹងមាន ហានិភ័យច្រើនជាងការខ្ចីពីគ្រឹះស្ថានហិរញ្ញវត្ថុ៕ PS
រាយការណ៍បន្ថែម ដោយ ឆាយ ចាន់នីដា
