The Phnom Penh Post Search

Search form




Logo of Phnom Penh Post newspaper Phnom Penh Post - សង្ឃ ២០ អង្គ​នៅ វត្ត​ពោធិ​លង្កា ទាមទារ​ឲ្យ​ដោះលែង​សង្ឃ​ពីរ​អង្គ​ដែល​ត្រូវ​ផ្សឹក​រួច​ឃុំ

សង្ឃ ២០ អង្គ​នៅ វត្ត​ពោធិ​លង្កា ទាមទារ​ឲ្យ​ដោះលែង​សង្ឃ​ពីរ​អង្គ​ដែល​ត្រូវ​ផ្សឹក​រួច​ឃុំ

សង្ឃ ២០ អង្គ​នៅ វត្ត​ពោធិ​លង្កា ទាមទារ​ឲ្យ​ដោះលែង​សង្ឃ​ពីរ​អង្គ​ដែល​ត្រូវ​ផ្សឹក​រួច​ឃុំ

ភ្នំពេញៈ ព្រះសង្ឃ​ជាង ២០ អង្គ​គង់​នៅ វត្ត​ពោធិ​លង្កា ខេត្ត​សៀមរាប បាន​ឡើង​មក​រាជធានី​ភ្នំពេញ ស្វែង​រក​យុត្តិធម៌​និង​ជំរុញ​ឲ្យ​អាជ្ញាធរ​អន្តរាគមន៍​ដោះ​លែង​ព្រះសង្ឃ​ពីរ​អង្គ ដែល​ត្រូវ​សមត្ថកិច្ច​វាយ​ដំ ចាប់​ផ្សឹក និង​ដាក់​ឃុំ ក្រោម​ការ​ចោទ​ថា សេព​គ្រឿង​ស្រវឹង និង​លួច​មាន​ស្រី​ក្នុង​វត្ត​កាល​ពី​យប់​ថ្ងៃ ទី១៨ ខែ​កញ្ញា កន្លង​ទៅ។ អតីត​ព្រះ​សង្ឃ​ជាប់​ចោទ​ទាំង​ពីរ​មាន​ឈ្មោះ ពេជ្រ ដេវីត អាយុ ៣៥​ឆ្នាំ និង ចាន់ សំបូរ អាយុ ២០​ឆ្នាំ។

ក្នុង​សន្និសីទ​សារ​ព័ត៌មាន កាល​ពី​ម្សិល​មិញ​នេះ ព្រះ​តេជគុណ ងីម សៅរ៍​សំខាន់ ប្រធាន​អង្គការ​ធម្មទាន​សង្គម មាន​សង្ឃ​ដីកា​ច្រាន​ចោល​នូវ​ការ​ចោទ​ប្រកាន់​ខាង​លើ​ថា ព្រះ​សង្ឃ​ទាំង​ពីរ​អង្គ​នោះ មិន​បាន​ប្រព្រឹត្ត​ដូច​ការ​ចោទ​ប្រកាន់​ទេ។ ព្រះ​តេជគុណ​លើក​ឡើង​ថា នោះ​ជា​រឿង​ចៃដន្យ​មួយ​ដែល​ព្រះ​សង្ឃ ពេជ្រ ដេវីត ទៅ​រក​កូន​សិស្ស​ឲ្យ​ទៅ​យក​សំបុត្រ​ឡាន​ពេល​យប់​ដើម្បី ធ្វើ​ដំណើរ​ទៅ​ស្រុក​កំណើត​មុន​ភ្ជុំ ស្រប​ពេល​ដែល​សិស្ស​ទាំង​ពីរ​នោះ​កំពុង​ផឹក​ស្រាបៀរ​និង​មាន​ស្រី​កំដរ។

តេជ​គុណ ងីម សៅរ៍​សំខាន់ បាន​អះអាង​ថា៖ «គ្រាន់​តែ​ពេល​ព្រះ​អង្គ ពេជ្រ ដេវីត ទៅ​ដល់​មិន​ទាន់​បាន​ប៉ុន្មាន​ផង ស្រាប់​តែ​ប៉ូលិស​ស្លៀក​ពាក់​ស៊ីវិល ចុះ​បង្ក្រាប​ទាំង​កណ្តាល​យប់​ភ្លាមៗ។ ទាំង​នេះ​ហាក់​ដូច​ជា​ការ​ត្រៀម​ទុក​មុន​អ៊ីចឹង ហើយ​ប្រើ​ហិង្សា​វាយ​ដំ ដល់​បែក​ក្បាល​ឈាម​ផង ដោយ​មិន​គិត​ថា ពួក​លោក​ជា​ព្រះ​សង្ឃ​នោះ​ទេ»។

ព្រះ​តេជ​គុណ សេង សុខុម ដែល​អះអាង​ជា​ម្ចាស់​កុដិ​កើត​ហេតុ​នោះ មាន​សង្ឃ​ដីកា​ថា រឿង​នេះ​កើត​ឡើង​នៅ​ក្នុង​កុដិ​របស់​ព្រះ​អង្គ មិន​មាន​ពាក់​ព័ន្ធ​នឹង​ព្រះ​សង្ឃ​ទាំង​ពីរ​អង្គ​នោះ​ទេ ព្រោះ​កុដិ​នោះ ត្រូវ​បាន​កូន​សិស្ស​លោក​នាំ​គ្នា ចូល​ទៅ​ផឹក​ស៊ី​នៅ​យប់​នោះ។

ក្នុង​សន្និសីទ​សារ​ព័ត៌មាន​នេះ ព្រះសង្ឃ​ជាង ២០ អង្គ​នោះ ក៏​បាន​អំពាវ​នាវ​ឲ្យ​មាន​ការ​ដោះ​លែង​សង្ឃ​ទាំង​ពីរ​អង្គ​នោះ​និង​បញ្ឈប់​ការ​ប្រើ​អំពើ​ហិង្សា​ទៅ​លើ​ព្រះ​សង្ឃ​ពុទ្ធ​សាសនា ដោយ​បាន​ព្រមាន​ថា នឹង​រៀបចំ​បាតុកម្ម​ទ្រង់​ទ្រាយ​ធំ បើ​រឿង​នេះ​មិន​ត្រូវ​បាន​ដោះ​ស្រាយ​ដោយ​យុត្តិធម៌​ទេ​នោះ។

អភិបាល​រង ខេត្ត​សៀមរាប លោក ម៉ៅ វុឌ្ឍី បាន​ឲ្យ​ដឹង​ថា រឿង​រ៉ាវ​ជុំវិញ​ការ​ចាប់​ខ្លួន​ព្រះ​សង្ឃ​ពីរ​អង្គ​នេះ គឺ​ត្រូវ​បាន​ភាគី​អ្នក​គាំទ្រ និង​សមត្ថកិច្ច​បក​ស្រាយ និង​ដោះ​សារ​ខុសៗ​គ្នា ដែល​នាំ​ឲ្យ​មាន​ផល​វិបាក​ក្នុង​ការ​ស្វែង​រក​ការ​ពិត។

លោក​បាន​បន្ត​ឲ្យ​ដឹង​ថា បច្ចុប្បន្ន​នេះ លោក​សង្ឃ​ដែល​ត្រូវ​បាន​ផ្សឹក​ទាំង​ពីរ​អង្គ​នេះ កំពុង​ត្រូវ​បាន​ឃុំ​ខ្លួន​បណ្តោះ​អាសន្ន​នៅ​ពន្ធនាគារ​ខេត្ត ដើម្បី​រង់​ចាំ​សវនាការ​ពី​តុលាការ បន្ទាប់​ពី​ព្រះ​រាជ​អាជ្ញា​បាន​សម្រេច​ចោទ​ប្រកាន់ និង​ផ្តល់​គោល​ការណ៍ ឲ្យ​សមត្ថកិច្ច​រក្សា​ការ​ឃុំ​ខ្លួន​ជា​បណ្តោះ​អាសន្ន។

លោក​អភិបាល​រង​យល់​ថា៖ «ការ​ចោទ​ប្រកាន់​នេះ បើ​យើង​ផ្អែក​តាម​ភ័ស្តុតាង​និង​របាយ​ការណ៍​របស់​សមត្ថកិច្ច គឺ​អាច​ពិត​អ៊ីចឹង​មែន ព្រោះ​នៅ​វត្ត​នោះ មាន​ភាព​រញ៉េ​រញ៉ៃ​ច្រើន​យូរ​មក​ហើយ ចំណែក​ព្រះ​សង្ឃ ក៏​មាន​ច្រើន​បក្ខ​ទៀត បច្ចុប្បន្ន​នេះ មាន​ព្រះ​សង្ឃ និង​ពលរដ្ឋ​ខ្លះ​គាំទ្រ​ឲ្យ​មាន​ការ​ដាក់​ទោស ក៏​មាន​ខ្លះ​ទៀត​ស្នើ​ឲ្យ​មាន​ការ​ដោះ​លែង»។

តាម​កំណត់​ហេតុ​របស់​សមត្ថកិច្ច ការ​ចុះ​បង្រ្កាប​នៅ​យប់​នោះ សមត្ថកិច្ច​ឃាត់​ខ្លួន​បាន​មនុស្ស ៦ នាក់​គឺ​ព្រះសង្ឃ ២ អង្គ កូន​សិស្ស​លោក ២ នាក់ និង​ស្រី ២ នាក់ រួម​នឹង​ភ័ស្តុតាង​មួយ​ចំនួន។ នៅ​ថ្ងៃ ទី១៩ ខែ​កញ្ញា ជា​ថ្ងៃ​បន្ទាប់​នោះ ព្រះ​សង្ឃ​ទាំង​ពីរ​អង្គ ត្រូវ​បាន​ផ្សឹក និង​ចោទ​ប្រកាន់​ពី​បទ​ប្រើ​ប្រាស់​គ្រឿង​ញៀន​និង​ប្រើ​ហិង្សា​លើ​សមត្ថកិច្ច។ ចំណែក​អ្នក​ទាំង ៤ នាក់​នោះ មិន​ត្រូវ​បាន​ឃាត់​ខ្លួន​នោះ​ទេ ប៉ុន្តែ​សមត្ថកិច្ច​នគរបាល​ខេត្ត​បាន​កសាង​សំណុំ​រឿង​បញ្ជូន​ទៅ​តុលាការ​ខេត្ត​រង់​ចាំ​ចំណាត់ការ​តាម​នីតិវិធី។

ការ​ចាប់​ផ្សឹក​អតីត​ព្រះ​សង្ឃ​ពីរ​អង្គ​នោះ ត្រូវ​ប្រជា​ពលរដ្ឋ និង​ព្រះ​សង្ឃ​មួយ​ចំនួន​ចាត់​ទុក​ថា ជា​ចេតនា​គ្រោង​ទុក​ជា​មុន​របស់​ព្រះ​ចៅ​អធិការ​វត្ត ព្រះ​នាម កែវ ខូយ ដើម្បី​បណ្តេញ​អតីត​សង្ឃ​ទាំង​នោះ​ចេញ​ពី​វត្ត ដោយ​ការ​មិន​ពេញ​ចិត្ត​យូរ​មក​ហើយ ប៉ុន្តែ ករណី​នេះ ព្រះ​ចៅ​អធិការ​វត្ត​លោក​បាន​បដិសេធ​នូវ​ការ​ចោទ​ប្រកាន់​ដោយ​គ្មាន​មូលដ្ឋាន​នេះ ហើយ​ថា ព្រះ​អង្គ​មិន​មាន​ជាប់​ពាក់​ព័ន្ធ​អី​នៅ​ក្នុង​រឿង​សង្ឃ​ពីរ​អង្គ​នេះ​ឡើយ៕

អត្ថបទគួរចាប់អារម្មណ៍