ភ្នំពេញៈ អ្នកគ្រប់គ្រងសណ្ឋាគារ The Great Duke Phnom Penh លោក ចក្រពង្ស ផាឡាត់សុងក្រាម បានអះអាងថា ភាគីសណ្ឋាគារបានយល់ព្រមបើកប្រាក់ឈ្នួលឲ្យបុគ្គលិកសម្រាប់ខែសីហា បន្ទាប់ពីបញ្ចប់កិច្ចប្រជុំជាមួយភាគីតំណាងបុគ្គលិក និងក្រសួងការងារកាលពីម្សិលមិញដោយអនុវត្តចាប់ពីថ្ងៃពុធនេះ និងបញ្ចប់នៅថ្ងៃព្រហស្បតិ៍ស្អែក ខណៈខែផ្សេងទៀតនៅមិនទាន់ច្បាស់លាស់។
លោក ចក្រពង្ស ផាឡាត់សុងក្រាម ថ្លែងថា៖ «បញ្ហានេះបានបិទបញ្ចប់ដោយស្ថាពរហើយ។ យើងមិនបាននិយាយរឿងបើកប្រាក់ឈ្នួលនៅក្នុងខែបន្តបន្ទាប់ទៀតទេ គឺយើងនិយាយគ្នាពីការបើកប្រាក់ឈ្នួលសម្រាប់នៅថ្ងៃពុធ និងព្រហស្បតិ៍។
យើងបានព្រមព្រៀងគ្នាទាំង ២ ភាគីហើយ»។
លោក ហេង សួរ រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា ករណីរបៀបនេះក្រសួងធ្លាប់បានទទួលពាក្យបណ្ដឹងកាលពីខែមិថុនាម្ដងរួចមកហើយ ដោយក្រសួងបានដោះស្រាយចប់ហើយ ប៉ុន្តែនៅខែក្រោយៗមកទៀតទើបតែដឹងក្រោយមានការតវ៉ា។
លោកថ្លែងថា៖ «បើសិនជាមានករណីនេះកើតឡើងទៀតតំណាងកម្មករនិយោជិតបានជូនដំណឹងមកសាជាថ្មីនោះក្រសួងនឹងចុះទៅសម្របសម្រួលហើយអាចនឹងមានវិធានការ រដ្ឋបាលដើម្បីដោះស្រាយបញ្ហា ចំពោះការតវ៉ារបស់បុគ្គលិកកាលពីព្រឹកថ្ងៃអង្គារ ក្រសួងបានទទួលព័ត៌មាន និងបានចាត់មន្ដ្រីចុះទៅដោះស្រាយហើយ»។
លោក ខេង សំបូរ អនុប្រធាននាយកដ្ឋានវិវាទការងារនៃក្រសួងការងារ និងបណ្ដុះបណ្ដាលវិជ្ជាជីវៈបានប្រាប់ភ្នំពេញប៉ុស្ដិ៍ក្រោយបញ្ចប់ការប្រជុំម្សិលមិញថា បញ្ហានេះបានដោះស្រាយជាស្ថាពរហើយដោយទទួលបានលទ្ធផលជាវិជ្ជមាន។
បុគ្គលិកសណ្ឋាគារ The Great Duke Phnom Penh អតីតសណ្ឋាគារ InterContinental ជាង ១០០ នាក់កាលពីម្សិលមិញបាននាំគ្នាមកតវ៉ានៅសណ្ឋាគារដើម្បីទាមទារបើកប្រាក់ខែឲ្យបានទៀងទាត់ បន្ទាប់ពីខកខានតាំងពីខែមិថុនារហូតមក។ នេះបើតាមលោក ទូច កុសល ប្រធានសហជីពកម្មករនិយោជិតវិស័យទេសចរណ៍នៃសណ្ឋាគារមួយនេះ។
លោកបានថ្លែងថា៖ «បើគិតមកដល់ថ្ងៃទី ៣ ខែកញ្ញានេះ គឺជាខែទី ៣ ហើយដែលការបើកប្រាក់ខែឲ្យបុគ្គលិកមានការយឺតយ៉ាវ។ ភាគីសណ្ឋាគារមិនព្រមបើកប្រាក់ឈ្នួលឲ្យកម្មករហើយមិនជូនដំណឹងឲ្យច្បាស់ថានឹងបើកប្រាក់ឈ្នួលឲ្យពេលណាទេ»។
លោក កុសល បានឲ្យដឹងថា ចាប់តាំងពីសណ្ឋាគារនេះបានប្ដូរឈ្មោះពី InterContinental មក The Great Duke Phnom Penh កាលពីថ្ងៃទី ១ ខែមករា ឆ្នាំ ២០១៨ មកគឺសណ្ឋាគារនេះបានរំលោភអត្ថប្រយោជន៍បុគ្គលិកដូចជា បញ្ឈប់កម្មវិធីជប់លៀងខួបកំណើតបុគ្គលិក និងអត្ថប្រយោជន៍ផ្សេងៗទៀតជាដើម។
លោក កុសល បានបញ្ជាក់ថា៖ «រឿងប្រាក់អតីតភាពការងារ ក្រសួងបានប្រកាសច្បាស់ណាស់ឲ្យសណ្ឋាគារបើកឲ្យបុគ្គលិក។ ប៉ុន្ដែយើងមើលឃើញថានៅក្នុងខែ ៦ នេះមិនបានបើកឲ្យទេ គឺពន្យារពេលរហូត ហើយមិនបានជូនដំណឹងទៀត»។
លោកថា៖ «ចេតនារបស់គេយើងមើលទៅតាំងពីមានការផ្លាស់ប្ដូរឈ្មោះនេះរហូតមកហាក់បីដូចជាគេលែងចង់ធ្វើអាជីវកម្មទៀតអ៊ីចឹង គឺគេព្យាយាមដំឡើងថ្លៃបន្ទប់ អ៊ីចឹងមានភ្ញៀវឯណាគេមកស្នាក់នៅ? បើសណ្ឋាគារនេះនៅបន្តបើក ហេតុអីធ្វើរបងបាំងនៅចំពីមុខតែម្ដង។ ដូច្នេះគោលបំណងរបស់គេគឺមិនចង់ចំណាយលុយ ពេលបញ្ឈប់បុគ្គលិកគឺគេចង់ឲ្យកម្មករដើរចេញម្នាក់ម្ដងៗខ្លួនឯង»។
លោក កង ច័ន្ទសាវ៉ាឌី បុគ្គលិកផ្នែកកក់បន្ទប់ និងជាតំណាងក្រុមអ្នកតវ៉ាបានឲ្យដឹងថា ជាលទ្ធផលក្រោយប្រជុំ ភាគីម្ចាស់សណ្ឋាគារបានព្រមបើកប្រាក់ឈ្នួលសម្រាប់ខែសីហាឲ្យរួចរាល់ត្រឹមថ្ងៃទី ៥ ខែកញ្ញាស្អែកនេះ។ ប៉ុន្ដែនៅខែបន្តបន្ទាប់ទៀតមិនទាន់មានការសន្យាទេ។
លោកថា៖ «ខាងភាគីតំណាងម្ចាស់សណ្ឋាគារបានយល់ព្រមបើកប្រាក់ខែសម្រាប់តែខែសីហាទេ។ ប៉ុន្ដែសម្រាប់បញ្ហានេះនៅខែបន្តបន្ទាប់ទៀត យើងមិនទាន់ដឹងទេ តែយើងនឹងបន្ដទំនាក់ទំនងជាមួយក្រសួងការងារដើម្បីស្វែងរកដំណោះស្រាយជាបន្តទៀត ។ យើងសង្ឃឹមថា ភាគីសណ្ឋាគារនឹងធ្វើតាមអ្វីដែលក្រសួងបានបង្គាប់»៕