កោះកុងៈ សត្វខ្លាឃ្មុំកម្រ ១ ក្បាល ត្រូវបានមន្ត្រីឧទ្យានុរក្សស្នាក់ការល្បាតឆាយអារ៉ែង និងមន្ត្រីអង្គការសម្ព័ន្ធមិត្តសត្វព្រៃ (Wildlife Alliance) ជួយសង្គ្រោះដោយជោគជ័យកាលពីថ្ងៃទី ២២ មករា បន្ទាប់ពីបានជាប់អន្ទាក់របស់ព្រានព្រៃ ដែលលួចដាក់នៅក្នុងដែនឧទ្យានជាតិជួរភ្នំក្រវាញខាងត្បូង ហើយក៏បានដោះលែងឱ្យចូលក្នុងព្រៃធម្មជាតិវិញ។
លោក ម៉ន ផល្លា ប្រធានមន្ទីរបរិស្ថានខេត្តកោះកុងប្រាប់ ភ្នំពេញ ប៉ុស្តិ៍ កាលពីថ្ងៃទី ២៤ មករា ថាមន្ត្រីឧទ្យានុរក្សស្នាក់ការល្បាតឆាយអារ៉ែង និងមន្ត្រីអង្គការ Wildlife Alliance បានជួយសង្គ្រោះសត្វខ្លាឃ្មុំ ១ ក្បាល ទម្ងន់ប្រហែល ៤០ គីឡូក្រាម ចេញពីអន្ទាក់របស់ព្រានព្រៃដែលបានលួចដាក់នៅក្នុងដែនឧទ្យានជាតិជួរភ្នំក្រវាញខាងត្បូង។
លោកថា សត្វខ្លាឃ្មុំនេះមានស្លាកស្នាមរបួសជើងខាងក្រោយបន្ដិចបន្ដួចដោយសារជាប់អន្ទាក់ ប៉ុន្ដែក្រុមគ្រូពេទ្យជំនាញរបស់អង្គការបានជួយព្យាបាលទាន់ពេលវេលា និងបានដោះលែងវាឱ្យចូលក្នុងព្រៃធម្មជាតិដែលវាកំពុងរស់នៅវិញ។ ព្រានព្រៃបានដាក់ពង្រាយអន្ទាក់ជាច្រើនប្រភេទក្នុងដែនឧទ្យានជាតិជួរភ្នំក្រវាញខាងត្បូង ប៉ុន្ដែក្រុមមន្ត្រីជំនាញក៏បានដើរដោះចេញវិញជាបន្តបន្ទាប់ដែរ។
លោក ម៉ន ផល្លា បញ្ជាក់ថា៖ «អន្ទាក់ត្រូវបានដាក់ដោយព្រានព្រៃគឺមានច្រើនប្រភេទ រួមមានខ្សែនីឡុង ឬខ្សែគោ មានលួសសរសៃតូចៗ មានអន្ទាក់ប្រើភ្លើងឆក់ និងអន្ទាក់ផ្សេងៗទៀត។ បើទោះបីជាយ៉ាងនេះក្ដី យើងនៅតែបន្តចុះល្បាតជារៀងរាល់ថ្ងៃសហការជាមួយអង្គការ Wildlife Alliance ហើយយើងក៏បង្ក្រាបបានជាហូរហែដែរ»។
លោក Nick Marx ប្រធានគម្រោងសង្គ្រោះ និងថែរក្សាសត្វព្រៃនៃអង្គការសម្ព័ន្ធមិត្តសត្វព្រៃថ្លែងពីថ្ងៃទី ២៤ មករា ថា ក្រុមមន្ត្រីជំនាញ Wildlife Alliance បានពិនិត្យ និងព្យាបាលឱ្យវារួចរាល់ ដោយសារវាមានរបួសជើងតិចតួច។ ដូច្នេះអ្នកជំនាញបានដោះលែងឱ្យទៅរស់នៅក្នុងព្រៃធម្មជាតិវិញពីល្ងាចថ្ងៃទី ២២ ខែមករា។
ក្រោយពីដោះលែងឱ្យចូលក្នុងព្រៃវិញ លោកសម្តែងក្តីបារម្ភខ្លាំង ដោយខ្លាចវាជាប់អន្ទាក់របស់ព្រានព្រៃម្ដងទៀត ប៉ុន្ដែដោយសារតែគ្មានជម្រើស។ លោកថា សត្វដែលធ្លាប់រស់នៅក្នុងព្រៃមិនអាចយកមកដាក់ក្នុងទ្រុងដូចសត្វចិញ្ចឹមដោយដៃមនុស្សបានទេគឺពិតជាមានផលអាក្រក់សម្រាប់សត្វព្រៃនោះ។ កាលពីសប្ដាហ៍មុន មន្ត្រីលោកបានប្រមូលអន្ទាក់ចំនួនជាង ៤០០ អន្ទាក់ ប៉ុន្ដែចំនួននេះនៅមិនទាន់ប្រមូលចេញពីព្រៃអស់នៅឡើយ។
លោក Nick Marx បញ្ជាក់ថា៖ «ខ្ញុំស្អប់អន្ទាក់ខ្លាំងណាស់ ហើយអន្ទាក់វាសម្លាប់សត្វព្រៃយ៉ាងសាហាវ។ ច្បាប់របស់យើងមានភាពធូរលុងច្រើនពេក គឺមិនបានដាក់ទោសទណ្ឌជនល្មើសឱ្យបានធ្ងន់ធ្ងរទេ ព្រោះបើយើងចង់ការពារសត្វព្រៃយើង គឺត្រូវតែការពារកុំឱ្យមានអន្ទាក់»។
លោកបន្ថែមថា៖ «យើងតែងតែ ចុះល្បាតរាល់ថ្ងៃ ប៉ុន្ដែពិបាកក្នុងការចាប់ជនល្មើស។ ជួនកាលពេលយើងចាប់បានជនល្មើសហើយ គឺយើងអត់មានពិន័យអ្វីធ្ងន់ធ្ងរទៅលើពួកគេទេ អ៊ីចឹងពួកគេអត់ខ្លាចច្បាប់ទេ»។
តាមរបាយការណ៍ដែលបង្ហាញនៅលើគេហទំព័រហ្វេសប៊ុក Wildlife Alliance ពីថ្ងៃទី ២៤ មករា គឺ ខ្លាឃ្មុំតូចនេះត្រូវបានប្រទះឃើញ ដោយក្រុមឧទ្យានុរក្ស ដែលកំពុងជាប់អន្ទាក់នៅថ្ងៃទី ២២ ខែមករា។ ក្រុមល្បាតពុំទាន់បានដោះភ្លាមៗនោះទេ ដោយបារម្ភខ្លាចខ្លាឃ្មុំនេះភ័យ និងផ្អើល ហើយរើកាន់តែខ្លាំងនាំឱ្យមានរបួសកាន់តែធ្ងន់។ ពេលនោះ ទើបក្រុមល្បាតបានទូរស័ព្ទទៅកាន់ការិយាល័យនៃអង្គការសម្ព័ន្ធមិត្តសត្វព្រៃភ្លាមៗដើម្បីបញ្ជូនក្រុមជួយសង្គ្រោះសត្វព្រៃបន្ទាន់ពីភ្នំពេញ មកជួយសង្គ្រោះសត្វខ្លាឃ្មុំនេះ។
របាយការណ៍បន្តថា ក្រុមជួយសង្គ្រោះរបស់អង្គការដឹកនាំដោយលោក Nick Marx បានចុះទៅកន្លែងជាមួយក្រុមពេទ្យសត្វជួយសង្គ្រោះ។ សត្វខ្លាឃ្មុំនេះត្រូវបានក្រុមសង្គ្រោះបាញ់ថ្នាំសណ្តំ ដោះចេញពីអន្ទាក់ និងព្យាបាលនៅនឹងកន្លែងតែម្តង ព្រោះវាមិនមានរបួសធ្ងន់ធ្ងរទេ បន្ទាប់មកក៏ត្រូវបានដោះលែងទៅវិញ។
គួររំឭកថា ជួរភ្នំក្រវាញខាងត្បូងត្រូវបានរាជរដ្ឋាភិបាលសម្រេចចេញអនុក្រឹត្យបង្កើតជាដែនឧទ្យានជាតិជួរភ្នំក្រវាញខាងត្បូងកាលពីអំឡុងខែឧសភា ឆ្នាំ ២០១៦ ដែលមានផ្ទៃដីទំហំ ៤១០ ៣៩២ ហិកតាស្ថិតក្នុងភូមិសាស្ត្រខេត្តកោះកុង ខេត្តពោធិ៍សាត់ ខេត្តកំពង់ស្ពឺ និងខេត្តព្រះសីហនុ៕