.jpg)
សត្វទន្សោងដែលជាប់អន្ទាក់ងាប់នៅឃុំប្រាំបីមុំ។ រូបថត សហការី
កំពង់ស្ពឺៈ សត្វទន្សោង ១ ក្បាល ត្រូវបានប្រជាសហគមន៍ប្រាំបីមុំ ប្រទះឃើញងាប់ដោយជាប់អន្ទាក់កាលពីសប្តាហ៍មុន នៅស្រុកថ្ពង ខេត្តកំពង់ស្ពឺ ដែលករណីនេះបង្ហាញថា បទល្មើសសត្វព្រៃនៅតែជាការគំរាមកំហែងយ៉ាងធ្ងន់ធ្ងរដល់ជីវិតសត្វព្រៃ ជាពិសេសប្រភេទសត្វទន្សោងដ៏កម្រ និងជិតផុតពូជពីផែនដីនេះ។
លោក សឿន ឡាយ ប្រធានសហគមន៍ប្រាំបីមុំ នៅភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺប្រាប់ភ្នំពេញប៉ុស្តិ៍ថាកាលពី ៣ ថ្ងៃមុន គាត់ និងប្រជាពលរដ្ឋក្នុងសហគមន៍ប្រាំបីមុំបាននាំគ្នាចុះល្បាតព្រៃរយៈពេល ៣ ថ្ងៃ គឺពីថ្ងៃ ២៥-២៧ ខែមករា ដើម្បីធ្វើការស្រាវជ្រាវ និងបង្ក្រាបបទល្មើសព្រៃឈើ និងសត្វព្រៃ។
លោកនិយាយថា៖ «ក្នុងអំឡុងពេលនៃការចុះល្បាតព្រៃនោះក្រុមការងារយើងបានប្រទះឃើញសត្វទន្សោងឈ្មោលជំទង់ ១ ក្បាល ដែលមានអាយុប្រមាណ ១ ឆ្នាំ និងមានទម្ងន់ប្រមាណជាង ១០០ គីឡូក្រាម ងាប់ដោយមានជាប់ខ្សែអន្ទាក់នៅជើងខាងក្រោយផ្នែកខាងស្ដាំរបស់វា។ ខ្មោចរបស់វាមានសភាពហើមស្អុយ ដែលទំនងជាត្រូវងាប់ក្នុងអំឡុងពេល ២-៣ ថ្ងៃមកហើយ»។
លោកបន្តថា ក្រុមការងាររបស់លោកបានប្រទះឃើញខ្មោចសត្វទន្សោងនោះថ្ងៃទី ២៥ ខែមករា នៅព្រៃរបោះមួយខាងត្បូងភូមិដែលមានចម្ងាយប្រមាណជាង ១០០ ម៉ែត្រ ពីចម្ការអំពៅរបស់ឯកជនមួយឈ្មោះ ណា ឆា។
លោក ឡាយ បានបញ្ជាក់ថា៖ «ក្រោយប្រទះឃើញខ្មោចសត្វទន្សោងនោះ ពួកយើងបាននាំគ្នាសម្រាកនៅក្នុងព្រៃចំនួន ២ ថ្ងៃ ដើម្បីចាំឃ្លាំមើល និងចាប់ខ្លួនជនដែលបានដាក់អន្ទាក់បង្កឲ្យសត្វទន្សោងដ៏កម្រនេះស្លាប់ ដើម្បីនាំខ្លួនឲ្យមន្ត្រីជំនាញ ធ្វើការផ្ដន្ទាទោសតាមផ្លូវច្បាប់»។
លោកបន្ថែមថា បន្ទាប់ពីរង់ចាំឃ្លាំមើលអស់រយៈពេល ២ ថ្ងៃ ហើយមិនឃើញមានជនប្រមាញ់សត្វព្រៃណាម្នាក់ចូលទៅក្នុងព្រៃនោះ ពួកគាត់បានសម្រេចដុតកម្ទេចខ្មោចសត្វទន្សោងនោះចោល រួចបន្តស្រាវជ្រាវរកឃើញ និងដោះអន្ទាក់ដែលត្រូវបានគេបង្កៃសម្រាប់ចាប់សត្វព្រៃក្នុងតំបន់ព្រៃការពាររបស់សហគមន៍លោកបានចំនួន ២៣៧ អន្ទាក់។
បើតាមលោក ឡាយ កាលពីខែធ្នូ ឆ្នាំ ២០១៩ ប្រជាសហគមន៍បានចុះល្បាតព្រៃ ហើយក៏បានប្រទះឃើញសត្វឈ្លូស ២ ក្បាល មាន់ព្រៃ ១ ក្បាល និងសត្វកាំប្រមា ១ ក្បាល ងាប់ដោយជាប់អន្ទាក់។ លោកឲ្យដឹងថាកាលពីដើមខែមីនា ២០១៩ ក្រុមការងាររបស់លោកបានជួយសង្គ្រោះសត្វទន្សោងញីឈ្មោល ២ ក្បាលពីការជាប់អន្ទាក់របស់អ្នកប្រមាញ់សត្វព្រៃខុសច្បាប់ផងដែរ។
លោកបញ្ជាក់ថា៖ «គ្រប់អន្ទាក់ទាំងអស់សុទ្ធតែអាចសម្លាប់ជីវិតសត្វ និងមនុស្សបានគ្រប់ពេល ប្រសិនបើមិនប្រយ័ត្នដើរជាន់ចំពីលើវា។ ការបន្តប្រើអន្ទាក់ដើម្បីប្រមាញ់សត្វព្រៃនឹងបង្កឲ្យមានវិនាសកម្មសត្វព្រៃធ្ងន់ធ្ងរ និងឈានទៅដល់ការបាត់បង់ពូជសត្វកម្រដូចជាសត្វទន្សោង ខ្ទីង ជាដើមនេះយ៉ាងឆាប់រហ័ស»។
ករណីដាក់អន្ទាក់ចាប់សត្វព្រៃនេះផងដែរនៅឯខេត្តមណ្ឌលគិរីកាលពីសប្ដាហ៍មុន បុរសម្នាក់ត្រូវបានតុលាការខេត្តសម្រេចឃុំខ្លួនបណ្ដោះអាសន្នដោយចោទប្រកាន់ពីបទដាក់អន្ទាក់នៅក្នុងតំបន់ដែនជម្រកសត្វព្រៃស្រែពក។ បុរសនោះត្រូវបានក្រុមឧទ្យានុរក្សនៃដែនជម្រកសត្វព្រៃស្រែពកចាប់ឃាត់ខ្លួនក្នុងបទល្មើសជាក់ស្ដែងជាមួយវត្ថុតាងអន្ទាក់ និងឧបករណ៍ឆក់ជាជំនួយក្នុងការឆក់សម្លាប់សត្វព្រៃ ព្រមទាំងគ្រឿងរំសេវដែលជាសារធាតុគីមីពុលមួយចំនួនទៀត។
យ៉ាងណាក៏ដោយការប្រមាញ់សត្វព្រៃ និងការជួញដូរសាច់សត្វព្រៃនៅតែបន្តកើតមាន ល្គឹកណាអ្នកបរិភោគសាច់សត្វព្រៃមិនភ្ញាក់រឭកក្នុងការបញ្ឈប់ការបរិភោគសាច់សត្វព្រៃទេនោះ។ ជាក់ស្ដែងកាលពីថ្ងៃទី ២៩ ខែមករា កម្លាំងមូលដ្ឋានកងរាជអាវុធហត្ថស្រុកវ៉ើនសៃ រួមសហការជាមួយកម្លាំងទីស្នាក់ការឧទ្យានជាតិវិរជ័យបានចុះបង្ក្រាបបទល្មើសសត្វព្រៃនៅភូមិកំពង់ចាម ឃុំប៉ាក់កាឡាន ស្រុកវ៉ើនសៃ ខេត្តរតនគិរី ដោយបានចាប់យកសាច់សត្វជ្រូកព្រៃទម្ងន់ ២៨ គីឡូក្រាម។ នេះបើតាមសម្ដីរបស់លោក ស៊ូ ខុន អនុប្រធានការិយាល័យឧទ្យានជាតិវិរជ័យកាលពីសប្តាហ៍មុន។ លោក ខុន ថ្លែងថា៖ «បទល្មើសសត្វព្រៃនឹងនៅតែបន្តកើតមាន ប្រសិនបើអ្នកបរិភោគមិននាំគ្នាបញ្ឈប់»។
លោកថា៖ «ការការពារព្រៃឈើ និងសត្វព្រៃមិនមែនជាតួនាទីផ្ដាច់មុខរបស់ក្រុមឧទ្យានុរក្សនៃក្រសួងបរិស្ថាន ឬរបស់ស្ថាប័នជំនាញណាមួយឡើយ តែវាជាតួនាទី និងការទទួលខុសត្រូវរួមគ្នារបស់ប្រជាពលរដ្ឋ និងអាជ្ញាធររដ្ឋាភិបាល»៕
