.jpg)
សមត្ថកិច្ចខេត្តកំពង់ធំបានលែងសត្វស្លាបអម្បូរសត្វប្រវឹកជាង ១ ពាន់ក្បាល ទៅក្នុងរមណីយដ្ឋានព្រៃប្រស់កាលពីចុងសប្ដាហ៍កន្លងទៅ។ សហការី
កំពង់ធំ: សមត្ថកិច្ចខេត្តកំពង់ធំបានលែងសត្វស្លាបអម្បូរសត្វប្រវឹកជាង ១ ពាន់ក្បាល ទៅក្នុងរមណីយដ្ឋានព្រៃប្រស់កាលពីចុងសប្ដាហ៍កន្លងទៅនេះ ក្រោយពីរឹបអូសបានពីរថយន្ត ១ គ្រឿង ដែលត្រូវបានសង្ស័យថាបាននាំចូលពីព្រំដែនកម្ពុជាថៃ ឆ្ពោះទៅកាន់រាជធានីភ្នំពេញ។ យោងតាមលោក ប៊ុន សុធី នាយខណ្ឌរដ្ឋបាលព្រៃឈើខេត្តកំពង់ធំ។
លោក ប៊ុន សុធី បានប្រាប់ភ្នំពេញ ប៉ុស្ដិ៍ កាលពីម្សិលមិញថា បុរសជាជនសង្ស័យចំនួន ៣ នាក់ ត្រូវបានមន្ត្រីជំនាញកំពុងសាកសួរតាមនីតិវិធីក្រោយពីឃាត់ខ្លួនពួកគេ ខណៈដែលពួកគេកំពុងដឹកជញ្ជូនសត្វស្លាបប្រភេទនេះឆ្លងកាត់ខេត្តកំពង់ធំ ហើយត្រូវសមត្ថកិច្ចបង្ក្រាបបាននៅថ្ងៃទី ១៣ ខែកក្កដានេះ។
លោក សុធី បានឲ្យដឹងថា បន្ទាប់ពីសមត្ថកិច្ចបានឃាត់ទាំងមនុស្ស និងរថយន្តដឹកជញ្ជូនសត្វប្រវឹកនេះ មន្ត្រីជំនាញបានយកសត្វប្រវឹករស់ទាំងអស់នេះ ទៅដោះលែងចូលព្រៃធម្មជាតិនៅរមណីយដ្ឋានព្រៃប្រស់ ខេត្តកំពង់ធំ។ ចំណែក ជនសង្ស័យ និងរថយន្តដែលជាមធ្យោបាយដឹកជញ្ជូននោះត្រូវសមត្ថកិច្ចបញ្ជូនទៅសង្កាត់រដ្ឋបាលព្រៃឈើស្រុកកំពង់ស្វាយ ដើម្បីចាត់ការតាមច្បាប់។
លោកបញ្ជាក់ថា៖ «ឥឡូវនេះ យើងកំពុងសួរនាំអ្នកដឹកជញ្ជូនសត្វប្រវឹកទាំង ៣ នាក់នេះ ខ្ញុំអត់ទាន់ដឹងត្រូវពិន័យ ឬបញ្ជូនទៅតុលាការទេ ព្រោះមន្ត្រីខ្ញុំគាត់កំពុងធ្វើការ ពេលបានរបាយការណ៍ហើយ យើងនឹងកាត់ក្ដីតាមច្បាប់។ ចំណែកសត្វប្រវឹកទាំងនេះ យើងអត់អាចទុកវាយូបានទេ ពេលយើងចាប់បានភ្លាមៗ យកវាទៅលែងវិញហើយ ព្រោះបើទុកយូរ ខ្លាចវាងាប់»។
លោក អិុត សុធា ព្រះរាជអាជ្ញាអមសាលាដំបូងខេត្តកំពង់ធំ ដែលជាអ្នកដឹកនាំប្រតិបត្តិការនេះផ្ទាល់បានថ្លែងថា រថយន្ដ ១ គ្រឿង លួចដឹកសត្វប្រវឹកនេះ ដោយសង្ស័យខ្លះនាំយកមកពីព្រំដែនកម្ពុជា និងយកមកពីថៃមួយចំនួន ហើយសត្វប្រវឹកនេះជាប្រវឹកព្រៃ មិនមែនជាសត្វគេចិញ្ចឹមទេ ហើយពួកគេដឹកជញ្ជូនបម្រុងនាំ យកទៅលក់នៅទីក្រុងភ្នំពេញ។
លោកបន្តថា ករណីនេះកន្លងទៅសមត្ថកិច្ចធ្លាប់បានបង្ក្រាបជាបន្ដបន្ទាប់ ប៉ុន្ដែមិនមែនទ្រង់ទ្រាយធំដូចករណីនេះទេ ពោលមានសត្វប្រវឹកបន្ដិចបន្តួចប៉ុណ្ណោះ។
លោកបញ្ជាក់ថា៖ «យើងសាកសួរគាត់សិន បើដឹងលទ្ធផលយ៉ាងណា គឺយើងឆែកមើលច្បាប់ទៀតថា តើត្រូវពិន័យគាត់ ឬត្រូវបញ្ជូនទៅតុលាការ? ប៉ុន្ដែសត្វប្រវឹកនេះ យើងមិនទាន់ទុកថា ជាសត្វកម្រទេ ហើយកម្រិតទោសនេះ គឺអាចត្រឹមពិន័យ និងធ្វើកិច្ចសន្យា តែបើសិនសត្វហ្នឹងជា សត្វកម្រវិញ ពួកគាត់នឹងត្រូវមានទោស ត្រូវបញ្ជូនទៅតុលាការ»៕
