.jpg)
សត្វប្រវឹកដែលសមត្ថកិច្ចខេត្តសៀមរាបចាប់ពីឈ្មួញ។ រូបថត សហការី
ភ្នំពេញៈ សត្វប្រវឹកចំនួន ៣៨២ ក្បាល ក្នុងចំណោម ៥៥៣ ក្បាល ត្រូវបានមន្ត្រីជំនាញខណ្ឌរដ្ឋបាលព្រៃឈើខេត្តសៀមរាប ដោះលែងចូលទៅក្នុងព្រៃក្បែរបឹងធម្មជាតិមួយក្នុងសហគមន៍បឹងឈូកនៃស្រុកបន្ទាយស្រីកាលពីព្រឹកថ្ងៃអាទិត្យ ក្រោយពីពួកវាត្រូវបានរំដោះចេញពីដៃឈ្មួញជួញដូរសត្វព្រៃខុសច្បាប់ ២ នាក់។
លោក លឹម សម្បត្តិ អធិការស្រុកប្រាសាទបាគងបានប្រាប់ភ្នំពេញប៉ុស្តិ៍ថា កាលពីវេលាម៉ោងជាង ១២ យប់រំលងអធ្រាត្រឈានចូលថ្ងៃទី ២៦ ខែ កញ្ញា ឆ្នាំ ២០២០ កម្លាំងរបស់លោកបានចាប់ឃាត់ខ្លួនបុរស ២ នាក់ រួមមានឈ្មោះ យ៉េង ឈុនហេង អាយុ ៣៣ ឆ្នាំ និងគូកនម្នាក់ទៀតឈ្មោះ ឆាត រស្មី ដែលអ្នកទាំង ២ មានលំនៅក្នុងក្រុងសិរីសោភ័ណ ខេត្តបន្ទាយមានជ័យ។
ការចាប់ខ្លួនបុរសទាំង ២ នេះបានធ្វើឡើងនៅចំណុចភូមិជ្រៃ ឃុំកណ្ដែកស្រុកប្រាសាទបាគង ខេត្តសៀមរាប បន្ទាប់ពីសមត្ថកិច្ចបានឆែកឆេររថយន្តទំនើបពណ៌ត្រេអ៊ីរបស់ពួកគេ ១ គ្រឿង ដែលមានពាក់ស្លាកលេខ (ខ.ម) ហើយបានរកឃើញ សត្វប្រវឹកចំនួន ៥៥៣ ក្បាលក្នុងនោះ ១៧១ ក្បាលបានងាប់ ដែលពួកគេបានដឹកជញ្ជូនដោយគ្មានលិខិតអនុញ្ញាត។ លោកថ្លែងថា៖ «បុរសជាប់សង្ស័យក្នុងបទល្មើសដឹកជញ្ជូនសត្វព្រៃខុសច្បាប់ទាំង ២ និងវត្ថុតាងត្រូវបានបញ្ជូនទៅឱ្យសមត្ថកិច្ចជំនាញខណ្ឌរដ្ឋបាលព្រៃឈើ ចាត់វិធានការបន្តទៅតាមផ្លូវច្បាប់»។
លោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាបបានប្រាប់ភ្នំពេញប៉ុស្តិ៍ថា សត្វប្រវឹកដែលនៅមានជីវិតរស់ចំនួន ៣៨២ ក្បាល ត្រូវបានដោះលែងកាលពីព្រឹកថ្ងៃអាទិត្យនៅក្នុងព្រៃក្បែរបឹងធម្មជាតិ ១ ដែលមានទីតាំងស្ថិតនៅក្នុងសហគមន៍បឹងឈូកនៃស្រុកបន្ទាយស្រី។
ចំណែកជនសង្ស័យត្រូវបានមន្ត្រីជំនាញធ្វើការផាកពិន័យអន្តរការណ៍តាមមាត្រា ៩៦ នៃច្បាប់ស្ដីពីព្រៃឈើ បន្ទាប់ពីពួកគេអះអាងថា សត្វស្លាបទាំងនេះបាននាំចូលពីខេត្តស្រះកែវប្រទេសថៃ ដើម្បីនាំយកទៅលក់បន្តនៅក្នុងរាជធានីភ្នំពេញ។
លោកបញ្ជាក់ថា៖ «សត្វប្រវឹកជាសត្វមានដោយបង្គួរ ប៉ុន្តែពួកគេធ្វើការដឹកជញ្ជូននាំចូលឬ ធ្វើពាណិជ្ជកម្ម ដោយគ្មានលិខិតអនុញ្ញាតដែលយោងតាមមាត្រា ៩៦ នៃច្បាប់ស្ដីពីព្រៃឈើពួកគេត្រូវធ្វើការផ្ដន្ទាទោសដោយផាកពិន័យអន្តរការណ៍គិតជាប្រាក់ចំនួនពី ២ ទៅ ៣ ដងនៃតម្លៃវត្ថុតាងពិតប្រាកដនៃទីផ្សារ»។
បើតាមលោក ប៊ុនលីម ជនសង្ស័យត្រូវបានដោះលែងវិញហើយក្រោយពីមន្ត្រីជំនាញបានធ្វើការអប់រំណែនាំ និងយល់ព្រមទទួលការបង់ផាកពិន័យទៅតាមការកំណត់នៃច្បាប់៕
វីដេអូ៖
