The Phnom Penh Post Search

Search form




Logo of Phnom Penh Post newspaper Phnom Penh Post - សត្វ​ក្តាន់​ដែល​ជិត​ផុត​ពូជ​ត្រូវ​គេ​ឃើញ​នៅ​ខេត្ត ក្រចេះ

សត្វ​ក្តាន់​ដែល​ជិត​ផុត​ពូជ​ត្រូវ​គេ​ឃើញ​នៅ​ខេត្ត ក្រចេះ

សត្វ​ក្តាន់​ដែល​ជិត​ផុត​ពូជ​ត្រូវ​គេ​ឃើញ​នៅ​ខេត្ត ក្រចេះ

131112_08
សត្វក្តាន់ នៅសួនសត្វភ្នំតាម៉ៅ ក្នុងខេត្តតាកែវ កាលពីឆ្នាំ ២០១២ ម៉េង គឹមឡុង

ក្រចេះ: អង្គការ Fauna & Flora International (FFI) បាន​ចេញ​ផ្សាយ​កាល​ពី​ម្សិលមិញ​ថា ជំពូក​សត្វ​ក្តាន់​ថ្មី ដែល​ជា​សត្វ​កំពុង​រង​គ្រោះថ្នាក់​ជិត​ផុត​ពូជ​បំផុត​នៅ ឥណ្ឌូចិន ត្រូវ​បាន​រក​ឃើញ​នា​ពេល​ថ្មីៗ​នេះ នៅ​ខេត្ត ក្រចេះ និង​ភាគ​ពាយ័ព្យ​នៃ​ព្រះ​រាជាណាចក្រ​កម្ពុជា។

សត្វ​ក្តាន់​ដ៏​កម្រ​នេះ ត្រូវ​បាន​រក​ឃើញ​ដោយ​ក្រុម​ចម្រុះ​មក​ពី​សាកល​វិទ្យាល័យ ភូមិន្ទ ភ្នំពេញ និង FFI នៅ​កន្លែង​រស់​នៅ​មាន​សក្តានុពល​ចំនួន ៥ ក្នុង​ចំណោម ១០ កន្លែង។

លោក​ស្រី Sarah Brook អ្នក​គ្រប់​គ្រង​ជំពូក​សត្វ​នៅ​កម្មវិធី​ប្រចាំ​កម្ពុជា​របស់​អង្គការ FFI បាន​ពន្យល់​ថា ជំពូក​រងគ្រោះ​ពីរ​នៃ​សត្វ​កា្តន់​ត្រូវ​បាន​គេ​ដឹង​ថា មាន​ជីវិត​រស់​នៅ ខណៈ​ដែល​សត្វ​ក្តាន់ ឥណ្ឌូចិន ដែល​ធ្លាប់​សម្បូរ​នៅ ឡាវ វៀតណាម ថៃ និង យូណាន ប៉ែក​ខាង​ត្បូង​ប្រទេស ចិន​នោះ ត្រូវ​បាន​គេ​បរ​បាញ់​សម្លាប់​អស់​តាំង​ពី​យូរ​មក​ហើយ។

លោក​ស្រី Brook បាន​សរសេរ​អ៊ីមែល ពី​ម្សិលមិញ​ថា៖ «កម្ពុជា ជា​ប្រទេស​តែ​មួយ​គត់​នៅ​ឥណ្ឌូចិន ដែល​នៅ​សល់​សត្វ​ក្តាន់ ដូច្នេះ វា​ជា​រឿង​វិជ្ជមាន។ វា​អស្ចារ្យ ដែល​សត្វ​នេះ កំពុង​រស់​នៅ​ទី​នេះ ប៉ុន្តែ​វា​មិន​យឺត​ពេល​ទេ​ក្នុង​ការ​ជួយ​សង្គ្រោះ​វា»។

សត្វ​ក្តាន់​នេះ​ត្រូវ​បាន​រក​ឃើញ​ចុង​ក្រោយ​បង្អស់​នៅ​ឆ្នាំ ២០០៦ ក្បែរ​ខេត្ត ក្រចេះ បន្ទាប់​ពី​អ្នក​ភូមិ កាន់​ម៉ាស៊ីន​ថត​វាស់​វែង​បឋម​ឃើញ​ថា ក្តាន់​ពី ៥០ ទៅ ៨០ ក្បាល​កំពុង​រស់​នៅ​ក្នុង​តំបន់​នេះ​។ មុន​ការ​រក​ឃើញ​ឆ្នាំ ២០០៦ មាន​តែ​ទីតាំង​ពីរ​ប៉ុណ្ណោះ ដែល​ត្រូវ​បាន​ឃើញ​ថា មាន​សត្វ​ក្តាន់​មួយ​ចំនួន​តូច​ក្នុង​ទស្សវត្សរ៍ ទី៨០។

លោក​វេជ្ជបណ្ឌិត Nick Souter នៃ​មជ្ឈមណ្ឌល​អភិរក្ស​ជីវសាស្រ្ត​សាកល​វិទ្យាល័យ ភូមិន្ទ ភ្នំពេញ និង​ធ្វើ​ការ​រួម​គ្នា​ជាមួយ​នឹង FFI បាន​គូស​បញ្ជាក់​ថា ខណៈ​ដែល​ក្រុម​សត្វ​ក្តាន់​នេះ ត្រូវ​បាន​រក​ឃើញ​នៅ​ក្រៅ​តំបន់​អភិរក្ស​ជាតិ ការ​ធ្វើ​ការ​ដើម្បី​បង្កើន​ចំនួន​សត្វ​ក្តាន់​នេះ​មិន​មែន​ជា​រឿង​មិន​អាច​ធ្វើ​ទៅ​បាន​នោះ​ទេ។ លោក​បាន​បញ្ជាក់​ថា៖ «យើង​ចង់​រក​ឃើញ​ពួក​វា​រស់​នៅ​ក្នុង​តំបន់​អភិរក្ស ដោយ​សារ​តែ​វា​ធ្វើ​ឲ្យ​កិច្ច​ខិតខំ​ប្រឹង​ប្រែង​អភិរក្ស​កាន់​តែ​លំបាក​ថែម​ទៀត​»។ លោក​បន្ថែម​ថា ការ​បរ​បាញ់ និង​ការ​បំផ្លាញ​ទី​ជម្រក​ជា​កត្តា​សំខាន់ ដែល​ធ្វើ​ឲ្យ​អន្តរាយ​ដល់​ជំពូក​សត្វ​នៅ​កម្ពុជា។

ការិយាល័យ​កម្មវិធី WWF ប្រចាំ​កម្ពុជា បាន​រៀបរាប់​សត្វ​ក្តាន់​នេះ​ថា មាន​មាឌ​តូច​មាន​រោម​ពណ៌​ត្នោត​ចាស់​រហូត​ដល់​ត្នោត​ខ្ចី និង​មាន​ចុង​កន្ទុយ​ពណ៌​ស។

លោក​ស្រី Brook បាន​ឲ្យ​ដឹង​ថា សត្វ​នេះ​ចូលចិត្ត​នៅ​តំបន់​វាល​ស្មៅ​សើម​នៅ​ក្បែរ​ទន្លេ​ធំ ឬ​ខ្នាត​កណ្តាល​ដោយ​ជា​ធម្មតា​នៅ​ក្រៅ​តំបន់​ព្រៃ​ក្រាស់។ លោក ព្រមាន​ថា៖ «ការ​បរ​បាញ់​គឺ​ជា​ការ​គំរាម​កំហែង​ធំ​បំផុត ចំពោះ​សត្វ​ក្តាន់ ដែល​នៅ​សល់​នៅ​កម្ពុជា​។ សត្វ​ក្តាន់ ត្រូវ​បាន​គេ​បរ​បាញ់ ដើម្បី​យក​សាច់​ទៅ​បរិភោគ និង​អាច​ធ្វើ​ការ​ជួញ​ដូរ ដូចជា​សត្វ​ព្រៃ​ផ្សេង​ទៀត​ផង​ដែរ»៕ TK

អត្ថបទគួរចាប់អារម្មណ៍