The Phnom Penh Post Search

Search form




Logo of Phnom Penh Post newspaper Phnom Penh Post - សប្តាហ៍​ក្រោយ​សំបូរ​វិល​ទៅ​រស់​នៅ​ក្នុង​នាម​ជាសត្វ​ព្រៃ​វិញ

សប្តាហ៍​ក្រោយ​សំបូរ​វិល​ទៅ​រស់​នៅ​ក្នុង​នាម​ជាសត្វ​ព្រៃ​វិញ

សំបូរ​​ ត្រូវ​បាន​គេ​បំពាក់​កម្រង​ផ្កា និង​ផ្តល់​ផ្លែ​ចេក​ជា​អាហារ នៅ​ក្នុង​ពិធី​សាសនា​មួយ​កាល​ពី​ម្សិល​មិញ​។ រូបថត ម៉ៃ វីរៈ
សំបូរ​​ ត្រូវ​បាន​គេ​បំពាក់​កម្រង​ផ្កា និង​ផ្តល់​ផ្លែ​ចេក​ជា​អាហារ នៅ​ក្នុង​ពិធី​សាសនា​មួយ​កាល​ពី​ម្សិល​មិញ​។ ម៉ៃ វីរៈ

សប្តាហ៍​ក្រោយ​សំបូរ​វិល​ទៅ​រស់​នៅ​ក្នុង​នាម​ជាសត្វ​ព្រៃ​វិញ

ភ្នំពេញៈ នៅ​សប្តាហ៍​ក្រោយ បន្ទាប់​ពី​ព្រះ​អាទិត្យ​លិច ​សត្វ​ដំរី​ល្បី​ឈ្មោះ​បំផុត ​របស់​កម្ពុជា​ ឈ្មោះ​ សំបូរ ដែល​មាន​ទម្ងន់​ ៣៦០០ គីឡូ​ក្រាម នឹង​ត្រូវ​ដឹក​ចូល​ក្នុង​កុងតឺន័រ​​ ហើយ​លើក​​ដាក់​លើ​រថយន្ត ដឹក​ទៅ​កាន់​ភាគ​ខាង​ជើង​ នៃ​ខេត្ត​មណ្ឌល​គិរី​ដើម្បី​ឲ្យ​វា​រស់​នៅ​ក្នុង​ទី​ជម្រក​សត្វ​ព្រៃ បន្ទាប់​ពី​វា​បាន​​រស់​នៅ​ភ្នំពេញ​អស់​រយៈ​ពេល ៣៣ ឆ្នាំ។

ក្នុង​ពិធី​ព្រះពុទ្ធ​សាសនា​មួយ កាល​ពី​ម្សិលមិញ ដើម្បី​ប្រារព្ធ​ការ​ចាក​ចេញ​ សត្វ​ដំរី​ ដែល​ដឹក​​ភ្ញៀវ​​ទេសចរ​ជា​ច្រើន​ឆ្នាំ​នៅ​វត្ត​ភ្នំ ត្រូវ​បាន​​គេ​ពាក់​កម្រង​ផ្កា​ឲ្យ​ខណៈ​ដែល​ព្រះ​សង្ឃ​​សូត្រ​ធម៌ ហើយ​​ម្ចាស់​របស់​វា​បាន​ស្រែក​យំ។

ម្ចាស់​ដំរី​លោក ស៊ីន ស៊ន អាយុ ៥៧ ឆ្នាំ ដែល​បាន​រស់​នៅ​ជាមួយ​នឹង​ដំរី​អាយុ​ ៥៤ ឆ្នាំ​នេះ ចាប់​តាំង​​ពី​លោក​នៅ​ជា​ក្មេង​​ប្រុស បាន​ឲ្យ​ដឹង​ថា៖ «​ខ្ញុំ​មិន​ចង់​ឲ្យ​សំបូរ​​នៅ​ទី​នេះ​ទៀត​ទេ​ បើ​ទោះ​បីជា​ខ្ញុំ​នឹក​​វា​ក៏​ដោយ ព្រោះ​កន្លែង​នេះតូច ហើយ​វា​ត្រូវ​ការ​កន្លែង​ធំ​ ដើម្បី​​រស់​នៅ​ក្នុង​បរិស្ថាន​ធម្មជាតិ​។ ខ្ញុំ​​ចាត់​ទុក​វា​ជា​​ប្អូន​ស្រី​ខ្ញុំ​»។

នៅ​ដើម​​ឆ្នាំ​នេះ ​ខណៈ​មាន​ការ​ខ្វែង​គំនិត​គ្នា​ ជាមួយ​នឹង​មូល​និធិ​​សង្គ្រោះ​​ដំរី​អាស៊ី​ ដែល​មាន​​​​មូល​ដ្ឋាន​នៅ​ទីក្រុង​ហុង​កុង ​​ដែល​​បាន​រៀប​ចំ​ឲ្យ​សំបូរ​ចាក​​ចេញ​ពី​វត្ត​ភ្នំនៅ​ឆ្នាំ ២០១​២ ទៅ​ដី​មួយ​កន្លែង​នៅ​ក្បែរ​អាកាស​យាន​ដ្ឋាន​ពោធិ៍ចិនតុង​សម្រាប់​ការ​សម្រាក និង​ការ​ព្យាបាល លោក​ ស៊ន មាន​​បំណង​​ចង់​នាំ​វា​​​ដឹក​ភ្ញៀវ​នៅ​វត្ត​ភ្នំ​វិញ ដោយ​សារ​តែ បញ្ហា​ហិរញ្ញវត្ថុ​។

ប៉ុន្តែ បន្ទាប់​ពី​មាន​ការ​រិះ​គន់​នៅ​ថ្នាក់​អន្តរ​ជាតិ​ពី​អ្នក​គាំទ្រ​ជា​ច្រើន ដែល​បាន​ឧបត្ថម្ភ​រយៈ​ពេល​ព្យាបាល ២ ឆ្នាំ​របស់​សំបូរ ​និង​ការ​ជំទាស់ពី​សាលា​រាជធានី ក្រោយ​មក ​លោក ស៊ន បាន​ស្ទាក់​ស្ទើរ ហើយ​ឯកភាព​ថា ​សំបូរ អាច​ចូល​និវត្តន៍​ក្នុង​គម្រោង​ជ្រលង​ដំរី នៅ​តំបន់​​អភិរក្ស​សីមា នៅ​ខេត្ត​មណ្ឌល​គិរី​ជំនួស​វិញ។

ជា​ថ្នូរ លោក​​ស៊ន ​នឹង​​ទទួល​បាន​ការ​ងារ​ជា​ទី​ប្រឹក្សានៅ​ទី​ជម្រក​នោះ​មាន​ន័យ​ថា លោក​អាច​ធ្វើ​ដំណើរ​ជា​ប្រចាំ និង​​ទទួល​បាន​ប្រាក់​ខែ។ «​ខ្ញុំ​នឹង​បាត់​​បង់​ប្រាក់​ចំណូល​មួយ​ចំនួន បន្ទាប់​​ពី​សំបូរ​ចាក​ចេញ ប៉ុន្តែ ខ្ញុំ​សប្បាយ​ចិត្ត​ ព្រោះ​សំបូរ​ នឹង​​សប្បាយចិត្ត​ជាមួយ​នឹង​ជីវិត​ថ្មី​របស់​​វា»។

លោក Jack Highwood ​អ្នក​គ្រប់​គ្រង​នៅ​គម្រោង​ជ្រលង​​ដំរីបាន​ឲ្យ​ដឹង​ថា ​វា​នឹង​ចំណាយ​អស់ ១៥០០០ ដុល្លារ​ក្នុង​មួយ​ឆ្នាំក្នុ​ងការ​ឧបត្ថម្ភ​សំបូរ។ សំបូរ នឹង​ចូល​រួម​​ជាមួយ​នឹង​សត្វ​ដំរី ៩ក្បាល​ទៀតនៅ​ទី​ជម្រក​ហើយ​នឹង​រៀន​ធ្វើ​ជា​សត្វ​ដំរី​ព្រៃ​ឡើង​វិញ។

លោក​​បាន​បញ្ជាក់​ថា៖​«វា​ជា​ដំណើរ​ការ​យូរ។ ​​វា​មិន​មែន​​​គ្រាន់​តែ​ដាក់​សត្វ​ដំរី​លើ​រថយន្ត ហើយ​បើក​ទៅ និង​ទម្លាក់​វា​ចុះ​នោះ​ទេ។ វា​ជា​ដំណើរ​​ការ​ស្មុគ​ស្មាញ»។

យោង​​តាម​លោក Highwood បាន​ឲ្យ​ដឹង​ថា សំបូរ​ ត្រូវ​បាន​រំពឹង​ថា នឹង​រស់​នៅ​ប្រហែល ១ ទស្សវត្សរ៍​ទៀត។ ការ​ដើរ​លើ​ថ្ម​ និង​​ក្រួសច្រើន​ឆ្នាំ​ក្នុង​ទីក្រុង បណ្តាល​ឲ្យ​មាន​ដំបៅ​​លើ​ជើង​សំបូរ​ក្នុង​ចំណោម​បញ្ហា​ដទៃ​ទៀត ដែល​បណ្តាល​ឲ្យ​វា​ដើរ​ទាំង​លំបាក។

យុទ្ធនា​ការ​ស្វែង​រក​ហិរញ្ញវត្ថុ​លើ​អីុនធឺណិត និង​ការ​គាំទ្រ​ពី​មូលនិធិ Abraham Foundation ដែល​មាន​មូល​ដ្ឋាន​នៅ​សហរដ្ឋ​អាមេរិក បាន​រៃ​អង្គាស​ប្រាក់​ជា​ច្រើន​ សម្រាប់​ថ្លៃ​ព្យាបាល និង​ស្នាក់​នៅ ចំណែក​ឯ USAID ​បង់​ថ្លៃ​ដឹក​ជញ្ជូន​វា​ទៅ​មណ្ឌល​គិរី។

លោកកែវ អូម៉ាលីស ប្រធាន​នាយក​ដ្ឋាន​សត្វ​ព្រៃ និង​ជីវ​ចម្រុះ​នៅ​រដ្ឋបាល​ព្រៃ​ឈើ បាន​ថ្លែង​កាល​ពី​ម្សិលមិញ​ថា លោក ស៊ន បាន​ធ្វើ​សេចក្តី​សម្រេច​ត្រឹម​ត្រូវ ក្នុង​ការ​បញ្ជូន​សំបូរ​ទៅ​ទី​ជម្រក។

លោក​បាន​​បន្ថែ​ម​​ថា៖ «​អ្វី​ដែល​លោក ស៊ីន ស៊ន កំពុង​ធ្វើ​ គឺ​ជា​គំរូ​ល្អ​សម្រាប់​អ្នក​ដទៃ​ទៀត ដែល​មាន​សត្វ​ដំរី ហើយ​ដែល​គួរ​បញ្ជូន​វា​ទៅ​រស់​នៅ​ក្នុង​ព្រៃ»។

យោង​តាម​គម្រោង​ជ្រលង​ដំរី បាន​ឲ្យ​ដឹង​ថា មាន​សត្វ​ដំរី​មាន​ម្ចាស់​ប្រហែល ៨០ ក្បាល​នៅ​កម្ពុជា​។ បើ​តាម​លោក អូម៉ាលីស កម្ពុជា​មាន​ដំរី​សរុប​ជាង ៥០០ ក្បាល៕ TK

អត្ថបទគួរចាប់អារម្មណ៍