The Phnom Penh Post Search

Search form




Logo of Phnom Penh Post newspaper Phnom Penh Post - សព​លោក​បណ្ឌិត​កែម ​ឡី​ត្រូវ​បាន​ដង្ហែ​ទៅ​ស្រុក​កំណើត​ខេត្ត តាកែវ ដោយ​មាន​អ្នក​ចូល​រួម​យ៉ាង​ច្រើន​កុះករ

សព​លោក​បណ្ឌិត​កែម ​ឡី​ត្រូវ​បាន​ដង្ហែ​ទៅ​ស្រុក​កំណើត​ខេត្ត តាកែវ ដោយ​មាន​អ្នក​ចូល​រួម​យ៉ាង​ច្រើន​កុះករ

Content image - Phnom Penh Post
ប្រជា​ពលរ​ដ្ឋ​យ៉ាងច្រើន​​កុះ​ករ​​ ចូល​រួម​ដង្ហែសព​លោក​បណ្ឌិត​ កែម ឡី ដែល​ហែ​តាម​មហាវិថី​ព្រះ​មុនី​វង្ស​ កាលពី​ថ្ងៃ​ម្សិលមិញ​។ ហុង មិនា

សព​លោក​បណ្ឌិត​កែម ​ឡី​ត្រូវ​បាន​ដង្ហែ​ទៅ​ស្រុក​កំណើត​ខេត្ត តាកែវ ដោយ​មាន​អ្នក​ចូល​រួម​យ៉ាង​ច្រើន​កុះករ

ភ្នំពេញ/តាកែវៈ ប្រជា​ពលរដ្ឋ​ដែល​ស្រឡាញ់​យុត្តិធម៌ ដែល​គណៈកម្មា​រៀប​​ចំ​បុណ្យ​សព ​បាន​​ប៉ាន់​ប្រមាណ​ថាអាច​មាន​រហូត​ដល់ ២ លាន​នាក់ ​ដោយ​ក្បួន​ដង្ហែ​មាន​ប្រវែង​រហូត​ដល់ ៣០ គីឡូម៉ែត្រ​ នៅ​លើ​ផ្លូវ​ជាតិ​លេខ ៣ បាន​ចូល​រួម​ជូន​ដំណើរ​សព ​លោក​បណ្ឌិត​ កែម ឡី ទៅ​កាន់​ស្រុក​កំណើត របស់​លោក នៅ​ក្នុង​ស្រុក​ត្រាំកក់ ខេត្ត​តាកែវ និង​ជម្រាប​លា​ «វីរបុរស» រូប​នេះ​ជា​រៀង​រហូត ជា​មួយ​នឹង​អារម្មណ៍​ក្តុកក្តួល​ និង​សោក​ស្តាយ​​អាឡោះ​អាល័យ​ជា​​ទី​បំផុត។

សព​របស់​លោក​បណ្ឌិត កែម ឡី ត្រូវ​បាន​ដង្ហែ​ចេញ​ពីវត្ត​ចាស់ ខណ្ឌ ជ្រោយ​ចង្វារ រាជធានី​ភ្នំពេញ នៅ​វេលា​ម៉ោង ៧ ព្រឹក​ម្សិល​មិញ ទៅ​តាម​ការ​គ្រោង​ទុក ដោយ​ភ្ជាប់​នឹង​មឈូស​ទឹកកក ត្រូវ​ដឹក​យក​ទៅ​បញ្ចុះ​នៅ​ស្រុក​កំណើត​​របស់​លោក​នៅ​ខេត្ត​តា​កែវ បន្ទាប់​ពី​សព​នេះ​ត្រូវ​បាន​តម្កល់​ទុក​នៅវ​ត្ត​ចាស់​អស់​រយៈពេល ១៤ ថ្ងៃ​មក​គិត​ចាប់​តាំង​ពី​ថ្ងៃ​ដែល​ខ្មាន់​កាំភ្លើង​បាន​បាញ់​សម្លាប់​រូប​លោក​កាល​ពីថ្ងៃទី ១០ កក្កដា ឆ្នាំ ២០១៦។

ក្បួន​រថយន្ត​ដង្ហែ​សព​ចេញ​ពី​វត្ត​ចាស់​ត្រូវ​បាន​គេ​រៀប​ចំ​ឡើង​យ៉ាង​មាន​របៀប​ដោយ​គេ​ឃើញ​មាន​ម៉ូតូ ស៊ីរ៉ែន​មួយ​គ្រឿង​ និង​រថយន្ត​ ស៊ីរ៉ែន ​នាំ​ផ្លូវ​មួយ​គ្រឿង​របស់​អាជ្ញាធរ បន្ទាប់​មក​មាន​រថយន្ត​ដឹក​ព្រះ​សង្ឃ រថយន្ត​ដឹក​​ក្រុមគ្រួសារ​សព​រថយន្ត​ដឹក​វង់​ភ្លេង​ពិណពាទ្យ រថយន្ត​ដឹក​សព និង​រថយន្ត​ផ្សេង​ៗ​ទៀត ខណៈ​ដែល​អ្នក​ថ្មើ​រជើង​និង​​អ្នក​ជិះ​ម៉ូតូ​បាន​ដើរ​និង​ជិះ​អម​ពី​ក្រោយ។

Content image - Phnom Penh Post
រថយន្ត​ដឹក​សព​លោក​បណ្ឌិត ​កែម ​ឡី ពេល​ទៅ​ដល់​រង្វង់​មូល​ចោ​ម​ចៅ​កាល​ពីម្សិល​មិញ​​​។ ផា លីណា

ចាប់​តាំង​ពី​ព្រឹក​ព្រលឹម​ គេ​ឃើ​ញ​មាន​ព្រះ​សង្ឃ ប្រជា​ពលរដ្ឋ​ប្រុស ​ស្រី ​ចាស់​ក្មេង​ជា​ច្រើន សកម្មជន​អង្គការ​សង្គម​ស៊ីវិល តំណាង​រាស្ត្រ​គណបក្ស​ប្រឆាំង កម្មករ​និង​អ្នក​កាសែត​ជាតិ​ និង​អន្តរជាតិ​ បាន​ធ្វើ​ដំណើរ​យ៉ាង​ប្រញាប់​ប្រញាល់​ទៅ​កាន់​វត្ត​ចាស់ ក្នុង​សង្កាត់​ជ្រោយ​ចង្វារ ដែល​ជា​ទី​កន្លែង​តម្កល់​សព ​លោក​ បណ្ឌិត កែម ឡី និង​មាន​ពលរដ្ឋ​ជា​ច្រើន​ទៀត បាន​នាំ​គ្នា​នៅ​ឈរ​រង់​ចាំ​នៅ​តាម​ដង​ផ្លូវដែល​ក្បួន​ដង្ហែ​សព​របស់ «វីរបុរស» ដែល​ហ៊ាន​និយាយ​ការ​ពិត​ពី​បញ្ហា​ក្នុង​សង្គម​រូប​នេះ ត្រូវ​ហែ​ឆ្លង​កាត់ ដូច​ជា​កំណាត់​ផ្លូវ​​ពី​វត្ត​ចាស់ រហូត​ដល់​ស្ពាន​ជ្រោយ​ចង្វារ កំណាត់​ផ្លូវ​ព្រះ​មុនីវង្សពីគល់​ស្ពាន​ជ្រោយ​ចង្វា​រ ដល់​ស្តុប​ផ្លូវ​បំបែក​សហព័ន្ធ​រុស្ស៊ី និង​នៅ​​អម​សង​ខាង​ផ្លូវ​សហព័ន្ធ​រុស្ស៊ី រហូត​ដល់​ផ្លូវ​បំបែក​ចោម​ចៅ​គឺ​សុទ្ធ​តែ​មាន​មនុស្ស​យ៉ាង​ច្រើន​កកកុញ។

ចំនួន​មនុស្ស​ដ៏​ច្រើន​សម្បើម​ ដែល​គេ​ពុំ​ធ្លាប់​ដែល​ឃើញ​នៅ​ក្នុង​ប្រទេស​ កម្ពុជា ​ពី​មុន​មក​​នេះ ត្រូវ​បាន​គណៈកម្មការ​​រៀប​ចំ​បុណ្យ​​សព​បាន​គណនា​ថា អាច​មាន​រហូត​ដល់ ២ លាន​នាក់។

អ្នក​ចូល​រួមហែ​ក្បួន​មាន​​ពាក់​អាវ​យឺតពណ៌​ស ដែល​មាន​រូប​ថត និង​សារ​របស់​លោក ​កែម ឡី ដែល​សរសេរ​ថា «ជូត​ទឹក​ភ្នែ​ក​របស់​អ្នក​រួច​បន្ត​ដំណើរ​ទៅ​មុខ​ទៀត»​និង​សារ​ផ្សេង​ទៀត និង​មាន​អ្នក​ខ្លះ​ កាន់​រូប​ថត​ លោក កែម ឡី កាន់​ទង់​ជាតិ និង​ទង់​សាសនា​ជា​ដើម ។ល។ អ្នក​ចូល​រួម​ភាគ​ច្រើន​ជិះ​ម៉ូតូ​ផ្ទាល់​ខ្លួន ម៉ូតូ​កង់​បី រថយន្ត​ឈ្នួល រថយន្ត​ទ្រុង​ដឹក​កម្មករ និង​រថយន្ត​គ្រួសារ​ជាដើម។

Content image - Phnom Penh Post
ក្បួន​ដង្ហែ​សព​តាម​ផ្លូវ​ជាតិ​លេខ​៣​ពីម្សិល​មិញ​​។ ហេង ជីវ័ន

នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​ លោក សន ជ័យ ដែល​បាន​ដឹកនាំ​ក្បួន នៅ​ខាង​មុខ​ថ្លែង​ថា បើ​រាប់​អ្នក​ចូលរួម​ដង្ហែ​សព និង​អ្នក​ឈរ​មើល​នៅ​តាម​ផ្លូវ​ គឺមាន​ជាង​ ១ លាន​នាក់។

លោក​យល់​ឃើញ​ថា ចំនួន​​មនុស្ស​ចូល​រួម​ដង្ហែ​សព​ដ៏​ច្រើន​សម្បើម​បែប​នេះ បង្ហាញ​ថា​ ខ្មែរ​ចេះ​សាមគ្គី​គ្នា​ និង​ឱ្យ​តម្លៃ​ទៅលើ​អ្នក​ចេះ​ដឹង​ដូច​ជា​លោក​​ កែម ឡី។

លោក​ថា៖​«តាំងពី​ក្បួន​ចេញពី​វត្ត​ចាស់​មក​ដល់​វត្ត​ជម្ពូ​វ័ន​ឃើញ​ថា​ ប្រជាពលរដ្ឋ​មក​ឈរ​ចាំ​ត្រៀបត្រា ក្នុង​ដៃ​កាន់​រូបថត​លោក​ កែម ឡី ក្រៅពីនោះ​ ប្រជាពលរដ្ឋ​យក​ទឹក​សុទ្ធ នំប៉័ង អ្វី​ដែល​អាច​ហូប​បាន​ត្រៀម​ទុក​ចែក​ជូន​ដល់​អ្នក​ធ្វើ​ដំណើរ ហើយ​ពួកគេ​និយាយ​ភាសា​ដូចៗ​គ្នា​ថា យើង​ត្រូវ​តែ​ចេះ​ស្រឡាញ់​គ្នា ត្រូវ​ឱ្យ​តម្លៃ​អ្នក​ចេះ​ដឹង»។

លោក​ថា៖«អ្វីដែល​ខ្ញុំ​ចាប់​អារម្មណ៍​ខ្លាំង​ គឺ​ប្រជាពលរដ្ឋ​ហាក់​បី​ដូចជា ​ឱ្យ​តម្លៃ​ខ្ពស់​ទៅ​លើ​ទង្វើ​ល្អ​របស់​បុគ្គល​ម្នាក់​ ដែល​គ្មាន​ងារ គ្មាន​បុណ្យ​ស័ក្ដិ​ទាល់​តែ​សោះ​ក្នុង​ជួរ​សាធារណៈ ឬ​តំណែង​នយោបាយ​ឡើយ​មិន​ត្រឹម​តែ​មនុស្ស​ចាស់ ឬ​យុវ​ជន​ទេ សូម្បី​កុមារ​ក៏​នាំគ្នា​រង់ចាំ​ជា​ក្រុម​ហើយ​កាន់​រូបថត​លោក​បណ្ឌិត​ កែម ឡី ដែរ»។

Content image - Phnom Penh Post
ស្ត្រី​ចំណាស់​ជិះ​រថ​យន្ត​ក្នុង​ក្បួន​ដង្ហែ​សព​លោក​កែម ឡី កាល​ពីម្សិលមិញ​។ ហុង មិនា

ទាហាន​ជើង​ទឹក​មួយរូប​ សុំ​មិន​បញ្ចេញ​ឈ្មោះ​ ដែល​ចូលរួម​ដង្ហែ​សព​នេះ​ដែរ​ថ្លែងថា លោក​ចូល​ចិត្ត​ការ​វិភាគ និង​ការ​ស្រាវ​ជ្រាវ​របស់​លោក​បណ្ឌិត ​កែម ឡី ដែល​ហ៊ាន​និយាយ​អ្វី​ដែល​ពិត​និង​មិន​លម្អៀង​ទៅ​​គណបក្ស​​ណាមួយ​ឡើយ។

លោក​ថា៖«គាត់​វិភាគ​ស្មើ គឺ​នៅ​កណ្តាល​ ព្រោះ​គាត់​អត់​មាន​កាន់​ជើង​គណបក្ស​ណា​មួយ​ទេ និយាយ​រួម​គាត់​វិភាគ​ម្តងៗ​ សូម្បី​កូន​ក្មេង​ក៏​ស្តាប់​បាន​មនុស្ស​អត់​ចេះ​អក្សរ​ក៏​ស្តាប់​យល់​ដែរ ហើយ​រាល់​ការវិភាគ​របស់​គាត់​គឺ​សម​ទៅ​នឹង​សង្គម​យើង​សព្វថ្ងៃ»។ «ដូច​យើង​ឃើញ​សព្វថ្ងៃ​ ការ​កាន់​អំណាច​មាន​ភាព​លម្អៀង​ជា​មួយ​អ្នក​មាន និង​អ្នក​ក្រ ប្រព័ន្ធ​យុត្តិធម៌​អត់​មាន​សម្រាប់​អ្នក​ក្រ បើ​អត់​លុយ​អត់​ទ្រព្យ​សម្បត្តិ​អត់​បុណ្យ​ស័ក្ដិ គឺ​អត់​មាន​យុត្តិធម៌​សម្រាប់​អ្នក​ក្រ​ហ្មង»។

ទាហាន​រូប​នេះ បាន​សម្តែង​ការ​សោកស្តាយ​ដែល​បាត់បង់​មនុស្ស​ចេះ​ដឹង និង​អ្នក​ស្នេហា​ជាតិ​នៅ​កម្ពុជា។

លោក​ថា៖ «ខ្ញុំ​ស្តាយ​ណាស់​កម្រ​​មាន​អ្នក​មាន​មនសិការ​ដូច​គាត់​ទាំង​ការ​បញ្ចេញ​មតិ ព្រោះ​អី​ស្រុក​ខ្មែរ រាល់ថ្ងៃ​អត់​មាន​អ្នក​ហ៊ាន​បញ្ចេញ​មតិ​ត្រង់ៗ​ដូច​គាត់​ទេ​ តែ​ខ្ញុំ​គិត​ថា ទោះជា​បាត់​បង់​គាត់ ក៏​នឹង​មាន​អ្នក​ក្លាហាន​ដូច​គាត់​ព្រោះ​អី​កូន​សិស្ស​​គាត់​មាន​ច្រើន​ អ៊ីចឹង​អ្នក​ត​តំណែង​ពី​គាត់​មាន​ច្រើន​ក្នុង​ការ​បញ្ចេញ​មតិ គេ​លែង​ខ្លាច​ហើយ​សម័យ​នេះ​ហើយ ដូច​គាត់​អ៊ីចឹង ​គេ​ដឹង​ថា​ គេ​សម្លាប់​គាត់​ហើយ តែ​គាត់​អត់​រត់​ទៅណា​ទេ»។

Content image - Phnom Penh Post
ក្បួន​ដង្ហែសព​ពេល​មក​ដល់​រង្វង់​មូល​គល់​ស្ពាន​ជ្រោយ​ចង្វារ​កាល​ពីម្សិល​មិញ​។ ផា លីណា

ក្រៅ​ពី​ការ​ដាក់​​កង​កម្លាំង​ពង្រាយ​នៅ​តាម​ដង​ផ្លូវ​ ដើម្បី​ជួយ​សម្រួល​ដល់​ការ​ធ្វើ​ចរាចរណ៍ អាជ្ញាធរ ក៏​បាន​ដាក់​កម្លាំង​ពង្រាយ នៅ​មុខ​ទីស្តីការ​គណៈរដ្ឋ​មន្ត្រី និង​ដាក់​បារ៉ាស់​បិទ​ផ្លូវ​ នៅ​ខាង​មុខ​ក្រសួង​ការពារ​ជាតិ ដេអិន ផង​ដែរ។

លោក ​ចែវ ឡា អាយុ ៤៧ ឆ្នាំ មានស្រុក​កំណើត​នៅ​ស្រុក​ព្រៃកប្បាស ​ខេត្តតាកែវ តែបាន​មក​ប្រកប​មុខ​របរ​រត់​ម៉ូតូកង់បី​នៅ​ភ្នំពេញ បាន​ថ្លែងថា លោក​បាន​ទៅ​ចូលរួម​រៀបចំ​ពិធី​បុណ្យ​​នៅ​វត្ត​ចាស់​តាំងពី​ម៉ោង​បី​​ទៀប​ភ្លឺ​យប់​ម្សិល​មិញ​មក​ម្ល៉េះ ដើម្បី​ជូន​ដំណើរ​​បុរស​ដែល​លោក​បាន​ហៅថា​ ជា​វីរបុរស​កម្ពុជា​ ឱ្យ​បាន​ទៅ​កាន់​សុគតិភព។

លោក​ថា៖«ខ្ញុំ​ស្គាល់​លោក កែម ឡី ពេល​គាត់​ធ្វើការ​ជាមួយ​អង្គការ និង​ឮតាម​វិទ្យុ​អាស៊ីសេរី គាត់​និយាយ​ទៅ​គឺ​ចង់​ការពារ​ជាតិ​ឱ្យ​រុងរឿង គាត់​និយាយ​ល្អ គាត់​សមជា​អ្នក ​ដឹក​នាំ​មួយរូប ពេល​គាត់​ស្លាប់​អ៊ីចឹ​ង​ទៅ​សោកស្តាយ​ណាស់ ដូច​បាត់​ជាតិ​យើង​អ៊ីចឹង ព្រោះ​អ្នក​ចេះ​ដឹង​កម្រ​មាន​ណាស់ ចេះ​ដែរ​ តែ​អត់​ហ៊ាន​លះបង់​ស្នេហា​ជាតិ​ដូច​គាត់​អ៊ីចឹង​ទេ»។

បើ​តាម​លោក ចែវ ឡា កូន​របស់​លោក​ជា​ពលករ​ធ្វើការ​នៅ​កូរ៉េ​បាន​ទូរស័ព្ទ​មក​ថា ពលករ​មួយ​ចំនួន​នៅកូរ៉េ បាន​សុំច្បាប់​ថៅកែ ឈប់​ធ្វើ​ការ​មួយថ្ងៃ ដើម្បី​ចូល​រួម​មរណ​ទុក្ខ​លោក កែម ឡី។

Content image - Phnom Penh Post
អ្នក​គាំ​ទ្រ​ជួយ​លើក​សព​ចេញ​ពី​រថ​យន្ត​​ ពេល​ទៅ​ដល់​ស្រុក​កំណើត​លោក​កែម ឡី​​។ ហេង ជីវ័ន

លោក​ណា រិ​ន អាយុ ៥៤ ឆ្នាំ មកពី​ស្រុក​កៀនស្វាយ ខេត្ត​កណ្តាល​បាន​ថ្លែង​ទាំង​សំឡេង​​ក្តុកក្តួល​ថា លោក​និង​អ្នក​ជិត​ខាង​ប្រមាណ ២០ នាក់ បាន​ជួល​រថយន្ត​ឈ្នួល​មួយ​គ្រឿង​ ដោយ​ចំណាយ​ថវិកា​ម្នាក់ ៧ ពាន់​រៀល ដើម្បី​មក​បាន​ឃើញ​សព​លោក កែម ឡី និង​ជូន​ដំណើរ​ជា​ចុងក្រោយ។ លោក​ស្រឡាញ់​និង​ចូលចិត្ត​លោក កែម ឡី រឿង​និយាយ​ត្រង់។

លោក​ថា៖«គាត់​និយាយ​សម​ហេតុសម​ផល គួរឱ្យ​ស្តាប់​​បាន គាត់​លើកពី​សង្គម​ពុក​រលួយ យើង​ដឹង​ហើយ​ថា​ សព្វថ្ងៃនេះ​ ពិតជា​ពុករលួយ​មែន ហើយ​គាត់​និយាយ​ជាការ​ពិត អ៊ីចឹង​បាត់​គាត់​មួយ​ហ្នឹង បើ​យើង​គិត​មើល រក​អ្នកវិភាគ​ប្រហែល​គាត់ ពិបាក​ទៀត អ្នក​ផ្សេង​មិន​ហ៊ាន​ចេញមុខ​ដូច​គាត់​ទេ ទោះ​រដ្ឋាភិបាល និង​គណបក្ស​ណា​ក៏ដោយ​ឱ្យ​តែ​ខុស គាត់​ថា​ទាំងអស់​ហ្នឹង»។

ជាការ​កត់​សម្គាល់​ម៉ូតូ​ជា​ច្រើន​ដែល​ចូលរួម​ដង្ហែ​សព​ត្រូវ​បាន​ចុះ​បណ្តើរ​ដោយ​សារ​អស់​សាំង ខណៈ​ប្រេង​ឥន្ធនៈ​មួយ​ចំនួន​តាម​ដង​ផ្លូវ​នៃ​ក្បួន​ត្រូវ​បាន​បិទ។

អ្នកស្រី សោម ផល្លា អាយុ ៣៦ ឆ្នាំ​ជា​កម្មករ​រោងចក្រ​កាត់​ដេរ​ នៅ​ស្រុក​កៀនស្វាយ ដែល​ស្គាល់​ឈ្មោះ​លោក​ កែម ឡី តាម​រយៈ​វិទ្យុ​ថ្លែង​ថា៖«ពេល​ឮ​គេ​បាញ់​សម្លាប់​គាត់​ចឹង គឺ​សោកស្តាយ​អាណិត​គាត់​បាត់​អ្នក​ចេះដឹង​ទើប​ខ្ញុំ​ចូលរួម​ដើម្បី​រំលែក​ទុក្ខ​​គាត់​ឱ្យ​​គាត់​ទៅ​កាន់​សុគតិភព»។

អភិបាលរង​រាជធានី​ភ្នំពេញ​ លោក ឃួង ស្រេង ថ្លែងថា អាជ្ញាធរ​បាន​ជួយ​សម្រួល​ក្បួន​ដោយ​ជោគ​ជ័យ ពុំមាន​ហិង្សា​ណាមួយ​កើត​ឡើង​ឡើយ ប៉ុន្តែ​លោក​​បាន​សម្តែង​ការ​សោក​ស្តាយ ខណៈ​ដែល​មាន​​អ្នក​ចូល​រួម​ហែ​ដោយ​ថ្មើរជើង​ដោយ​ចាត់​ទុក​ការ​ចូល​រួម​ហែ​ដោយ​ថ្មើរ​ជើង​នេះ ថា​​ជា​ការ​កេង​ចំណេញ​នយោបាយ។

លោក​បន្តថា៖​ «អាជ្ញាធរ​ភ្នំពេញ​មាន​កាតព្វកិច្ច​ការពារ​សណ្តាប់ធ្នាប់​សាធារណៈ ដែល​ចំណុច​នេះ​យើង​ធ្វើបាន​ជោគជ័យ ប៉ុន្តែ​គួរឱ្យ​សោកស្តាយ ​ដែលថា ​អ្នក​ចូល​រួម​មិន​គោរព​តាម​ការ​អំពាវនាវ​របស់​សាមី​សព​ គាត់​ចង់​បាន​ហែ​ក្បួន​មិន​មាន​ការ​ធ្វើ​ដំណើរ​ថ្មើ​រជើង ប៉ុន្តែ​ដោយសារ​មាន​ការ​ចង់​ចំណេញ​នយោបាយ អ៊ីចឹង​គាត់​ហែ​ដោយ​ថ្មើរជើង ប៉ុន្តែ​មិន​សំខាន់​ចំណុច​នេះ​ទេ​ សំខាន់​បំផុត​អាជ្ញាធរ​រក្សា​បាន​សុវត្ថិភាព​ជូន​ប្រជាពលរដ្ឋ»។

ក្បួន​ដង្ហែ​សព​ បានទៅ​ដល់​ភូមិ​កំណើត​របស់​លោក ​កែម ឡី នៅ​វេលា​ម៉ោង​ប្រមាណ​ជា ៦ ​និង​ ៣០ ​នាទី យប់​មិញ​ គឺ​យឺត​ជាង​ការ​គ្រោង​ទុក​ប្រមាណ​ជា ៤ ម៉ោង ដោយ​សារ​តែ​មាន​មនុស្ស​ចូល​រួម​ហែ​ច្រើន​ពេក​ដែល​ធ្វើ​ឲ្យ​មានការ​កក​ស្ទះ​ជាច្រើន​កន្លែង​នៅ​តាម​ផ្លូវ​​។

បើ​តាម​គណៈកម្មការ​រៀប​ចំ​បុណ្យ​សព​អ្នក​ចូល​រួម​ដង្ហែ​សព​​លោក​បណ្ឌិត​ កែម ឡី កាល​ពី​ម្សិល​មិញ​​អាច​មាន​រហូត​ដល់​​ប្រមាណ​ ២ ​លាន​នាក់​ ដោយ​ក្បួន​ដង្ហែ​នៅ​លើ​ផ្លូវ​ជាតិ​លេខ​ ៣​ មាន​​ប្រវែង​ប្រមាណ​ ៣០ ​គីឡូម៉ែត្រ​ ដោយ​មាន​ពលរដ្ឋ​នៅ​​ឈរ​រង់​ចាំ​ទទួល​​នៅ​អម​សង​ខាង​ដង​​ផ្លូវ ចាប់​តាំង​ពី​រាជ​ធានី​ភ្នំពេញ រហូត​ដល់​ភូមិ​កំណើត​របស់​លោក ​កែម ឡី ហើយ​មាន​សប្បុរស​ជន​ជាច្រើន​ បាន​រង់​ចាំ​ចែក​នំប៉័ង និង​ទឹក​សុទ្ធ​ដល់​​​អ្នក​ហែ​ក្បួន​ទៀត​ផង៕

រាយ​ការណ៍​បន្ថែម​ដោយ សូ វិសាល

អត្ថបទគួរចាប់អារម្មណ៍