.jpg)
ស្ត្រីអង់គ្លេសឈ្មោះ Amelia Bambridge មុនលង់ទឹកស្លាប់នៅកោះរ៉ុង។ រូបថត សហការី
ភ្នំពេញៈ មន្ត្រីបានអះអាងថា សាកសពស្ដ្រីទេសចរណ៍ជនជាតិអង់គ្លេសឈ្មោះ Amelia Bambridge អាយុ ២១ ឆ្នាំ ដែលបានរកឃើញលង់ទឹកស្លាប់កាលពីថ្ងៃទី ៣១ ខែតុលានោះ គឺមិនត្រូវបានបញ្ជូនទៅប្រទេស អង់គ្លេស វិញឡើយ ដោយសារគ្រួសារបានសម្រេចយកទៅបូជានៅវត្តទឹកថ្លាក្នុងរាជធានីភ្នំពេញកាលពីថ្ងៃទី ២ វិច្ឆិកា ហើយគ្រោងយកអដិ្ឋធាតុទៅធ្វើបុណ្យនៅអង់គ្លេសនៅថ្ងៃចុងសប្ដាហ៍នេះ។
លោក អ៊ិន បូរ៉ា អគ្គស្នងការរងនគរបាលជាតិទទួលផែននាយកដ្ឋានកណ្ដាលយុត្តិធម៌ប្រាប់ភ្នំពេញប៉ុស្ដិ៍ពីម្សិលមិញថា មូលហេតុនៃការសម្រេចបូជានៅកម្ពុជានេះ ដោយសារក្រុមគ្រួសារបានពិនិត្យឃើញថា ស្ដ្រីរងគ្រោះឈ្មោះ Amelia Bambridge គឺបានស្លាប់ដោយសារមិនជាប់ពាក់ព័ន្ធនឹងបទព្រហ្មទណ្ឌ។
លោកថា៖ «ដំបូងគាត់ (គ្រួសារ) ថាប្រុងយក (សាកសព) ទៅប្រទេស អង់គ្លេស វិញ ដោយមានទាំងការឯកភាពពីខាងស្ថានទូតផង (អង់គ្លេសនៅកម្ពុជា)។ ប៉ុន្តែដល់ពេលគាត់ពិនិត្យឃើញថា សាកសពហ្នឹងមិនពាក់ព័ន្ធអីនឹងបទល្មើសព្រហ្មទណ្ឌ អ៊ីចឹងទៅ! គាត់ក៏សម្រេចចិត្តបូជានៅភ្នំពេញ ហើយយកតែធាតុទៅទេ»។
ស្ដ្រីទេសចរណ៍ឈ្មោះ Amelia Bambridge បានបាត់ខ្លួននៅកោះរ៉ុង ខេត្តព្រះសីហនុកាលពីថ្ងៃទី ២៤ តុលា ក្រោយពីនាងត្រូវបានគេឃើញជាលើកចុងក្រោយក្នុងពិធីជប់លៀងមួយនៅភោជនីយដ្ឋានឈ្មោះ Police Beach នៅម៉ោងប្រហែល ២ ទៀបភ្លឺ។
ក្រោយពីបាត់ខ្លួនភ្លាមៗ សមត្ថកិច្ចបានប្រទះឃើញកាបូបរបស់នាងនៅលើផ្ទាំងថ្មជាប់មាត់ទឹកដែលក្នុងនោះមានដូចជា ថ្នាំពេទ្យ កាបូបលុយ ទូរស័ព្ទ និងកាតធនាគារជាដើម ខណៈសម្លៀកបំពាក់ និងលិខិតឆ្លងដែនត្រូវបានរកឃើញនៅសណ្ឋាគារស្នាក់នៅរបស់នាង។
លុះមកដល់ថ្ងៃទី ៣១ ខែតុលា សាកសពគាត់ត្រូវអ្នកនេសាទប្រទះឃើញអណ្ដែតទៅដល់ក្បែរព្រំដែនទឹកកម្ពុជា-ថៃ ដែលមានចម្ងាយពីកន្លែងបាត់ខ្លួនជិត ៩២ គីឡូម៉ែត្រ ក្រោយពីក្រុមសមត្ថកិច្ច អ្នកស្ម័គ្រចិត្ត និងក្រុមអ្នកមុជទឹករាប់រយនាក់បានបើកប្រតិបត្តិការរុករកអស់ពេល ១ សប្ដាហ៍។
ក្រុមអ្នកស្រាវជ្រាវបានដឹកសាកសពរបស់ Amelia ដើម្បីយកទៅពិនិត្យកោសល្យវិច័យនៅមន្ទីរពេទ្យបង្អែកខេត្តព្រះសីហនុ។ ប៉ុន្តែលោក ឆាយ គឹមខឿន មន្ត្រីនាំពាក្យអគ្គស្នងការនគរបាលជាតិបានប្រាប់ភ្នំពេញប៉ុស្ដិ៍កាលពីថ្ងៃទី ៣ វិច្ឆិកា ថា លទ្ធផលកោសល្យវិច័យបង្ហាញថា ស្ដ្រីរងគ្រោះបានស្លាប់ដោយសារលង់ទឹក ពីព្រោះនៅលើសាកសពរកមិនឃើញមានចំណុចសង្ស័យទេ ។
លោក ឃាង ភារម្យ មន្ត្រីនាំពាក្យសាលាខេត្តព្រះសីហនុបានប្រាប់ពីម្សិលមិញដែរថា សាកសពរបស់ស្ត្រី Amelia Bambridge គឺត្រូវបានប្រគល់ឲ្យក្រុមគ្រួសារតាំងពីថ្ងៃទី ១ ខែវិច្ឆិកា ក្រោយធ្វើកោសល្យវិច័យរួចដើម្បីដឹកមកកាន់ទីក្រុងភ្នំពេញ។
លោកថា៖ «ក្រុមគ្រួសារបានស្នើសុំសពយកទៅកាន់ទៅក្រុងភ្នំពេញ។ ដល់អ៊ីចឹង! ការចាត់ចែងយ៉ាងណាគឺស្ថិតលើក្រុមគ្រួសាររបស់គាត់»។
បងប្រុសរបស់ Amelia Bambridge ឈ្មោះ Harry Bambridge បានបង្ហោះនៅលើហ្វេសប៊ុកកាលពីថ្ងៃទី ៤ វិច្ឆិកាថា ពិធីបុណ្យ Amelia នឹងប្រារព្ធធ្វើនៅថ្ងៃសុក្រសប្ដាហ៍នេះ ក្នុងទីក្រុង Worthing ប្រទេសអង់គ្លេស។
ជាមួយគ្នានេះនៅក្នុងជំនួបជាមួយលោកស្រី Tina Redshaw អគ្គរាជទូតអង់គ្លេសប្រចាំនៅកម្ពុជាកាលពីថ្ងៃទី ៥ វិច្ឆិកា លោក នេត សាវឿន អគ្គស្នងការនគរបាលជាតិបានបង្ហាញការសោកស្ដាយ និងប្រកាសចូលរួមរំលែកទុក្ខចំពោះការបាត់បង់ជីវិតរបស់ស្ដ្រីទេសចរណ៍អង់គ្លេសរូបនេះ។ រីឯលោកស្រី Tina Redshaw ក៏បានសម្ដែងការអរគុណចំពោះអាជ្ញាធរកម្ពុជាផងដែរដែលបានខិតខំស្វែងរកសាកសពរបស់ Amelia ឃើញនោះ ៕
