The Phnom Penh Post Search

Search form

Logo of Phnom Penh Post newspaper Phnom Penh Post - សព​ឪពុក​លោក​នាយក​រដ្ឋ​មន្ត្រី​បញ្ចុះ​ថ្ងៃ​ទី១៧

សព​ឪពុក​លោក​នាយក​រដ្ឋ​មន្ត្រី​បញ្ចុះ​ថ្ងៃ​ទី១៧

សព​ឪពុក​លោក​នាយក​រដ្ឋ​មន្ត្រី​បញ្ចុះ​ថ្ងៃ​ទី១៧

130715_06
មហាឧបាសក ហ៊ុន នាង នាពេលកន្លងមក ហេង ជីវ័ន

ភ្នំពេញៈ សព​ឪពុក​លោក​នាយក រដ្ឋ​មន្ត្រី ហ៊ុន សែន មហា​ឧបាសក ហ៊ុន នាង នឹង​ត្រូវ​ដង្ហែ​យក​ទៅ​បញ្ចុះ​ក្បែរ​ចេតិយ​មហា​ឧបាសក ឌី ប៉ុក ភរិយា​របស់​លោក នៅ​ថ្ងៃ​ទី១៧ ខែ​កក្កដា នៅ​វត្ត​ព្រះ​បារមី​វង្គដ្ឋបុរី​កបិលភស្តុ​ស្ថិត​ក្នុង​សង្កាត់ ទឹក​ថ្លា ខណ្ឌ​សែន​សុខ។

លោក កឹម គុណវឌ្ឍន៍ អគ្គ​នាយក​នៃ​អគ្គ​នាយកដ្ឋាន​ទូរទស្សន៍​ជាតិ​កម្ពុជា បាន​ប្រាប់​ភ្នំពេញ ប៉ុស្ដិ៍​ថា សព​អ្នក​ឧកញ៉ា​មហា​ភក្តី​សប្បុរិស​ភោគា​ធិបតី ហ៊ុន នាង នឹង​ត្រូវ​ដង្ហែ​ចេញ​ពី​ភូមិគ្រឹះ​របស់​លោក​នាយក​រដ្ឋ​មន្ត្រី​ហ៊ុន សែន ដើម្បី​យក​ទៅ​បញ្ចុះ​នៅ​ក្នុង​មហា​ចេតិយ​មួយ​ក្បែរ​មហា​ចេតិយ​របស់​មហា​ឧបាសិកា ឌី ប៉ុក ដែល​ជា​ភរិយា​របស់​លោក។ លោក​ថ្លែង​ថា​៖​«តាម​ទំនៀម​ទម្លាប់​និង​ប្រពៃណី​របស់​ប្រជា​ពលរដ្ឋ​ខ្មែរ​នៅ​តាម​ដង​ទន្លេ សព​របស់​អ្នក​ដែល​បាន​ធ្វើ​មរណទុក្ខ​ទៅ​កាន់​បរិលោក ភាគ​ច្រើន​ត្រូវ​បាន​គេ​និយម​បញ្ចុះ...»។

អ្នក​ឧកញ៉ា​មហា​ភក្តី​សប្បុរិស​ភោគា​ធិបតី​ហ៊ុន នាង បាន​ទទួល​មរណភាព កាល​ពី​វេលា​ម៉ោង ៤ និង​១០ នាទី​ព្រឹក​ថ្ងៃ​ទី១២ ខែ​កក្កដា ឆ្នាំ​២០១៣ ក្នុង​ជន្មាយុ​៩០​ឆ្នាំ ដោយ​ជរាពាធ។ លោក​បាន​ធ្លាក់​ខ្លួន​ឈឺ​ធ្ងន់​អស់​រយៈ​កាល​ជិត​១​ឆ្នាំ​មក​ហើយ។

ក្នុង​អំឡុង​ពេល​នៃ​ពិធី​បុណ្យ​កាន់​ទុក្ខ ប៉ុន្មាន​ថ្ងៃ​នេះ​មាន​វត្តមាន​មន្ត្រី​ជាន់​ខ្ពស់​សំខាន់ៗ មក​ពី​គ្រប់​ក្រសួង មន្ទីរ និង​ស្ថាប័ន​ជាតិ រួម​ទាំង​មេ​ដឹក​នាំ​នៃ​បណ្ដា​ប្រទេស​សហគមន៍​អាស៊ាន និង​អង្គទូត​មួយ​ចំនួន​បាន​ផ្ញើសារ និង​ចូល​រួម​រំលែក​ទុក្ខ​ដោយ​ផ្ទាល់​។ ជា​ពិសេស​កាល​ពី​ថ្ងៃ​ទី​១៣ ខែ​កក្កដា​កន្លង​ទៅ​នេះ ព្រះ​ករុណា​ព្រះ​បាទ​នរោត្តម សីហមុនី និង សម្តេច​ម៉ែ បាន​យាង​ចូល​រួម​រំលែក​មរណទុក្ខ។ ហើយ​នៅ​ថ្ងៃ​ទី១៤ ខែ​កក្កដា លោក ថាក់ ស៊ីន អតីត​នាយក​រដ្ឋ​មន្ត្រី​ថៃ និង​លោក​នាយក​រដ្ឋ​មន្ត្រី​វៀតណាម​ក៏​បាន​មក​ចូល​រួម​រំលែកទុក្ខ នេះ​ផង​ដែរ។

លោក​ឧកញ៉ា មហាភក្តី ហ៊ុន នាង កើត​នៅ​ថ្ងៃ​ទី២៧ ខែ​សីហា ឆ្នាំ​១៩២៣ នៅ​ភូមិ​ពាម​កោះ​ស្នា ឃុំ​ពាម​កោះ​ស្នា ស្រុក​ស្ទឹងត្រង់ ខេត្ត​កំពង់ចាម​។ លោក​បាន​រៀបការ​ជាមួយ​ឧបាសិកា ឌី ប៉ុក នៅ​ក្នុង​ទសវត្សរ៍​ឆ្នាំ​១៩៤០។ ឧបាសិកា ឌី ប៉ុក ទទួល​មរណភាព​នៅ​ឆ្នាំ​១៩៩៨ ក្នុង​ជន្មាយុ​៧៩​ឆ្នាំ។

លោក​ឧកញ៉ា មហាភក្តី ហ៊ុន នាង និង​ឧបាសិកា ឌី​ប៉ុក មាន​កូន​ប្រុស​ស្រី​ចំនួន​៦នាក់ និង ចៅ​ប្រុស​ស្រី​ចំនួន ៣០ នាក់ និង​ចៅ​ទួត​ប្រុស​ស្រី​ចំនួន​៦០​នាក់។

ដោយ​សារ​ការ​ចូល​រួម​កសាង​និង​អភិវឌ្ឍ​នូវ​សមិទ្ធផល​ជូន​ជាតិ​ជាច្រើន​រួម​ទាំង សាលារៀន វត្ត​អារាម និង​សហគមន៍​ក្រី​ក្រ​នៅ​កម្ពុជា នៅ​ក្នុង​ខែ​កញ្ញា ឆ្នាំ​២០១១ ព្រះ​មហាក្សត្រ​បាន​ប្រោស​ព្រះ​រាជទាន​គោរមងារ ជា​អ្នក​ឧកញ៉ា​មហាភក្តី​សប្បុរិស​ភោគា​ធិបតី​ហ៊ុន នាង៕

អត្ថបទគួរចាប់អារម្មណ៍