The Phnom Penh Post Search

Search form




Logo of Phnom Penh Post newspaper Phnom Penh Post - សភា​កម្ពុជា-ចិន បាន​ប្រកាស​ពង្រឹង​កិច្ចសហប្រតិបត្តិការ​ទ្វេភាគី​គ្រប់​ជ្រុងជ្រោយ

សភា​កម្ពុជា-ចិន បាន​ប្រកាស​ពង្រឹង​កិច្ចសហប្រតិបត្តិការ​ទ្វេភាគី​គ្រប់​ជ្រុងជ្រោយ

Content image - Phnom Penh Post
​កិច្ចប្រជុំ​ទ្វេភាគី​រវាងសភា​កម្ពុជា-ចិន តាម​ប្រព័ន្ធ​វីដេអូ​ កាលពីម្សិលមិញ។ រូបថត NAC

សភា​កម្ពុជា-ចិន បាន​ប្រកាស​ពង្រឹង​កិច្ចសហប្រតិបត្តិការ​ទ្វេភាគី​គ្រប់​ជ្រុងជ្រោយ

ភ្នំពេញៈ ប្រធាន​ស្ថាប័ន​សភា​ប្រទេស​កម្ពុជា និង​ចិន​បាន​ប្រកាស​ពី​ការត្រៀម​ជាស្រេច​ក្នុង​ការពង្រឹង​កិច្ចសហការ​រវាង​ស្ថាប័ន​នីតិប្បញ្ញត្តិ​ប្រទេស​ទាំង​ ២ ដើម្បី​បន្ត​ថែរក្សា និង​ជំរុញ​មិត្តភាព​ជា​ប្រពៃណី ដែល​ត្រូវបាន​កសាង​យ៉ាងរឹងមាំ​ដោយ​ថ្នាក់ដឹកនាំ​ជំនាន់​មុនៗ​ឱ្យ​កាន់តែ​ស្អិតល្មួត និង​ស្ថិតស្ថេរ​យូរអង្វែង ហើយ​បន្ត​គាំទ្រ​គ្នា​ទៅវិញ​ទៅមក​រវាង​ស្ថាប័ន សភា​ទាំង​ ២ ​នៅលើ​បញ្ហា​តំបន់ និង​អន្តរជាតិ​។

ក្នុង​កិច្ចប្រជុំ​ទ្វេភាគី​តាម​ប្រព័ន្ធ​វីដេអូ​នៅ​រសៀល​ថ្ងៃទី​ ១៨ ខែ​មករា ឆ្នាំ​ ២០២១ ថ្នាក់ដឹកនាំ​នៃ​ប្រទេស​ទាំង​ ២ ​ក៏បាន​គាំទ្រ​ចំពោះ​សមិទ្ធផល​ជាច្រើន​ដែល​កើតចេញពី​ទំនាក់ទំនង​ដ៏ល្អ​រវាង​ប្រទេស​ទាំង​ ២ ​ក្នុង​រយៈពេល​ ៦៣ ​ឆ្នាំ​នៃ​ចំណង​ការទូត​នៃ​ប្រទេស​ទាំង​២​។

លោក ហេង សំរិន ប្រធានរដ្ឋសភា​បាន​ថ្លែង​តាមរយៈ​ប្រព័ន្ធ​តេឡេក្រាម​របស់​រដ្ឋសភា​ថា ៦៣ ​ឆ្នាំ​នៃ​ទំនាក់ទំនង​ការទូត​ប្រទេស​ទាំង​ ២ បាន​ចាក់ឫស​យ៉ាងរឹងមាំ និង​ក្លាយជា​កិច្ចសហប្រតិបត្តិការ​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ ផ្តល់​ផលប្រយោជន៍​យ៉ាងច្រើន​សម្រាប់​ប្រជាជន​ទាំងសងខាង និង​បាន​ចូលរួម​ចំណែក​ជា​វិជ្ជមាន​ដល់​សន្តិភាព និង​វិបុលភាព​ក្នុង​តំបន់​ និង​សកលលោក​ទៀតផង​។

លោក ហេង សំរិន ក៏បាន​ថ្លែង​ដោយ​សម្តែង​ការពេញចិត្ត​ចំពោះ​កិច្ចខិតខំ​ប្រឹងប្រែង​របស់​រដ្ឋាភិបាល​ប្រទេស​ទាំង​ ២ ក្នុងការ​ពង្រឹង​និង​ពង្រីក​បន្ថែម​នូវ​កិច្ចសហប្រតិបត្តិការ​សេដ្ឋកិច្ច ពាណិជ្ជកម្ម និង​វិនិយោគ ជាអាទិ៍​មាន កិច្ចព្រមព្រៀង​ពាណិជ្ជកម្ម​សេរី​កម្ពុជា-ចិន ការអភិវឌ្ឍ​ហេដ្ឋារចនាសម្ព័ន្ធ និង​កិច្ចសហប្រតិបត្តិការ​ស៊ីជម្រៅ​ផ្សេងៗ​ទៀត​ជាច្រើន​។

លោក លី ចាន់ស៊ូ ប្រធានសភា​ប្រជាជន​ទូទាំង​ប្រទេស​ចិន​ឱ្យ​ដឹងថា ឆ្នាំ​ ២០២០ ​ដែល​ពិភពលោក​ជួប​ការលំបាក​ដោយសារ​ជំងឺ​កូវីដ​១៩ កម្ពុជា​ និង​ចិន​បាន​ពង្រឹងពង្រីក​ទំនាក់ទំនង និង​កិច្ចសហប្រតិបត្តិការ​ប្រទេស​ទាំង​ ២ ​កាន់តែ​រឹងមាំ​ឡើង​តាមរយៈ​សកម្មភាព​ជួយ​គ្នា​ទៅវិញទៅមក​។

កិច្ចសហប្រតិបត្តិការ​សភា​ប្រទេស​ទាំង​ ២ ​មាន​សារៈសំខាន់​នៅក្នុង​ការពង្រឹង​ទំនាក់ទំនង កិច្ចសហប្រតិបត្តិការ​ប្រទេស​ទាំង​ ២ ​ឱ្យ​កាន់តែ​រឹងមាំ​ឡើង​។ សភា​ប្រជាជន​ចិន​បាន​ភ្ជាប់​ទំនាក់ទំនង​ និង​កិច្ចសហប្រតិបត្តិការ​ដ៏ល្អ​ជាមួយ​ព្រឹទ្ធសភា និង​រដ្ឋសភា​កម្ពុជា​។ កម្ពុជា​តែងតែ​ប្រកាន់ខ្ជាប់​យ៉ាង​ម៉ឺងម៉ាត់​នូវ «​គោលនយោបាយ​ចិន​តែមួយ​» ​និង​គាំទ្រ​ចំពោះ​កិច្ចការពារ​បូរណភាព​ដែនដី​៕

អត្ថបទគួរចាប់អារម្មណ៍