The Phnom Penh Post Search

Search form




Logo of Phnom Penh Post newspaper Phnom Penh Post - សភា​​នឹង​ប្រជុំ​ធ្វើ​វិសោធនកម្ម​ច្បាប់​គណបក្ស​នៅ​ដើម​ខែ​មេសា




សភា​​នឹង​ប្រជុំ​ធ្វើ​វិសោធនកម្ម​ច្បាប់​គណបក្ស​នៅ​ដើម​ខែ​មេសា

Content image - Phnom Penh Post
សម័យ​ប្រជុំ​របស់​រដ្ឋសភា​កម្ពុជា​នា​ពេល​កន្លង​មក។ ហេង ជីវ័ន

សភា​​នឹង​ប្រជុំ​ធ្វើ​វិសោធនកម្ម​ច្បាប់​គណបក្ស​នៅ​ដើម​ខែ​មេសា

ភ្នំពេញៈ ​រដ្ឋសភា​អាច​នឹង​បើក​កិច្ចប្រជុំ​ស្តីពី​ការ​ធ្វើ​វិសោធនកម្ម​ច្បាប់​ស្តីពី​គណបក្ស​នយោបាយ​នៅ​ដើម​ខែ​មេសា​ខាង​មុខ​ទៅ​តាម​អ្វី​ដែល​លោក​នាយក​រដ្ឋមន្ត្រី​ ហ៊ុន សែន ចង់​បាន ដែល​ច្បាប់​នេះ​អាច​នឹង​ឈាន​ទៅ​ដល់​ការ​រំលាយ​គណបក្ស​ប្រឆាំង​ដែល​ជា​គូ​ប្រជែង​យ៉ាង​ស្រួចស្រាល់​របស់​គណបក្ស​ប្រជាជន​។ ទោះបី​យ៉ាង​ណា​ក្រុម​​អ្នក​​វិភាគ​យល់​​ថា​គណបក្ស​​ប្រជាជន​​​នឹង​មិន​ហ៊ាន​រំលាយ​គូ​ប្រកួត​នយោបាយ​​របស់​ខ្លួន​​នោះ​ទេ​។

ប៉ុន្តែ​អ្នក​នាំ​ពាក្យ​គណបក្ស​​ប្រជាជន​លោក សុខ ឥសាន ​​បញ្ជាក់​ថា​​​ក្នុង​នាម​ជា​គណបក្ស​កាន់​អំណាច​គ្មាន​ហេតុផល​ណា​មួយ​ដែល​​​មិន​ហ៊ាន​​រំលាយ​​គណបក្ស​ដែល​​មេដឹកនាំ​របស់​​គណបក្ស​នោះ​មាន​ទោស​នោះ​ទេ​ដោយ​អះអាង​ថា​​នៅ​ពេល​ច្បាប់​ស្តីពី​គណបក្ស​ត្រូវ​បាន​ធ្វើ​វិសោធនកម្ម​​រួចរាល់​ហើយ​ចូល​ជា​ធរមាន​ មិនមែន​តែ​គណបក្ស​សង្គ្រោះ​ជាតិ​​តែ​មួយ​ទេ ​ប៉ុន្តែ​គណបក្ស​ដទៃៗ​​ទៀត​ក៏​នឹង​ត្រូវ​ចាត់​ការ​​តាម​ច្បាប់​ដែរ​​។ ​លោក​ថា​រដ្ឋសភា​នឹង​បើក​កិច្ចប្រជុំ​​នៅ​ថ្ងៃ​ទី​ ១ មេសា ដើម្បី​ធ្វើ​វិសោធនកម្ម​​ច្បាប់​ស្តីពី​​គណបក្ស​នយោបាយ​។

ប៉ុន្តែ​អ្នក​វិភាគ​នយោបាយ លោក អ៊ូ វីរៈ ​និង​អ្នក​នាំ​ពាក្យ​​គណបក្ស​ប្រជាធិបតេយ្យ​​​មូលដ្ឋាន​លោក សំ អ៊ិន និង​ទីប្រឹក្សា​រដ្ឋាភិបាល​ម្នាក់​ដែល​​បដិសេធ​​បង្ហាញ​ឈ្មោះ​បាន​អះអាង​ថា​គណបក្ស​ប្រជាជន​មិន​ហ៊ាន​​រំលាយ​គណបក្ស​​សង្គ្រោះ​ជាតិ​​ទេ​ដោយសារ​​វា​គ្មាន​ប្រយោជន៍​សម្រាប់​​ជាតិ​ និង​គណបក្ស​ប្រជាជន​តែ​​ផ្ទុយ​ទៅ​វិញ​វា​ប៉ះពាល់​ដល់​ស្ថិរភាព​នយោបាយ​។

ទីប្រឹក្សា​រដ្ឋាភិបាល​ម្នាក់​ថ្លែង​ថា​៖ «​​ប្រសិន​​គណបក្ស​ប្រជាជន​រំលាយ​បក្ស​ប្រឆាំង​​វា​ដូចជា​ [គណបក្ស​ប្រជាជន​​] ​សម្លាប់​ខ្លួន​ឯង​។ ​វា​អត់​ចំណេញ​។ ​មាន​តែ​​បង្រួបបង្រួម​ខ្មែរ​​ជាមួយ​គ្នា​ទេ​»​។

លោក អ៊ូ វីរៈ ​​ថ្លែង​ថា​៖ «​​គាត់​ [គណបក្ស​ប្រជាជន​] ​មាន​លទ្ធភាព​ គាត់​មាន​អំណាច​រំលាយ​ [គណបក្ស​សង្គ្រោះ​ជាតិ​] ​ប៉ុន្តែ​ខ្ញុំ​មើល​ទៅ​ វា​គ្មាន​ប្រយោជន៍​ក្នុង​ការ​រំលាយ​​​»៕ PS

អត្ថបទគួរចាប់អារម្មណ៍