The Phnom Penh Post Search

Search form




Logo of Phnom Penh Post newspaper Phnom Penh Post - សភា​នឹង​ពិភាក្សា​វិសោធនកម្ម​​ លក្ខន្តិកៈ​មន្ត្រី​នីតិប្បញ្ញតិ្ត




សភា​នឹង​ពិភាក្សា​វិសោធនកម្ម​​ លក្ខន្តិកៈ​មន្ត្រី​នីតិប្បញ្ញតិ្ត

Content image - Phnom Penh Post
ទិដ្ឋភាព​នៃ​អគារ​រដ្ឋសភា។

សភា​នឹង​ពិភាក្សា​វិសោធនកម្ម​​ លក្ខន្តិកៈ​មន្ត្រី​នីតិប្បញ្ញតិ្ត

ភ្នំពេញៈ សមាជិក​គណៈកម្មាធិការ​អចិន្រៃ្តយ៍​របស់​រដ្ឋសភា​មកពី​គណបក្ស​កាន់​អំណាច និង​គណបក្ស​ប្រឆាំង​នឹង​ជួប​ប្រជុំ​គ្នា​នៅ​ថ្ងៃ​នេះ​ដើម្បី​ពិភាក្សា​អំពី​កាល​កំណត់​សម័យ​ប្រជុំ​ពេញ​អង្គ​រដ្ឋសភា​នៅ​ដើម​ខែ​ក្រោយ​ និង​ដើម្បី​ពិភាក្សា​អំពី​វិសោធនកម្ម​នៃ​លក្ខន្តិកៈ​មន្រ្តី​នីតិប្បញ្ញត្តិ។

លោក ឡេង ប៉េងឡុង អ្នក​នាំពាក្យ​រដ្ឋសភា​បាន​បញ្ជាក់​កាលពី​ម្សិលមិញ​ថា​គណៈកម្មាធិការ​អចិន្រៃ្តយ៍​នៃ​រដ្ឋសភា​នឹង​ជួប​ប្រជុំ​គ្នា​នៅ​ថ្ងៃ​នេះ​គឺ​ដើម្បី​រៀបចំ​កំណត់​កាលបរិច្ឆេទ​នៃ​សម័យ​ប្រជុំ​ពេញ​អង្គ​នៅ​ដើម​ខែ​មេសា និង​ពិភាក្សា​អំពី​របៀបវារៈ​មួយ​ចំនួន​ដើម្បី​ដាក់​នៅ​ក្នុង​សម័យ​ប្រជុំ​រដ្ឋសភា​ពេញ​អង្គ​ដូចជា​សេចក្តី​ព្រាង​ច្បាប់​របស់​រដ្ឋាភិបាល​ដែល​ស្នើសុំ​ធ្វើ​អនុសញ្ញា​សច្ចាប័ន​អាស៊ាន វិសោធនកម្ម​នៃ​លក្ខន្តិកៈ​មន្រ្តី​រាជការ​នីតិប្បញ្ញត្តិ​ និង​របាយការណ៍​រដ្ឋសភា ប៉ុន្តែ​លោក​មិន​បាន​ប្រាប់​អំពី​កាលបរិច្ឆេទ​ជាក់លាក់​នៃ​សម័យ​ប្រជុំ​ពេញ​អង្គ​ទេ។ លោក​បន្ត​ថា​លក្ខន្តិកៈ​មន្រ្តី​រាជការ​នីតិប្បញ្ញត្តិ​រួមមាន​មន្រ្តី​រដ្ឋសភា មន្រ្តី​ព្រឹទ្ធសភា និង​មន្រ្តី​ក្រុម​ប្រឹក្សា​ធម្មនុញ្ញ។

លោក ប៉េងឡុង បន្ត​ថា៖ «ច្បាប់ [យើង] មាន​រួច​ហើយ។ ប៉ុន្តែ​នៅ​ពេល​រាជរដ្ឋាភិបាល​លុប​ចោល ឋានន្តរ​ស័ក្តិ​នៅ​ក្នុង​ក្របខ័ណ្ឌ គ យើង​ត្រូវ​រៀបចំ​ឲ្យ​មាន​ភាព​ប្រហាក់​ប្រហែល​គ្នា​នោះ​ហើយ​ជា​មូលហេតុ​ដែល [យើង] ធ្វើ​វិសោធនកម្ម​ច្បាប់។ យើង​ត្រូវ​សម្រប​សម្រួល​ឲ្យ​មាន​ភាព​ប្រហាក់​ប្រហែល​គ្នា​ពីព្រោះ​ជា​មន្រ្តី​ដូច​គ្នា»។

លោក​បន្ថែម​ថា​ការ​ធ្វើ​វិសោធនកម្ម​ច្បាប់​នេះ គឺ​ដើម្បី​ធ្វើ​ឲ្យ​មាន​ភាព​ប្រហាក់​ប្រហែល​គ្នា​សម្រាប់​មន្រ្តី​រាជការ​ឲ្យ​ទទួល​បាន​របប​ប្រហាក់​ប្រហែល​គ្នា។

នៅ​ពេល​ទាក់ទង​កាលពី​ម្សិលមិញ​តំណាងរាស្រ្ត​គណបក្ស​សង្គ្រោះ​ជាតិ​លោក អេង ឆៃអ៊ាង ដែល​ជា​សមាជិក​នៃ​គណៈកម្មាធិការ​អចិន្រៃ្តយ៍​មិន​បាន​ថ្លែង​លម្អិត​ទេ​ដោយ​បញ្ជាក់​ថា​ពួកគេ​នឹង​ចូលរួម​កិច្ចប្រជុំ​នេះ​ហើយ​ថា​គ្មាន​បញ្ហា​ទេ​សម្រាប់​វិសោធនកម្ម​នេះ។

លោក ឆៃអ៊ាង ដែល​ជា​ប្រធាន​គណៈកម្មការ​សិទ្ធិ​មនុស្ស​ទទួល​ពាក្យ​បណ្ដឹង​អង្កេត និង​ទំនាក់​ទំនង​ជាមួយ​រដ្ឋសភា ព្រឹទ្ធសភា ថ្លែង​ថា៖ «ជា​គោលការណ៍​យើង​នឹង​ចូលរួម [កិច្ចប្រជុំ​នេះ] ទាំងអស់​គ្នា ប៉ុន្តែ​ពួកយើង​មួយ​ចំនួន​មាន​ការ​រវល់។ យើង​ចូលរួម​ធម្មតា​នៅ​ក្នុង​គណៈកម្មការ​អចិន្រៃ្តយ៍»៕ PS

អត្ថបទគួរចាប់អារម្មណ៍