The Phnom Penh Post Search

Search form




Logo of Phnom Penh Post newspaper Phnom Penh Post - សភា​នឹង​ហៅ​លោក ស ខេង ​សួរ​ពាក់ព័ន្ធ​​សំណុំ​រឿង កែម ឡី




សភា​នឹង​ហៅ​លោក ស ខេង ​សួរ​ពាក់ព័ន្ធ​​សំណុំ​រឿង កែម ឡី

Content image - Phnom Penh Post
លោក ស ខេង ដែល​ជា​ឧបនាយក​រដ្ឋមន្រ្តី​ និង​ជា​រដ្ឋមន្រ្តី​ក្រសួង​មហាផ្ទៃ​​។ ហេង ជីវ័ន

សភា​នឹង​ហៅ​លោក ស ខេង ​សួរ​ពាក់ព័ន្ធ​​សំណុំ​រឿង កែម ឡី

ភ្នំពេញៈ លោក ស ខេង ដែល​ជា​ឧបនាយក​រដ្ឋមន្រ្តី​ និង​ជា​រដ្ឋមន្រ្តី​ក្រសួង​មហាផ្ទៃ​​នឹង​ត្រូវ​​កោះ​​ហៅ​​ដោយ​គណៈកម្មការ​ទី​មួយ​នៃ​រដ្ឋសភា​​ដើម្បី​សាកសួរ​​នា​ខែ​ក្រោយ​​ពាក់ព័ន្ធ​នឹង​ករណី​​ឃាតកម្ម​​ទៅ​លើ​​អ្នក​វិភាគ​​​ល្បី​ឈ្មោះ លោក​បណ្ឌិត​ កែម ឡី ដែល​រហូត​មក​ដល់​ពេល​នេះ​មាន​​រយៈពេល​ជាង​ ៥ ​ខែ​ហើយ​សំណុំ​រឿង​​បាញ់​សម្លាប់​មនុស្ស​ទាំង​កណ្តាល​ថ្ងៃ​នៅ​កណ្តាល​ទីក្រុង​នេះ​ហាក់​ដូចជា​ស្ងប់ស្ងាត់​។

ប្រធាន​គណៈកម្មការ​​សិទ្ធិ​មនុស្ស​​ទទួល​ពាក្យ​​បណ្តឹង​ស៊ើប​អង្កេត ​និង​​ទំនាក់​ទំនង​រដ្ឋសភា​ព្រឹទ្ធសភា​​ពី​គណបក្ស​សង្គ្រោះ​ជាតិ​​លោក អេង ឆៃអ៊ាង បាន​បញ្ជាក់​កាលពី​ម្សិលមិញ​ថា​លោក ស ខេង ​នឹង​ត្រូវ​កោះ​ហៅ​សាកសួរ​​នៅ​​រដ្ឋសភា​​នៅ​ថ្ងៃ​ទី​ ១២ ​មករា​​ពាក់ព័ន្ធ​នឹង​ករណី​​ឃាតកម្ម​​ទៅ​លើ​លោក កែម ឡី ​ដែល​​រហូត​មក​ដល់​ពេល​នេះ​​មិន​ទាន់​រកឃើញ​​ និង​​បង្ហាញ​ឃាតករ​ពិត​ប្រាកដ​នៅ​ឡើយ បើ​ទោះបី​ជា​​ជនរងគ្រោះ​ត្រូវ​បាន​សម្លាប់​នៅ​កន្លែង​​​ដែល​មាន​កាមេរ៉ា​សុវត្ថិភាព​​ និង​មាន​មនុស្ស​ច្រើន​ក៏ដោយ​។ ​

លោក អ៊ាង ​បន្ត​ថា​៖ «​​គណៈកម្មការ​ទី​មួយ​​​នៃ​រដ្ឋសភា​​បាន​សម្រេច​កោះ​ហៅ​​រដ្ឋមន្រ្តី​ពីរ​រូប​ដើម្បី​បំភ្លឺ​​ពាក់ព័ន្ធ​នឹង​ករណី​ឃាតកម្ម​លើ​​លោក កែម ឡី​។ ទី​មួយ​​យើង​​កោះ​​​ហៅ​​សម្តេច​ក្រឡាហោម ស ខេង ដើម្បី​បំភ្លឺ​​​នៅ​គណៈកម្មការ​ទី​មួយ​​​​អំពី​​ចំណាត់ការ​របស់​សមត្ថកិច្ច​ និង​ការ​ស៊ើបអង្កេត​ ​និង​ចំណាត់ការ​បន្ត​»។

រដ្ឋមន្រ្តី​មួយ​ទៀត​ដែល​នឹង​ត្រូវ​កោះ​ហៅ​សម្រាប់​ការ​សាកសួរ​នៅ​ក្នុង​​ករណី​ឃាតកម្ម​​នេះ​ដែរ​គឺ​រដ្ឋមន្រ្តី​​​យុត្តិធម៌​លោក អង្គ វង្គវឌ្ឍនា ប៉ុន្តែ​លោក អ៊ាង មិន​ទាន់​បាន​បញ្ជាក់​​អំពី​កាលបរិច្ឆេទ​នៃ​ការ​កោះ​ហៅ​នៅ​ឡើយ​​ទេ​។ «​យើង​ឃើញ​ថា​រយៈពេល​​ ៥ ​ខែ​មក​ហើយ​យើង​​មិន​ទាន់​បាន​ឃើញ​ភាព​រីកចម្រើន​​​នៅ​ក្នុង​ការ​ស៊ើបអង្កេត​ទាល់​តែ​សោះ​​»។ «​​នោះ​ហើយ​ជា​មូលហេតុ​ដែល​យើង​​ចំាបាច់​​ត្រូវ​​កោះ​ហៅ​ [​រដ្ឋមន្រ្តី​ក្រសួង​​មហាផ្ទៃ​] ​ដើម្បី​បំភ្លឺ​ដើម្បី​ឲ្យ​យើង​មាន​មូលដ្ឋាន​​ក្នុង​ការ​ប្រាប់​សាធារណជន​​ដោយសារ​សាធារណជន​តែងតែ​លើក​បញ្ហា​នេះ​មក​យើង​»​។

លោក កែម ឡី ត្រូវ​បាន​​ខ្មាន់​កាំភ្លើង​បាញ់​សម្លាប់​កាលពី​ថ្ងៃ​ទី​ ១០ ខែ​កក្កដា​នៅ​ក្នុង​​​ម៉ាត​​ការ៉ាស​សាំង​កាល់តិច​បូក​គោ​ហើយ​ភ្លាមៗ​​បន្ទាប់ពី​​ការ​បាញ់​សម្លាប់​សមត្ថកិច្ច​បាន​អះអាង​ថា​ខ្លួន​​ចាប់​បាន​ជន​ដៃ​ដល់​ដែល​ជា​ខ្មាន់​កាំភ្លើង​មាន​ឈ្មោះ ជួប សម្លាប់។

នៅក្នុង​ចម្លើយ​សារភាព ជួប សម្លាប់​ បាន​​​និយាយ​ថា​​ខ្លួន​​បាន​បាញ់​លោក កែម ឡី គឺ​ដោយសារ​ការ​ជំពាក់​ប្រាក់​ ៣០០០ ​ដុល្លារ​។ ទោះ​យ៉ាងណា​ក្តី​មជ្ឈដ្ឋាន​ជា​ច្រើន​បាន​ចាត់​ទុក​​ខ្មាន់​កាំភ្លើង​នេះ​ថា​ជា​ឃាតករ​សិប្បនិមិ្មត។

អ្នក​នាំពាក្យ​​​ក្រសួង​មហាផ្ទៃ​លោក​ ខៀវ សុភ័គ ​កាលពី​ម្សិលមិញ​បាន​ចាត់​ទុក​​ការ​កោះ​ហៅ​លោក ស ខេង ថា​ជា​ហេតុផល​នយោបាយ​​ហើយ​អះអាង​ថា​ខ្មាន់​កាំភ្លើង​ដែល​​បាន​បាញ់​សម្លាប់​លោក កែម ឡី គឺ​ជា​ឃាតករ​ពិត​ប៉ុន្តែ​បាន​ថ្លែង​ថា​លោក​មិន​ជឿ​ថា​ខ្មាន់​កាំភ្លើង​​នេះ​ឈ្មោះ ជួប សម្លាប់​​នោះ​ទេ​ហើយ​ក៏​មិន​ជឿ​​ថា​លោក​ កែម ឡី ជំពាក់​លុយ​ខ្មាន់​កាំភ្លើង​​នោះ​ដែរ​។ ​

លោក​បន្ថែម​ថា​លោក ឡី ត្រូវ​បាន​បាញ់​សម្លាប់​​​ពាក់ព័ន្ធ​នឹង​រឿង​ផ្សេង​ហើយ​ថា​ករណី​នេះ​នៅ​កំពុង​បន្ត​ស៊ើបអង្កេត​នៅ​ឡើយ​។ «​​ខ្ញុំ​គិត​ថា​​នេះ​ជា​បញ្ហា​មួយ​​​ដើម្បី​ឲ្យ​ [ប្រជាជន​] ​ឃើញ​ថា​ខ្លួន​​យក​ចិត្ត​ទុក​ដាក់​​ចំពោះ​ករណី​ឃាតកម្ម​​លោក កែម ឡី ​ដោយសារ​ខ្លួនឯង​ចង់​បាន​សំឡេង​ឆ្នោត​ពី​ប្រជាពលរដ្ឋ​។ ​តាម​ដែល​ខ្ញុំ​យល់​គ្មាន​ប្រយោជន៍​ទេ​។ ​បើ​ទោះបី​ជា​​​សម្តេច​ក្រឡាហោម​ទៅ​គាត់​ក៏​​នៅ​តែ​មិន​ដឹង​​ថា​ឆ្លើយ​ដូច​ម្តេច​​ដែរ​»។ ​

លោក សុភ័គ ​ក៏​បាន​អំពាវនាវ​​បែប​ចំអក​​ទៅ​កាន់​​លោក ឆៃអ៊ាង ​​​ថា​ប្រសិន​បើ​លោក ឆៃអ៊ាង ​ដឹង​ថា​ តើ​នរណា​​នៅ​ពី​ក្រោយ​​​ឃាតកម្ម​នេះ​ត្រូវ​តែ​ជម្រាប​ទៅ​អាជ្ញាធរ​រដ្ឋាភិបាល​ផង​៕ PS

អត្ថបទគួរចាប់អារម្មណ៍