.jpg)
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ក្នុងពិធីទទួលជំនួយមនុស្សធម៌ពីសមាគមសភាពាណិជ្ជកម្មអាមេរិកនៅកម្ពុជា។ រូបថត សហការី
ភ្នំពេញ៖ សភាពាណិជ្ជកម្មអាមេរិកនៅកម្ពុជា និងក្រុមហ៊ុនឯកជន ព្រមទាំងម្ចាស់អាជីវកម្មអន្តរជាតិនៅកម្ពុជា បានកៀរគរគ្នាផ្តល់ជំនួយមនុស្សធម៌ដល់កម្ពុជាដែលជំហានដំបូងមានរថយន្ត FORD RANGER ចំនួន ២ គ្រឿង ព្រមទាំងឧបករណ៍ និងសម្ភារចាំបាច់ផ្សេងៗទៀតសម្រាប់បម្រើដល់ការចាក់វ៉ាក់សាំងកូវីដ ១៩។
លោកទេសរដ្ឋមន្ត្រី លី ធុជ អ្នកសម្របសម្រួលជាមួយតំណាងសមាគមសភាពាណិជ្ជកម្មអាមេរិកនៅកម្ពុជាបានឲ្យដឹងថា ក្រុមអ្នកជំនួញបរទេសដែលបានមកវិនិយោគនៅកម្ពុជា ចង់អរគុណដល់រាជរដ្ឋាភិបាលកម្ពុជាដែលបានខិតខំយ៉ាងយកចិត្តទុកដាក់ក្នុងកិច្ចការពារការរីករាលដាលជំងឺកូវីដ ១៩ ទើបពួកគេនាំគ្នាកៀរគរប្រាក់ ដើម្បីផ្តល់ជាជំនួយមនុស្សធម៌ជូនក្រសួងសុខាភិបាលនូវអ្វីដែលចាំបាច់ក្នុងការប្រើប្រាស់បម្រើដល់ការចាក់វ៉ាក់សាំងកូវីដ ១៩ ក្នុងពេលបច្ចុប្បន្ន។
លោកថ្លែងថា៖ «ក្នុងនាមពួកគេជាអ្នកនៅស្រុកខ្មែររស់នៅ ធ្វើការងារ និងរកស៊ីនៅស្រុកខ្មែរ ហើយស្រលាញ់ស្រុកខ្មែរ គេមានចិត្តចង់ចូលរួម ជួយដល់រដ្ឋាភិបាល ទើបកៀរគរគ្នាប្រមែប្រមូល ជួយបានជំហានដំបូង ដែលមានកុំព្យូទ័រយួដៃ ម៉ាស៊ីនព្រីន និងសម្ភារមួយចំនួនដែលចាំបាច់ដូចជាម៉ាស់ ទឹកអាល់កុលលាងដៃ និងរថយន្ត FORD RANGER ដែលនឹងមកដល់ឆាប់ៗនេះ»។
បើតាមលោក លី ធុជ ការផ្តល់ជំនួយមនុស្សធម៌ទាំងនេះ មិនមែនមានតែក្រុមហ៊ុនបរទេសធ្វើការនៅកម្ពុជានោះទេ ក៏មានក្រុមហ៊ុនឯកជនខ្មែរមួយចំនួនទៀត បានចូលរួមជួយផងដែរ ក្នុងនោះមានដូចជា សហព័ន្ធស្រូវអង្ករកម្ពុជាជាដើម។
លោកបញ្ជាក់ថា៖ «យើងអរគុណគេដែលមិនត្រឹមតែមកវិនិយោគនៅកម្ពុជា បង្កើតការងារឲ្យកូនខ្មែរបានធ្វើនោះទេ ថែមទាំងជួយគាំទ្រឲ្យមានកំណើនសេដ្ឋកិច្ច ព្រមទាំងចូលរួមដល់វិស័យមនុស្សធម៌នេះផងដែរ។ យ៉ាងណា នេះជាវគ្គដំបូងទេ ហើយនឹងមានប្រមែប្រមូលថែមជាបន្តបន្ទាប់ទៀត»។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា ថ្លែងថា ដោយមើលឃើញពីកិច្ចខំប្រឹងប្រែងរបស់រាជរដ្ឋាភិបាលកម្ពុជាក្នុងការទប់ស្កាត់ការរីករាលដាលនៃជំងឺកូវីដ ១៩ ក្រុមហ៊ុន អ អិម អេ សូមប្រគល់ជូននូវរថយន្តម៉ាក FORD RANGER ចំនួន ២ គ្រឿង ដែលកែច្នៃជារថយន្តដឹកវ៉ាក់សាំង ដល់ក្រសួងសុខាភិបាល ដើម្បីជាការចូលរួមចំណែកក្នុងការប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ និងយុទ្ធនាការណ៍ចាក់វ៉ាក់សាំង ការពារជំងឺកូវីដ ១៩ ជូនប្រជាពលរដ្ឋកម្ពុជាតាមអនុសាសន៍លោកនាយករដ្ឋមន្ត្រី ហ៊ុន សែន។
លោកបញ្ជាក់ថា៖ «រថយន្តទាំង ២ គ្រឿងនេះ នឹងមកដល់ប្រទេសកម្ពុជា មួយគ្រឿងនៅចុងខែមេសា និងមួយគ្រឿងទៀត នៅចុងខែមិថុនាខាងមុខនេះ។ ហេតុនេះ ខ្ញុំបាទសូមគោរពស្នើសុំគោលការណ៍អនុញ្ញាតពីក្រសួងសុខាភិបាល ដើម្បីឲ្យក្រុមហ៊ុនយើងខ្ញុំបាននាំចូលរថយន្តទាំងពីរគ្រឿងខាងលើដោយរួចពន្ធអាករ»។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានអរគុណដល់ក្រុមអ្នកវិនិយោគទុននៅកម្ពុជាទាំងអស់ទាំងជាតិ និងអន្តរជាតិ ដែលបានចាត់ចែងខ្នះខ្នែងប្រមែប្រមូលវត្ថុអំណោយមកប្រគល់ជូនដល់គណៈកម្មការចំពោះកិច្ចចាក់វ៉ាក់សាំងកូវីដ ១៩ ហើយវត្ថុទាំងអស់នេះ សុទ្ធតែជាសម្ភារៈចាំបាច់សម្រាប់ក្រុមការងារគ្រូពេទ្យដែលបានដំណើរការចាក់វ៉ាក់សាំងនៅតាមទីតាំងផ្សេងៗទូទាំងព្រះរាជាណាចក្រកម្ពុជា។
លោកស្រីបញ្ជាក់ថា៖ «ខ្ញុំជឿជាក់ថា រថយន្តទាំងពីរគ្រឿងនេះ នឹងរួមចំណែកបន្ថែមទៀតដល់កិច្ចការចាក់វ៉ាក់សាំងជូនបងប្អូនប្រជាពលរដ្ឋ ជាពិសេសបំពេញតម្រូវការក្នុងដំណើរទៅតាមខេត្ត។ តាមរយៈការចូលរួមនេះ គឺបានបង្ហាញច្បាស់ថា ក្រោមការដឹកនាំដ៏ត្រឹមត្រូវរបស់សម្តេចនាយករដ្ឋមន្ត្រី ហ៊ុន សែន គឺមិនថាតែប្រជាជនកម្ពុជាទេ គឺមានទាំងអ្នកវិនិយោគទុនទាំងខ្មែរទាំងបរទេស គឺគាត់បានរួមសាមគ្គីគ្នា ដើម្បីជួយជ្រោមជ្រែងទៅដល់ការឆ្លើយតបវិធានការ និងការអនុវត្តវិធានការឆ្លើយតបទៅនឹងជំងឺកូវីដ ១៩»៕
