The Phnom Penh Post Search

Search form




Logo of Phnom Penh Post newspaper Phnom Penh Post - សភា​អនុម័ត​​ច្បាប់​ទាក់​ទង​ការ​​បោះឆ្នោត​ដោយ​គ្មាន​ការ​ជជែក​​ក្នុង​អង្គ​ប្រ​ជុំ​

សភា​អនុម័ត​​ច្បាប់​ទាក់​ទង​ការ​​បោះឆ្នោត​ដោយ​គ្មាន​ការ​ជជែក​​ក្នុង​អង្គ​ប្រ​ជុំ​

កិច្ច​ប្រជុំ​សភា​ពេញ​អង្គ ដើម្បី​អនុម័ត​សេចក្តី​ព្រាង​ច្បាប់​ពាក់ព័ន្ធ​ការ​បោះ​ឆ្នោត កាល​ពី​ម្សិល​មិញ។
កិច្ច​ប្រជុំ​សភា​ពេញ​អង្គ ដើម្បី​អនុម័ត​សេចក្តី​ព្រាង​ច្បាប់​ពាក់ព័ន្ធ​ការ​បោះ​ឆ្នោត កាល​ពី​ម្សិល​មិញ។ រូប សហការី

សភា​អនុម័ត​​ច្បាប់​ទាក់​ទង​ការ​​បោះឆ្នោត​ដោយ​គ្មាន​ការ​ជជែក​​ក្នុង​អង្គ​ប្រ​ជុំ​

ភ្នំពេញៈ តំណាង​រាស្ត្រ​ពី​គណបក្ស​កាន់​អំណាច និង​គណបក្ស​ប្រឆាំង​កាលពី​ម្សិល​មិញ បាន​អនុម័ត​ច្បាប់​ទាក់ទង​នឹង​ការ​បោះ​ឆ្នោត​ដ៏​ចម្រូង​ចម្រាស ដោយ​គ្មាន​ការ​ជជែក​ពិភាក្សា​ក្នុង​អង្គ​ប្រជុំ​សភា​ទេ។

តំណាង​រាស្ត្រ​ពី​គណបក្ស​ទាំង​ពីរ​បាន​បោះឆ្នោត​ដើម្បី​អនុម័ត​វិសោធនកម្ម​ច្បាប់​បោះ​ឆ្នោត និង​ច្បាប់​ថ្មី​ដែល​គ្រប់​គ្រង​លើ​គណៈកម្មាធិការ​ជាតិ​រៀបចំ​ការ​បោះឆ្នោត (គជប) បើ​ទោះ​ជា​មាន​កិច្ច​ប្រឹង​ប្រែង​ចុង​ក្រោយ​ពី​អង្គការ​ក្រៅ​រដ្ឋាភិបាល​ស្នើ​ឲ្យ​លុប​ចោល​នូវ​បញ្ញតិ្ត​ដែល​រឹត​ត្បិត​ខ្លាំង​ក៏​ដោយ។

ច្បាប់​ទាំង​ពីរ​ត្រូវ​បាន​ព្រាង​ឡើង​ដោយ​ក្រុម​ការងារ​នៃ​គណបក្ស​ប្រជាជន​កម្ពុជា​និង​គណបក្ស​សង្គ្រោះ​ជាតិ អស់​ពេល​ច្រើន​ខែ​ដោយ​មាន​កិច្ច​ពិគ្រោះ​យោបល់​តិច​តួច បន្ទាប់​ពី​មាន​កិច្ច​ព្រម​ព្រៀង​នយោបាយ កាល​ពី ខែ​កក្កដា ឆ្នាំ​២០១៤។

ក្តី​កង្វល់​របស់​អង្គការ​មិនមែន​រដ្ឋាភិបាល​និង​អង្គការ​សិទិ្ធ​មនុស្ស​គឺ​ទាក់ទង​នឹង​ច្បាប់​បោះ​ឆ្នោត ដោយ​បាន​រិះគន់​បញ្ញតិ្ត​ដែល​នឹង​រឹតត្បិត​លើ​សកម្មភាព​របស់​អង្គការ​ក្រៅ​រដ្ឋាភិបាល​ក្នុង​ពេល​បោះឆ្នោត ហើយ​ដាក់​ពិន័យ​ធ្ងន់ធ្ងរ​លើ​អង្គការ​ដែល​ចាត់​ទុក​ថា បាន​ប្រមាថ​លើ​គណបក្ស​ឬ​អ្នក​នយោបាយ។

ចំណុច​ជា​កង្វល់​ដទៃ​ទៀត រួម​ទាំង​បញ្ញតិ្ត​ដែល​នឹង​អនុញ្ញាត ឲ្យ​គណបក្ស​បាត់បង់​លក្ខណ​សម្បតិ្ត ដោយសារ​បទ​ល្មើស​ដែល​ប្រព្រឹត្ត​ដោយ​សមាជិក ហើយ​ការ​ពិត​ដែល​ទាហាន និង​មន្ត្រី​តុលាការ ត្រូវ​បាន​អនុញ្ញាត​ឲ្យ​ធ្វើ​យុទ្ធនាការ។

តំណាង​រាស្ត្រ​ពី​គណបក្ស​សង្គ្រោះ​ជាតិ​ជាច្រើន​នាក់ ក្នុង​នោះ​មាន​លោក កឹម សុខា អនុ​ប្រធាន ដែល​កំពុង​នៅ​សហរដ្ឋ​អាមេរិក​មិន​បាន​ចូល​រួម​ក្នុង​សម័យ​ប្រជុំ​នេះ​ទេ។ តំណាង​រាស្ត្រ​គណបក្ស​ប្រជាជន​យ៉ាង​ហោច ៦​រូប បាន​អវត្តមាន​ដែរ។

ច្បាប់ គ.ជ.ប ត្រូវ​បាន​អនុម័ត​ដោយ​សំឡេង​ឯកច្ឆន្ទ​ក្នុង​សំឡេង ១០៣ ដែល​មាន​វត្តមាន​ក្នុង​សម័យ​ប្រជុំ​ពេល​ព្រឹក ហើយ​ច្បាប់​បោះ​ឆ្នោត ត្រូវ​បាន​អនុម័ត​ដោយ​សំឡេង ១០១ នៅ​ពេល​រសៀល​ម្សិល​មិញ។

លោក សម រង្ស៊ី ប្រធាន​គណបក្ស​សង្គ្រោះ​ជាតិ បាន​កោត​សរសើរ​ក្រុម​ការងារ​កំណែ​ទម្រង់​ការ​បោះ​ឆ្នោត ដែល​បាន​ព្រាង​ច្បាប់​នេះ​ក្នុង​ស្មារតី​យោគយល់ និង​សម្រុះ​សម្រួល។

លោក​ថ្លែង​ប្រាប់​អ្នក​យក​ព័ត៌មាន​ថា៖ «ខ្ញុំ​សង្ឃឹម​ថា តំណាង​រាស្ត្រ និង​ពលរដ្ឋ​ខ្មែរ​ទាំងអស់ ពិតជា​ទទួល​ស្គាល់​សមិទ្ធ​ផល​នៃ​ក្រុម​ការងារ»។

លោក សម រង្ស៊ី បន្ថែម​ថា ច្បាប់​មិន​ត្រូវ​ជជែក​ពិភាក្សា​ក្នុង​រដ្ឋសភា​ទេ ព្រោះ​គណបក្ស​បាន​សម្រេច​លើ​ពាក្យ​ពេចន៍​រួច​អស់​ហើយ មុន​សម័យ​ប្រជុំ។

នៅ​ពេល​សួរ​ថា តើ​ហេតុ​អ្វី​មាត្រា​ចម្រូង​ចម្រាស​មិន​ត្រូវ​ដក​ចេញ​តាម​ការ​ស្នើ​សុំ​របស់​អង្គការ​ក្រៅ​រដ្ឋាភិបាល? លោក សម រង្ស៊ី បាន​សង្កត់​ធ្ងន់​ថា លោក​មិន​ពេញ​ចិត្ត​ច្បាប់​នេះ ១០០ ភាគរយ​នោះ​ទេ ប៉ុន្តែ គណបក្ស​របស់​លោក​ត្រូវ​តែ​ធ្វើ​សម្បទាន។

លោក ហ៊ុន សែន មិន​បាន​ថ្លែង​ទៅ​កាន់​អ្នក​យក​ព័ត៌មាន​ទេ ប៉ុន្តែ​លោក​ឧប​នាយក​រដ្ឋ​មន្ត្រី ប៊ិន ឈិន ជា​ប្រធាន​ក្រុម​ការងារ​គណបក្ស​ប្រជាជន បាន​ថ្លែង​ថា ច្បាប់​នឹង​មាន​សារៈ​សំខាន់​ក្នុង​ការ​ធានា​ថា ការ​បោះ​ឆ្នោត​ខាង​មុខ​នឹង​រៀបចំ​ដោយ​មាន​ប្រសិទ្ធ​ភាព និង​តម្លាភាព។

ការ​អនុម័ត​ច្បាប់​នេះ​គឺជា​ចំណុច​បញ្ចប់​មួយ​នៃ​យុទ្ធនាការ​របស់​គណបក្ស​សង្គ្រោះ​ជាតិ​ក្នុង​ការ​ផ្លាស់​ប្តូរ​ប្រព័ន្ធ​បោះឆ្នោត បន្ទាប់ពី​មាន​វិវាទ​បោះ​ឆ្នោត​នា ឆ្នាំ​២០១៣ ដែល​គណបក្ស​ទាំង​ពីរ​ទទូច​ថា នឹង​ធានា​នូវ​ការ​បោះឆ្នោត​ដោយ​ភាព​សេរី និង​យុតិ្តធម៌ បើ​ទោះ​ជា​អ្នក​តាម​ដាន​អន្តរជាតិ​យល់​ផ្ទុយ​ក្តី។

ក្នុង​ពេល ២០ ខែ ចាប់​ពី​ការ​បោះ​ឆ្នោត យុទ្ធសាស្ត្រ​របស់​គណបក្ស​សង្គ្រោះ​ជាតិ បាន​ប្តូរ​ពី​ការ​បដិសេធ​លទ្ធផល​ការ​បោះ​ឆ្នោត ការ​ធ្វើ​ពហិការ​មិន​ចូល​រដ្ឋសភា និង​ការ​ធ្វើ​បាតុកម្ម​ដែល​អំពាវនាវ​ឲ្យ​លោក​នាយក​រដ្ឋ​មន្ត្រី ហ៊ុន សែន ចុះ​ចេញ មក​ចាប់​ដៃគូ​ធ្វើការ​ជាមួយ​គ្នា​នឹង​គណបក្ស​កាន់​អំណាច។

ប៉ុន្តែ បើ​ទោះ​ជា​មាន​វប្បធម៌​សន្ទនា​ក៏​ដោយ ក៏​លោក ហ៊ុន សែន បាន​ថ្លែង​វាយ​ប្រហារ​ជា​សាធារណៈ​មក​លើ​គណបក្ស​ប្រឆាំង ដែល​នាំ​ឲ្យ​មាន​ការ​ចោទ​ថា គណបក្ស​សង្គ្រោះ​ជាតិ​ទន់​ជ្រាយ​ក្នុង​ការ​ឆ្លើយ​តប។

ពីថ្ងៃ​ពុធ លោក ហ៊ុន សែន បាន​ជំរុញ​ឲ្យ​តុលាការ​ចាត់​វិធានការ​ប្រឆាំង​នឹង​លោក កឹម សុខា ព្រោះ​សំអាង​ថា គាត់​បាន​សារភាព​ក្នុង​សុន្ទរកថា នៅ​រដ្ឋ​កាលីហ្វ័រ​នីញ៉ា កាល​ពី​សប្តាហ៍​មុន​ថា លោក​បាន​ព្យាយាម​ផ្តួល​រលំ​រដ្ឋាភិបាល បន្ទាប់ពី​ការ​បោះ​ឆ្នោត ឆ្នាំ​២០១៣។

ក្នុង​ពេល​សម្រាក​ប្រជុំ​លោក ហ៊ុន សែន និង​លោក សម រង្ស៊ី បាន​ជួប​គ្នា​ជា​ឯកជន​ពិភាក្សា​ពី​ករណី​បន្ត​ឃុំ​ខ្លួន​សមាជិក​គណបក្ស​ប្រឆាំង​ចំនួន ៥ នាក់។

លោក សម រង្ស៊ី បដិសេធ​មិន​ធ្វើ​អត្ថាប្បាយ​អំពី​ការ​ជជែក​នោះ​ទេ ប៉ុន្តែ​លោក​នៅ​តែ​គាំទ្រ​វប្បធម៌​នៃ​ការ​សន្ទនា​រវាង​គណបក្ស​ទាំង​ពីរ ហើយ​សង្ឃឹម​ថា បញ្ហា​នយោបាយ​នឹង​អាច «ដោះស្រាយ​បាន​សមស្រប​និង​ទាន់​ពេល​វេលា»។

លោក​ថ្លែង​បន្ត​ថា៖ «ការ​សន្ទនា​មាន​ន័យ​ថា ជា​ការ​គោរព​គ្នា​ទៅ​វិញ​ទៅ​មក​និង​ជា​ការ​ដោះស្រាយ​បញ្ហា​ដោយ​មធ្យោបាយ​សន្តិវិធី។ នេះ​ជា​គោល​ការណ៍​ដែល​យើង​ត្រូវ​តែ​គោរព​យ៉ាង​ម៉ឺងម៉ាត់។ បើ​ទោះ​ជា​អាច​មាន​ស្ថានភាព​តានតឹង យើង​ត្រូវ​តែ​រក្សា​ស្មារតី​នេះ និង​វប្បធម៌​នៃ​ការ​សន្ទនា»។

អ្នក​វិភាគ​លោក អ៊ូ វីរៈ បាន​ថ្លែង​កាល​ម្សិល​មិញ​ថា ខណៈ​លោក ហ៊ុន សែន បាន​ជួប​បញ្ហា​ដោយ​សារ​មហា​ចលនា​បាតុកម្ម​ប្រឆាំង​រូប​លោក​កាល ឆ្នាំ​២០១៣ ឥឡូវ​នេះ​លោក​ទំនង​ជា​វិល​មក​រក​ស្ថានភាព​រឹងមាំ​លើ​អាសនៈ​របស់​លោក។

លោក​បន្ត​ថា៖ «គាត់​បាន​ត្រឡប់​មក​ស្ថានភាព​ដើម​របស់​គាត់​វិញ ទំនុក​ចិត្ត​វិញ ហើយ​គាត់​អាច​ធ្វើ​ឲ្យ​គណបក្ស​ប្រឆាំង​ស្ថិត​នៅ​ទីតាំង​ដែល​គាត់​ចង់​ឲ្យ​ស្ថិត​នៅ»។

លោក អ៊ូ វីរៈ បន្ត​ថា គណបក្ស​សង្គ្រោះ​ជាតិ ត្រូវ​បាន​ស្ថិត​នៅ​ក្នុង​យុទ្ធសាស្ត្រ​របស់​លោក ហ៊ុន សែន ចាប់​តាំង​ពី​ពួក​គេ​សន្យា​ចូល​ធ្វើ​ការ​ជាមួយ​គណបក្ស​ប្រជាជន​កម្ពុជា។

ប៉ុន្តែ លោក សឺន ស៊ូប៊ែរិ៍្ត អ្នក​សង្កេត​ការណ៍​នយោបាយ​ជើង​ចាស់​និង​ជាទី​ប្រឹក្សា​ព្រះ​មហាក្សត្រ​ថ្លែង​ថា ការ​ពិត​ដែល​បក្ស​ប្រឆាំង​និង​បក្ស​កាន់​អំណាច​បន្ត​ជជែក​គ្នា បើ​ទោះ​ជា​មាន​ការ​ផ្ទុះ​សម្តី​យូរៗ​ម្តង ពី​លោក ហ៊ុន សែន ក៏​នេះ​ជា​សញ្ញា​នៃ​ភាព​ចាស់​ទុំ​នយោបាយ​ប្រសើរ​ឡើង​របស់​កម្ពុជា។

លោក​ថ្លែង​ថា គណបក្ស​សង្គ្រោះ​ជាតិ ទំនង​ជា​កំពុង​យក​វិធីសាស្ត្រ​ស្ថានភាព​ជាក់​ស្តែង ដើម្បី​សម្រេច​ឲ្យ​មាន​ការ​ផ្លាស់​ប្តូរ​បន្តិច​ម្តង។

លោក​បន្ត​ថា៖ «នៅ​ពេល​អ្នក​ប្រយុទ្ធ​នឹង​គណបក្ស​នយោបាយ​ធំ​ដូចជា​គណបក្ស​ប្រជាជន​កម្ពុជា អ្នក​មិន​អាច​ទទួល​បាន​អ្វីៗ​ភ្លាម​ទេ»។

ខណៈ​លោក​យល់​អំពី​ការ​ខក​ចិត្ត​របស់​អ្នក​គាំទ្រ​គណបក្ស​ប្រឆាំង ដែល​ចង់​ឲ្យ​មាន​កំណែ​ទម្រង់​ខ្លាំង​ក្លា​តាម​រយៈ​សមត្ថភាព​របស់​គណបក្ស​នេះ​លោក​មិន​ជឿ​ថា ការ​ធ្វើ​បាតុកម្ម​តាម​ផ្លូវ​នឹង​នាំ​ឲ្យ​មាន​វឌ្ឍនភាព​និង​ប្រជា​ធិបតេយ្យ​ប្រសើរ​ឡើង​ទេ។

លោក​បន្ត​ថា៖ «នៅ​ពេល​អ្នក​ចង់​ឲ្យ​មាន​វឌ្ឍនភាព​នោះ អ្នក​ត្រូវ​តែ​បញ្ចុះ​បញ្ចូល​សត្រូវ​អ្នក​ឲ្យ​ឃើញ​អំពី​អត្ថ​ប្រយោជន៍​ប្រជាជន​និង​ប្រយោជន៍​ជាតិ​ជា​ធំ...មិន​មែន​គិត​តែ​ប្រឈម​ដាក់​គ្នា​ទេ»៕

អត្ថបទគួរចាប់អារម្មណ៍