ភ្នំពេញៈ សមត្ថកិច្ចបានបំពាក់កាមេរ៉ាចាប់ល្បឿនលើផ្លូវ ៦០ ម៉ែត្រក្នុងខណ្ឌមានជ័យ រាជធានីភ្នំពេញ បន្ទាប់ពីកំណត់ឱ្យអ្នកបើកបរប្រើល្បឿនក្នុងកម្រិតកុងទ័រ ៤០ គីឡូម៉ែត្រក្នុង ១ ម៉ោង ដើម្បីការពារគ្រោះថ្នាក់ដែលតែងតែកើតមានជាញឹកញាប់លើផ្លូវនេះធ្វើឱ្យមានមនុស្សរបួសធ្ងន់ និងស្លាប់ជាបន្តបន្ទាប់។
លោក ប៉ាល់ ចន្ទតារា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍ពីថ្ងៃទី ១១ តុលាថា ការកំណត់ល្បឿននេះគឺបន្ទាប់ពីមានការសិក្សារួមគ្នាជាមួយក្រសួង និងអគ្គស្នងការដ្ឋាននគរបាលជាតិរួមនឹងអាជ្ញាធរពាក់ព័ន្ធដទៃទៀត ដើម្បីបញ្ចៀសគ្រោះថ្នាក់ចរាចរណ៍ដែលតែងកើតជាញឹកញាប់ដោយសារតែល្បឿនលឿនលើផ្លូវ ៦០ ម៉ែត្រនេះ។
លោកបានបន្តថាល្បឿន ៤០ គីឡូម៉ែត្រក្នុង ១ ម៉ោងនេះកើតចេញពីការពិភាក្សាគ្នាដើម្បីធ្វើយ៉ាងណាឱ្យការបើកបរលើដងផ្លូវនេះមានសុវត្ថិភាពហើយបានកំណត់ជាធរមាន និងអនុវត្តចាប់ពីដើមខែតុលានេះមក។
លោកបញ្ជាក់ថា៖ «មូលហេតុអ្វីបានជាយើងដាក់ ៤០ គីឡូម៉ែត្រក្នុង ១ ម៉ោង ព្រោះតែផ្លូវនេះគ្រោះថ្នាក់ណាស់។ បើហ៊ានប៉ះ (បុកគ្នា) គឺគ្រោះថ្នាក់ដឹងតែធ្ងន់ៗហ្មងមានស្លាប់មានរបួសធ្ងន់ហ្មង ។ ឃើញថា គ្រោះថ្នាក់នេះច្រើននៅកន្លែងហ្នឹងឱ្យតែប៉ះ។ ដូច្នេះទើបយើងកំណត់ដាក់ ៤០ គីឡូម៉ែត្រក្នុង ១ ម៉ោង ហើយឱ្យមានប៉ូលិសចាប់ល្បឿន ចាប់អីនៅកន្លែងហ្នឹង»។
យ៉ាងណាក្ដីលោក ប៉ាល់ ចន្ទតារា បានអះអាងថា ដោយសារតែមានប្រតិកម្មពីសំណាក់ពលរដ្ឋ ដូចនេះអាជ្ញាធរមានសមត្ថភាពនឹងពិភាក្សាជាថ្មីក្នុងន័យកម្រិតល្បឿនជាក់លាក់ថា គួររក្សាដដែល ឬដំឡើងឱ្យក្នុងកម្រិតណាបន្ទាប់ពីសិក្សារួចរាល់។
លោក ឆាយ គីមខឿន អ្នកនាំពាក្យអគ្គស្នងការដ្ឋាននគរបាលជាតិបានលើកឡើងដែរថា ការកំណត់ល្បឿននេះគឺដើម្បីតែការពារអាយុជីវិតអ្នកធ្វើដំណើរប៉ុណ្ណោះ។ ដូច្នេះប្រសិនបើការកំណត់មិនបានល្អយ៉ាងណានោះ សមត្ថកិច្ចនឹងពិចារណាដើម្បីកែតម្រូវជាថ្មី។
លោកថា៖ «និយាយពីបច្ចេកទេសក្នុងការកំណត់ល្បឿនគឺត្រូវតែមានការពិភាក្សាគ្នាដោយមានការសិក្សាផ្នែកបច្ចេកទេស។ គ្រាន់តែចង់បញ្ជាក់ថា ការកំណត់នេះគឺដើម្បីកុំឱ្យមានគ្រោះថ្នាក់ចរាចរណ៍នេះឯង។ បើចង់បាន ៨០ ម៉ែត្រក្នុង ១ ម៉ោងពេលមានគ្រោះថ្នាក់អ្នកណាទទួលខុសត្រូវ»។
ចំណែកលោក ជីម សុភ័ក្ត អធិការរងទទួលផែនចរាចរណ៍ខណ្ឌមានជ័យ បានឱ្យភ្នំពេញប៉ុស្តិ៍ដឹងពីថ្ងៃទី ១១ តុលាថា ការចាប់ល្បឿនលើផ្លូវ ៦០ ម៉ែត្រធ្វើឡើងដោយមន្ត្រីនៃអគ្គស្នងការដ្ឋាននគរបាលដោយក្នុង ១ សប្តាហ៍មានការចុះចាប់ល្បឿនចន្លោះពី ៣ ថ្ងៃទៅ ៥ ថ្ងៃទៅតាមទីតាំងខុសៗគ្នា។
បើតាមលោក សុភ័ក្ត បន្ទាប់ពីមានការកំណត់ល្បឿនដូច្នេះ ឃើញថានៅដើមខែតុលានេះគឺមិនមានគ្រោះថ្នាក់ចរាចរណ៍លើផ្លូវ ៦០ ម៉ែត្រទេ ដែលខុសពីខែមុនៗមានគ្រោះថ្នាក់ច្រើនធ្វើឱ្យមានអ្នករបួសធ្ងន់ ឬរហូតដល់ស្លាប់។
លោកបញ្ជាក់ថា៖ «យើងសប្បាយចិត្តទាំងម៉ូតូ និងរថយន្តធ្វើដំណើរលើផ្លូវ ៦០ ម៉ែត្រហ្នឹងបានបន្ថយល្បឿន ហើយពួកគាត់ក៏បានគោរពច្បាប់ចរាចរណ៍ ជាពិសេសមធ្យោបាយឡានធំៗដឹកខ្សាច់។ ពេលមានកាមេរ៉ាយ៉ាងដូច្នេះពួកគាត់បានបន្ថយល្បឿនព្រោះខ្លាចសមត្ថកិច្ចយើងចាប់។ វាពិតជាកាត់បន្ថយគ្រោះថ្នាក់ចរាចរណ៍បានលើផ្លូវនេះ»។
លោក គង់ សុវណ្ណ ជាទីប្រឹក្សាជំនាញ និងជាអនុប្រធានក្រុមកម្មវិធីសុវត្ថិភាពចរាចរណ៍សហគមន៍នៃគម្រោងអភិវឌ្ឍន៍ផ្លូវជនបទជំហានទី ២ របស់ក្រសួងអភិវឌ្ឍន៍ជនបទ ជឿថា ការកំណត់ល្បឿននេះច្បាស់ណាស់ពិតជាមានការសិក្សាពីភាគីពាក់ព័ន្ធ ហើយន័យសំខាន់គឺកាត់បន្ថយគ្រោះថ្នាក់លើដងផ្លូវ។ បន្ថែមពីលើនេះលោកថាផ្លូវនេះគួរតែត្រូវបានកែលម្អបរិក្ខារសុវត្ថិភាពឱ្យបានល្អជាងនេះ ព្រោះលោកយល់ថា ផ្លូវនេះនៅមានការខ្វះខាតបរិក្ខារសុវត្ថិភាពច្រើន។
ក្នុងនាមអ្នកបច្ចេកទេសលោកយល់ថា៖ «នៅលើទំហំផ្លូវបែបនេះ ហើយបើមានបរិក្ខារសុវត្ថិភាពគ្រប់គ្រាន់ អ៊ីចឹងការបើកបរ វាគួរតែបាន ៦០ គីឡូម៉ែត្រឡើងហើយ។ តែថ្ងៃក្រោយទៅ យើងត្រូវមើលស្ថានភាពកន្លែងនេះ វាអាចប្រែប្រួលតាមកាលៈទេសៈ និងពេលវេលាទៀត ព្រោះកាលណាមានទីប្រជុំជនច្រើនមានសិស្សច្រើន តំបន់ហ្នឹងមានសាលារៀន និងមានការឆ្លងកាត់ខ្វែងខ្វាត់ អ៊ីចឹងគេមិនត្រឹមតែទម្លាក់មក ៤០ ទេគឺអាចដល់ក្រោម ៣០ គីឡូម៉ែត្រក្នុង ១ ម៉ោង»។
ក៏ប៉ុន្តែលោក គង់ សុវណ្ណ បានផ្ដល់ឧទាហរណ៍ថា ក្នុងករណីផ្លូវណាមួយកាន់តែមានសុវត្ថិភាពនោះសមត្ថកិច្ចនឹងអនុញ្ញាតឱ្យបើកបរក្នុងល្បឿនលឿនបាន។ ប៉ុន្តែបើផ្លូវមិនទាន់មានសុវត្ថិភាពល្អទេ ការបើកបរគឺត្រូវតែស្ថិតក្នុងល្បឿនដែលអាចគ្រប់គ្រងបាន៕