ភ្នំពេញ៖ សមត្ថកិច្ចកំពុងស្រាវជ្រាវតាមចាប់ខ្លួនក្រុមជនសង្ស័យជាអ្នករត់ម៉ូតូកង់បី ដែលបានបាញ់មនុស្ស ៣ នាក់ ក្នុងរឿងជម្លោះកកស្ទះចរាចរណ៍នៅមុខហាងលក់ទូរស័ព្ទយីហោពន្លកថ្មី ស្ថិតនៅតាមបណ្ដោយផ្លូវបេតុង ក្នុងបុរីប៊ុនហួរ ភូមិព្រៃព្រីងខាងត្បូង សង្កាត់ចោមចៅទី២ កាលពីយប់ថ្ងៃទី ១១ ខែកុម្ភៈ បណ្តាលឱ្យស្លាប់ ២ នាក់ ក្រោយបញ្ជូនទៅសង្គ្រោះនៅមន្ទីរពេទ្យ។
លោក ម៉ន វុធី អធិការនគរបាលខណ្ឌពោធិ៍សែនជ័យ បានឱ្យដឹងថា សមត្ថកិច្ចកំពុងដុតដៃដុតជើងធ្វើការស្រាវជ្រាវស្វែងរកចាប់ខ្លួនជនសង្ស័យមកផ្តន្ទាទោសតាមច្បាប់។ លោកថ្លែងថា៖ «យើងកំពុងតាមស្រាវជ្រាវ ទាំងក្រសួង ទាំងក្រុង។ ដោយសារតែស្ថិតក្នុងការស្រាវជ្រាវ អ៊ីចឹងខ្ញុំមិនអាចបញ្ជាក់អ្វីច្រើនលើសពីនេះទៀតបានទេ»។
លោក ជា សុវណ្ណ អធិការរងទទួលបន្ទុកព្រហ្មទណ្ឌខណ្ឌពោធិ៍សែនជ័យ បានឱ្យដឹងថា នៅយប់ថ្ងៃទី ១១ ខែកុម្ភៈ ជនសង្ស័យជាខ្មាន់កាំភ្លើង បានបាញ់ទៅលើមនុស្ស ៣ នាក់ បណ្តាលឱ្យស្លាប់ ២ នាក់ក្រោយបញ្ជូនទៅសង្គ្រោះនៅមន្ទីរពេទ្យព្រះកុសុមៈ និងម្នាក់ទៀតរបួសធ្ងន់ កំពុងសម្រាកព្យាបាលនៅមន្ទីរពេទ្យរុស្ស៊ី។
លោក ជា សុវណ្ណ ប្រាប់ថា រឿងរ៉ាវរហូតឈានដល់ការបាញ់សម្លាប់គ្នានេះ កើតឡើងដំបូងដោយសារតែរឿងស្ទះចរាចរណ៍ ហើយបានកើតជាជម្លោះពាក្យសម្តីរហូតដល់មានការវាយគ្នាដល់ទៅ ២ លើក។ ភាគីខាងម្ចាស់កង់បីចង់ឱ្យភាគីខាងរថយន្តសុំ-ទោស ប៉ុន្តែភាគីខាងម្ចាស់រថយន្តមិនព្រមសុំទោស ទើបបណ្តាលឱ្យឈ្លោះគ្នាកាន់តែខ្លាំង។
លោកថ្លែងថា៖ «រឿងហ្នឹងកើតឡើងដោយសារតែការស្ទះផ្លូវ ឡានឈប់លើផ្លូវ ម៉ូតូកង់បីមកដល់អត់មានផ្លូវទៅ ក៏ទាស់-សម្តីគ្នាវាយគ្នា។ ពួកគេវាយគ្នាមួយសាហើយ ហើយខាងកង់បីអត់ព្រមចេញទៅណាដោយចង់ឱ្យខាងម្ចាស់ឡានសុំទោស។ ម្ចាស់ឡានមិនសុំទោស ទើបម្ចាស់កង់បីតេហៅគ្នា ពេលមកដល់វាយគ្នាម្តងទៀត ម្ចាស់កង់ ៣ បានស្ទុះទៅយកកាំភ្លើងពីបក្ខពួក ហើយបាញ់សំដៅភាគីខាងម្ចាស់ឡានតែម្តង»។
បើតាមលោក ជា សុវណ្ណ ភាគីខាងម៉ូតូកង់ ៣ បានចូលទៅរករឿង ភាគីខាងរថយន្តដែលកំពុងតែផឹកស៊ីនៅក្នុងផ្ទះ។ ដោយសារតែមានសភាពស្រវឹង ទាំងសងខាងទើបម្នាក់ៗចង់ឈ្នះរៀងៗខ្លួន ទើបបណ្តាលឱ្យកើតជារឿងឈ្លោះគ្នាបែបនេះ។
លោក ចាន់ ពន្លក សាក្សីម្នាក់ដែលនៅក្បែរកន្លែងកើតហេតុបានអះអាងថា មុនដំបូងគេឃើញម្ចាស់រថយន្តបានបើក រថយន្តមកឈប់ចតនៅមុខផ្ទះរបស់គាត់ ដើម្បីដាក់កូនចុះនៅក្បែរកន្លែងកើតហេតុ។ ភ្លាមនោះមានបុរសម្នាក់ បើកម៉ូតូកង់ ៣ មកពីក្រោយ រួចស៊ីផ្លេដាក់រថយន្តឱ្យអែប ខណ:ផ្លូវកំពុងមានការកកស្ទះ រួចក៏មានជម្លោះពាក្យសម្ដីដាក់គ្នា។ បន្ទាប់មកអ្នករត់ម៉ូតូកង់ ៣ មិនបានចេញទៅណាទេ និងបានទូរស័ព្ទហៅបក្ខពួកមកជួយ ហើយក្រោយមកក៏ឈ្លោះគ្នារហូត ដល់មានការបាញ់បោះតែម្តង។
លោកថ្លែងថា៖ «ម្ចាស់ឡានគាត់ឈប់ដាក់កូនគាត់ឱ្យចូលផ្ទះ ហើយពេលហ្នឹងផាសអាប់មកដល់ ដោយសារស្ទះផ្លូវ ហើយឡានឈប់បញ្ច្រាសទិសគ្នា ក៏ស្រែកដាក់គ្នា សម្តីធ្ងន់តិចតួចដាក់គ្នាទៅ កើតជាជម្លោះវាយតប់គ្នាអ៊ីចឹងទៅ។ ដល់ពេលឃើញហេតុការណ៍អ៊ីចឹងអ្នកហូបចុកនៅក្បែរនោះ ក៏ចូលទៅសម្រួល ទើបបណ្តាលឱ្យរងគ្រោះតែម្តង»។
របាយការណ៍សមត្ថកិច្ចបានបញ្ជាក់ថា ជនរងគ្រោះទាំង ៣ នាក់ ទី១ ឈ្មោះ សៀក លឹម អាយុ ២៥ ឆ្នាំ នៅលីវ មុខរបរជាអ្នកលក់ខោអាវ នៅភូមិព្រៃព្រីងខាងត្បូង (ស្លាប់នៅពេទ្យព្រះកុសុមៈ) ទី២ ឈ្មោះ សុខ ស៊ីដេត អាយុ ៤១ ឆ្នាំ មុខរបរលក់ទូស័ព្ទ ស្នាក់នៅកន្លែងកើតហេតុ (ស្លាប់នៅពេទ្យព្រះកុសុមៈ) និងទី៣ ឈ្មោះ បូរ រ៉ាភី អាយុ ៤៦ ឆ្នាំ រងរបួសក្បាលធ្ងន់ធ្ងរ គិតមកដល់ថ្ងៃម្សិលមិញនៅកំពុងសម្រាកព្យាបាលនៅមន្ទីរពេទ្យរុស្ស៊ី៕
វីដេអូ៖