កំពង់ឆ្នាំងៈ សមត្ថកិច្ចកំពុងតាមស្វែងរកចាប់ខ្លួនជនសង្ស័យ ដែលជាគូកំណាន់ បន្ទាប់ពីបានអារកសម្លាប់ស្ត្រីមេម៉ាយកូន ៣ ម្នាក់នៅភូមិស្រែអ៊ុក ឃុំតាំងក្រសាំង ស្រុកទឹកផុស កាលពីថ្ងៃទី ២៥ ខែមករា។
អធិការនគរបាលស្រុកទឹកផុសលោក ខែម វិបុល ប្រាប់ ភ្នំពេញ ប៉ុស្តិ៍ នៅថ្ងៃអង្គារថា កាលពីវេលាម៉ោង ១ រំលងអធ្រាត្រឈានចូលថ្ងៃទី ២៥ ខែមករា មានឃាតកម្មមួយកើតឡើងនៅភូមិស្រែអ៊ុក ដោយមានជនរងគ្រោះឈ្មោះ អឿន រ៉េន អាយុ ៣៣ ឆ្នាំ ជាស្ត្រីមេម៉ាយមានកូនប្រុស-ស្រី ៣ នាក់ក្នុងបន្ទុក។ «នាងត្រូវបានគេអារកសម្លាប់»។
បើតាមលោក វិបុល នៅក្បែរសាកសពរបស់ស្ត្រីរងគ្រោះសមត្ថកិច្ចបានរកឃើញស្រោមកាំបិតពណ៌ខ្មៅមួយដែលមានប្រឡាក់ឈាម ចំណែកផ្លែកាំបិតទំនងជាឃាតករបាននាំយកទៅក្រោយសម្លាប់ស្ត្រីរងគ្រោះ។ ក្រោយពិនិត្យអង្កេតនៅកន្លែងកើតហេតុ និងការរៀបរាប់របស់កុមារីឈ្មោះ ង៉ែត ណែត អាយុ ១១ ឆ្នាំដែលជាកូនច្បងរបស់ស្ត្រីរងគ្រោះសមត្ថកិច្ចបានកំណត់មុខសញ្ញាជនសង្ស័យជាឃាតកររួចរាល់ហើយ និងកំពុងតាមស្វែងរកចាប់ខ្លួន។ «បុរសជាឃាតករ គឺជាប្រុសស្នេហ៍របស់ស្ត្រីរងគ្រោះ ព្រោះពួកគេបានលួចលាក់ស្នេហាជាមួយគ្នារហូតដល់មានកូនប្រុស ១ [កូនទី៣] ដែលពេលនេះមានអាយុជាង ១ ខួប។ នៅពេលនេះសមត្ថកិច្ចយើងកំពុងតាមស្វែងរកចាប់ខ្លួន»។
បើតាមឪពុកស្ត្រីរងគ្រោះលោក អឿន រឿន អាយុ ៥៥ ឆ្នាំ ប្រាប់ ភ្នំពេញ ប៉ុស្តិ៍ ថា បុរសដែលលួចទាក់ទងស្នេហាជាមួយកូនស្រីរបស់លោកឈ្មោះ ម៉ី ម៉ាប់ អាយុ ៣៥ ឆ្នាំ មានទីលំនៅក្នុងភូមិស្រែអ៊ុកជាមួយគ្នា។ បុរសនោះមានប្រពន្ធកូនរួចហើយ។
ចំណែកប្ដីដើមរបស់កូនស្រីលោក ឈ្មោះ ញឹម បានលែងលះគ្នាច្រើនឆ្នាំមកហើយ បន្ទាប់ពីពួកគេបានរួមរស់ជាមួយគ្នាបានកូន ២ នាក់ (ប្រុស ១ ស្រី ១)។
លោកបន្តថា នៅយប់ថ្ងៃកើតហេតុចៅស្រីរបស់លោកបាននាំប្អូនទៅផ្ទះរបស់លោកទាំងយប់ ហើយស្រែកយំប្រាប់ថា «តា! ពូម៉ាប់ចាប់អារកម៉ែខ្ញុំស្លាប់ហើយ»។ ក្រោយពេលឮដូច្នោះលោកបានរត់ទៅផ្ទះកូនស្រីភ្លាម ដែលនៅប្រមាណ ១០០ ម៉ែត្រពីផ្ទះរបស់លោក ហើយក៏ឃើញកូនស្រីរបស់លោកស្លាប់។ ចំណែកបុរសជាឃាតករបានរត់គេចខ្លួនបាត់។ «ខ្ញុំពិតជារន្ធត់ចិត្តណាស់នៅពេលឃើញកូនស្រីត្រូវបានគេសម្លាប់យ៉ាងព្រៃផ្សៃ។ បន្ទាប់មកខ្ញុំក៏រត់ទៅប្ដឹងអាជ្ញាធរភូមិ-ឃុំឱ្យជួយអន្តរាគមន៍តាមចាប់ [អា] ម៉ាប់ មកផ្ដន្ទាទោស ដើម្បីផ្ដល់ភាពយុត្តិធម៌ឱ្យកូនស្រីរបស់ខ្ញុំវិញ» ៕