ព្រះសីហនុ: សមត្ថកិច្ចខេត្តព្រះសីហនុកាលពីម្សិលមិញ បានកំណត់អត្តសញ្ញាណរួចហើយ ជនសង្ស័យដែលបានរំលោភ ហើយសម្លាប់ក្មេងស្រីអាយុ ១០ ឆ្នាំម្នាក់ និងបានឈានទៅសម្លាប់ប្អូនប្រុសនាងអាយុជាង ២ ឆ្នាំម្នាក់ទៀត ខណៈក្មេងប្រុសបានឃើញសកម្មភាពរំលោភរបស់ខ្លួន កាលពីល្ងាចថ្ងៃទី ២៩ ខែ ឧសភា នៅភូមិគគីរ ឃុំបិតត្រាង ស្រុកព្រៃនប់។
លោក កុល ផាលី ស្នងការរងខេត្តព្រះសីហនុ ទទួលផែនព្រហ្មទណ្ឌបានប្រាប់ភ្នំពេញប៉ុស្ដិ៍ កាលពីម្សិលមិញថា ខណៈនេះសមត្ថកិច្ចជំនាញខេត្តព្រះសីហនុ និងនគរបាលស្រុកព្រៃនប់ បានសហការគ្នាឈានទៅកំណត់អត្ដសញ្ញាណជនសង្ស័យបានហើយដោយកំពុងស្រាវជ្រាវរកកន្លែងលាក់ខ្លួនរបស់ជនល្មើស។
លោកបញ្ជាក់ថា៖ «យើងកំណត់អត្តសញ្ញណបានហើយកំពុងតាមចាប់ខ្លួន។ ឥឡូវនេះគឺខ្ញុំមិនទាន់អាចប្រាប់ពីនីតិវិធីរបស់សមត្ថកិច្ចយើងបានទេ ព្រោះយើងកំពុងធ្វើការងារនេះ»។
លោក ហួ យ៉ៃ អធិការ ស្រុកព្រៃនប់ថ្លែងថា សមត្ថកិច្ចកំពុងតាមចាប់ខ្លួនជនល្មើសប៉ុន្ដែលោកសុំមិនបញ្ចេញអត្ដសញ្ញាណជនសង្ស័យនោះទេ។ «សុំទោសផងខ្ញុំអត់ទាន់អាចប្រាប់អ្វីច្រើនជាងនេះទេ ព្រោះយើងកំពុងធ្វើការលើរឿងនេះ»។
តាមរបាយការណ៍របស់អធិការដ្ឋាននគរបាលស្រុកព្រៃនប់ បានឲ្យដឹងពីម្សិលមិញថា ការស្លាប់របស់ក្មេងស្រី និងក្មេងប្រុសទាំង ២ នាក់នេះ គឺជាករណីរំលោភសម្លាប់ បង្កឡើងដោយជនល្មើសមិនទាន់ស្គាល់អត្តសញ្ញាណ។
ការសន្និដ្ឋានដំបូងសង្ស័យថា ជនល្មើស អាចធ្វើសកម្មភាពចាប់រំលោភកុមារី ផ.ល ដែលមានអាយុទើបតែ ១០ ឆ្នាំ បន្ទាប់មកធ្វើសកម្មភាពសម្លាប់ទាំងប្អូនប្រុសរបស់នាងទៀតដែលមាន អាយុទើបតែ ២ ឆ្នាំកន្លះ ដែលកំពុងដេកនៅក្នុងផ្ទះជាមួយគ្នា។ របាយការណ៍បន្តថា ក្មេងប្រុសជាប្អូនបានស្លាប់ភ្លាមៗនៅក្នុងផ្ទះ ខណៈក្មេងស្រីជាបងត្រូវបានក្រុមគ្រួសារព្យាយាមដឹកទៅសង្គ្រោះរហូតដល់មន្ទីរពេទ្យនៅរាជធានីភ្នំពេញ ប៉ុន្ដែបានស្លាប់នៅលើរថយន្តនៅតាមផ្លូវ នៅវេលាម៉ោង ៨ យប់ថ្ងៃដដែលនោះ។
ទោះយ៉ាងណាមន្ត្រីនគរបាលប៉ុស្ដិ៍រដ្ឋបាលឃុំបិតត្រាងម្នាក់ សុំមិនបញ្ចេញឈ្មោះថ្លែងថា មុនពេលកើតហេតុ ឪពុកម្ដាយក្មេងរងគ្រោះដែលជាកម្មករសំណង់ តែងតែយកកូនទាំង ២ នាក់ ទៅកន្លែងធ្វើការជាមួយ តែនៅថ្ងៃកើតហេតុ ឪពុកម្ដាយ មិនបានយកកូនទាំង ២ នាក់ ទៅជាមួយទេដោយទុកកូនចោលនៅផ្ទះ ២ នាក់បងប្អូន ក៏មានជនមិនស្គាល់មុខលួចចូលមករំលោភសម្លាប់កូនទាំង ២ នាក់យ៉ាងសាហាវព្រៃផ្សៃបែបនេះ។
លោកបន្តថា៖ «ខ្ញុំមិនទាន់ដឹងច្បាស់ទេ សមត្ថកិច្ចយើង កំពុងធ្វើការលើរឿងនេះ តែគេបានសង្ស័យថា ជនល្មើសអាចធ្វើសកម្មភាពចាប់រំលោភកុមារីអាយុ ១០ ឆ្នាំ បន្ទាប់មកធ្វើសកម្មភាពសម្លាប់ ព្រោះតែខ្លាចបែកការ ហើយជនល្មើសក៏សម្លាប់កុមារាជាប្អូនអាយុ ២ ឆ្នាំកន្លះដែលកំពុងដេកនៅក្នុងផ្ទះជាមួយគ្នាដែរ»។
លោកស្រី សោម វឌ្ឍនា ប្រធានផ្នែកផ្តល់សេវាកម្មគាំពារកុមារទូទាំងប្រទេសនៃអង្គភាពការពារកុមារ (Child Protection Unit) ថ្លែងថា ក្រោយពីទទួលបានព័ត៌មានពីសមត្ថកិច្ចភ្លាម លោកស្រី និងក្រុមការងារបានចុះទៅដល់ទីតាំងកើតហេតុហើយឃើញសមត្ថកិច្ចកំពុងធ្វើកោសល្យវិច័យ លើកន្លែងកើតហេតុ និងពិនិត្យលើទីតាំងប្រព្រឹត្ត ដើម្បីប្រមូលភ័ស្ដុតាងឈានទៅឃាត់ខ្លួនជនសង្ស័យ។
លោកស្រីបញ្ជាក់ថា៖ «ឥឡូវនេះ ខ្ញុំអត់ទាន់មានព័ត៌មានអ្វីរាយការណ៍នៅឡើយ ព្រោះយើងកំពុងធ្វើការងារនេះ មិនទាន់ចប់ ដោយសុំរង់ចាំយើងស៊ើបអង្កេតចប់សិន»។
តាមគេហទំព័រហ្វេសប៊ុក អង្គភាពការពារកុមារ (Child Protection Unit) បានចេញផ្សាយកាលពីម្សិលមិញថា វាជាទង្វើឃោរឃៅ និងព្រៃផ្សៃហួសពីការថ្លែងដែលធ្វើឲ្យមានការភ្ញាក់ផ្អើលបំផុត ចំពោះអ្នកស៊ើបអង្កេតឃាតកម្មរបស់អង្គភាពការពារកុមារ។ «យើងនឹងប្រើប្រាស់រាល់ធនធាន និងវិធីសាស្ត្រទាំងអស់ ដែលយើងមានដើម្បីតាមរកជនបង្កហេតុក្នុងឧក្រិដ្ឋកម្ម នេះ ដើម្បីនាំឃាតករទៅដាក់ទោសតាមផ្លូវច្បាប់ឲ្យទាល់តែបាន»។
ជាមួយគ្នានេះលោកស្រី ហៀក ហ៊ីមុល្លី អភិបាលរងខេត្តព្រះសីហនុ បានថ្លែងក្នុងកិច្ចប្រជុំឈ្វេងយល់លើកកម្ពស់បង្ការទប់ស្កាត់ ឆ្លើយតប និងការរំលោភបំពានកេងប្រវ័ញ្ចផ្លូវភេទលើកុមារ នៅថ្ងៃទី ២៩ ខែ ឧសភា ថា ដោយសារបច្ចុប្បន្នខេត្តព្រះសីហនុមានការអភិវឌ្ឍលឿនយ៉ាងគំហុកដែលទាមទារឲ្យអាជ្ញាធរធ្វើផែនការ និងសកម្មភាពនៅតាមចំណុចគោលដៅទេសចរណ៍។
លោកស្រីបានបញ្ជាក់ថា៖ «ប្រសិនបើយើងមិនមានវិធានការទប់ស្កាត់ បង្ការបង្ក្រាបបានទាន់ពេលវេលានោះទេការរំលោភបំពាន និងអំពើកេងប្រវ័ញផ្លូវភេទលើកុមារនឹងកើតមានឡើងជាក់ជាមិនខាន។ ដូច្នេះសមត្ថកិច្ចគ្រប់ផ្នែក ត្រូវយកចិត្តទុកដាក់តាមដានត្រួតពិនិត្យរាល់សកម្មភាពធ្វើយ៉ាងណាកាត់បន្ថយការរំលោភបំពានកេងប្រវ័ញ្ចផ្លូវភេទលើកុមារឲ្យខានតែបាន»៕